| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
3. ஏரகத்தே²ரகா³தா²வண்ணனா
3. Erakattheragāthāvaṇṇanā
து³க்கா² காமா ஏரகாதி ஆயஸ்மதோ ஏரகத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதங் பத்தோ ஏகதி³வஸங் ஸத்தா²ரங் தி³ஸ்வா பஸன்னமானஸோ ஸத்து² கிஞ்சி தா³தப்³ப³யுத்தகங் அலப⁴ந்தோ ‘‘ஹந்தா³ஹங் காயஸாரங் புஞ்ஞங் கரிஸ்ஸாமீ’’தி ஸத்து² க³மனமக்³க³ங் ஸோதெ⁴த்வா ஸமங் அகாஸி. ஸத்தா² தேன ததா²கதங் மக்³க³ங் படிபஜ்ஜி . ஸோ தத்த² ப⁴க³வந்தங் தி³ஸ்வா பஸன்னமானஸோ வந்தி³த்வா அஞ்ஜலிங் பக்³க³ய்ஹ பஸன்னசித்தோ யாவ த³ஸ்ஸனுபசாரஸமதிக்கமா பு³த்³தா⁴ரம்மணங் பீதிங் அவிஜஹந்தோ அட்டா²ஸி. ஸோ தேன புஞ்ஞகம்மேன தே³வலோகே நிப்³ப³த்தோ அபராபரங் புஞ்ஞானி கத்வா ஸுக³தீஸுயேவ ஸங்ஸரந்தோ இமஸ்மிங் பு³த்³து⁴ப்பாதே³ ஸாவத்தி²யங் ஸம்பா⁴வனீயஸ்ஸ குடும்பி³யஸ்ஸ புத்தோ ஹுத்வா நிப்³ப³த்தி, ஏரகோதிஸ்ஸ நாமங் அஹோஸி அபி⁴ரூபோ த³ஸ்ஸனீயோ பாஸாதி³கோ இதிகத்தப்³ப³தாஸு பரமேன வெய்யத்தியேன ஸமன்னாக³தோ. தஸ்ஸ மாதாபிதரோ குலேன ரூபேன ஆசாரேன வயேன கோஸல்லேன ச அனுச்ச²விகங் தா³ரிகங் ஆனெத்வா விவாஹகம்மங் அகங்ஸு . ஸோ தாய ஸத்³தி⁴ங் ஸங்வாஸேன கே³ஹே வஸந்தோ பச்சி²மப⁴விகத்தா கேனசிதே³வ ஸங்வேக³வத்து²னா ஸங்ஸாரே ஸங்விக்³க³மானஸோ ஸத்து² ஸந்திகங் க³ந்த்வா த⁴ம்மங் ஸுத்வா படிலத்³த⁴ஸத்³தோ⁴ பப்³ப³ஜி, தஸ்ஸ ஸத்தா² கம்மட்டா²னங் அதா³ஸி. ஸோ கம்மட்டா²னங் க³ஹெத்வா கதிபயதி³வஸாதிக்கமேன உக்கண்டா²பி⁴பூ⁴தோ விஹாஸி. அத² ஸத்தா² தஸ்ஸ சித்தப்பவத்திங் ஞத்வா ஓவாத³வஸேன ‘‘து³க்கா² காமா ஏரகா’’தி கா³த²ங் அபா⁴ஸி. ஸோ தங் ஸுத்வா ‘‘அயுத்தங் மயா கதங், யோஹங் ஏவரூபஸ்ஸ ஸத்து² ஸந்திகே கம்மட்டா²னங் க³ஹெத்வா தங் விஸ்ஸஜ்ஜெந்தோ மிச்சா²விதக்கப³ஹுலோ விஹாஸி’’ந்தி ஸங்வேக³ஜாதோ விபஸ்ஸனாய யுத்தப்பயுத்தோ நசிரஸ்ஸேவ அரஹத்தங் பாபுணி. தேன வுத்தங் அபதா³னே (அப॰ தே²ர 1.15.32-36) –
Dukkhā kāmā erakāti āyasmato erakattherassa gāthā. Kā uppatti? Ayampi purimabuddhesu katādhikāro tattha tattha bhave puññāni upacinanto siddhatthassa bhagavato kāle kulagehe nibbattitvā viññutaṃ patto ekadivasaṃ satthāraṃ disvā pasannamānaso satthu kiñci dātabbayuttakaṃ alabhanto ‘‘handāhaṃ kāyasāraṃ puññaṃ karissāmī’’ti satthu gamanamaggaṃ sodhetvā samaṃ akāsi. Satthā tena tathākataṃ maggaṃ paṭipajji . So tattha bhagavantaṃ disvā pasannamānaso vanditvā añjaliṃ paggayha pasannacitto yāva dassanupacārasamatikkamā buddhārammaṇaṃ pītiṃ avijahanto aṭṭhāsi. So tena puññakammena devaloke nibbatto aparāparaṃ puññāni katvā sugatīsuyeva saṃsaranto imasmiṃ buddhuppāde sāvatthiyaṃ sambhāvanīyassa kuṭumbiyassa putto hutvā nibbatti, erakotissa nāmaṃ ahosi abhirūpo dassanīyo pāsādiko itikattabbatāsu paramena veyyattiyena samannāgato. Tassa mātāpitaro kulena rūpena ācārena vayena kosallena ca anucchavikaṃ dārikaṃ ānetvā vivāhakammaṃ akaṃsu . So tāya saddhiṃ saṃvāsena gehe vasanto pacchimabhavikattā kenacideva saṃvegavatthunā saṃsāre saṃviggamānaso satthu santikaṃ gantvā dhammaṃ sutvā paṭiladdhasaddho pabbaji, tassa satthā kammaṭṭhānaṃ adāsi. So kammaṭṭhānaṃ gahetvā katipayadivasātikkamena ukkaṇṭhābhibhūto vihāsi. Atha satthā tassa cittappavattiṃ ñatvā ovādavasena ‘‘dukkhā kāmā erakā’’ti gāthaṃ abhāsi. So taṃ sutvā ‘‘ayuttaṃ mayā kataṃ, yohaṃ evarūpassa satthu santike kammaṭṭhānaṃ gahetvā taṃ vissajjento micchāvitakkabahulo vihāsi’’nti saṃvegajāto vipassanāya yuttappayutto nacirasseva arahattaṃ pāpuṇi. Tena vuttaṃ apadāne (apa. thera 1.15.32-36) –
‘‘உத்தரித்வான நதி³கங், வனங் க³ச்ச²தி சக்கு²மா;
‘‘Uttaritvāna nadikaṃ, vanaṃ gacchati cakkhumā;
தமத்³த³ஸாஸிங் ஸம்பு³த்³த⁴ங், ஸித்³த⁴த்த²ங் வரலக்க²ணங்.
Tamaddasāsiṃ sambuddhaṃ, siddhatthaṃ varalakkhaṇaṃ.
‘‘குதா³லபிடகமாதா³ய , ஸமங் கத்வான தங் பத²ங்;
‘‘Kudālapiṭakamādāya , samaṃ katvāna taṃ pathaṃ;
ஸத்தா²ரங் அபி⁴வாதெ³த்வா, ஸகங் சித்தங் பஸாத³யிங்.
Satthāraṃ abhivādetvā, sakaṃ cittaṃ pasādayiṃ.
‘‘சதுன்னவுதிதோ கப்பே, யங் கம்மமகரிங் ததா³;
‘‘Catunnavutito kappe, yaṃ kammamakariṃ tadā;
து³க்³க³திங் நாபி⁴ஜானாமி, மக்³க³தா³னஸ்ஸித³ங் ப²லங்.
Duggatiṃ nābhijānāmi, maggadānassidaṃ phalaṃ.
‘‘ஸத்தபஞ்ஞாஸகப்பம்ஹி, ஏகோ ஆஸிங் ஜனாதி⁴போ;
‘‘Sattapaññāsakappamhi, eko āsiṃ janādhipo;
நாமேன ஸுப்பபு³த்³தோ⁴தி, நாயகோ ஸோ நரிஸ்ஸரோ.
Nāmena suppabuddhoti, nāyako so narissaro.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
அரஹா பன ஹுத்வா அஞ்ஞங் ப்³யாகரொந்தோ –
Arahā pana hutvā aññaṃ byākaronto –
93.
93.
‘‘து³க்கா² காமா ஏரக, ந ஸுகா² காமா ஏரக;
‘‘Dukkhā kāmā eraka, na sukhā kāmā eraka;
யோ காமே காமயதி, து³க்க²ங் ஸோ காமயதி ஏரக;
Yo kāme kāmayati, dukkhaṃ so kāmayati eraka;
யோ காமே ந காமயதி, து³க்க²ங் ஸோ ந காமயதி ஏரகா’’தி. –
Yo kāme na kāmayati, dukkhaṃ so na kāmayati erakā’’ti. –
தமேவ ப⁴க³வதா வுத்தகா³த²ங் பச்சுதா³ஹாஸி.
Tameva bhagavatā vuttagāthaṃ paccudāhāsi.
தத்த² து³க்கா² காமாதி இமே வத்து²காமகிலேஸகாமா து³க்க²வத்து²தாய விபரிணாமது³க்க²ஸங்ஸாரது³க்க²ஸபா⁴வதோ ச, து³க்கா² து³க்க²மா து³க்க²னிப்³ப³த்திகா. வுத்தஞ்ஹேதங் – ‘‘அப்பஸ்ஸாதா³ காமா ப³ஹுது³க்கா² ப³ஹுபாயாஸா, ஆதீ³னவோ எத்த² பி⁴ய்யோ’’திஆதி³ (பாசி॰ 417; ம॰ நி॰ 1.234). ஏரகாதி பட²மங் தாவ ப⁴க³வா தங் ஆலபதி, பச்சா² பன தே²ரோ அத்தானங் நாமேன கதே²ஸி. ந ஸுகா² காமாதி காமா நாமேதே ஜானந்தஸ்ஸ ஸுகா² ந ஹொந்தி, அஜானந்தஸ்ஸ பன ஸுக²தோ உபட்ட²ஹந்தி. யதா²ஹ – ‘‘யோ ஸுக²ங் து³க்க²தோ அத்³த³, து³க்க²மத்³த³க்கி² ஸல்லதோ’’திஆதி³ (ஸங்॰ நி॰ 4.253; இதிவு॰ 53; தே²ரகா³॰ 986). யோ காமே காமயதி, து³க்க²ங் ஸோ காமயதீதி யோ ஸத்தோ கிலேஸகாமேன வத்து²காமே காமயதி, தஸ்ஸ தங் காமனங் ஸம்பதி ஸபரிளாஹதாய , ஆயதிங் அபாயது³க்க²ஹேதுதாய ச வட்டது³க்க²ஹேதுதாய ச து³க்க²ங். வத்து²காமா பன து³க்க²ஸ்ஸ வத்து²பூ⁴தா. இதி ஸோ து³க்க²ஸபா⁴வங் து³க்க²னிமித்தங் து³க்க²வத்து²ஞ்ச காமயதீதி வுத்தோ. இதரங் படிபக்க²வஸேன தமேவத்த²ங் ஞாபேதுங் வுத்தங், தஸ்மா தஸ்ஸத்தோ² வுத்தவிபரியாயேன வேதி³தப்³போ³.
Tattha dukkhā kāmāti ime vatthukāmakilesakāmā dukkhavatthutāya vipariṇāmadukkhasaṃsāradukkhasabhāvato ca, dukkhā dukkhamā dukkhanibbattikā. Vuttañhetaṃ – ‘‘appassādā kāmā bahudukkhā bahupāyāsā, ādīnavo ettha bhiyyo’’tiādi (pāci. 417; ma. ni. 1.234). Erakāti paṭhamaṃ tāva bhagavā taṃ ālapati, pacchā pana thero attānaṃ nāmena kathesi. Na sukhā kāmāti kāmā nāmete jānantassa sukhā na honti, ajānantassa pana sukhato upaṭṭhahanti. Yathāha – ‘‘yo sukhaṃ dukkhato adda, dukkhamaddakkhi sallato’’tiādi (saṃ. ni. 4.253; itivu. 53; theragā. 986). Yo kāme kāmayati, dukkhaṃ so kāmayatīti yo satto kilesakāmena vatthukāme kāmayati, tassa taṃ kāmanaṃ sampati sapariḷāhatāya , āyatiṃ apāyadukkhahetutāya ca vaṭṭadukkhahetutāya ca dukkhaṃ. Vatthukāmā pana dukkhassa vatthubhūtā. Iti so dukkhasabhāvaṃ dukkhanimittaṃ dukkhavatthuñca kāmayatīti vutto. Itaraṃ paṭipakkhavasena tamevatthaṃ ñāpetuṃ vuttaṃ, tasmā tassattho vuttavipariyāyena veditabbo.
ஏரகத்தே²ரகா³தா²வண்ணனா நிட்டி²தா.
Erakattheragāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 3. ஏரகத்தே²ரகா³தா² • 3. Erakattheragāthā
