| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
6. க³ப்³பா⁴வக்கந்திபஞ்ஹோ
6. Gabbhāvakkantipañho
6. ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா ‘திண்ணங் கோ² பன, பி⁴க்க²வே, ஸன்னிபாதா க³ப்³ப⁴ஸ்ஸ அவக்கந்தி 1 ஹோதி, இத⁴ மாதாபிதரோ ச ஸன்னிபதிதா ஹொந்தி, மாதா ச உதுனீ ஹோதி, க³ந்த⁴ப்³போ³ ச பச்சுபட்டி²தோ ஹோதி, இமேஸங் கோ², பி⁴க்க²வே, திண்ணங் ஸன்னிபாதா க³ப்³ப⁴ஸ்ஸ அவக்கந்தி ஹோதீ’தி, அஸேஸவசனமேதங், நிஸ்ஸேஸவசனமேதங், நிப்பரியாயவசனமேதங், அரஹஸ்ஸவசனமேதங், ஸதே³வமனுஸ்ஸானங் மஜ்ஜே² நிஸீதி³த்வா ப⁴ணிதங், அயஞ்ச த்³வின்னங் ஸன்னிபாதா க³ப்³ப⁴ஸ்ஸ அவக்கந்தி தி³ஸ்ஸதி, து³கூலேன தாபஸேன பாரிகாய தாபஸியா உதுனிகாலே த³க்கி²ணேன ஹத்த²ங்கு³ட்டே²ன நாபி⁴ பராமட்டா², தஸ்ஸ தேன நாபி⁴பராமஸனேன ஸாமகுமாரோ நிப்³ப³த்தோ. மாதங்கே³னாபி இஸினா ப்³ராஹ்மணகஞ்ஞாய உதுனிகாலே த³க்கி²ணேன ஹத்த²ங்கு³ட்டே²ன நாபி⁴ பராமட்டா², தஸ்ஸ தேன நாபி⁴பராமஸனேன மண்ட³ப்³யோ நாம மாணவகோ நிப்³ப³த்தோதி. யதி³, ப⁴ந்தே நாக³ஸேன, ப⁴க³வதா ப⁴ணிதங் ‘திண்ணங் கோ² பன, பி⁴க்க²வே, ஸன்னிபாதா க³ப்³ப⁴ஸ்ஸ அவக்கந்தி ஹோதீ’தி. தேன ஹி ஸாமோ ச குமாரோ மண்ட³ப்³யோ ச மாணவகோ உபோ⁴பி தே நாபி⁴பராமஸனேன நிப்³ப³த்தாதி யங் வசனங், தங் மிச்சா². யதி³, ப⁴ந்தே, ததா²க³தேன ப⁴ணிதங் ‘ஸாமோ ச குமாரோ மண்ட³ப்³யோ ச மாணவகோ நாபி⁴பராமஸனேன நிப்³ப³த்தா’’தி, தேன ஹி ‘திண்ணங் கோ² பன, பி⁴க்க²வே, ஸன்னிபாதா க³ப்³ப⁴ஸ்ஸ அவக்கந்தி ஹோதீ’தி யங் வசனங், தம்பி மிச்சா². அயம்பி உப⁴தோ கோடிகோ பஞ்ஹோ ஸுக³ம்பீ⁴ரோ ஸுனிபுணோ விஸயோ பு³த்³தி⁴மந்தானங், ஸோ தவானுப்பத்தோ, சி²ந்த³ விமதிபத²ங், தா⁴ரேஹி ஞாணவரப்பஜ்ஜோத’’ந்தி.
6. ‘‘Bhante nāgasena, bhāsitampetaṃ bhagavatā ‘tiṇṇaṃ kho pana, bhikkhave, sannipātā gabbhassa avakkanti 2 hoti, idha mātāpitaro ca sannipatitā honti, mātā ca utunī hoti, gandhabbo ca paccupaṭṭhito hoti, imesaṃ kho, bhikkhave, tiṇṇaṃ sannipātā gabbhassa avakkanti hotī’ti, asesavacanametaṃ, nissesavacanametaṃ, nippariyāyavacanametaṃ, arahassavacanametaṃ, sadevamanussānaṃ majjhe nisīditvā bhaṇitaṃ, ayañca dvinnaṃ sannipātā gabbhassa avakkanti dissati, dukūlena tāpasena pārikāya tāpasiyā utunikāle dakkhiṇena hatthaṅguṭṭhena nābhi parāmaṭṭhā, tassa tena nābhiparāmasanena sāmakumāro nibbatto. Mātaṅgenāpi isinā brāhmaṇakaññāya utunikāle dakkhiṇena hatthaṅguṭṭhena nābhi parāmaṭṭhā, tassa tena nābhiparāmasanena maṇḍabyo nāma māṇavako nibbattoti. Yadi, bhante nāgasena, bhagavatā bhaṇitaṃ ‘tiṇṇaṃ kho pana, bhikkhave, sannipātā gabbhassa avakkanti hotī’ti. Tena hi sāmo ca kumāro maṇḍabyo ca māṇavako ubhopi te nābhiparāmasanena nibbattāti yaṃ vacanaṃ, taṃ micchā. Yadi, bhante, tathāgatena bhaṇitaṃ ‘sāmo ca kumāro maṇḍabyo ca māṇavako nābhiparāmasanena nibbattā’’ti, tena hi ‘tiṇṇaṃ kho pana, bhikkhave, sannipātā gabbhassa avakkanti hotī’ti yaṃ vacanaṃ, tampi micchā. Ayampi ubhato koṭiko pañho sugambhīro sunipuṇo visayo buddhimantānaṃ, so tavānuppatto, chinda vimatipathaṃ, dhārehi ñāṇavarappajjota’’nti.
‘‘பா⁴ஸிதம்பேதங், மஹாராஜ, ப⁴க³வதா ‘திண்ணங் கோ² பன, பி⁴க்க²வே, ஸன்னிபாதா க³ப்³ப⁴ஸ்ஸ அவக்கந்தி ஹோதி, இத⁴ மாதாபிதரோ ச ஸன்னிபதிதா ஹொந்தி, மாதா ச உதுனீ ஹோதி, க³ந்த⁴ப்³போ³ ச பச்சுபட்டி²தோ ஹோதி, ஏவங் திண்ணங் ஸன்னிபாதா க³ப்³ப⁴ஸ்ஸ அவக்கந்தி ஹோதீ’தி. ப⁴ணிதஞ்ச ‘ஸாமோ ச குமாரோ மண்ட³ப்³யோ ச மாணவகோ நாபி⁴பராமஸனேன நிப்³ப³த்தா’’தி. ‘‘தேன ஹி, ப⁴ந்தே நாக³ஸேன, யேன காரணேன பஞ்ஹோ ஸுவினிச்சி²தோ ஹோதி, தேன காரணேன மங் ஸஞ்ஞாபேஹீ’’தி.
‘‘Bhāsitampetaṃ, mahārāja, bhagavatā ‘tiṇṇaṃ kho pana, bhikkhave, sannipātā gabbhassa avakkanti hoti, idha mātāpitaro ca sannipatitā honti, mātā ca utunī hoti, gandhabbo ca paccupaṭṭhito hoti, evaṃ tiṇṇaṃ sannipātā gabbhassa avakkanti hotī’ti. Bhaṇitañca ‘sāmo ca kumāro maṇḍabyo ca māṇavako nābhiparāmasanena nibbattā’’ti. ‘‘Tena hi, bhante nāgasena, yena kāraṇena pañho suvinicchito hoti, tena kāraṇena maṃ saññāpehī’’ti.
‘‘ஸுதபுப்³ப³ங் பன தயா, மஹாராஜ, ஸங்கிச்சோ ச குமாரோ இஸிஸிங்கோ³ ச தாபஸோ தே²ரோ ச குமாரகஸ்ஸபோ ‘இமினா நாம தே நிப்³ப³த்தா’’தி? ‘‘ஆம, ப⁴ந்தே, ஸுய்யதி, அப்³பு⁴க்³க³தா தேஸங் ஜாதி, த்³வே மிக³தே⁴னுயோ தாவ உதுனிகாலே த்³வின்னங் தாபஸானங் பஸ்ஸாவட்டா²னங் ஆக³ந்த்வா ஸஸம்ப⁴வங் பஸ்ஸாவங் பிவிங்ஸு, தேன பஸ்ஸாவஸம்ப⁴வேன ஸங்கிச்சோ ச குமாரோ இஸிஸிங்கோ³ ச தாபஸோ நிப்³ப³த்தா. தே²ரஸ்ஸ உதா³யிஸ்ஸ பி⁴க்கு²னுபஸ்ஸயங் உபக³தஸ்ஸ ரத்தசித்தேன பி⁴க்கு²னியா அங்க³ஜாதங் உபனிஜ்ஜா²யந்தஸ்ஸ ஸம்ப⁴வங் காஸாவே முச்சி. அத² கோ² ஆயஸ்மா உதா³யி தங் பி⁴க்கு²னிங் ஏதத³வோச ‘க³ச்ச² ப⁴கி³னி, உத³கங் ஆஹர அந்தரவாஸகங் தோ⁴விஸ்ஸாமீ’தி. ‘ஆஹரய்ய அஹமேவ தோ⁴விஸ்ஸாமீ’தி. ததோ ஸா பி⁴க்கு²னீ உதுனிஸமயே தங் ஸம்ப⁴வங் ஏகதே³ஸங் முகே²ன அக்³க³ஹேஸி, ஏகதே³ஸங் அங்க³ஜாதே பக்கி²பி, தேன தே²ரோ குமாரகஸ்ஸபோ நிப்³ப³த்தோதி ஏதங் ஜனோ ஆஹா’’தி.
‘‘Sutapubbaṃ pana tayā, mahārāja, saṃkicco ca kumāro isisiṅgo ca tāpaso thero ca kumārakassapo ‘iminā nāma te nibbattā’’ti? ‘‘Āma, bhante, suyyati, abbhuggatā tesaṃ jāti, dve migadhenuyo tāva utunikāle dvinnaṃ tāpasānaṃ passāvaṭṭhānaṃ āgantvā sasambhavaṃ passāvaṃ piviṃsu, tena passāvasambhavena saṃkicco ca kumāro isisiṅgo ca tāpaso nibbattā. Therassa udāyissa bhikkhunupassayaṃ upagatassa rattacittena bhikkhuniyā aṅgajātaṃ upanijjhāyantassa sambhavaṃ kāsāve mucci. Atha kho āyasmā udāyi taṃ bhikkhuniṃ etadavoca ‘gaccha bhagini, udakaṃ āhara antaravāsakaṃ dhovissāmī’ti. ‘Āharayya ahameva dhovissāmī’ti. Tato sā bhikkhunī utunisamaye taṃ sambhavaṃ ekadesaṃ mukhena aggahesi, ekadesaṃ aṅgajāte pakkhipi, tena thero kumārakassapo nibbattoti etaṃ jano āhā’’ti.
‘‘அபி நு கோ² த்வங், மஹாராஜ, ஸத்³த³ஹஸி தங் வசன’’ந்தி? ‘‘ஆம ப⁴ந்தே, ப³லவங் தத்த² மயங் காரணங் உபலபா⁴ம, யேன மயங் காரணேன ஸத்³த³ஹாம ‘இமினா காரணேன நிப்³ப³த்தா’’தி. ‘‘கிங் பனெத்த², மஹாராஜ, காரண’’ந்தி? ‘‘ஸுபரிகம்மகதே , ப⁴ந்தே, கலலே பீ³ஜங் நிபதித்வா கி²ப்பங் ஸங்விருஹதீ’’தி . ‘‘ஆம மஹாராஜா’’தி. ‘‘ஏவமேவ கோ², ப⁴ந்தே, ஸா பி⁴க்கு²னீ உதுனீ ஸமானா ஸண்டி²தே கலலே ருஹிரே பச்சி²ன்னவேகே³ டி²தாய தா⁴துயா தங் ஸம்ப⁴வங் க³ஹெத்வா தஸ்மிங் கலலே பக்கி²பி, தேன தஸ்ஸா க³ப்³போ⁴ ஸண்டா²ஸி, ஏவங் தத்த² காரணங் பச்சேம தேஸங் நிப்³ப³த்தியா’’தி. ‘‘ஏவமேதங், மஹாராஜ, ததா² ஸம்படிச்சா²மி, யோனிப்பவேஸேன க³ப்³போ⁴ ஸம்ப⁴வதீதி. ஸம்படிச்ச²ஸி பன, த்வங் மஹாராஜ, தே²ரஸ்ஸ குமாரகஸ்ஸபஸ்ஸ க³ப்³பா⁴வக்கமன’’ந்தி? ‘‘ஆம ப⁴ந்தே’’தி. ‘‘ஸாது⁴, மஹாராஜ, பச்சாக³தோஸி மம விஸயங், ஏகவிதே⁴னபி க³ப்³பா⁴வக்கந்திங் கத²யந்தோ மமானுப³லங் ப⁴விஸ்ஸஸி, அத² யா பன தா த்³வே மிக³தே⁴னுயோ பஸ்ஸாவங் பிவித்வா க³ப்³ப⁴ங் படிலபி⁴ங்ஸு, தாஸங் த்வங் ஸத்³த³ஹஸி க³ப்³ப⁴ஸ்ஸாவக்கமன’’ந்தி? ‘‘ஆம, ப⁴ந்தே, யங் கிஞ்சி பு⁴த்தங் பீதங் கா²யிதங் லேஹிதங், ஸப்³ப³ங் தங் கலலங் ஓஸரதி, டா²னக³தங் வுட்³டி⁴மாபஜ்ஜதி. யதா², ப⁴ந்தே நாக³ஸேன, யா காசி ஸரிதா நாம, ஸப்³பா³ தா மஹாஸமுத்³த³ங் ஓஸரந்தி, டா²னக³தா வுட்³டி⁴மாபஜ்ஜந்தி. ஏவமேவ கோ², ப⁴ந்தே நாக³ஸேன, யங் கிஞ்சி பு⁴த்தங் பீதங் கா²யிதங் லேஹிதங், ஸப்³ப³ங் தங் கலலங் ஓஸரதி, டா²னக³தங் வுட்³டி⁴மாபஜ்ஜதி, தேனாஹங் காரணேன ஸத்³த³ஹாமி முக²க³தேனபி க³ப்³ப⁴ஸ்ஸ அவக்கந்தி ஹோதீ’’தி. ‘‘ஸாது⁴, மஹாராஜ, கா³ள்ஹதரங் உபக³தோஸி மம விஸயங், முக²பானேனபி த்³வயஸன்னிபாதோ ப⁴வதி. ஸங்கிச்சஸ்ஸ ச, மஹாராஜ, குமாரஸ்ஸ இஸிஸிங்க³ஸ்ஸ ச தாபஸஸ்ஸ தே²ரஸ்ஸ ச குமாரகஸ்ஸபஸ்ஸ க³ப்³பா⁴வக்கமனங் ஸம்படிச்ச²ஸீ’’தி? ‘‘ஆம, ப⁴ந்தே, ஸன்னிபாதோ ஓஸரதீ’’தி.
‘‘Api nu kho tvaṃ, mahārāja, saddahasi taṃ vacana’’nti? ‘‘Āma bhante, balavaṃ tattha mayaṃ kāraṇaṃ upalabhāma, yena mayaṃ kāraṇena saddahāma ‘iminā kāraṇena nibbattā’’ti. ‘‘Kiṃ panettha, mahārāja, kāraṇa’’nti? ‘‘Suparikammakate , bhante, kalale bījaṃ nipatitvā khippaṃ saṃviruhatī’’ti . ‘‘Āma mahārājā’’ti. ‘‘Evameva kho, bhante, sā bhikkhunī utunī samānā saṇṭhite kalale ruhire pacchinnavege ṭhitāya dhātuyā taṃ sambhavaṃ gahetvā tasmiṃ kalale pakkhipi, tena tassā gabbho saṇṭhāsi, evaṃ tattha kāraṇaṃ paccema tesaṃ nibbattiyā’’ti. ‘‘Evametaṃ, mahārāja, tathā sampaṭicchāmi, yonippavesena gabbho sambhavatīti. Sampaṭicchasi pana, tvaṃ mahārāja, therassa kumārakassapassa gabbhāvakkamana’’nti? ‘‘Āma bhante’’ti. ‘‘Sādhu, mahārāja, paccāgatosi mama visayaṃ, ekavidhenapi gabbhāvakkantiṃ kathayanto mamānubalaṃ bhavissasi, atha yā pana tā dve migadhenuyo passāvaṃ pivitvā gabbhaṃ paṭilabhiṃsu, tāsaṃ tvaṃ saddahasi gabbhassāvakkamana’’nti? ‘‘Āma, bhante, yaṃ kiñci bhuttaṃ pītaṃ khāyitaṃ lehitaṃ, sabbaṃ taṃ kalalaṃ osarati, ṭhānagataṃ vuḍḍhimāpajjati. Yathā, bhante nāgasena, yā kāci saritā nāma, sabbā tā mahāsamuddaṃ osaranti, ṭhānagatā vuḍḍhimāpajjanti. Evameva kho, bhante nāgasena, yaṃ kiñci bhuttaṃ pītaṃ khāyitaṃ lehitaṃ, sabbaṃ taṃ kalalaṃ osarati, ṭhānagataṃ vuḍḍhimāpajjati, tenāhaṃ kāraṇena saddahāmi mukhagatenapi gabbhassa avakkanti hotī’’ti. ‘‘Sādhu, mahārāja, gāḷhataraṃ upagatosi mama visayaṃ, mukhapānenapi dvayasannipāto bhavati. Saṃkiccassa ca, mahārāja, kumārassa isisiṅgassa ca tāpasassa therassa ca kumārakassapassa gabbhāvakkamanaṃ sampaṭicchasī’’ti? ‘‘Āma, bhante, sannipāto osaratī’’ti.
‘‘ஸாமோபி, மஹாராஜ, குமாரோ மண்ட³ப்³யோபி மாணவகோ தீஸு ஸன்னிபாதேஸு அந்தோக³தா⁴, ஏகரஸா யேவ புரிமேன, தத்த² காரணங் வக்கா²மி. து³கூலோ ச, மஹாராஜ, தாபஸோ பாரிகா ச தாபஸீ உபோ⁴பி தே அரஞ்ஞவாஸா அஹேஸுங் பவிவேகாதி⁴முத்தா உத்தமத்த²க³வேஸகா, தபதேஜேன யாவ ப்³ரஹ்மலோகங் ஸந்தாபேஸுங் . தேஸங் ததா³ ஸக்கோ தே³வானமிந்தோ³ ஸாயங் பாதங் உபட்டா²னங் ஆக³ச்ச²தி. ஸோ தேஸங் க³ருகதமெத்ததாய உபதா⁴ரெந்தோ அத்³த³ஸ அனாக³தமத்³தா⁴னே த்³வின்னம்பி தேஸங் சக்கூ²னங் அந்தரதா⁴னங், தி³ஸ்வா தே ஏவமாஹ ‘ஏகங் மே, பொ⁴ந்தோ, வசனங் கரோத², ஸாது⁴ ஏகங் புத்தங் ஜனெய்யாத², ஸோ தும்ஹாகங் உபட்டா²கோ ப⁴விஸ்ஸதி ஆலம்ப³னோ சா’தி. ‘அலங், கோஸிய, மா ஏவங் ப⁴ணீ’தி. தே தஸ்ஸ தங் வசனங் ந ஸம்படிச்சி²ங்ஸு. அனுகம்பகோ அத்த²காமோ ஸக்கோ தே³வானமிந்தோ³ து³தியம்பி…பே॰… ததியம்பி தே ஏவமாஹ ‘ஏகங் மே, பொ⁴ந்தோ, வசனங் கரோத², ஸாது⁴ ஏகங் புத்தங் ஜனெய்யாத², ஸோ தும்ஹாகங் உபட்டா²கோ ப⁴விஸ்ஸதி ஆலம்ப³னோ சா’தி. ததியம்பி தே ஆஹங்ஸு ‘அலங், கோஸிய, மா த்வங் கோ² அம்ஹே அனத்தே² நியோஜேஹி, கதா³யங் காயோ ந பி⁴ஜ்ஜிஸ்ஸதி, பி⁴ஜ்ஜது அயங் காயோ பே⁴த³னத⁴ம்மோ, பி⁴ஜ்ஜந்தியாபி த⁴ரணியா பதந்தேபி ஸேலஸிக²ரே ப²லந்தேபி ஆகாஸே பதந்தேபி சந்தி³மஸூரியே நேவ மயங் லோகத⁴ம்மேஹி மிஸ்ஸயிஸ்ஸாம, மா த்வங் அம்ஹாகங் ஸம்முக²பா⁴வங் உபக³ச்ச², உபக³தஸ்ஸ தே ஏஸோ விஸ்ஸாஸோ, அனத்த²சரோ த்வங் மஞ்ஞே’தி.
‘‘Sāmopi, mahārāja, kumāro maṇḍabyopi māṇavako tīsu sannipātesu antogadhā, ekarasā yeva purimena, tattha kāraṇaṃ vakkhāmi. Dukūlo ca, mahārāja, tāpaso pārikā ca tāpasī ubhopi te araññavāsā ahesuṃ pavivekādhimuttā uttamatthagavesakā, tapatejena yāva brahmalokaṃ santāpesuṃ . Tesaṃ tadā sakko devānamindo sāyaṃ pātaṃ upaṭṭhānaṃ āgacchati. So tesaṃ garukatamettatāya upadhārento addasa anāgatamaddhāne dvinnampi tesaṃ cakkhūnaṃ antaradhānaṃ, disvā te evamāha ‘ekaṃ me, bhonto, vacanaṃ karotha, sādhu ekaṃ puttaṃ janeyyātha, so tumhākaṃ upaṭṭhāko bhavissati ālambano cā’ti. ‘Alaṃ, kosiya, mā evaṃ bhaṇī’ti. Te tassa taṃ vacanaṃ na sampaṭicchiṃsu. Anukampako atthakāmo sakko devānamindo dutiyampi…pe… tatiyampi te evamāha ‘ekaṃ me, bhonto, vacanaṃ karotha, sādhu ekaṃ puttaṃ janeyyātha, so tumhākaṃ upaṭṭhāko bhavissati ālambano cā’ti. Tatiyampi te āhaṃsu ‘alaṃ, kosiya, mā tvaṃ kho amhe anatthe niyojehi, kadāyaṃ kāyo na bhijjissati, bhijjatu ayaṃ kāyo bhedanadhammo, bhijjantiyāpi dharaṇiyā patantepi selasikhare phalantepi ākāse patantepi candimasūriye neva mayaṃ lokadhammehi missayissāma, mā tvaṃ amhākaṃ sammukhabhāvaṃ upagaccha, upagatassa te eso vissāso, anatthacaro tvaṃ maññe’ti.
ததோ ஸக்கோ தே³வானமிந்தோ³ தேஸங் மனங் அலப⁴மானோ க³ருகதோ பஞ்ஜலிகோ புன யாசி ‘யதி³ மே வசனங் ந உஸ்ஸஹத² காதுங், யதா³ தாபஸீ உதுனீ ஹோதி புப்ப²வதீ, ததா³ த்வங், ப⁴ந்தே, த³க்கி²ணேன ஹத்த²ங்கு³ட்டே²ன நாபி⁴ங் பராமஸெய்யாஸி, தேன ஸா க³ப்³ப⁴ங் லச்ச²தி, ஸன்னிபாதோ யேவேஸ க³ப்³பா⁴வக்கந்தியா’தி. ‘ஸக்கோமஹங், கோஸிய, தங் வசனங் காதுங், ந தாவதகேன அம்ஹாகங் தபோ பி⁴ஜ்ஜதி, ஹோதூ’தி ஸம்படிச்சி²ங்ஸு. தாய ச பன வேலாய தே³வப⁴வனே அத்தி² தே³வபுத்தோ உஸ்ஸன்னகுஸலமூலோ கீ²ணாயுகோ ஆயுக்க²யப்பத்தோ யதி³ச்ச²கங் ஸமத்தோ² ஓக்கமிதுங் அபி சக்கவத்திகுலேபி. அத² ஸக்கோ தே³வானமிந்தோ³ தங் தே³வபுத்தங் உபஸங்கமித்வா ஏவமாஹ ‘ஏஹி கோ², மாரிஸ, ஸுபபா⁴தோ தே தி³வஸோ, அத்த²ஸித்³தி⁴ உபக³தா, யமஹங் தே உபட்டா²னமாக³மிங், ரமணீயே தே ஓகாஸே வாஸோ ப⁴விஸ்ஸதி, பதிரூபே குலே படிஸந்தி⁴ ப⁴விஸ்ஸதி, ஸுந்த³ரேஹி மாதாபிதூஹி வட்³டே⁴தப்³போ³, ஏஹி மே வசனங் கரோஹீ’தி யாசி. து³தியம்பி…பே॰… ததியம்பி யாசி ஸிரஸி பஞ்ஜலிகதோ.
Tato sakko devānamindo tesaṃ manaṃ alabhamāno garukato pañjaliko puna yāci ‘yadi me vacanaṃ na ussahatha kātuṃ, yadā tāpasī utunī hoti pupphavatī, tadā tvaṃ, bhante, dakkhiṇena hatthaṅguṭṭhena nābhiṃ parāmaseyyāsi, tena sā gabbhaṃ lacchati, sannipāto yevesa gabbhāvakkantiyā’ti. ‘Sakkomahaṃ, kosiya, taṃ vacanaṃ kātuṃ, na tāvatakena amhākaṃ tapo bhijjati, hotū’ti sampaṭicchiṃsu. Tāya ca pana velāya devabhavane atthi devaputto ussannakusalamūlo khīṇāyuko āyukkhayappatto yadicchakaṃ samattho okkamituṃ api cakkavattikulepi. Atha sakko devānamindo taṃ devaputtaṃ upasaṅkamitvā evamāha ‘ehi kho, mārisa, supabhāto te divaso, atthasiddhi upagatā, yamahaṃ te upaṭṭhānamāgamiṃ, ramaṇīye te okāse vāso bhavissati, patirūpe kule paṭisandhi bhavissati, sundarehi mātāpitūhi vaḍḍhetabbo, ehi me vacanaṃ karohī’ti yāci. Dutiyampi…pe… tatiyampi yāci sirasi pañjalikato.
ததோ ஸோ தே³வபுத்தோ ஏவமாஹ ‘கதமங் தங், மாரிஸ, குலங், யங் த்வங் அபி⁴க்க²ணங் கித்தயஸி புனப்புன’ந்தி. ‘து³கூலோ ச தாபஸோ பாரிகா ச தாபஸீ’தி. ஸோ தஸ்ஸ வசனங் ஸுத்வா துட்டோ² ஸம்படிச்சி² ‘ஸாது⁴, மாரிஸ, யோ தவ ச²ந்தோ³, ஸோ ஹோது, ஆகங்க²மானோ அஹங், மாரிஸ, பத்தி²தே குலே உப்பஜ்ஜெய்யங், கிம்ஹி குலே உப்பஜ்ஜாமி அண்ட³ஜே வா ஜலாபு³ஜே வா ஸங்ஸேத³ஜே வா ஓபபாதிகே வா’தி? ‘ஜலாபு³ஜாய, மாரிஸ, யோனியா உப்பஜ்ஜாஹீ’தி. அத² ஸக்கோ தே³வானமிந்தோ³ உப்பத்திதி³வஸங் விக³ணெத்வா து³கூலஸ்ஸ தாபஸஸ்ஸ ஆரோசேஸி ‘அஸுகஸ்மிங் நாம தி³வஸே தாபஸீ உதுனீ ப⁴விஸ்ஸதி புப்ப²வதீ, ததா³ த்வங், ப⁴ந்தே, த³க்கி²ணேன ஹத்த²ங்கு³ட்டே²ன நாபி⁴ங் பராமஸெய்யாஸீ’தி. தஸ்மிங், மஹாராஜ, தி³வஸே தாபஸீ ச உதுனீ புப்ப²வதீ அஹோஸி, தே³வபுத்தோ ச தத்தூ²பகோ³ பச்சுபட்டி²தோ அஹோஸி, தாபஸோ ச த³க்கி²ணேன ஹத்த²ங்கு³ட்டே²ன தாபஸியா நாபி⁴ங் பராமஸி, இதி தே தயோ ஸன்னிபாதா அஹேஸுங், நாபி⁴பராமஸனேன தாபஸியா ராகோ³ உத³பாதி³, ஸோ பனஸ்ஸா ராகோ³ நாபி⁴பராமஸனங் படிச்ச மா த்வங் ஸன்னிபாதங் அஜ்ஜா²சாரமேவ மஞ்ஞி, ஊஹஸனம்பி 3 ஸன்னிபாதோ, உல்லபனம்பி ஸன்னிபாதோ, உபனிஜ்ஜா²யனம்பி ஸன்னிபாதோ, புப்³ப³பா⁴க³பா⁴வதோ ராக³ஸ்ஸ உப்பாதா³ய ஆமஸனேன ஸன்னிபாதோ ஜாயதி, ஸன்னிபாதா ஓக்கமனங் ஹோதீதி.
Tato so devaputto evamāha ‘katamaṃ taṃ, mārisa, kulaṃ, yaṃ tvaṃ abhikkhaṇaṃ kittayasi punappuna’nti. ‘Dukūlo ca tāpaso pārikā ca tāpasī’ti. So tassa vacanaṃ sutvā tuṭṭho sampaṭicchi ‘sādhu, mārisa, yo tava chando, so hotu, ākaṅkhamāno ahaṃ, mārisa, patthite kule uppajjeyyaṃ, kimhi kule uppajjāmi aṇḍaje vā jalābuje vā saṃsedaje vā opapātike vā’ti? ‘Jalābujāya, mārisa, yoniyā uppajjāhī’ti. Atha sakko devānamindo uppattidivasaṃ vigaṇetvā dukūlassa tāpasassa ārocesi ‘asukasmiṃ nāma divase tāpasī utunī bhavissati pupphavatī, tadā tvaṃ, bhante, dakkhiṇena hatthaṅguṭṭhena nābhiṃ parāmaseyyāsī’ti. Tasmiṃ, mahārāja, divase tāpasī ca utunī pupphavatī ahosi, devaputto ca tatthūpago paccupaṭṭhito ahosi, tāpaso ca dakkhiṇena hatthaṅguṭṭhena tāpasiyā nābhiṃ parāmasi, iti te tayo sannipātā ahesuṃ, nābhiparāmasanena tāpasiyā rāgo udapādi, so panassā rāgo nābhiparāmasanaṃ paṭicca mā tvaṃ sannipātaṃ ajjhācārameva maññi, ūhasanampi 4 sannipāto, ullapanampi sannipāto, upanijjhāyanampi sannipāto, pubbabhāgabhāvato rāgassa uppādāya āmasanena sannipāto jāyati, sannipātā okkamanaṃ hotīti.
‘‘அனஜ்ஜா²சாரேபி, மஹாராஜ, பராமஸனேன க³ப்³பா⁴வக்கந்தி ஹோதி. யதா², மஹாராஜ, அக்³கி³ ஜலமானோ அபராமஸனோபி உபக³தஸ்ஸ ஸீதங் ப்³யபஹந்தி, ஏவமேவ கோ², மஹாராஜ, அனஜ்ஜா²சாரேபி பராமஸனேன க³ப்³பா⁴வக்கந்தி ஹோதி.
‘‘Anajjhācārepi, mahārāja, parāmasanena gabbhāvakkanti hoti. Yathā, mahārāja, aggi jalamāno aparāmasanopi upagatassa sītaṃ byapahanti, evameva kho, mahārāja, anajjhācārepi parāmasanena gabbhāvakkanti hoti.
‘‘சதுன்னங், மஹாராஜ, வஸேன ஸத்தானங் க³ப்³பா⁴வக்கந்தி ஹோதி கம்மவஸேன யோனிவஸேன குலவஸேன ஆயாசனவஸேன, அபி ச ஸப்³பே³பேதே ஸத்தா கம்மஸம்ப⁴வா கம்மஸமுட்டா²னா .
‘‘Catunnaṃ, mahārāja, vasena sattānaṃ gabbhāvakkanti hoti kammavasena yonivasena kulavasena āyācanavasena, api ca sabbepete sattā kammasambhavā kammasamuṭṭhānā .
‘‘கத²ங், மஹாராஜ, கம்மவஸேன ஸத்தானங் க³ப்³பா⁴வக்கந்தி ஹோதி? உஸ்ஸன்னகுஸலமூலா, மஹாராஜ, ஸத்தா யதி³ச்ச²கங் உப்பஜ்ஜந்தி க²த்தியமஹாஸாலகுலே வா ப்³ராஹ்மணமஹாஸாலகுலே வா க³ஹபதிமஹாஸாலகுலே வா தே³வேஸு வா அண்ட³ஜாய வா யோனியா ஜலாபு³ஜாய வா யோனியா ஸங்ஸேத³ஜாய வா யோனியா ஓபபாதிகாய வா யோனியா. யதா², மஹாராஜ, புரிஸோ அட்³டோ⁴ மஹத்³த⁴னோ மஹாபோ⁴கோ³ பஹூதஜாதரூபரஜதோ பஹூதவித்தூபகரணோ பஹூதத⁴னத⁴ஞ்ஞோ பஹூதஞாதிபக்கோ² தா³ஸிங் வா தா³ஸங் வா கெ²த்தங் வா வத்து²ங் வா கா³மங் வா நிக³மங் வா ஜனபத³ங் வா யங் கிஞ்சி மனஸா அபி⁴பத்தி²தங், யதி³ச்ச²கங் த்³விகு³ணதிகு³ணம்பி த⁴னங் த³த்வா கிணாதி, ஏவமேவ கோ², மஹாராஜ, உஸ்ஸன்னகுஸலமூலா ஸத்தா யதி³ச்ச²கங் உப்பஜ்ஜந்தி க²த்தியமஹாஸாலகுலே வா ப்³ராஹ்மணமஹாஸாலகுலே வா க³ஹபதிமஹாஸாலகுலே வா தே³வேஸு வா அண்ட³ஜாய வா யோனியா ஜலாபு³ஜாய வா யோனியா ஸங்ஸேத³ஜய வா யோனியா ஓபபாதிகாய வா யோனியா. ஏவங் கம்மவஸேன ஸத்தானங் க³ப்³பா⁴வக்கந்தி ஹோதி.
‘‘Kathaṃ, mahārāja, kammavasena sattānaṃ gabbhāvakkanti hoti? Ussannakusalamūlā, mahārāja, sattā yadicchakaṃ uppajjanti khattiyamahāsālakule vā brāhmaṇamahāsālakule vā gahapatimahāsālakule vā devesu vā aṇḍajāya vā yoniyā jalābujāya vā yoniyā saṃsedajāya vā yoniyā opapātikāya vā yoniyā. Yathā, mahārāja, puriso aḍḍho mahaddhano mahābhogo pahūtajātarūparajato pahūtavittūpakaraṇo pahūtadhanadhañño pahūtañātipakkho dāsiṃ vā dāsaṃ vā khettaṃ vā vatthuṃ vā gāmaṃ vā nigamaṃ vā janapadaṃ vā yaṃ kiñci manasā abhipatthitaṃ, yadicchakaṃ dviguṇatiguṇampi dhanaṃ datvā kiṇāti, evameva kho, mahārāja, ussannakusalamūlā sattā yadicchakaṃ uppajjanti khattiyamahāsālakule vā brāhmaṇamahāsālakule vā gahapatimahāsālakule vā devesu vā aṇḍajāya vā yoniyā jalābujāya vā yoniyā saṃsedajaya vā yoniyā opapātikāya vā yoniyā. Evaṃ kammavasena sattānaṃ gabbhāvakkanti hoti.
‘‘கத²ங் யோனிவஸேன ஸத்தானங் க³ப்³பா⁴வக்கந்தி ஹோதி? குக்குடானங், மஹாராஜ, வாதேன க³ப்³பா⁴வக்கந்தி ஹோதி. ப³லாகானங் மேக⁴ஸத்³தே³ன க³ப்³பா⁴வக்கந்தி ஹோதி. ஸப்³பே³பி தே³வா அக³ப்³ப⁴ஸெய்யகா ஸத்தா யேவ, தேஸங் நானாவண்ணேன க³ப்³பா⁴வக்கந்தி ஹோதி. யதா², மஹாராஜ, மனுஸ்ஸா நானாவண்ணேன மஹியா சரந்தி, கேசி புரதோ படிச்சா²தெ³ந்தி, கேசி பச்ச²தோ படிச்சா²தெ³ந்தி, கேசி நக்³கா³ ஹொந்தி, கேசி ப⁴ண்டூ³ ஹொந்தி ஸேதபடத⁴ரா, கேசி மோளிப³த்³தா⁴ ஹொந்தி, கேசி ப⁴ண்டூ³ காஸாவவஸனா ஹொந்தி, கேசி காஸாவவஸனா மோளிப³த்³தா⁴ ஹொந்தி, கேசி ஜடினோ வாகசீரத⁴ரா 5 ஹொந்தி, கேசி சம்மவஸனா ஹொந்தி, கேசி ரஸ்மியோ நிவாஸெந்தி, ஸப்³பே³பேதே மனுஸ்ஸா நானாவண்ணேன மஹியா சரந்தி, ஏவமேவ கோ², மஹாராஜ, ஸத்தா யேவ தே ஸப்³பே³, தேஸங் நானாவண்ணேன க³ப்³பா⁴வக்கந்தி ஹோதி. ஏவங் யோனிவஸேன ஸத்தானங் க³ப்³பா⁴வக்கந்தி ஹோதி.
‘‘Kathaṃ yonivasena sattānaṃ gabbhāvakkanti hoti? Kukkuṭānaṃ, mahārāja, vātena gabbhāvakkanti hoti. Balākānaṃ meghasaddena gabbhāvakkanti hoti. Sabbepi devā agabbhaseyyakā sattā yeva, tesaṃ nānāvaṇṇena gabbhāvakkanti hoti. Yathā, mahārāja, manussā nānāvaṇṇena mahiyā caranti, keci purato paṭicchādenti, keci pacchato paṭicchādenti, keci naggā honti, keci bhaṇḍū honti setapaṭadharā, keci moḷibaddhā honti, keci bhaṇḍū kāsāvavasanā honti, keci kāsāvavasanā moḷibaddhā honti, keci jaṭino vākacīradharā 6 honti, keci cammavasanā honti, keci rasmiyo nivāsenti, sabbepete manussā nānāvaṇṇena mahiyā caranti, evameva kho, mahārāja, sattā yeva te sabbe, tesaṃ nānāvaṇṇena gabbhāvakkanti hoti. Evaṃ yonivasena sattānaṃ gabbhāvakkanti hoti.
‘‘கத²ங் குலவஸேன ஸத்தானங் க³ப்³பா⁴வக்கந்தி ஹோதி? குலங் நாம, மஹாராஜ, சத்தாரி குலானி அண்ட³ஜங் ஜலாபு³ஜங் ஸங்ஸேத³ஜங் ஓபபாதிகங். யதி³ தத்த² க³ந்த⁴ப்³போ³ யதோ குதோசி ஆக³ந்த்வா அண்ட³ஜே குலே உப்பஜ்ஜதி, ஸோ தத்த² அண்ட³ஜோ ஹோதி…பே॰… ஜலாபு³ஜே குலே…பே॰… ஸங்ஸேத³ஜே குலே…பே॰… ஓபபாதிகே குலே உப்பஜ்ஜதி, ஸோ தத்த² ஓபபாதிகோ ஹோதி. தேஸு தேஸு குலேஸு தாதி³ஸா யேவ ஸத்தா ஸம்ப⁴வந்தி. யதா², மஹாராஜ, ஹிமவதி நேருபப்³ப³தங் யே கேசி மிக³பக்கி²னோ உபெந்தி, ஸப்³பே³ தே ஸகவண்ணங் விஜஹித்வா ஸுவண்ணவண்ணா ஹொந்தி, ஏவமேவ கோ², மஹாராஜ, யோ கோசி க³ந்த⁴ப்³போ³ யதோ குதோசி ஆக³ந்த்வா அண்ட³ஜங் யோனிங் உபக³ந்த்வா ஸபா⁴வவண்ணங் விஜஹித்வா அண்ட³ஜோ ஹோதி…பே॰… ஜலாபு³ஜங்…பே॰… ஸங்ஸேத³ஜங்…பே॰… ஓபபாதிகங் யோனிங் உபக³ந்த்வா ஸபா⁴வவண்ணங் விஜஹித்வா ஓபபாதிகோ ஹோதி, ஏவங் குலவஸேன ஸத்தானங் க³ப்³பா⁴வக்கந்தி ஹோதி.
‘‘Kathaṃ kulavasena sattānaṃ gabbhāvakkanti hoti? Kulaṃ nāma, mahārāja, cattāri kulāni aṇḍajaṃ jalābujaṃ saṃsedajaṃ opapātikaṃ. Yadi tattha gandhabbo yato kutoci āgantvā aṇḍaje kule uppajjati, so tattha aṇḍajo hoti…pe… jalābuje kule…pe… saṃsedaje kule…pe… opapātike kule uppajjati, so tattha opapātiko hoti. Tesu tesu kulesu tādisā yeva sattā sambhavanti. Yathā, mahārāja, himavati nerupabbataṃ ye keci migapakkhino upenti, sabbe te sakavaṇṇaṃ vijahitvā suvaṇṇavaṇṇā honti, evameva kho, mahārāja, yo koci gandhabbo yato kutoci āgantvā aṇḍajaṃ yoniṃ upagantvā sabhāvavaṇṇaṃ vijahitvā aṇḍajo hoti…pe… jalābujaṃ…pe… saṃsedajaṃ…pe… opapātikaṃ yoniṃ upagantvā sabhāvavaṇṇaṃ vijahitvā opapātiko hoti, evaṃ kulavasena sattānaṃ gabbhāvakkanti hoti.
‘‘கத²ங் ஆயாசனவஸேன ஸத்தானங் க³ப்³பா⁴வக்கந்தி ஹோதி? இத⁴, மஹாராஜ, குலங் ஹோதி அபுத்தகங் ப³ஹுஸாபதெய்யங் ஸத்³த⁴ங் பஸன்னங் ஸீலவந்தங் கல்யாணத⁴ம்மங் தபனிஸ்ஸிதங், தே³வபுத்தோ ச உஸ்ஸன்னகுஸலமூலோ சவனத⁴ம்மோ ஹோதி. அத² ஸக்கோ தே³வானமிந்தோ³ தஸ்ஸ குலஸ்ஸ அனுகம்பாய தங் தே³வபுத்தங் ஆயாசதி ‘பணிதே⁴ஹி, மாரிஸ, அஸுகஸ்ஸ குலஸ்ஸ மஹேஸியா குச்சி²’ந்தி. ஸோ தஸ்ஸ ஆயாசனஹேது தங் குலங் பணிதே⁴தி. யதா², மஹாராஜ, மனுஸ்ஸா புஞ்ஞகாமா ஸமணங் மனோபா⁴வனீயங் ஆயாசித்வா கே³ஹங் உபனெந்தி, அயங் உபக³ந்த்வா ஸப்³ப³ஸ்ஸ குலஸ்ஸ ஸுகா²வஹோ ப⁴விஸ்ஸதீதி. ஏவமேவ கோ², மஹாராஜ, ஸக்கோ தே³வானமிந்தோ³ தங் தே³வபுத்தங் ஆயாசித்வா தங் குலங் உபனேதி. ஏவங் ஆயாசனவஸேன ஸத்தானங் க³ப்³பா⁴வக்கந்தி ஹோதி.
‘‘Kathaṃ āyācanavasena sattānaṃ gabbhāvakkanti hoti? Idha, mahārāja, kulaṃ hoti aputtakaṃ bahusāpateyyaṃ saddhaṃ pasannaṃ sīlavantaṃ kalyāṇadhammaṃ tapanissitaṃ, devaputto ca ussannakusalamūlo cavanadhammo hoti. Atha sakko devānamindo tassa kulassa anukampāya taṃ devaputtaṃ āyācati ‘paṇidhehi, mārisa, asukassa kulassa mahesiyā kucchi’nti. So tassa āyācanahetu taṃ kulaṃ paṇidheti. Yathā, mahārāja, manussā puññakāmā samaṇaṃ manobhāvanīyaṃ āyācitvā gehaṃ upanenti, ayaṃ upagantvā sabbassa kulassa sukhāvaho bhavissatīti. Evameva kho, mahārāja, sakko devānamindo taṃ devaputtaṃ āyācitvā taṃ kulaṃ upaneti. Evaṃ āyācanavasena sattānaṃ gabbhāvakkanti hoti.
‘‘ஸாமோ, மஹாராஜ, குமாரோ ஸக்கேன தே³வானமிந்தே³ன ஆயாசிதோ பாரிகாய தாபஸியா குச்சி²ங் ஓக்கந்தோ. ஸாமோ, மஹாராஜ, குமாரோ கதபுஞ்ஞோ, மாதாபிதரோ ஸீலவந்தோ கல்யாணத⁴ம்மா, ஆயாசகோ ஸக்கோ, திண்ணங் சேதோபணிதி⁴யா ஸாமோ குமாரோ நிப்³ப³த்தோ. இத⁴, மஹாராஜ, நயகுஸலோ புரிஸோ ஸுகட்டே² அனூபகெ²த்தே பீ³ஜங் ரோபெய்ய, அபி நு தஸ்ஸ பீ³ஜஸ்ஸ அந்தராயங் விவஜ்ஜெந்தஸ்ஸ வுட்³டி⁴யா கோசி அந்தராயோ ப⁴வெய்யா’’தி ? ‘‘ந ஹி, ப⁴ந்தே, நிருபகா⁴தங் பீ³ஜங் கி²ப்பங் ஸங்விருஹெய்யா’’தி. ‘‘ஏவமேவ கோ², மஹாராஜ, ஸாமோ குமாரோ முத்தோ உப்பன்னந்தராயேஹி திண்ணங் சேதோபணிதி⁴யா நிப்³ப³த்தோ.
‘‘Sāmo, mahārāja, kumāro sakkena devānamindena āyācito pārikāya tāpasiyā kucchiṃ okkanto. Sāmo, mahārāja, kumāro katapuñño, mātāpitaro sīlavanto kalyāṇadhammā, āyācako sakko, tiṇṇaṃ cetopaṇidhiyā sāmo kumāro nibbatto. Idha, mahārāja, nayakusalo puriso sukaṭṭhe anūpakhette bījaṃ ropeyya, api nu tassa bījassa antarāyaṃ vivajjentassa vuḍḍhiyā koci antarāyo bhaveyyā’’ti ? ‘‘Na hi, bhante, nirupaghātaṃ bījaṃ khippaṃ saṃviruheyyā’’ti. ‘‘Evameva kho, mahārāja, sāmo kumāro mutto uppannantarāyehi tiṇṇaṃ cetopaṇidhiyā nibbatto.
‘‘அபி நு கோ², மஹாராஜ, ஸுதபுப்³ப³ங் தயா இஸீனங் மனோபதோ³ஸேன இத்³தோ⁴ பீ²தோ மஹாஜனபதோ³ ஸஜனோ ஸமுச்சி²ன்னோ’’தி? ‘‘ஆம, ப⁴ந்தே, ஸுய்யதி. மஹியா த³ண்ட³காரஞ்ஞங் 7 மஜ்ஜா²ரஞ்ஞங் காலிங்கா³ரஞ்ஞங் மாதங்கா³ரஞ்ஞங், ஸப்³ப³ங் தங் அரஞ்ஞங் அரஞ்ஞபூ⁴தங், ஸப்³பே³பேதே ஜனபதா³ இஸீனங் மனோபதோ³ஸேன க²யங் க³தா’’தி. ‘‘யதி³ , மஹாராஜ, தேஸங் மனோபதோ³ஸேன ஸுஸமித்³தா⁴ ஜனபதா³ உச்சி²ஜ்ஜந்தி, அபி நு கோ² தேஸங் மனோபஸாதே³ன கிஞ்சி நிப்³ப³த்தெய்யா’’தி? ‘‘ஆம ப⁴ந்தே’’தி. ‘‘தேன ஹி, மஹாராஜ, ஸாமோ குமாரோ திண்ணங் ப³லவந்தானங் சேதோபஸாதே³ன நிப்³ப³த்தோ இஸினிம்மிதோ தே³வனிம்மிதோ புஞ்ஞனிம்மிதோதி. ஏவமேதங், மஹாராஜ, தா⁴ரேஹி.
‘‘Api nu kho, mahārāja, sutapubbaṃ tayā isīnaṃ manopadosena iddho phīto mahājanapado sajano samucchinno’’ti? ‘‘Āma, bhante, suyyati. Mahiyā daṇḍakāraññaṃ 8 majjhāraññaṃ kāliṅgāraññaṃ mātaṅgāraññaṃ, sabbaṃ taṃ araññaṃ araññabhūtaṃ, sabbepete janapadā isīnaṃ manopadosena khayaṃ gatā’’ti. ‘‘Yadi , mahārāja, tesaṃ manopadosena susamiddhā janapadā ucchijjanti, api nu kho tesaṃ manopasādena kiñci nibbatteyyā’’ti? ‘‘Āma bhante’’ti. ‘‘Tena hi, mahārāja, sāmo kumāro tiṇṇaṃ balavantānaṃ cetopasādena nibbatto isinimmito devanimmito puññanimmitoti. Evametaṃ, mahārāja, dhārehi.
‘‘தயோமே, மஹாராஜ, தே³வபுத்தா ஸக்கேன தே³வானமிந்தே³ன ஆயாசிதா குலங் உப்பன்னா. கதமே தயோ? ஸாமோ குமாரோ மஹாபனாதோ³ குஸராஜா, தயோபேதே போ³தி⁴ஸத்தா’’தி. ‘‘ஸுனித்³தி³ட்டா², ப⁴ந்தே நாக³ஸேன, க³ப்³பா⁴வக்கந்தி, ஸுகதி²தங் காரணங், அந்த⁴காரோ ஆலோகோ கதோ, ஜடா விஜடிதா, நிச்சு²த்³தா⁴ பரவாதா³, ஏவமேதங் ததா² ஸம்படிச்சா²மீ’’தி.
‘‘Tayome, mahārāja, devaputtā sakkena devānamindena āyācitā kulaṃ uppannā. Katame tayo? Sāmo kumāro mahāpanādo kusarājā, tayopete bodhisattā’’ti. ‘‘Suniddiṭṭhā, bhante nāgasena, gabbhāvakkanti, sukathitaṃ kāraṇaṃ, andhakāro āloko kato, jaṭā vijaṭitā, nicchuddhā paravādā, evametaṃ tathā sampaṭicchāmī’’ti.
க³ப்³பா⁴வக்கந்திபஞ்ஹோ ச²ட்டோ².
Gabbhāvakkantipañho chaṭṭho.
Footnotes:
