| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
6. ஏஸுகாரீஸுத்தவண்ணனா
6. Esukārīsuttavaṇṇanā
437. கொட்டா²ஸந்தி மங்ஸபா⁴க³ங். லக்³கா³பெய்யுந்தி ந்ஹாருனா வா வாகேன வா ப³ந்தி⁴த்வா புரிஸஸ்ஸ ஹத்தே² வா வஸனகே³ஹே வா ஓலம்ப³னவஸேன ப³ந்தெ⁴ய்யுங். ஸத்த²த⁴ம்மந்தி ஸத்தி²கேஸு ஸத்த²வாஹேன பணேதப்³ப³ங் ஆணாத⁴ம்மங். தஸ்ஸ நிக்க²மனத்த²ந்தி தங் மூலங் ஸத்தி²கேஹி நித்த²ரணத்த²ங். பாபங் அஸ்ஸாதி பரிசரந்தஸ்ஸ பாரிசரியாய அஹிதங்வ அஸ்ஸ. தேனாஹ ‘‘ந ஸெய்யோ’’தி. உச்சகுலீனாத³யோ து³தியவாராதீ³ஹி வுச்சந்தி, இத⁴ உபதி⁴விபத்திஸம்பத்தியோ பாபியாதி³பதே³ஹி வுத்தாதி அதி⁴ப்பாயோ. தேனாஹ – ‘‘பாபியோதி பாபகோ லாமகோ அத்தபா⁴வோ அஸ்ஸா’’தி. ஸெய்யங்ஸோதி ஹிதகொட்டா²ஸோ, ஹிதஸபா⁴வோதி அத்தோ². உச்சகுலீனதாதி கரணத்தே² பச்சத்தவசனந்தி ஆஹ ‘‘உச்சாகுலீனத்தேனா’’தி. ‘‘வண்ணோ ந கீ²யேத² ததா²க³தஸ்ஸா’’திஆதீ³ஸு (தீ³॰ நி॰ அட்ட²॰ 1.305; 3.141; ம॰ நி॰ அட்ட²॰ 2.425; உதா³॰ 53; அப॰ அட்ட²॰ 2.7.20; பு³॰ வங்॰ அட்ட²॰ 4.4; சரியா॰ அட்ட²॰ 1.நிதா³னகதா²; 2.பகிண்ணககதா²; தீ³॰ நி॰ டீ॰ 1.க³ந்தா²ரம்ப⁴கதா²வண்ணனா; ஸங்॰ நி॰ டீ॰ 1.2.1; அ॰ நி॰ டீ॰ 1.1.1; வஜிர॰ டீ॰ க³ந்தா²ரம்ப⁴கதா²வண்ணனா; ஸாரத்த²॰ டீ॰ 1.க³ந்தா²ரம்ப⁴கதா²வண்ணனா; நெத்தி॰ டீ॰ க³ந்தா²ரம்ப⁴கதா²வண்ணனா; ம॰ நி॰ டீ॰ 1.1) விய வண்ணஸத்³தோ³ இத⁴ பஸங்ஸாபரியாயோதி ஆஹ ‘‘வெஸ்ஸோபி ஹி உளாரவண்ணோ ஹோதீ’’தி.
437.Koṭṭhāsanti maṃsabhāgaṃ. Laggāpeyyunti nhārunā vā vākena vā bandhitvā purisassa hatthe vā vasanagehe vā olambanavasena bandheyyuṃ. Satthadhammanti satthikesu satthavāhena paṇetabbaṃ āṇādhammaṃ. Tassa nikkhamanatthanti taṃ mūlaṃ satthikehi nittharaṇatthaṃ. Pāpaṃ assāti paricarantassa pāricariyāya ahitaṃva assa. Tenāha ‘‘na seyyo’’ti. Uccakulīnādayo dutiyavārādīhi vuccanti, idha upadhivipattisampattiyo pāpiyādipadehi vuttāti adhippāyo. Tenāha – ‘‘pāpiyoti pāpako lāmako attabhāvo assā’’ti. Seyyaṃsoti hitakoṭṭhāso, hitasabhāvoti attho. Uccakulīnatāti karaṇatthe paccattavacananti āha ‘‘uccākulīnattenā’’ti. ‘‘Vaṇṇo na khīyetha tathāgatassā’’tiādīsu (dī. ni. aṭṭha. 1.305; 3.141; ma. ni. aṭṭha. 2.425; udā. 53; apa. aṭṭha. 2.7.20; bu. vaṃ. aṭṭha. 4.4; cariyā. aṭṭha. 1.nidānakathā; 2.pakiṇṇakakathā; dī. ni. ṭī. 1.ganthārambhakathāvaṇṇanā; saṃ. ni. ṭī. 1.2.1; a. ni. ṭī. 1.1.1; vajira. ṭī. ganthārambhakathāvaṇṇanā; sārattha. ṭī. 1.ganthārambhakathāvaṇṇanā; netti. ṭī. ganthārambhakathāvaṇṇanā; ma. ni. ṭī. 1.1) viya vaṇṇasaddo idha pasaṃsāpariyāyoti āha ‘‘vessopi hi uḷāravaṇṇo hotī’’ti.
440. ‘‘நிரவோ பத³ஸத்³தோ³ ஸோளாரகொ³த்தஸ்ஸ அகிண்ணமத்திகாபத்தோ திட்டெ²ய்ய அஸங்க³சாரீ’’தி வுத்தத்தா பி⁴க்கா² சரிதப்³பா³வ, அயங் தேஸங் குலத⁴ம்மோதி அதி⁴ப்பாயோ. ஹரித்வாதி அபனெத்வா. ஸத்தஜீவோ ஸத்தவாணிஜகோ. கோ³பேதி ரக்க²தீதி கோ³போ, ஆரக்கா²தி⁴காரே நியுத்தோ. அஸந்தி லூனந்தி தேனாதி அஸிதங், லவித்தங். விவித⁴ங் பா⁴ரங் ஆப⁴ஞ்ஜந்தி ஓலம்ப³ந்தி எத்தா²தி ப்³யாப⁴ங்கீ³, காஜங்.
440. ‘‘Niravo padasaddo soḷāragottassa akiṇṇamattikāpatto tiṭṭheyya asaṅgacārī’’ti vuttattā bhikkhā caritabbāva, ayaṃ tesaṃ kuladhammoti adhippāyo. Haritvāti apanetvā. Sattajīvo sattavāṇijako. Gopeti rakkhatīti gopo, ārakkhādhikāre niyutto. Asanti lūnanti tenāti asitaṃ, lavittaṃ. Vividhaṃ bhāraṃ ābhañjanti olambanti etthāti byābhaṅgī, kājaṃ.
441. அனுஸ்ஸரதோதி அனுஸ்ஸரணஹேது குலவங்ஸானுஸ்ஸரணக்க²ணே க²த்தியோதிஆதி³னா ஸங்க்²யங் க³ச்ச²தி. தேனாஹ ‘‘போராணே…பே॰… அனுஸ்ஸரியமானே’’தி. உச்சனீசத்தஜானநத்த²ஞ்ச குலவவத்தா²னங் கதங் ஹோதீதி க²த்தியாதி³குலகம்முனா தேஸங் சதுன்னங் வண்ணானங் ஸந்த⁴னங் ஜீவிகங் பஞ்ஞபெந்தி ப்³ராஹ்மணா, ததா²க³தோ பன லோகுத்தரத⁴ம்மமேவ புரிஸஸ்ஸ ஸந்த⁴னங் பஞ்ஞபேதி தேன ஸத்தஸ்ஸ லோகக்³க³பா⁴வஸித்³தி⁴தோ. ஸேஸங் ஸுவிஞ்ஞெய்யமேவ.
441.Anussaratoti anussaraṇahetu kulavaṃsānussaraṇakkhaṇe khattiyotiādinā saṅkhyaṃ gacchati. Tenāha ‘‘porāṇe…pe… anussariyamāne’’ti. Uccanīcattajānanatthañca kulavavatthānaṃ kataṃ hotīti khattiyādikulakammunā tesaṃ catunnaṃ vaṇṇānaṃ sandhanaṃ jīvikaṃ paññapenti brāhmaṇā, tathāgato pana lokuttaradhammameva purisassa sandhanaṃ paññapeti tena sattassa lokaggabhāvasiddhito. Sesaṃ suviññeyyameva.
ஏஸுகாரீஸுத்தவண்ணனா லீனத்த²ப்பகாஸனா ஸமத்தா.
Esukārīsuttavaṇṇanā līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 6. ஏஸுகாரீஸுத்தங் • 6. Esukārīsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 6. ஏஸுகாரீஸுத்தவண்ணனா • 6. Esukārīsuttavaṇṇanā
