| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༦༢. གབྦྷཝཱིསཱུཔསམྤདཱནུཛཱནནཱ
62. Gabbhavīsūpasampadānujānanā
༡༢༤. ཏེན ཁོ པན སམཡེན ཨཱཡསྨཱ ཀུམཱརཀསྶཔོ གབྦྷཝཱིསོ ཨུཔསམྤནྣོ ཨཧོསི། ཨཐ ཁོ ཨཱཡསྨཏོ ཀུམཱརཀསྶཔསྶ ཨེཏདཧོསི – ‘‘བྷགཝཏཱ པཉྙཏྟཾ ‘ན ཨཱུནཝཱིསཏིཝསྶོ པུགྒལོ ཨུཔསམྤཱདེཏབྦོ’ཏི། ཨཧཉྩམྷི གབྦྷཝཱིསོ ཨུཔསམྤནྣོ། ཨུཔསམྤནྣོ ནུ ཁོམྷི, ནནུ ཁོ ཨུཔསམྤནྣོ’’ཏི? བྷགཝཏོ ཨེཏམཏྠཾ ཨཱརོཙེསུཾ། ཡཾ, བྷིཀྑཝེ, མཱཏུཀུཙྪིསྨིཾ པཋམཾ ཙིཏྟཾ ཨུཔྤནྣཾ, པཋམཾ ཝིཉྙཱཎཾ པཱཏུབྷཱུཏཾ , ཏདུཔཱདཱཡ སཱཝསྶ ཛཱཏི། ཨནུཛཱནཱམི, བྷིཀྑཝེ, གབྦྷཝཱིསཾ ཨུཔསམྤཱདེཏུནྟི།
124. Tena kho pana samayena āyasmā kumārakassapo gabbhavīso upasampanno ahosi. Atha kho āyasmato kumārakassapassa etadahosi – ‘‘bhagavatā paññattaṃ ‘na ūnavīsativasso puggalo upasampādetabbo’ti. Ahañcamhi gabbhavīso upasampanno. Upasampanno nu khomhi, nanu kho upasampanno’’ti? Bhagavato etamatthaṃ ārocesuṃ. Yaṃ, bhikkhave, mātukucchismiṃ paṭhamaṃ cittaṃ uppannaṃ, paṭhamaṃ viññāṇaṃ pātubhūtaṃ , tadupādāya sāvassa jāti. Anujānāmi, bhikkhave, gabbhavīsaṃ upasampādetunti.
