| Library / Tipiṭaka / திபிடக • Tipiṭaka / த்³வேமாதிகாபாளி • Dvemātikāpāḷi |
7. க³ப்³பி⁴னீவக்³கோ³
7. Gabbhinīvaggo
1. க³ப்³பி⁴னீஸிக்கா²பத³வண்ணனா
1. Gabbhinīsikkhāpadavaṇṇanā
க³ப்³பி⁴னிவக்³க³ஸ்ஸ பட²மே ‘‘க³ப்³பி⁴னீ’’தி ஜானித்வா உபஜ்ஜா²யாய வுட்டா²பெந்தியா க³ணபரியேஸனாதீ³ஸு ச ஞத்திகம்மவாசாத்³வயே ச து³க்கடங், கம்மவாசாபரியோஸானே பாசித்தியங்.
Gabbhinivaggassa paṭhame ‘‘gabbhinī’’ti jānitvā upajjhāyāya vuṭṭhāpentiyā gaṇapariyesanādīsu ca ñattikammavācādvaye ca dukkaṭaṃ, kammavācāpariyosāne pācittiyaṃ.
ஸாவத்தி²யங் ஸம்ப³ஹுலா பி⁴க்கு²னியோ ஆரப்³ப⁴ க³ப்³பி⁴னிங் வுட்டா²பனவத்து²ஸ்மிங் பஞ்ஞத்தங், க³ப்³பி⁴னியா வேமதிகாய அக³ப்³பி⁴னியா க³ப்³பி⁴னிஸஞ்ஞாய சேவ வேமதிகாய ச து³க்கடங். உபோ⁴ஸு அக³ப்³பி⁴னிஸஞ்ஞாய, உம்மத்திகாதீ³னஞ்ச அனாபத்தி. க³ப்³பி⁴னிதா, ‘க³ப்³பி⁴னீ’தி ஜானநங், வுட்டா²பனந்தி இமானெத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ங் பன பண்ணத்திவஜ்ஜங், திசித்தங், திவேத³னந்தி.
Sāvatthiyaṃ sambahulā bhikkhuniyo ārabbha gabbhiniṃ vuṭṭhāpanavatthusmiṃ paññattaṃ, gabbhiniyā vematikāya agabbhiniyā gabbhinisaññāya ceva vematikāya ca dukkaṭaṃ. Ubhosu agabbhinisaññāya, ummattikādīnañca anāpatti. Gabbhinitā, ‘gabbhinī’ti jānanaṃ, vuṭṭhāpananti imānettha tīṇi aṅgāni. Samuṭṭhānādīni adinnādānasadisāni, idaṃ pana paṇṇattivajjaṃ, ticittaṃ, tivedananti.
க³ப்³பி⁴னீஸிக்கா²பத³வண்ணனா நிட்டி²தா.
Gabbhinīsikkhāpadavaṇṇanā niṭṭhitā.
2. பாயந்தீஸிக்கா²பத³வண்ணனா
2. Pāyantīsikkhāpadavaṇṇanā
து³தியே பாயந்திந்தி த²ஞ்ஞங் பாயமானங், யங் பாயேதி, தஸ்ஸ மாதா வா, தா⁴தி வா. இத³ங் வத்து²மத்தமேவெத்த² விஸேஸோ, ஸேஸங் பட²மஸிக்கா²பத³ஸதி³ஸமேவாதி.
Dutiye pāyantinti thaññaṃ pāyamānaṃ, yaṃ pāyeti, tassa mātā vā, dhāti vā. Idaṃ vatthumattamevettha viseso, sesaṃ paṭhamasikkhāpadasadisamevāti.
பாயந்தீஸிக்கா²பத³வண்ணனா நிட்டி²தா.
Pāyantīsikkhāpadavaṇṇanā niṭṭhitā.
3. பட²மஸிக்க²மானஸிக்கா²பத³வண்ணனா
3. Paṭhamasikkhamānasikkhāpadavaṇṇanā
ததியே த்³வே வஸ்ஸானீதி பவாரணாவஸேன த்³வே ஸங்வச்ச²ரானி. ச²ஸு த⁴ம்மேஸூதி பாணாதிபாதாவேரமணிஆதீ³ஸு விகாலபோ⁴ஜனாவேரமணிபரியோஸானேஸு ச²ஸு ஸிக்கா²பதே³ஸு. அஸிக்கி²தஸிக்க²ந்தி பத³பா⁴ஜனே (பாசி॰ 1077) வுத்தனயேனேவ அதி³ன்னஸிக்க²ங் வா குபிதஸிக்க²ங் வா. ஸிக்க²மானங் வுட்டா²பெய்யாதி தேஸு ச²ஸு த⁴ம்மேஸு ஸிக்க²னதோ, தே வா ஸிக்கா²ஸங்கா²தே த⁴ம்மே மானநதோ ஏவங்லத்³த⁴னாமங் அனுபஸம்பன்னங் உபஸம்பாதெ³ய்ய. பாசித்தியந்தி பட²மஸிக்கா²பதே³ வுத்தனயேனேவ கம்மவாசாபரியோஸானே பாசித்தியங்.
Tatiye dve vassānīti pavāraṇāvasena dve saṃvaccharāni. Chasu dhammesūti pāṇātipātāveramaṇiādīsu vikālabhojanāveramaṇipariyosānesu chasu sikkhāpadesu. Asikkhitasikkhanti padabhājane (pāci. 1077) vuttanayeneva adinnasikkhaṃ vā kupitasikkhaṃ vā. Sikkhamānaṃ vuṭṭhāpeyyāti tesu chasu dhammesu sikkhanato, te vā sikkhāsaṅkhāte dhamme mānanato evaṃladdhanāmaṃ anupasampannaṃ upasampādeyya. Pācittiyanti paṭhamasikkhāpade vuttanayeneva kammavācāpariyosāne pācittiyaṃ.
ஸாவத்தி²யங் ஸம்ப³ஹுலா பி⁴க்கு²னியோ ஆரப்³ப⁴ ஏவரூபங் ஸிக்க²மானங் வுட்டா²பனவத்து²ஸ்மிங் பஞ்ஞத்தங், த⁴ம்மகம்மே திகபாசித்தியங், அத⁴ம்மகம்மே திகது³க்கடங். த்³வே வஸ்ஸானி ச²ஸு த⁴ம்மேஸு ஸிக்கி²தஸிக்க²ங் ஸிக்க²மானங் வுட்டா²பெந்தியா, உம்மத்திகாதீ³னஞ்ச அனாபத்தி. வுத்தனயேன அஸிக்கி²தஸிக்க²தா, த⁴ம்மகம்மதா, கம்மவாசாபரியோஸானந்தி இமானெத்த² தீணி அங்கா³னி. ஸமுட்டா²னாதீ³னி பட²மே வுத்தனயானேவாதி.
Sāvatthiyaṃ sambahulā bhikkhuniyo ārabbha evarūpaṃ sikkhamānaṃ vuṭṭhāpanavatthusmiṃ paññattaṃ, dhammakamme tikapācittiyaṃ, adhammakamme tikadukkaṭaṃ. Dve vassāni chasu dhammesu sikkhitasikkhaṃ sikkhamānaṃ vuṭṭhāpentiyā, ummattikādīnañca anāpatti. Vuttanayena asikkhitasikkhatā, dhammakammatā, kammavācāpariyosānanti imānettha tīṇi aṅgāni. Samuṭṭhānādīni paṭhame vuttanayānevāti.
பட²மஸிக்க²மானஸிக்கா²பத³வண்ணனா நிட்டி²தா.
Paṭhamasikkhamānasikkhāpadavaṇṇanā niṭṭhitā.
4. து³தியஸிக்க²மானஸிக்கா²பத³வண்ணனா
4. Dutiyasikkhamānasikkhāpadavaṇṇanā
சதுத்தே² ஸங்கே⁴ன அஸம்மதந்தி யஸ்ஸா ஸங்கே⁴ன அந்தமஸோ உபஸம்பதா³மாளகேபி பத³பா⁴ஜனே (பாசி॰ 1086) வுத்தா உபஸம்பதா³ஸம்முதி ந தி³ன்னா ஹோதி, தங் இமா த்³வேபி மஹாஸிக்க²மானா நாம. இத⁴ ஸங்கே⁴ன ஸம்மதங் வுட்டா²பெந்தியா, உம்மத்திகாதீ³னஞ்ச அனாபத்தி. ஸேஸங் ததியே வுத்தஸதி³ஸமேவ, இத³ங் பன கிரியாகிரியங் ஹோதீதி.
Catutthe saṅghena asammatanti yassā saṅghena antamaso upasampadāmāḷakepi padabhājane (pāci. 1086) vuttā upasampadāsammuti na dinnā hoti, taṃ imā dvepi mahāsikkhamānā nāma. Idha saṅghena sammataṃ vuṭṭhāpentiyā, ummattikādīnañca anāpatti. Sesaṃ tatiye vuttasadisameva, idaṃ pana kiriyākiriyaṃ hotīti.
து³தியஸிக்க²மானஸிக்கா²பத³வண்ணனா நிட்டி²தா.
Dutiyasikkhamānasikkhāpadavaṇṇanā niṭṭhitā.
5. பட²மகி³ஹிக³தஸிக்கா²பத³வண்ணனா
5. Paṭhamagihigatasikkhāpadavaṇṇanā
பஞ்சமே கி³ஹிக³தந்தி புரிஸந்தரக³தங், இதா⁴பி இத³ங் வத்து²மத்தமேவ விஸேஸோ. ஊனத்³வாத³ஸவஸ்ஸஞ்ச பரிபுண்ணஸஞ்ஞாய வுட்டா²பெந்தியா கிஞ்சாபி அனாபத்தி, ஸா பன அனுபஸம்பன்னாவ ஹோதி. ஸேஸங் பட²மஸிக்கா²பத³ஸதி³ஸமேவாதி.
Pañcame gihigatanti purisantaragataṃ, idhāpi idaṃ vatthumattameva viseso. Ūnadvādasavassañca paripuṇṇasaññāya vuṭṭhāpentiyā kiñcāpi anāpatti, sā pana anupasampannāva hoti. Sesaṃ paṭhamasikkhāpadasadisamevāti.
பட²மகி³ஹிக³தஸிக்கா²பத³வண்ணனா நிட்டி²தா.
Paṭhamagihigatasikkhāpadavaṇṇanā niṭṭhitā.
6-7. து³தியததியகி³ஹிக³தஸிக்கா²பத³வண்ணனா
6-7. Dutiyatatiyagihigatasikkhāpadavaṇṇanā
ச²ட்டே² ஸப்³ப³ங் ததியே வுத்தனயேன. ஸத்தமேபி ஸப்³ப³ங் சதுத்தே² வுத்தனயேனேவ வேதி³தப்³ப³ந்தி.
Chaṭṭhe sabbaṃ tatiye vuttanayena. Sattamepi sabbaṃ catutthe vuttanayeneva veditabbanti.
து³தியததியகி³ஹிக³தஸிக்கா²பத³வண்ணனா நிட்டி²தா.
Dutiyatatiyagihigatasikkhāpadavaṇṇanā niṭṭhitā.
8. பட²மஸஹஜீவினிஸிக்கா²பத³வண்ணனா
8. Paṭhamasahajīvinisikkhāpadavaṇṇanā
அட்ட²மே ஸஹஜீவினிந்தி ஸத்³தி⁴விஹாரினிங். நேவ அனுக்³க³ண்ஹெய்யாதி ஸயங் உத்³தே³ஸாதீ³ஹி நானுக்³க³ண்ஹெய்ய. ந அனுக்³க³ண்ஹாபெய்யாதி ‘‘இமிஸ்ஸா, அய்யே, உத்³தே³ஸாதீ³னி தே³ஹீ’’தி ஏவங் ந அஞ்ஞாய அனுக்³க³ண்ஹாபெய்ய. பாசித்தியந்தி து⁴ரே நிக்கி²த்தமத்தே பாசித்தியங்.
Aṭṭhame sahajīvininti saddhivihāriniṃ. Neva anuggaṇheyyāti sayaṃ uddesādīhi nānuggaṇheyya. Na anuggaṇhāpeyyāti ‘‘imissā, ayye, uddesādīni dehī’’ti evaṃ na aññāya anuggaṇhāpeyya. Pācittiyanti dhure nikkhittamatte pācittiyaṃ.
ஸாவத்தி²யங் து²ல்லனந்த³ங் ஆரப்³ப⁴ ஏவரூபே வத்து²ஸ்மிங் பஞ்ஞத்தங், ஸேஸமெத்த² துவட்டவக்³கே³ து³க்கி²தஸஹஜீவினிஸிக்கா²பதே³ வுத்தஸதி³ஸமேவாதி.
Sāvatthiyaṃ thullanandaṃ ārabbha evarūpe vatthusmiṃ paññattaṃ, sesamettha tuvaṭṭavagge dukkhitasahajīvinisikkhāpade vuttasadisamevāti.
பட²மஸஹஜீவினிஸிக்கா²பத³வண்ணனா நிட்டி²தா.
Paṭhamasahajīvinisikkhāpadavaṇṇanā niṭṭhitā.
9. நானுப³ந்த⁴னஸிக்கா²பத³வண்ணனா
9. Nānubandhanasikkhāpadavaṇṇanā
நவமே வுட்டா²பிதங் பவத்தினிந்தி வுட்டா²பிதங் பவத்தினிங் யாய உபஸம்பாதி³தா, தங் உபஜ்ஜா²யினிந்தி அத்தோ². நானுப³ந்தெ⁴ய்யாதி சுண்ணேன மத்திகாய த³ந்தகட்டே²ன முகோ²த³கேனாதி ஏவங் தேன தேன கரணீயேன ந உபட்ட²ஹெய்ய. பாசித்தியந்தி நானுப³ந்தி⁴ஸ்ஸந்தி து⁴ரே நிக்கி²த்தமத்தே பாசித்தியங்.
Navame vuṭṭhāpitaṃ pavattininti vuṭṭhāpitaṃ pavattiniṃ yāya upasampāditā, taṃ upajjhāyininti attho. Nānubandheyyāti cuṇṇena mattikāya dantakaṭṭhena mukhodakenāti evaṃ tena tena karaṇīyena na upaṭṭhaheyya. Pācittiyanti nānubandhissanti dhure nikkhittamatte pācittiyaṃ.
ஸாவத்தி²யங் ஸம்ப³ஹுலா பி⁴க்கு²னியோ ஆரப்³ப⁴ நானுப³ந்த⁴னவத்து²ஸ்மிங் பஞ்ஞத்தங். பா³லங் பன அலஜ்ஜினிங் வா அனநுப³ந்த⁴ந்தியா, கி³லானாய, ஆபதா³ஸு, உம்மத்திகாதீ³னஞ்ச அனாபத்தி. வுட்டா²பிதப்பவத்தினிதா, த்³வே வஸ்ஸானி அனநுப³ந்த⁴னே து⁴ரனிக்கே²போ, அனுஞ்ஞாதகாரணாபா⁴வோதி இமானெத்த² தீணி அங்கா³னி. ஸமுட்டா²னாதீ³னி பட²மபாராஜிகஸதி³ஸானி, இத³ங் பன அகிரியங், து³க்க²வேத³னந்தி.
Sāvatthiyaṃ sambahulā bhikkhuniyo ārabbha nānubandhanavatthusmiṃ paññattaṃ. Bālaṃ pana alajjiniṃ vā ananubandhantiyā, gilānāya, āpadāsu, ummattikādīnañca anāpatti. Vuṭṭhāpitappavattinitā, dve vassāni ananubandhane dhuranikkhepo, anuññātakāraṇābhāvoti imānettha tīṇi aṅgāni. Samuṭṭhānādīni paṭhamapārājikasadisāni, idaṃ pana akiriyaṃ, dukkhavedananti.
நானுப³ந்த⁴னஸிக்கா²பத³வண்ணனா நிட்டி²தா.
Nānubandhanasikkhāpadavaṇṇanā niṭṭhitā.
10. து³தியஸஹஜீவினிஸிக்கா²பத³வண்ணனா
10. Dutiyasahajīvinisikkhāpadavaṇṇanā
த³ஸமே நேவ வூபகாஸெய்யாதி ந க³ஹெத்வா க³ச்செ²ய்ய. ந வூபகாஸாபெய்யாதி ‘‘இமங், அய்யே, க³ஹெத்வா க³ச்சா²ஹீ’’தி அஞ்ஞங் ந ஆணாபெய்ய. பாசித்தியந்தி து⁴ரே நிக்கி²த்தமத்தே பாசித்தியங்.
Dasame neva vūpakāseyyāti na gahetvā gaccheyya. Na vūpakāsāpeyyāti ‘‘imaṃ, ayye, gahetvā gacchāhī’’ti aññaṃ na āṇāpeyya. Pācittiyanti dhure nikkhittamatte pācittiyaṃ.
ஸாவத்தி²யங் து²ல்லனந்த³ங் ஆரப்³ப⁴ ஸஹஜீவினியா அவூபகாஸனவத்து²ஸ்மிங் பஞ்ஞத்தங். ஸதி பன அந்தராயே, பரியேஸித்வா து³தியிகங் அலப⁴ந்தியா, கி³லானாய , ஆபதா³ஸு, உம்மத்திகாதீ³னஞ்ச அனாபத்தி. ஸஹஜீவினிதா, வூபகாஸவூபகாஸாபனே து⁴ரனிக்கே²போ, அனுஞ்ஞாதகாரணாபா⁴வோதி இமானெத்த² தீணி அங்கா³னி. ஸமுட்டா²னாதீ³னி ஸமனுபா⁴ஸனஸதி³ஸானீதி.
Sāvatthiyaṃ thullanandaṃ ārabbha sahajīviniyā avūpakāsanavatthusmiṃ paññattaṃ. Sati pana antarāye, pariyesitvā dutiyikaṃ alabhantiyā, gilānāya , āpadāsu, ummattikādīnañca anāpatti. Sahajīvinitā, vūpakāsavūpakāsāpane dhuranikkhepo, anuññātakāraṇābhāvoti imānettha tīṇi aṅgāni. Samuṭṭhānādīni samanubhāsanasadisānīti.
து³தியஸஹஜீவினிஸிக்கா²பத³வண்ணனா நிட்டி²தா.
Dutiyasahajīvinisikkhāpadavaṇṇanā niṭṭhitā.
க³ப்³பி⁴னீவக்³கோ³ ஸத்தமோ.
Gabbhinīvaggo sattamo.
