14. Etadaggavaggo

1. Paṭhamavaggo

188. ‘‘Etadaggaṃ , bhikkhave, mama sāvakānaṃ bhikkhūnaṃ rattaññūnaṃ yadidaṃ aññāsikoṇḍañño’’ ².

189. … Mahāpaññānaṃ yadidaṃ sāriputto.

190. … Iddhimantānaṃ yadidaṃ mahāmoggallāno.

191. … Dhutavādānaṃ ⁴ yadidaṃ mahākassapo.

192. … Dibbacakkhukānaṃ yadidaṃ anuruddho.

193. … Uccākulikānaṃ yadidaṃ bhaddiyo kāḷigodhāyaputto.

194. … Mañjussarānaṃ yadidaṃ lakuṇḍaka ⁶ bhaddiyo.

195. … Sīhanādikānaṃ yadidaṃ piṇḍolabhāradvājo.

196. … Dhammakathikānaṃ yadidaṃ puṇṇo mantāṇiputto.

197. … Saṃkhittena bhāsitassa vitthārena atthaṃ vibhajantānaṃ yadidaṃ mahākaccānoti.

Vaggo paṭhamo.

2. Dutiyavaggo

198. ‘‘Etadaggaṃ , bhikkhave, mama sāvakānaṃ bhikkhūnaṃ manomayaṃ kāyaṃ abhinimminantānaṃ yadidaṃ cūḷapanthako’’ ⁸.

199. … Cetovivaṭṭakusalānaṃ yadidaṃ cūḷapanthako.

200. … Saññāvivaṭṭakusalānaṃ yadidaṃ mahāpanthako.

201. … Araṇavihārīnaṃ yadidaṃ subhūti.

202. … Dakkhiṇeyyānaṃ yadidaṃ subhūti.

203. … Āraññakānaṃ yadidaṃ revato khadiravaniyo.

204. … Jhāyīnaṃ yadidaṃ kaṅkhārevato.

205. … Āraddhavīriyānaṃ yadidaṃ soṇo koḷiviso.

206. … Kalyāṇavākkaraṇānaṃ yadidaṃ soṇo kuṭikaṇṇo.

207. … Lābhīnaṃ yadidaṃ sīvali.

208. … Saddhādhimuttānaṃ yadidaṃ vakkalīti.

Vaggo dutiyo.

3. Tatiyavaggo

209. ‘‘Etadaggaṃ , bhikkhave, mama sāvakānaṃ bhikkhūnaṃ sikkhākāmānaṃ yadidaṃ rāhulo’’.

210. … Saddhāpabbajitānaṃ yadidaṃ raṭṭhapālo.

211. … Paṭhamaṃ salākaṃ gaṇhantānaṃ yadidaṃ kuṇḍadhāno.

212. … Paṭibhānavantānaṃ yadidaṃ vaṅgīso.

213. … Samantapāsādikānaṃ yadidaṃ upaseno vaṅgantaputto.

214. … Senāsanapaññāpakānaṃ yadidaṃ dabbo mallaputto.

215. … Devatānaṃ piyamanāpānaṃ yadidaṃ pilindavaccho.

216. … Khippābhiññānaṃ yadidaṃ bāhiyo dārucīriyo.

217. … Cittakathikānaṃ yadidaṃ kumārakassapo.

218. … Paṭisambhidāpattānaṃ yadidaṃ mahākoṭṭhitoti ¹⁰.

Vaggo tatiyo.

4. Catutthavaggo

219. ‘‘Etadaggaṃ, bhikkhave, mama sāvakānaṃ bhikkhūnaṃ bahussutānaṃ yadidaṃ ānando’’.

220. … Satimantānaṃ yadidaṃ ānando.

221. … Gatimantānaṃ yadidaṃ ānando.

222. … Dhitimantānaṃ yadidaṃ ānando.

223. … Upaṭṭhākānaṃ yadidaṃ ānando.

224. … Mahāparisānaṃ yadidaṃ uruvelakassapo.

225. … Kulappasādakānaṃ yadidaṃ kāḷudāyī.

226. … Appābādhānaṃ yadidaṃ bākulo ¹².

227. … Pubbenivāsaṃ anussarantānaṃ yadidaṃ sobhito.

228. … Vinayadharānaṃ yadidaṃ upāli.

229. … Bhikkhunovādakānaṃ yadidaṃ nandako.

230. … Indriyesu guttadvārānaṃ yadidaṃ nando.

231. … Bhikkhuovādakānaṃ yadidaṃ mahākappino.

232. … Tejodhātukusalānaṃ yadidaṃ sāgato.

233. … Paṭibhāneyyakānaṃ yadidaṃ rādho.

234. … Lūkhacīvaradharānaṃ yadidaṃ mogharājāti.

Vaggo catuttho.

5. Pañcamavaggo

235. ‘‘Etadaggaṃ , bhikkhave, mama sāvikānaṃ bhikkhunīnaṃ rattaññūnaṃ yadidaṃ mahāpajāpatigotamī’’.

236. … Mahāpaññānaṃ yadidaṃ khemā.

237. … Iddhimantīnaṃ yadidaṃ uppalavaṇṇā.

238. … Vinayadharānaṃ yadidaṃ paṭācārā.

239. … Dhammakathikānaṃ yadidaṃ dhammadinnā.

240. … Jhāyīnaṃ yadidaṃ nandā.

241. … Āraddhavīriyānaṃ yadidaṃ soṇā.

242. … Dibbacakkhukānaṃ yadidaṃ bakulā ¹⁴.

243. … Khippābhiññānaṃ yadidaṃ bhaddā kuṇḍalakesā.

244. … Pubbenivāsaṃ anussarantīnaṃ yadidaṃ bhaddā kāpilānī.

245. … Mahābhiññappattānaṃ yadidaṃ bhaddakaccānā.

246. … Lūkhacīvaradharānaṃ yadidaṃ kisāgotamī.

247. … Saddhādhimuttānaṃ yadidaṃ siṅgālakamātāti ¹⁶.

Vaggo pañcamo.

6. Chaṭṭhavaggo

248. ‘‘Etadaggaṃ , bhikkhave, mama sāvakānaṃ upāsakānaṃ paṭhamaṃ saraṇaṃ gacchantānaṃ yadidaṃ tapussabhallikā ¹⁸ vāṇijā’’.

249. … Dāyakānaṃ yadidaṃ sudatto gahapati anāthapiṇḍiko.

250. … Dhammakathikānaṃ yadidaṃ citto gahapati macchikāsaṇḍiko.

251. … Catūhi saṅgahavatthūhi parisaṃ saṅgaṇhantānaṃ yadidaṃ hatthako āḷavako.

252. … Paṇītadāyakānaṃ yadidaṃ mahānāmo sakko.

253. … Manāpadāyakānaṃ yadidaṃ uggo gahapati vesāliko.

254. … Saṅghupaṭṭhākānaṃ yadidaṃ hatthigāmako uggato gahapati.

255. … Aveccappasannānaṃ yadidaṃ sūrambaṭṭho ²⁰.

256. … Puggalappasannānaṃ yadidaṃ jīvako komārabhacco.

257. … Vissāsakānaṃ yadidaṃ nakulapitā gahapatīti.

Vaggo chaṭṭho.

7. Sattamavaggo

258. ‘‘Etadaggaṃ , bhikkhave, mama sāvikānaṃ upāsikānaṃ paṭhamaṃ saraṇaṃ gacchantīnaṃ yadidaṃ sujātā seniyadhītā’’ ²².

259. … Dāyikānaṃ yadidaṃ visākhā migāramātā.

260. … Bahussutānaṃ yadidaṃ khujjuttarā.

261. … Mettāvihārīnaṃ yadidaṃ sāmāvatī.

262. … Jhāyīnaṃ yadidaṃ uttarānandamātā.

263. … Paṇītadāyikānaṃ yadidaṃ suppavāsā koliyadhītā.

264. … Gilānupaṭṭhākīnaṃ yadidaṃ suppiyā upāsikā.

265. … Aveccappasannānaṃ yadidaṃ kātiyānī.

266. … Vissāsikānaṃ yadidaṃ nakulamātā gahapatānī.

267. … Anussavappasannānaṃ yadidaṃ kāḷī upāsikā kulagharikā ²⁴ ti.

Vaggo sattamo.

Etadaggavaggo cuddasamo.