| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
৬. এসুকারীসুত্তং
6. Esukārīsuttaṃ
৪৩৬. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। অথ খো এসুকারী ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো এসুকারী ব্রাহ্মণো ভগৰন্তং এতদৰোচ – ‘‘ব্রাহ্মণা, ভো গোতম, চতস্সো পারিচরিযা পঞ্ঞপেন্তি – ব্রাহ্মণস্স পারিচরিযং পঞ্ঞপেন্তি, খত্তিযস্স পারিচরিযং পঞ্ঞপেন্তি, ৰেস্সস্স পারিচরিযং পঞ্ঞপেন্তি, সুদ্দস্স পারিচরিযং পঞ্ঞপেন্তি। তত্রিদং, ভো গোতম, ব্রাহ্মণা ব্রাহ্মণস্স পারিচরিযং পঞ্ঞপেন্তি – ‘ব্রাহ্মণো ৰা ব্রাহ্মণং পরিচরেয্য, খত্তিযো ৰা ব্রাহ্মণং পরিচরেয্য, ৰেস্সো ৰা ব্রাহ্মণং পরিচরেয্য, সুদ্দো ৰা ব্রাহ্মণং পরিচরেয্যা’তি। ইদং খো, ভো গোতম, ব্রাহ্মণা ব্রাহ্মণস্স পারিচরিযং পঞ্ঞপেন্তি। তত্রিদং, ভো গোতম, ব্রাহ্মণা খত্তিযস্স পারিচরিযং পঞ্ঞপেন্তি – ‘খত্তিযো ৰা খত্তিযং পরিচরেয্য, ৰেস্সো ৰা খত্তিযং পরিচরেয্য, সুদ্দো ৰা খত্তিযং পরিচরেয্যা’তি। ইদং খো, ভো গোতম, ব্রাহ্মণা খত্তিযস্স পারিচরিযং পঞ্ঞপেন্তি। তত্রিদং, ভো গোতম, ব্রাহ্মণা ৰেস্সস্স পারিচরিযং পঞ্ঞপেন্তি – ‘ৰেস্সো ৰা ৰেস্সং পরিচরেয্য, সুদ্দো ৰা ৰেস্সং পরিচরেয্যা’তি। ইদং খো, ভো গোতম, ব্রাহ্মণা ৰেস্সস্স পারিচরিযং পঞ্ঞপেন্তি । তত্রিদং, ভো গোতম, ব্রাহ্মণা সুদ্দস্স পারিচরিযং পঞ্ঞপেন্তি – ‘সুদ্দোৰ সুদ্দং পরিচরেয্য। কো পনঞ্ঞো সুদ্দং পরিচরিস্সতী’তি? ইদং খো, ভো গোতম, ব্রাহ্মণা সুদ্দস্স পারিচরিযং পঞ্ঞপেন্তি। ব্রাহ্মণা, ভো গোতম, ইমা চতস্সো পারিচরিযা পঞ্ঞপেন্তি। ইধ ভৰং গোতমো কিমাহা’’তি?
436. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho esukārī brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho esukārī brāhmaṇo bhagavantaṃ etadavoca – ‘‘brāhmaṇā, bho gotama, catasso pāricariyā paññapenti – brāhmaṇassa pāricariyaṃ paññapenti, khattiyassa pāricariyaṃ paññapenti, vessassa pāricariyaṃ paññapenti, suddassa pāricariyaṃ paññapenti. Tatridaṃ, bho gotama, brāhmaṇā brāhmaṇassa pāricariyaṃ paññapenti – ‘brāhmaṇo vā brāhmaṇaṃ paricareyya, khattiyo vā brāhmaṇaṃ paricareyya, vesso vā brāhmaṇaṃ paricareyya, suddo vā brāhmaṇaṃ paricareyyā’ti. Idaṃ kho, bho gotama, brāhmaṇā brāhmaṇassa pāricariyaṃ paññapenti. Tatridaṃ, bho gotama, brāhmaṇā khattiyassa pāricariyaṃ paññapenti – ‘khattiyo vā khattiyaṃ paricareyya, vesso vā khattiyaṃ paricareyya, suddo vā khattiyaṃ paricareyyā’ti. Idaṃ kho, bho gotama, brāhmaṇā khattiyassa pāricariyaṃ paññapenti. Tatridaṃ, bho gotama, brāhmaṇā vessassa pāricariyaṃ paññapenti – ‘vesso vā vessaṃ paricareyya, suddo vā vessaṃ paricareyyā’ti. Idaṃ kho, bho gotama, brāhmaṇā vessassa pāricariyaṃ paññapenti . Tatridaṃ, bho gotama, brāhmaṇā suddassa pāricariyaṃ paññapenti – ‘suddova suddaṃ paricareyya. Ko panañño suddaṃ paricarissatī’ti? Idaṃ kho, bho gotama, brāhmaṇā suddassa pāricariyaṃ paññapenti. Brāhmaṇā, bho gotama, imā catasso pāricariyā paññapenti. Idha bhavaṃ gotamo kimāhā’’ti?
৪৩৭. ‘‘কিং পন, ব্রাহ্মণ, সব্বো লোকো ব্রাহ্মণানং এতদব্ভনুজানাতি – ‘ইমা চতস্সো পারিচরিযা পঞ্ঞপেন্তূ’’’তি 1? ‘‘নো হিদং, ভো গোতম’’। ‘‘সেয্যথাপি, ব্রাহ্মণ, পুরিসো দলিদ্দো 2 অস্সকো অনাল়্হিযো। তস্স অকামস্স বিলং ওলগ্গেয্যুং – ‘ইদং তে, অম্ভো পুরিস, মংসং খাদিতব্বং, মূলঞ্চ অনুপ্পদাতব্ব’ন্তি। এৰমেৰ খো, ব্রাহ্মণ, ব্রাহ্মণা অপ্পটিঞ্ঞায তেসং সমণব্রাহ্মণানং, অথ চ পনিমা চতস্সো পারিচরিযা পঞ্ঞপেন্তি। নাহং, ব্রাহ্মণ, ‘সব্বং পরিচরিতব্ব’ন্তি ৰদামি; নাহং, ব্রাহ্মণ, ‘সব্বং ন পরিচরিতব্ব’ন্তি ৰদামি। যং হিস্স, ব্রাহ্মণ, পরিচরতো পারিচরিযাহেতু পাপিযো অস্স ন সেয্যো, নাহং তং ‘পরিচরিতব্ব’ন্তি ৰদামি; যঞ্চ খ্ৰাস্স, ব্রাহ্মণ, পরিচরতো পারিচরিযাহেতু সেয্যো অস্স ন পাপিযো তমহং ‘পরিচরিতব্ব’ন্তি ৰদামি। খত্তিযং চেপি, ব্রাহ্মণ, এৰং পুচ্ছেয্যুং – ‘যং ৰা তে পরিচরতো পারিচরিযাহেতু পাপিযো অস্স ন সেয্যো, যং ৰা তে পরিচরতো পারিচরিযাহেতু সেয্যো অস্স ন পাপিযো; কমেত্থ পরিচরেয্যাসী’তি, খত্তিযোপি হি, ব্রাহ্মণ , সম্মা ব্যাকরমানো এৰং ব্যাকরেয্য – ‘যঞ্হি মে পরিচরতো পারিচরিযাহেতু পাপিযো অস্স ন সেয্যো, নাহং তং পরিচরেয্যং; যঞ্চ খো মে পরিচরতো পারিচরিযাহেতু সেয্যো অস্স ন পাপিযো তমহং পরিচরেয্য’ন্তি। ব্রাহ্মণং চেপি, ব্রাহ্মণ…পে॰… ৰেস্সং চেপি, ব্রাহ্মণ…পে॰… সুদ্দং চেপি, ব্রাহ্মণ, এৰং পুচ্ছেয্যুং – ‘যং ৰা তে পরিচরতো পারিচরিযাহেতু পাপিযো অস্স ন সেয্যো, যং ৰা তে পরিচরতো পারিচরিযাহেতু সেয্যো অস্স ন পাপিযো; কমেত্থ পরিচরেয্যাসী’তি, সুদ্দোপি হি, ব্রাহ্মণ, সম্মা ব্যাকরমানো এৰং ব্যাকরেয্য – ‘যঞ্হি মে পরিচরতো পারিচরিযাহেতু পাপিযো অস্স ন সেয্যো, নাহং তং পরিচরেয্যং; যঞ্চ খো মে পরিচরতো পারিচরিযাহেতু সেয্যো অস্স ন পাপিযো তমহং পরিচরেয্য’ন্তি। নাহং, ব্রাহ্মণ, ‘উচ্চাকুলীনতা সেয্যংসো’তি ৰদামি, ন পনাহং, ব্রাহ্মণ, ‘উচ্চাকুলীনতা পাপিযংসো’তি ৰদামি; নাহং, ব্রাহ্মণ, ‘উল়ারৰণ্ণতা সেয্যংসো’তি ৰদামি, ন পনাহং, ব্রাহ্মণ, ‘উল়ারৰণ্ণতা পাপিযংসো’তি ৰদামি; নাহং, ব্রাহ্মণ, ‘উল়ারভোগতা সেয্যংসো’তি ৰদামি, ন পনাহং, ব্রাহ্মণ, ‘উল়ারভোগতা পাপিযংসো’তি ৰদামি।
437. ‘‘Kiṃ pana, brāhmaṇa, sabbo loko brāhmaṇānaṃ etadabbhanujānāti – ‘imā catasso pāricariyā paññapentū’’’ti 3? ‘‘No hidaṃ, bho gotama’’. ‘‘Seyyathāpi, brāhmaṇa, puriso daliddo 4 assako anāḷhiyo. Tassa akāmassa bilaṃ olaggeyyuṃ – ‘idaṃ te, ambho purisa, maṃsaṃ khāditabbaṃ, mūlañca anuppadātabba’nti. Evameva kho, brāhmaṇa, brāhmaṇā appaṭiññāya tesaṃ samaṇabrāhmaṇānaṃ, atha ca panimā catasso pāricariyā paññapenti. Nāhaṃ, brāhmaṇa, ‘sabbaṃ paricaritabba’nti vadāmi; nāhaṃ, brāhmaṇa, ‘sabbaṃ na paricaritabba’nti vadāmi. Yaṃ hissa, brāhmaṇa, paricarato pāricariyāhetu pāpiyo assa na seyyo, nāhaṃ taṃ ‘paricaritabba’nti vadāmi; yañca khvāssa, brāhmaṇa, paricarato pāricariyāhetu seyyo assa na pāpiyo tamahaṃ ‘paricaritabba’nti vadāmi. Khattiyaṃ cepi, brāhmaṇa, evaṃ puccheyyuṃ – ‘yaṃ vā te paricarato pāricariyāhetu pāpiyo assa na seyyo, yaṃ vā te paricarato pāricariyāhetu seyyo assa na pāpiyo; kamettha paricareyyāsī’ti, khattiyopi hi, brāhmaṇa , sammā byākaramāno evaṃ byākareyya – ‘yañhi me paricarato pāricariyāhetu pāpiyo assa na seyyo, nāhaṃ taṃ paricareyyaṃ; yañca kho me paricarato pāricariyāhetu seyyo assa na pāpiyo tamahaṃ paricareyya’nti. Brāhmaṇaṃ cepi, brāhmaṇa…pe… vessaṃ cepi, brāhmaṇa…pe… suddaṃ cepi, brāhmaṇa, evaṃ puccheyyuṃ – ‘yaṃ vā te paricarato pāricariyāhetu pāpiyo assa na seyyo, yaṃ vā te paricarato pāricariyāhetu seyyo assa na pāpiyo; kamettha paricareyyāsī’ti, suddopi hi, brāhmaṇa, sammā byākaramāno evaṃ byākareyya – ‘yañhi me paricarato pāricariyāhetu pāpiyo assa na seyyo, nāhaṃ taṃ paricareyyaṃ; yañca kho me paricarato pāricariyāhetu seyyo assa na pāpiyo tamahaṃ paricareyya’nti. Nāhaṃ, brāhmaṇa, ‘uccākulīnatā seyyaṃso’ti vadāmi, na panāhaṃ, brāhmaṇa, ‘uccākulīnatā pāpiyaṃso’ti vadāmi; nāhaṃ, brāhmaṇa, ‘uḷāravaṇṇatā seyyaṃso’ti vadāmi, na panāhaṃ, brāhmaṇa, ‘uḷāravaṇṇatā pāpiyaṃso’ti vadāmi; nāhaṃ, brāhmaṇa, ‘uḷārabhogatā seyyaṃso’ti vadāmi, na panāhaṃ, brāhmaṇa, ‘uḷārabhogatā pāpiyaṃso’ti vadāmi.
৪৩৮. ‘‘উচ্চাকুলীনোপি হি, ব্রাহ্মণ, ইধেকচ্চো পাণাতিপাতী হোতি, অদিন্নাদাযী হোতি, কামেসুমিচ্ছাচারী হোতি, মুসাৰাদী হোতি, পিসুণাৰাচো হোতি, ফরুসাৰাচো হোতি, সম্ফপ্পলাপী হোতি, অভিজ্ঝালু হোতি , ব্যাপন্নচিত্তো হোতি, মিচ্ছাদিট্ঠি হোতি। তস্মা ‘ন উচ্চাকুলীনতা সেয্যংসো’তি ৰদামি। উচ্চাকুলীনোপি হি, ব্রাহ্মণ, ইধেকচ্চো পাণাতিপাতা পটিৰিরতো হোতি, অদিন্নাদানা পটিৰিরতো হোতি, কামেসুমিচ্ছাচারা পটিৰিরতো হোতি, মুসাৰাদা পটিৰিরতো হোতি, পিসুণায ৰাচায পটিৰিরতো হোতি, ফরুসায ৰাচায পটিৰিরতো হোতি, সম্ফপ্পলাপা পটিৰিরতো হোতি, অনভিজ্ঝালু হোতি, অব্যাপন্নচিত্তো হোতি, সম্মাদিট্ঠি হোতি। তস্মা ‘ন উচ্চাকুলীনতা পাপিযংসো’তি ৰদামি।
438. ‘‘Uccākulīnopi hi, brāhmaṇa, idhekacco pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇāvāco hoti, pharusāvāco hoti, samphappalāpī hoti, abhijjhālu hoti , byāpannacitto hoti, micchādiṭṭhi hoti. Tasmā ‘na uccākulīnatā seyyaṃso’ti vadāmi. Uccākulīnopi hi, brāhmaṇa, idhekacco pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhi hoti. Tasmā ‘na uccākulīnatā pāpiyaṃso’ti vadāmi.
৪৩৯. ‘‘উল়ারৰণ্ণোপি হি, ব্রাহ্মণ…পে॰… উল়ারভোগোপি হি, ব্রাহ্মণ, ইধেকচ্চো পাণাতিপাতী হোতি…পে॰… মিচ্ছাদিট্ঠি হোতি। তস্মা ‘ন উল়ারভোগতা সেয্যংসো’তি ৰদামি। উল়ারভোগোপি হি, ব্রাহ্মণ, ইধেকচ্চো পাণাতিপাতা পটিৰিরতো হোতি…পে॰… সম্মাদিট্ঠি হোতি। তস্মা ‘ন উল়ারভোগতা পাপিযংসো’তি ৰদামি। নাহং, ব্রাহ্মণ, ‘সব্বং পরিচরিতব্ব’ন্তি ৰদামি, ন পনাহং, ব্রাহ্মণ, ‘সব্বং ন পরিচরিতব্ব’ন্তি ৰদামি। যং হিস্স, ব্রাহ্মণ, পরিচরতো পারিচরিযাহেতু সদ্ধা ৰড্ঢতি, সীলং ৰড্ঢতি, সুতং ৰড্ঢতি, চাগো ৰড্ঢতি, পঞ্ঞা ৰড্ঢতি, তমহং ‘পরিচরিতব্ব’ন্তি (ৰদামি। যং হিস্স, ব্রাহ্মণ, পরিচরতো পারিচরিযাহেতু ন সদ্ধা ৰড্ঢতি, ন সীলং ৰড্ঢতি, ন সুতং ৰড্ঢতি, ন চাগো ৰড্ঢতি, ন পঞ্ঞা ৰড্ঢতি, নাহং তং ‘পরিচরিতব্ব’ন্তি) 5 ৰদামী’’তি।
439. ‘‘Uḷāravaṇṇopi hi, brāhmaṇa…pe… uḷārabhogopi hi, brāhmaṇa, idhekacco pāṇātipātī hoti…pe… micchādiṭṭhi hoti. Tasmā ‘na uḷārabhogatā seyyaṃso’ti vadāmi. Uḷārabhogopi hi, brāhmaṇa, idhekacco pāṇātipātā paṭivirato hoti…pe… sammādiṭṭhi hoti. Tasmā ‘na uḷārabhogatā pāpiyaṃso’ti vadāmi. Nāhaṃ, brāhmaṇa, ‘sabbaṃ paricaritabba’nti vadāmi, na panāhaṃ, brāhmaṇa, ‘sabbaṃ na paricaritabba’nti vadāmi. Yaṃ hissa, brāhmaṇa, paricarato pāricariyāhetu saddhā vaḍḍhati, sīlaṃ vaḍḍhati, sutaṃ vaḍḍhati, cāgo vaḍḍhati, paññā vaḍḍhati, tamahaṃ ‘paricaritabba’nti (vadāmi. Yaṃ hissa, brāhmaṇa, paricarato pāricariyāhetu na saddhā vaḍḍhati, na sīlaṃ vaḍḍhati, na sutaṃ vaḍḍhati, na cāgo vaḍḍhati, na paññā vaḍḍhati, nāhaṃ taṃ ‘paricaritabba’nti) 6 vadāmī’’ti.
৪৪০. এৰং ৰুত্তে, এসুকারী ব্রাহ্মণো ভগৰন্তং এতদৰোচ – ‘‘ব্রাহ্মণা, ভো গোতম, চত্তারি ধনানি পঞ্ঞপেন্তি – ব্রাহ্মণস্স সন্ধনং পঞ্ঞপেন্তি, খত্তিযস্স সন্ধনং পঞ্ঞপেন্তি, ৰেস্সস্স সন্ধনং পঞ্ঞপেন্তি, সুদ্দস্স সন্ধনং পঞ্ঞপেন্তি। তত্রিদং, ভো গোতম, ব্রাহ্মণা ব্রাহ্মণস্স সন্ধনং পঞ্ঞপেন্তি ভিক্খাচরিযং; ভিক্খাচরিযঞ্চ পন ব্রাহ্মণো সন্ধনং অতিমঞ্ঞমানো অকিচ্চকারী হোতি গোপোৰ অদিন্নং আদিযমানোতি। ইদং খো, ভো গোতম, ব্রাহ্মণা ব্রাহ্মণস্স সন্ধনং পঞ্ঞপেন্তি। তত্রিদং, ভো গোতম, ব্রাহ্মণা খত্তিযস্স সন্ধনং পঞ্ঞপেন্তি ধনুকলাপং; ধনুকলাপঞ্চ পন খত্তিযো সন্ধনং অতিমঞ্ঞমানো অকিচ্চকারী হোতি গোপোৰ অদিন্নং আদিযমানোতি। ইদং খো, ভো গোতম, ব্রাহ্মণা খত্তিযস্স সন্ধনং পঞ্ঞপেন্তি। তত্রিদং, ভো গোতম, ব্রাহ্মণা ৰেস্সস্স সন্ধনং পঞ্ঞপেন্তি কসিগোরক্খং; কসিগোরক্খঞ্চ পন ৰেস্সো সন্ধনং অতিমঞ্ঞমানো অকিচ্চকারী হোতি গোপোৰ অদিন্নং আদিযমানোতি। ইদং খো, ভো গোতম, ব্রাহ্মণা ৰেস্সস্স সন্ধনং পঞ্ঞপেন্তি। তত্রিদং, ভো গোতম, ব্রাহ্মণা সুদ্দস্স সন্ধনং পঞ্ঞপেন্তি অসিতব্যাভঙ্গিং; অসিতব্যাভঙ্গিঞ্চ পন সুদ্দো সন্ধনং অতিমঞ্ঞমানো অকিচ্চকারী হোতি গোপোৰ অদিন্নং আদিযমানোতি। ইদং খো, ভো গোতম, ব্রাহ্মণা সুদ্দস্স সন্ধনং পঞ্ঞপেন্তি। ব্রাহ্মণা, ভো গোতম, ইমানি চত্তারি ধনানি পঞ্ঞপেন্তি। ইধ ভৰং গোতমো কিমাহা’’তি?
440. Evaṃ vutte, esukārī brāhmaṇo bhagavantaṃ etadavoca – ‘‘brāhmaṇā, bho gotama, cattāri dhanāni paññapenti – brāhmaṇassa sandhanaṃ paññapenti, khattiyassa sandhanaṃ paññapenti, vessassa sandhanaṃ paññapenti, suddassa sandhanaṃ paññapenti. Tatridaṃ, bho gotama, brāhmaṇā brāhmaṇassa sandhanaṃ paññapenti bhikkhācariyaṃ; bhikkhācariyañca pana brāhmaṇo sandhanaṃ atimaññamāno akiccakārī hoti gopova adinnaṃ ādiyamānoti. Idaṃ kho, bho gotama, brāhmaṇā brāhmaṇassa sandhanaṃ paññapenti. Tatridaṃ, bho gotama, brāhmaṇā khattiyassa sandhanaṃ paññapenti dhanukalāpaṃ; dhanukalāpañca pana khattiyo sandhanaṃ atimaññamāno akiccakārī hoti gopova adinnaṃ ādiyamānoti. Idaṃ kho, bho gotama, brāhmaṇā khattiyassa sandhanaṃ paññapenti. Tatridaṃ, bho gotama, brāhmaṇā vessassa sandhanaṃ paññapenti kasigorakkhaṃ; kasigorakkhañca pana vesso sandhanaṃ atimaññamāno akiccakārī hoti gopova adinnaṃ ādiyamānoti. Idaṃ kho, bho gotama, brāhmaṇā vessassa sandhanaṃ paññapenti. Tatridaṃ, bho gotama, brāhmaṇā suddassa sandhanaṃ paññapenti asitabyābhaṅgiṃ; asitabyābhaṅgiñca pana suddo sandhanaṃ atimaññamāno akiccakārī hoti gopova adinnaṃ ādiyamānoti. Idaṃ kho, bho gotama, brāhmaṇā suddassa sandhanaṃ paññapenti. Brāhmaṇā, bho gotama, imāni cattāri dhanāni paññapenti. Idha bhavaṃ gotamo kimāhā’’ti?
৪৪১. ‘‘কিং পন, ব্রাহ্মণ, সব্বো লোকো ব্রাহ্মণানং এতদব্ভনুজানাতি – ‘ইমানি চত্তারি ধনানি পঞ্ঞপেন্তূ’’’তি? ‘‘নো হিদং, ভো গোতম’’। ‘‘সেয্যথাপি, ব্রাহ্মণ, পুরিসো দলিদ্দো অস্সকো অনাল়্হিযো। তস্স অকামস্স বিলং ওলগ্গেয্যুং – ‘ইদং তে, অম্ভো পুরিস, মংসং খাদিতব্বং, মূলঞ্চ অনুপ্পদাতব্ব’ন্তি। এৰমেৰ খো, ব্রাহ্মণ, ব্রাহ্মণা অপ্পটিঞ্ঞায তেসং সমণব্রাহ্মণানং, অথ চ পনিমানি চত্তারি ধনানি পঞ্ঞপেন্তি। অরিযং খো অহং, ব্রাহ্মণ, লোকুত্তরং ধম্মং পুরিসস্স সন্ধনং পঞ্ঞপেমি। পোরাণং খো পনস্স মাতাপেত্তিকং কুলৰংসং অনুস্সরতো যত্থ যত্থেৰ অত্তভাৰস্স অভিনিব্বত্তি হোতি তেন তেনেৰ সঙ্খ্যং গচ্ছতি। খত্তিযকুলে চে অত্তভাৰস্স অভিনিব্বত্তি হোতি ‘খত্তিযো’ত্ৰেৰ সঙ্খ্যং গচ্ছতি; ব্রাহ্মণকুলে চে অত্তভাৰস্স অভিনিব্বত্তি হোতি ‘ব্রাহ্মণো’ত্ৰেৰ সঙ্খ্যং গচ্ছতি; ৰেস্সকুলে চে অত্তভাৰস্স অভিনিব্বত্তি হোতি ‘ৰেস্সো’ত্ৰেৰ সঙ্খ্যং গচ্ছতি; সুদ্দকুলে চে অত্তভাৰস্স অভিনিব্বত্তি হোতি ‘সুদ্দো’ত্ৰেৰ সঙ্খ্যং গচ্ছতি। সেয্যথাপি, ব্রাহ্মণ, যংযদেৰ পচ্চযং পটিচ্চ অগ্গি জলতি তেন তেনেৰ সঙ্খ্যং গচ্ছতি। কট্ঠঞ্চে পটিচ্চ অগ্গি জলতি ‘কট্ঠগ্গি’ত্ৰেৰ সঙ্খ্যং গচ্ছতি; সকলিকঞ্চে পটিচ্চ অগ্গি জলতি ‘সকলিকগ্গি’ত্ৰেৰ সঙ্খ্যং গচ্ছতি; তিণঞ্চে পটিচ্চ অগ্গি জলতি ‘তিণগ্গি’ত্ৰেৰ সঙ্খ্যং গচ্ছতি; গোমযঞ্চে পটিচ্চ অগ্গি জলতি ‘গোমযগ্গি’ত্ৰেৰ সঙ্খ্যং গচ্ছতি। এৰমেৰ খো অহং, ব্রাহ্মণ, অরিযং লোকুত্তরং ধম্মং পুরিসস্স সন্ধনং পঞ্ঞপেমি। পোরাণং খো পনস্স মাতাপেত্তিকং কুলৰংসং অনুস্সরতো যত্থ যত্থেৰ অত্তভাৰস্স অভিনিব্বত্তি হোতি তেন তেনেৰ সঙ্খ্যং গচ্ছতি।
441. ‘‘Kiṃ pana, brāhmaṇa, sabbo loko brāhmaṇānaṃ etadabbhanujānāti – ‘imāni cattāri dhanāni paññapentū’’’ti? ‘‘No hidaṃ, bho gotama’’. ‘‘Seyyathāpi, brāhmaṇa, puriso daliddo assako anāḷhiyo. Tassa akāmassa bilaṃ olaggeyyuṃ – ‘idaṃ te, ambho purisa, maṃsaṃ khāditabbaṃ, mūlañca anuppadātabba’nti. Evameva kho, brāhmaṇa, brāhmaṇā appaṭiññāya tesaṃ samaṇabrāhmaṇānaṃ, atha ca panimāni cattāri dhanāni paññapenti. Ariyaṃ kho ahaṃ, brāhmaṇa, lokuttaraṃ dhammaṃ purisassa sandhanaṃ paññapemi. Porāṇaṃ kho panassa mātāpettikaṃ kulavaṃsaṃ anussarato yattha yattheva attabhāvassa abhinibbatti hoti tena teneva saṅkhyaṃ gacchati. Khattiyakule ce attabhāvassa abhinibbatti hoti ‘khattiyo’tveva saṅkhyaṃ gacchati; brāhmaṇakule ce attabhāvassa abhinibbatti hoti ‘brāhmaṇo’tveva saṅkhyaṃ gacchati; vessakule ce attabhāvassa abhinibbatti hoti ‘vesso’tveva saṅkhyaṃ gacchati; suddakule ce attabhāvassa abhinibbatti hoti ‘suddo’tveva saṅkhyaṃ gacchati. Seyyathāpi, brāhmaṇa, yaṃyadeva paccayaṃ paṭicca aggi jalati tena teneva saṅkhyaṃ gacchati. Kaṭṭhañce paṭicca aggi jalati ‘kaṭṭhaggi’tveva saṅkhyaṃ gacchati; sakalikañce paṭicca aggi jalati ‘sakalikaggi’tveva saṅkhyaṃ gacchati; tiṇañce paṭicca aggi jalati ‘tiṇaggi’tveva saṅkhyaṃ gacchati; gomayañce paṭicca aggi jalati ‘gomayaggi’tveva saṅkhyaṃ gacchati. Evameva kho ahaṃ, brāhmaṇa, ariyaṃ lokuttaraṃ dhammaṃ purisassa sandhanaṃ paññapemi. Porāṇaṃ kho panassa mātāpettikaṃ kulavaṃsaṃ anussarato yattha yattheva attabhāvassa abhinibbatti hoti tena teneva saṅkhyaṃ gacchati.
‘‘খত্তিযকুলে চে অত্তভাৰস্স অভিনিব্বত্তি হোতি ‘খত্তিযো’ত্ৰেৰ সঙ্খ্যং গচ্ছতি; ব্রাহ্মণকুলে চে অত্তভাৰস্স অভিনিব্বত্তি হোতি ‘ব্রাহ্মণো’ত্ৰেৰ সঙ্খ্যং গচ্ছতি; ৰেস্সকুলে চে অত্তভাৰস্স অভিনিব্বত্তি হোতি ‘ৰেস্সো’ত্ৰেৰ সঙ্খ্যং গচ্ছতি; সুদ্দকুলে চে অত্তভাৰস্স অভিনিব্বত্তি হোতি ‘সুদ্দো’ত্ৰেৰ সঙ্খ্যং গচ্ছতি।
‘‘Khattiyakule ce attabhāvassa abhinibbatti hoti ‘khattiyo’tveva saṅkhyaṃ gacchati; brāhmaṇakule ce attabhāvassa abhinibbatti hoti ‘brāhmaṇo’tveva saṅkhyaṃ gacchati; vessakule ce attabhāvassa abhinibbatti hoti ‘vesso’tveva saṅkhyaṃ gacchati; suddakule ce attabhāvassa abhinibbatti hoti ‘suddo’tveva saṅkhyaṃ gacchati.
‘‘খত্তিযকুলা চেপি, ব্রাহ্মণ, অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি, অদিন্নাদানা পটিৰিরতো হোতি, অব্রহ্মচরিযা পটিৰিরতো হোতি, মুসাৰাদা পটিৰিরতো হোতি, পিসুণায ৰাচায পটিৰিরতো হোতি, ফরুসায ৰাচায পটিৰিরতো হোতি, সম্ফপ্পলাপা পটিৰিরতো হোতি, অনভিজ্ঝালু হোতি, অব্যাপন্নচিত্তো হোতি, সম্মাদিট্ঠি হোতি, আরাধকো হোতি ঞাযং ধম্মং কুসলং।
‘‘Khattiyakulā cepi, brāhmaṇa, agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti, adinnādānā paṭivirato hoti, abrahmacariyā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhi hoti, ārādhako hoti ñāyaṃ dhammaṃ kusalaṃ.
‘‘ব্রাহ্মণকুলা চেপি, ব্রাহ্মণ, অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে॰… সম্মাদিট্ঠি হোতি, আরাধকো হোতি ঞাযং ধম্মং কুসলং।
‘‘Brāhmaṇakulā cepi, brāhmaṇa, agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ.
‘‘ৰেস্সকুলা চেপি, ব্রাহ্মণ, অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে॰… সম্মাদিট্ঠি হোতি, আরাধকো হোতি ঞাযং ধম্মং কুসলং।
‘‘Vessakulā cepi, brāhmaṇa, agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ.
‘‘সুদ্দকুলা চেপি, ব্রাহ্মণ, অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে॰… সম্মাদিট্ঠি হোতি, আরাধকো হোতি ঞাযং ধম্মং কুসলং।
‘‘Suddakulā cepi, brāhmaṇa, agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ.
৪৪২. ‘‘তং কিং মঞ্ঞসি, ব্রাহ্মণ, ব্রাহ্মণোৰ নু খো পহোতি অস্মিং পদেসে অৰেরং অব্যাবজ্ঝং মেত্তচিত্তং ভাৰেতুং, নো খত্তিযো নো ৰেস্সো নো সুদ্দো’’তি? ‘‘নো হিদং, ভো গোতম। খত্তিযোপি হি, ভো গোতম, পহোতি অস্মিং পদেসে অৰেরং অব্যাবজ্ঝং মেত্তচিত্তং ভাৰেতুং; ব্রাহ্মণোপি হি, ভো গোতম… ৰেস্সোপি হি, ভো গোতম… সুদ্দোপি হি, ভো গোতম… সব্বেপি হি, ভো গোতম, চত্তারো ৰণ্ণা পহোন্তি অস্মিং পদেসে অৰেরং অব্যাবজ্ঝং মেত্তচিত্তং ভাৰেতু’’ন্তি। ‘‘এৰমেৰ খো, ব্রাহ্মণ, খত্তিযকুলা চেপি অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে॰… সম্মাদিট্ঠি হোতি, আরাধকো হোতি ঞাযং ধম্মং কুসলং।
442. ‘‘Taṃ kiṃ maññasi, brāhmaṇa, brāhmaṇova nu kho pahoti asmiṃ padese averaṃ abyābajjhaṃ mettacittaṃ bhāvetuṃ, no khattiyo no vesso no suddo’’ti? ‘‘No hidaṃ, bho gotama. Khattiyopi hi, bho gotama, pahoti asmiṃ padese averaṃ abyābajjhaṃ mettacittaṃ bhāvetuṃ; brāhmaṇopi hi, bho gotama… vessopi hi, bho gotama… suddopi hi, bho gotama… sabbepi hi, bho gotama, cattāro vaṇṇā pahonti asmiṃ padese averaṃ abyābajjhaṃ mettacittaṃ bhāvetu’’nti. ‘‘Evameva kho, brāhmaṇa, khattiyakulā cepi agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ.
‘‘ব্রাহ্মণকুলা চেপি, ব্রাহ্মণ… ৰেস্সকুলা চেপি, ব্রাহ্মণ… সুদ্দকুলা চেপি, ব্রাহ্মণ, অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে॰… সম্মাদিট্ঠি হোতি, আরাধকো হোতি ঞাযং ধম্মং কুসলং।
‘‘Brāhmaṇakulā cepi, brāhmaṇa… vessakulā cepi, brāhmaṇa… suddakulā cepi, brāhmaṇa, agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ.
৪৪৩. ‘‘তং কিং মঞ্ঞসি, ব্রাহ্মণ, ব্রাহ্মণোৰ নু খো পহোতি সোত্তিসিনানিং আদায নদিং গন্ত্ৰা রজোজল্লং পৰাহেতুং, নো খত্তিযো নো ৰেস্সো নো সুদ্দো’’তি? ‘‘নো হিদং, ভো গোতম । খত্তিযোপি হি, ভো গোতম, পহোতি সোত্তিসিনানিং আদায নদিং গন্ত্ৰা রজোজল্লং পৰাহেতুং; ব্রাহ্মণোপি হি, ভো গোতম… ৰেস্সোপি হি, ভো গোতম … সুদ্দোপি হি, ভো গোতম… সব্বেপি হি, ভো গোতম, চত্তারো ৰণ্ণা পহোন্তি সোত্তিসিনানিং আদায নদিং গন্ত্ৰা রজোজল্লং পৰাহেতু’’ন্তি। ‘‘এৰমেৰ খো, ব্রাহ্মণ, খত্তিযকুলা চেপি অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে॰… সম্মাদিট্ঠি হোতি, আরাধকো হোতি ঞাযং ধম্মং কুসলং।
443. ‘‘Taṃ kiṃ maññasi, brāhmaṇa, brāhmaṇova nu kho pahoti sottisināniṃ ādāya nadiṃ gantvā rajojallaṃ pavāhetuṃ, no khattiyo no vesso no suddo’’ti? ‘‘No hidaṃ, bho gotama . Khattiyopi hi, bho gotama, pahoti sottisināniṃ ādāya nadiṃ gantvā rajojallaṃ pavāhetuṃ; brāhmaṇopi hi, bho gotama… vessopi hi, bho gotama … suddopi hi, bho gotama… sabbepi hi, bho gotama, cattāro vaṇṇā pahonti sottisināniṃ ādāya nadiṃ gantvā rajojallaṃ pavāhetu’’nti. ‘‘Evameva kho, brāhmaṇa, khattiyakulā cepi agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ.
‘‘ব্রাহ্মণকুলা চেপি, ব্রাহ্মণ… ৰেস্সকুলা চেপি, ব্রাহ্মণ… সুদ্দকুলা চেপি , ব্রাহ্মণ, অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে॰… সম্মাদিট্ঠি হোতি, আরাধকো হোতি ঞাযং ধম্মং কুসলং।
‘‘Brāhmaṇakulā cepi, brāhmaṇa… vessakulā cepi, brāhmaṇa… suddakulā cepi , brāhmaṇa, agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ.
৪৪৪. ‘‘তং কিং মঞ্ঞসি, ব্রাহ্মণ, ইধ রাজা খত্তিযো মুদ্ধাৰসিত্তো নানাজচ্চানং পুরিসানং পুরিসসতং সন্নিপাতেয্য – ‘আযন্তু ভোন্তো যে তত্থ খত্তিযকুলা ব্রাহ্মণকুলা রাজঞ্ঞকুলা উপ্পন্না সাকস্স ৰা সালস্স ৰা সলল়স্স ৰা চন্দনস্স ৰা পদুমকস্স ৰা উত্তরারণিং আদায অগ্গিং অভিনিব্বত্তেন্তু, তেজো পাতুকরোন্তু; আযন্তু পন ভোন্তো যে তত্থ চণ্ডালকুলা নেসাদকুলা ৰেনকুলা রথকারকুলা পুক্কুসকুলা উপ্পন্না সাপানদোণিযা ৰা সূকরদোণিযা ৰা রজকদোণিযা ৰা এরণ্ডকট্ঠস্স ৰা উত্তরারণিং আদায অগ্গিং অভিনিব্বত্তেন্তু, তেজো পাতুকরোন্তূ’’’তি?
444. ‘‘Taṃ kiṃ maññasi, brāhmaṇa, idha rājā khattiyo muddhāvasitto nānājaccānaṃ purisānaṃ purisasataṃ sannipāteyya – ‘āyantu bhonto ye tattha khattiyakulā brāhmaṇakulā rājaññakulā uppannā sākassa vā sālassa vā salaḷassa vā candanassa vā padumakassa vā uttarāraṇiṃ ādāya aggiṃ abhinibbattentu, tejo pātukarontu; āyantu pana bhonto ye tattha caṇḍālakulā nesādakulā venakulā rathakārakulā pukkusakulā uppannā sāpānadoṇiyā vā sūkaradoṇiyā vā rajakadoṇiyā vā eraṇḍakaṭṭhassa vā uttarāraṇiṃ ādāya aggiṃ abhinibbattentu, tejo pātukarontū’’’ti?
‘‘তং কিং মঞ্ঞসি, ব্রাহ্মণ, যো এৰং নু খো সো খত্তিযকুলা ব্রাহ্মণকুলা রাজঞ্ঞকুলা উপ্পন্নেহি সাকস্স ৰা সালস্স ৰা সলল়স্স ৰা চন্দনস্স ৰা পদুমকস্স ৰা উত্তরারণিং আদায অগ্গি অভিনিব্বত্তো তেজো পাতুকতো সো এৰ নু খ্ৰাস্স অগ্গি অচ্চিমা চেৰ ৰণ্ণৰা চ পভস্সরো চ তেন চ সক্কা অগ্গিনা অগ্গিকরণীযং কাতুং; যো পন সো চণ্ডালকুলা নেসাদকুলা ৰেনকুলা রথকারকুলা পুক্কুসকুলা উপ্পন্নেহি সাপানদোণিযা ৰা সূকরদোণিযা ৰা রজকদোণিযা ৰা এরণ্ডকট্ঠস্স ৰা উত্তরারণিং আদায অগ্গি অভিনিব্বত্তো তেজো পাতুকতো স্ৰাস্স অগ্গি ন চেৰ অচ্চিমা ন চ ৰণ্ণৰা ন চ পভস্সরো ন চ তেন সক্কা অগ্গিনা অগ্গিকরণীযং কাতু’’ন্তি? ‘‘নো হিদং, ভো গোতম। যোপি হি সো, ভো গোতম, খত্তিযকুলা ব্রাহ্মণকুলা রাজঞ্ঞকুলা উপ্পন্নেহি সাকস্স ৰা সালস্স ৰা সলল়স্স ৰা চন্দনস্স ৰা পদুমকস্স ৰা উত্তরারণিং আদায অগ্গি অভিনিব্বত্তো তেজো পাতুকতো স্ৰাস্স অগ্গি অচ্চিমা চেৰ ৰণ্ণৰা চ পভস্সরো চ তেন চ সক্কা অগ্গিনা অগ্গিকরণীযং কাতুং; যোপি সো চণ্ডালকুলা নেসাদকুলা ৰেনকুলা রথকারকুলা পুক্কুসকুলা উপ্পন্নেহি সাপানদোণিযা ৰা সূকরদোণিযা ৰা রজকদোণিযা ৰা এরণ্ডকট্ঠস্স ৰা উত্তরারণিং আদায অগ্গি অভিনিব্বত্তো তেজো পাতুকতো স্ৰাস্স অগ্গি অচ্চিমা চেৰ ৰণ্ণৰা চ পভস্সরো চ তেন চ সক্কা অগ্গিনা অগ্গিকরণীযং কাতুং। সব্বোপি হি, ভো গোতম, অগ্গি অচ্চিমা চেৰ ৰণ্ণৰা চ পভস্সরো চ সব্বেনপি সক্কা অগ্গিনা অগ্গিকরণীযং কাতু’’ন্তি।
‘‘Taṃ kiṃ maññasi, brāhmaṇa, yo evaṃ nu kho so khattiyakulā brāhmaṇakulā rājaññakulā uppannehi sākassa vā sālassa vā salaḷassa vā candanassa vā padumakassa vā uttarāraṇiṃ ādāya aggi abhinibbatto tejo pātukato so eva nu khvāssa aggi accimā ceva vaṇṇavā ca pabhassaro ca tena ca sakkā agginā aggikaraṇīyaṃ kātuṃ; yo pana so caṇḍālakulā nesādakulā venakulā rathakārakulā pukkusakulā uppannehi sāpānadoṇiyā vā sūkaradoṇiyā vā rajakadoṇiyā vā eraṇḍakaṭṭhassa vā uttarāraṇiṃ ādāya aggi abhinibbatto tejo pātukato svāssa aggi na ceva accimā na ca vaṇṇavā na ca pabhassaro na ca tena sakkā agginā aggikaraṇīyaṃ kātu’’nti? ‘‘No hidaṃ, bho gotama. Yopi hi so, bho gotama, khattiyakulā brāhmaṇakulā rājaññakulā uppannehi sākassa vā sālassa vā salaḷassa vā candanassa vā padumakassa vā uttarāraṇiṃ ādāya aggi abhinibbatto tejo pātukato svāssa aggi accimā ceva vaṇṇavā ca pabhassaro ca tena ca sakkā agginā aggikaraṇīyaṃ kātuṃ; yopi so caṇḍālakulā nesādakulā venakulā rathakārakulā pukkusakulā uppannehi sāpānadoṇiyā vā sūkaradoṇiyā vā rajakadoṇiyā vā eraṇḍakaṭṭhassa vā uttarāraṇiṃ ādāya aggi abhinibbatto tejo pātukato svāssa aggi accimā ceva vaṇṇavā ca pabhassaro ca tena ca sakkā agginā aggikaraṇīyaṃ kātuṃ. Sabbopi hi, bho gotama, aggi accimā ceva vaṇṇavā ca pabhassaro ca sabbenapi sakkā agginā aggikaraṇīyaṃ kātu’’nti.
‘‘এৰমেৰ খো, ব্রাহ্মণ, খত্তিযকুলা চেপি অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে॰… সম্মাদিট্ঠি হোতি, আরাধকো হোতি ঞাযং ধম্মং কুসলং। ব্রাহ্মণকুলা চেপি, ব্রাহ্মণ… ৰেস্সকুলা চেপি, ব্রাহ্মণ… সুদ্দকুলা চেপি, ব্রাহ্মণ, অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি, অদিন্নাদানা পটিৰিরতো হোতি, অব্রহ্মচরিযা পটিৰিরতো হোতি, মুসাৰাদা পটিৰিরতো হোতি, পিসুণায ৰাচায পটিৰিরতো হোতি, ফরুসায ৰাচায পটিৰিরতো হোতি, সম্ফপ্পলাপা পটিৰিরতো হোতি, অনভিজ্ঝালু হোতি, অব্যাপন্নচিত্তো হোতি, সম্মাদিট্ঠি হোতি, আরাধকো হোতি ঞাযং ধম্মং কুসল’’ন্তি।
‘‘Evameva kho, brāhmaṇa, khattiyakulā cepi agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ. Brāhmaṇakulā cepi, brāhmaṇa… vessakulā cepi, brāhmaṇa… suddakulā cepi, brāhmaṇa, agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti, adinnādānā paṭivirato hoti, abrahmacariyā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhi hoti, ārādhako hoti ñāyaṃ dhammaṃ kusala’’nti.
এৰং ৰুত্তে, এসুকারী ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম, অভিক্কন্তং, ভো গোতম…পে॰… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি।
Evaṃ vutte, esukārī brāhmaṇo bhagavantaṃ etadavoca – ‘‘abhikkantaṃ, bho gotama, abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
এসুকারীসুত্তং নিট্ঠিতং ছট্ঠং।
Esukārīsuttaṃ niṭṭhitaṃ chaṭṭhaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৬. এসুকারীসুত্তৰণ্ণনা • 6. Esukārīsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৬. এসুকারীসুত্তৰণ্ণনা • 6. Esukārīsuttavaṇṇanā
