| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
2-4. එතංමමසුත්‌තාදිවණ්‌ණනා
2-4. Etaṃmamasuttādivaṇṇanā
207-209. දිට්‌ඨන්‌තිආදීසු දිට්‌ඨං රූපායතනං. සුතං සද්‌දායතනං. මුතං ගන්‌ධායතනං රසායතනං ඵොට්‌ඨබ්‌බායතනං. තඤ්‌හි පත්‌වා ගහෙතබ්‌බතො මුතන්‌ති ච වුත්‌තං. අවසෙසානි සත්‌තායතනානි විඤ්‌ඤාතං නාම. පත්‌තන්‌ති පරියෙසිත්‌වා වා අපරියෙසිත්‌වා වා පත්‌තං. පරියෙසිතන්‌ති පත්‌තං වා අපත්‌තං වා පරියෙසිතං. අනුවිචරිතං මනසාති චිත්‌තෙන අනුසඤ්‌චරිතං. ලොකස්‌මිඤ්‌හි පරියෙසිත්‌වා පත්‌තම්‌පි අත්‌ථි, පරියෙසිත්‌වා නොපත්‌තම්‌පි, අපරියෙසිත්‌වා පත්‌තම්‌පි, අපරියෙසිත්‌වා නොපත්‌තම්‌පි. තත්‌ථ පරියෙසිත්‌වා පත්‌තං පත්‌තං නාම, පරියෙසිත්‌වා නොපත්‌තං පරියෙසිතං නාම . අපරියෙසිත්‌වා පත්‌තඤ්‌ච අපරියෙසිත්‌වා නොපත්‌තඤ්‌ච මනසානුවිචරිතං නාම. අථ වා පරියෙසිත්‌වා පත්‌තම්‌පි අපරියෙසිත්‌වා පත්‌තම්‌පි පත්‌තට්‌ඨෙන පත්‌තං නාම, පරියෙසිත්‌වා නොපත්‌තමෙව පරියෙසිතං නාම, අපරියෙසිත්‌වා නොපත්‌තං මනසානුවිචරිතං නාම. සබ්‌බං වා එතං මනසා අනුවිචරිතමෙව.
207-209.Diṭṭhantiādīsu diṭṭhaṃ rūpāyatanaṃ. Sutaṃ saddāyatanaṃ. Mutaṃ gandhāyatanaṃ rasāyatanaṃ phoṭṭhabbāyatanaṃ. Tañhi patvā gahetabbato mutanti ca vuttaṃ. Avasesāni sattāyatanāni viññātaṃ nāma. Pattanti pariyesitvā vā apariyesitvā vā pattaṃ. Pariyesitanti pattaṃ vā apattaṃ vā pariyesitaṃ. Anuvicaritaṃ manasāti cittena anusañcaritaṃ. Lokasmiñhi pariyesitvā pattampi atthi, pariyesitvā nopattampi, apariyesitvā pattampi, apariyesitvā nopattampi. Tattha pariyesitvā pattaṃ pattaṃ nāma, pariyesitvā nopattaṃ pariyesitaṃ nāma . Apariyesitvā pattañca apariyesitvā nopattañca manasānuvicaritaṃ nāma. Atha vā pariyesitvā pattampi apariyesitvā pattampi pattaṭṭhena pattaṃ nāma, pariyesitvā nopattameva pariyesitaṃ nāma, apariyesitvā nopattaṃ manasānuvicaritaṃ nāma. Sabbaṃ vā etaṃ manasā anuvicaritameva.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya
2. එතංමමසුත්‌තං • 2. Etaṃmamasuttaṃ
3. සොඅත්‌තාසුත්‌තං • 3. Soattāsuttaṃ
4. නොචමෙසියාසුත්‌තං • 4. Nocamesiyāsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2-4. එතංමමසුත්‌තාදිවණ්‌ණනා • 2-4. Etaṃmamasuttādivaṇṇanā
