| Library / Tipiṭaka / तिपिटक • Tipiṭaka / उदानपाळि • Udānapāḷi |
६. गब्भिनीसुत्तं
6. Gabbhinīsuttaṃ
१६. एवं मे सुतं – एकं समयं भगवा सावत्थियं विहरति जेतवने अनाथपिण्डिकस्स आरामे। तेन खो पन समयेन अञ्ञतरस्स परिब्बाजकस्स दहरमाणविका पजापति होति गब्भिनी उपविजञ्ञा। अथ खो सा परिब्बाजिका तं परिब्बाजकं एतदवोच – ‘‘गच्छ त्वं, ब्राह्मण, तेलं आहर, यं मे विजाताय भविस्सती’’ति।
16. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarassa paribbājakassa daharamāṇavikā pajāpati hoti gabbhinī upavijaññā. Atha kho sā paribbājikā taṃ paribbājakaṃ etadavoca – ‘‘gaccha tvaṃ, brāhmaṇa, telaṃ āhara, yaṃ me vijātāya bhavissatī’’ti.
एवं वुत्ते, सो परिब्बाजको तं परिब्बाजिकं एतदवोच – ‘‘कुतो पनाहं, भोति 1, तेलं आहरामी’’ति? दुतियम्पि खो सा परिब्बाजिका तं परिब्बाजकं एतदवोच – ‘‘गच्छ त्वं, ब्राह्मण, तेलं आहर, यं मे विजाताय भविस्सती’’ति। दुतियम्पि खो सो परिब्बाजिको तं परिब्बाजिकं एतदवोच – ‘‘कुतो पनाहं, भोति, तेलं आहरामी’’ति? ततियम्पि खो सा परिब्बाजिका तं परिब्बाजकं एतदवोच – ‘‘गच्छ त्वं, ब्राह्मण, तेलं आहर, यं मे विजाताय भविस्सती’’ति।
Evaṃ vutte, so paribbājako taṃ paribbājikaṃ etadavoca – ‘‘kuto panāhaṃ, bhoti 2, telaṃ āharāmī’’ti? Dutiyampi kho sā paribbājikā taṃ paribbājakaṃ etadavoca – ‘‘gaccha tvaṃ, brāhmaṇa, telaṃ āhara, yaṃ me vijātāya bhavissatī’’ti. Dutiyampi kho so paribbājiko taṃ paribbājikaṃ etadavoca – ‘‘kuto panāhaṃ, bhoti, telaṃ āharāmī’’ti? Tatiyampi kho sā paribbājikā taṃ paribbājakaṃ etadavoca – ‘‘gaccha tvaṃ, brāhmaṇa, telaṃ āhara, yaṃ me vijātāya bhavissatī’’ti.
तेन खो पन समयेन रञ्ञो पसेनदिस्स कोसलस्स कोट्ठागारे समणस्स वा ब्राह्मणस्स वा सप्पिस्स वा तेलस्स वा यावदत्थं पातुं दीयति 3, नो नीहरितुं।
Tena kho pana samayena rañño pasenadissa kosalassa koṭṭhāgāre samaṇassa vā brāhmaṇassa vā sappissa vā telassa vā yāvadatthaṃ pātuṃ dīyati 4, no nīharituṃ.
अथ खो तस्स परिब्बाजकस्स एतदहोसि – ‘‘रञ्ञो खो पन पसेनदिस्स कोसलस्स कोट्ठागारे समणस्स वा ब्राह्मणस्स वा सप्पिस्स वा तेलस्स वा यावदत्थं पातुं दीयति, नो नीहरितुं। यंनूनाहं रञ्ञो पसेनदिस्स कोसलस्स कोट्ठागारं गन्त्वा तेलस्स यावदत्थं पिवित्वा घरं आगन्त्वा उच्छद्दित्वान 5 ददेय्यं, यं इमिस्सा विजाताय भविस्सती’’ति।
Atha kho tassa paribbājakassa etadahosi – ‘‘rañño kho pana pasenadissa kosalassa koṭṭhāgāre samaṇassa vā brāhmaṇassa vā sappissa vā telassa vā yāvadatthaṃ pātuṃ dīyati, no nīharituṃ. Yaṃnūnāhaṃ rañño pasenadissa kosalassa koṭṭhāgāraṃ gantvā telassa yāvadatthaṃ pivitvā gharaṃ āgantvā ucchadditvāna 6 dadeyyaṃ, yaṃ imissā vijātāya bhavissatī’’ti.
अथ खो सो परिब्बाजको रञ्ञो पसेनदिस्स कोसलस्स कोट्ठागारं गन्त्वा तेलस्स यावदत्थं पिवित्वा घरं आगन्त्वा नेव सक्कोति उद्धं कातुं, न पन अधो। सो दुक्खाहि तिब्बाहि 7 खराहि कटुकाहि वेदनाहि फुट्ठो आवट्टति परिवट्टति।
Atha kho so paribbājako rañño pasenadissa kosalassa koṭṭhāgāraṃ gantvā telassa yāvadatthaṃ pivitvā gharaṃ āgantvā neva sakkoti uddhaṃ kātuṃ, na pana adho. So dukkhāhi tibbāhi 8 kharāhi kaṭukāhi vedanāhi phuṭṭho āvaṭṭati parivaṭṭati.
अथ खो भगवा पुब्बण्हसमयं निवासेत्वा पत्तचीवरमादाय सावत्थिं पिण्डाय पाविसि। अद्दसा खो भगवा तं परिब्बाजकं दुक्खाहि तिब्बाहि खराहि कटुकाहि वेदनाहि फुट्ठं आवट्टमानं परिवट्टमानं।
Atha kho bhagavā pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi. Addasā kho bhagavā taṃ paribbājakaṃ dukkhāhi tibbāhi kharāhi kaṭukāhi vedanāhi phuṭṭhaṃ āvaṭṭamānaṃ parivaṭṭamānaṃ.
अथ खो भगवा एतमत्थं विदित्वा तायं वेलायं इमं उदानं उदानेसि –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘सुखिनो वत ये अकिञ्चना,
‘‘Sukhino vata ye akiñcanā,
वेदगुनो हि जना अकिञ्चना।
Vedaguno hi janā akiñcanā;
सकिञ्चनं पस्स विहञ्ञमानं,
Sakiñcanaṃ passa vihaññamānaṃ,
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / उदान-अट्ठकथा • Udāna-aṭṭhakathā / ६. गब्भिनीसुत्तवण्णना • 6. Gabbhinīsuttavaṇṇanā
