| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੨-੪. ਏਤਂਮਮਸੁਤ੍ਤਾਦਿવਣ੍ਣਨਾ
2-4. Etaṃmamasuttādivaṇṇanā
੨੦੭-੨੦੯. ਦਿਟ੍ਠਂ ਰੂਪਾਯਤਨਂ ਚਕ੍ਖੁਨਾ ਦਟ੍ਠਬ੍ਬਤੋ। ਸੁਤਂ ਸਦ੍ਦਾਯਤਨਂ ਸੋਤੇਨ ਸੋਤਬ੍ਬਤੋ। ਮੁਤਂ ਗਨ੍ਧਾਯਤਨਾਦਿ ਤਿવਿਧਂ ਸਮ੍ਪਤ੍ਤਗਾਹੀਹਿ ਘਾਨਾਦੀਹਿ ਪਤ੍વਾ ਗਹੇਤਬ੍ਬਤੋ। ਅવਸੇਸਾਨਿ ਚਕ੍ਖਾਦੀਨਿ ਸਤ੍ਤਾਯਤਨਾਨਿ વਿਞ੍ਞਾਤਂ ਨਾਮ ਕੇવਲਂ ਮਨੋવਿਞ੍ਞਾਣੇਨ વਿਜਾਨਿਤਬ੍ਬਤੋ। ਪਤ੍ਤਨ੍ਤਿ ਅਨੁਪ੍ਪਤ੍ਤਂ, ਯਂ ਕਿਞ੍ਚਿ ਪਾਪੁਣਿਤਬ੍ਬਂ ਪਰਿਯੇਸਿਤ੍વਾ ਗવੇਸਿਤ੍વਾ ਸਮ੍ਪਤ੍ਤਨ੍ਤਿ ਅਨੁਪ੍ਪਤ੍ਤਂ। ਪਰਿਯੇਸਿਤਨ੍ਤਿ ਪਰਿਯਿਟ੍ਠਂ। ਚਿਤ੍ਤੇਨ ਅਨੁਸਞ੍ਚਰਿਤਨ੍ਤਿ ਮਨਸਾ ਚਿਨ੍ਤਿਤਂ। ‘‘ਪਤ੍ਤਂ ਪਰਿਯੇਸਿਤ’’ਨ੍ਤਿ ਏਤਸ੍ਮਿਂ ਪਦਦ੍વਯੇ ਚਤੁਕ੍ਕਂ ਸਮ੍ਭવਤੀਤਿ ਤਂ ਦਸ੍ਸੇਤ੍વਾ ਤਸ੍ਸ વਸੇਨ ਪਤ੍ਤਪਰਿਯੇਸਿਤਪਦਾਨਿ, ਤਤੋ ਮਨਸਾ ਅਨੁવਿਚਰਿਤਞ੍ਚ ਨੀਹਰਿਤ੍વਾ ਦਸ੍ਸੇਤੁਂ ‘‘ਲੋਕਸ੍ਮਿਂ ਹੀ’’ਤਿਆਦਿ વੁਤ੍ਤਂ। ਤਤ੍ਥ ਪਰਿਯੇਸਿਤ੍વਾ ਪਤ੍ਤਂ ਨਾਮ ਪਰਿਯੇਸਨਾਯ ਪਰਿਗ੍ਗਾਹਭਾવਤੋ। ਪਰਿਯੇਸਿਤਂ ਨਾਮ ਕੇવਲਂ ਪਰਿਯੇਸਿਤਮੇવਾਤਿ ਕਤ੍વਾ ਪਰਿਯੇਸਿਤ੍વਾ ਪਤ੍ਤਸ੍ਸ ਮਨੁਸ੍ਸਾਨੁવਿਚਰਿਤਸ੍ਸ વੁਤ੍ਤਤ੍ਤਾ। ਪਠਮવਿਕਪ੍ਪੇ ਸਙ੍ਕਰੋ ਅਤ੍ਥੀਤਿ ਅਸਙ੍ਕਰਤੋ ਚ ਦਸ੍ਸੇਤੁਂ ‘‘ਅਥ વਾ’’ਤਿਆਦਿ વੁਤ੍ਤਂ। ਸਬ੍ਬਨ੍ਤਿ વਿਞ੍ਞਾਤਾਦਿ। ਤਞ੍ਹਿ ਮਨੋવਿਞ੍ਞਾਣੇਨ ਗਹਿਤਤ੍ਤਾ ਮਨਸਾ ਅਨੁવਿਚਰਿਤਂ ਨਾਮ ਨ ਦਿਟ੍ਠਂ ਸੁਤਂ ਮੁਤਂ।
207-209.Diṭṭhaṃ rūpāyatanaṃ cakkhunā daṭṭhabbato. Sutaṃ saddāyatanaṃ sotena sotabbato. Mutaṃ gandhāyatanādi tividhaṃ sampattagāhīhi ghānādīhi patvā gahetabbato. Avasesāni cakkhādīni sattāyatanāni viññātaṃ nāma kevalaṃ manoviññāṇena vijānitabbato. Pattanti anuppattaṃ, yaṃ kiñci pāpuṇitabbaṃ pariyesitvā gavesitvā sampattanti anuppattaṃ. Pariyesitanti pariyiṭṭhaṃ. Cittena anusañcaritanti manasā cintitaṃ. ‘‘Pattaṃ pariyesita’’nti etasmiṃ padadvaye catukkaṃ sambhavatīti taṃ dassetvā tassa vasena pattapariyesitapadāni, tato manasā anuvicaritañca nīharitvā dassetuṃ ‘‘lokasmiṃ hī’’tiādi vuttaṃ. Tattha pariyesitvā pattaṃ nāma pariyesanāya pariggāhabhāvato. Pariyesitaṃ nāma kevalaṃ pariyesitamevāti katvā pariyesitvā pattassa manussānuvicaritassa vuttattā. Paṭhamavikappe saṅkaro atthīti asaṅkarato ca dassetuṃ ‘‘atha vā’’tiādi vuttaṃ. Sabbanti viññātādi. Tañhi manoviññāṇena gahitattā manasā anuvicaritaṃ nāma na diṭṭhaṃ sutaṃ mutaṃ.
ਏਤਂਮਮਸੁਤ੍ਤਾਦਿવਣ੍ਣਨਾ ਨਿਟ੍ਠਿਤਾ।
Etaṃmamasuttādivaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya
੨. ਏਤਂਮਮਸੁਤ੍ਤਂ • 2. Etaṃmamasuttaṃ
੩. ਸੋਅਤ੍ਤਾਸੁਤ੍ਤਂ • 3. Soattāsuttaṃ
੪. ਨੋਚਮੇਸਿਯਾਸੁਤ੍ਤਂ • 4. Nocamesiyāsuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੨-੪. ਏਤਂਮਮਸੁਤ੍ਤਾਦਿવਣ੍ਣਨਾ • 2-4. Etaṃmamasuttādivaṇṇanā
