| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๒-๔. เอตํมมสุตฺตาทิวณฺณนา
2-4. Etaṃmamasuttādivaṇṇanā
๒๐๗-๒๐๙. ทิฎฺฐํ รูปายตนํ จกฺขุนา ทฎฺฐพฺพโตฯ สุตํ สทฺทายตนํ โสเตน โสตพฺพโตฯ มุตํ คนฺธายตนาทิ ติวิธํ สมฺปตฺตคาหีหิ ฆานาทีหิ ปตฺวา คเหตพฺพโตฯ อวเสสานิ จกฺขาทีนิ สตฺตายตนานิ วิญฺญาตํ นาม เกวลํ มโนวิญฺญาเณน วิชานิตพฺพโตฯ ปตฺตนฺติ อนุปฺปตฺตํ, ยํ กิญฺจิ ปาปุณิตพฺพํ ปริเยสิตฺวา คเวสิตฺวา สมฺปตฺตนฺติ อนุปฺปตฺตํฯ ปริเยสิตนฺติ ปริยิฎฺฐํฯ จิเตฺตน อนุสญฺจริตนฺติ มนสา จินฺติตํฯ ‘‘ปตฺตํ ปริเยสิต’’นฺติ เอตสฺมิํ ปททฺวเย จตุกฺกํ สมฺภวตีติ ตํ ทเสฺสตฺวา ตสฺส วเสน ปตฺตปริเยสิตปทานิ, ตโต มนสา อนุวิจริตญฺจ นีหริตฺวา ทเสฺสตุํ ‘‘โลกสฺมิํ หี’’ติอาทิ วุตฺตํฯ ตตฺถ ปริเยสิตฺวา ปตฺตํ นาม ปริเยสนาย ปริคฺคาหภาวโตฯ ปริเยสิตํ นาม เกวลํ ปริเยสิตเมวาติ กตฺวา ปริเยสิตฺวา ปตฺตสฺส มนุสฺสานุวิจริตสฺส วุตฺตตฺตาฯ ปฐมวิกเปฺป สงฺกโร อตฺถีติ อสงฺกรโต จ ทเสฺสตุํ ‘‘อถ วา’’ติอาทิ วุตฺตํฯ สพฺพนฺติ วิญฺญาตาทิฯ ตญฺหิ มโนวิญฺญาเณน คหิตตฺตา มนสา อนุวิจริตํ นาม น ทิฎฺฐํ สุตํ มุตํฯ
207-209.Diṭṭhaṃ rūpāyatanaṃ cakkhunā daṭṭhabbato. Sutaṃ saddāyatanaṃ sotena sotabbato. Mutaṃ gandhāyatanādi tividhaṃ sampattagāhīhi ghānādīhi patvā gahetabbato. Avasesāni cakkhādīni sattāyatanāni viññātaṃ nāma kevalaṃ manoviññāṇena vijānitabbato. Pattanti anuppattaṃ, yaṃ kiñci pāpuṇitabbaṃ pariyesitvā gavesitvā sampattanti anuppattaṃ. Pariyesitanti pariyiṭṭhaṃ. Cittena anusañcaritanti manasā cintitaṃ. ‘‘Pattaṃ pariyesita’’nti etasmiṃ padadvaye catukkaṃ sambhavatīti taṃ dassetvā tassa vasena pattapariyesitapadāni, tato manasā anuvicaritañca nīharitvā dassetuṃ ‘‘lokasmiṃ hī’’tiādi vuttaṃ. Tattha pariyesitvā pattaṃ nāma pariyesanāya pariggāhabhāvato. Pariyesitaṃ nāma kevalaṃ pariyesitamevāti katvā pariyesitvā pattassa manussānuvicaritassa vuttattā. Paṭhamavikappe saṅkaro atthīti asaṅkarato ca dassetuṃ ‘‘atha vā’’tiādi vuttaṃ. Sabbanti viññātādi. Tañhi manoviññāṇena gahitattā manasā anuvicaritaṃ nāma na diṭṭhaṃ sutaṃ mutaṃ.
เอตํมมสุตฺตาทิวณฺณนา นิฎฺฐิตาฯ
Etaṃmamasuttādivaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya
๒. เอตํมมสุตฺตํ • 2. Etaṃmamasuttaṃ
๓. โสอตฺตาสุตฺตํ • 3. Soattāsuttaṃ
๔. โนจเมสิยาสุตฺตํ • 4. Nocamesiyāsuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๒-๔. เอตํมมสุตฺตาทิวณฺณนา • 2-4. Etaṃmamasuttādivaṇṇanā
