| Library / Tipiṭaka / তিপিটক • Tipiṭaka / দ্ৰেমাতিকাপাল়ি • Dvemātikāpāḷi |
৭. গব্ভিনীৰগ্গো
7. Gabbhinīvaggo
১. গব্ভিনীসিক্খাপদৰণ্ণনা
1. Gabbhinīsikkhāpadavaṇṇanā
গব্ভিনিৰগ্গস্স পঠমে ‘‘গব্ভিনী’’তি জানিত্ৰা উপজ্ঝাযায ৰুট্ঠাপেন্তিযা গণপরিযেসনাদীসু চ ঞত্তিকম্মৰাচাদ্ৰযে চ দুক্কটং, কম্মৰাচাপরিযোসানে পাচিত্তিযং।
Gabbhinivaggassa paṭhame ‘‘gabbhinī’’ti jānitvā upajjhāyāya vuṭṭhāpentiyā gaṇapariyesanādīsu ca ñattikammavācādvaye ca dukkaṭaṃ, kammavācāpariyosāne pācittiyaṃ.
সাৰত্থিযং সম্বহুলা ভিক্খুনিযো আরব্ভ গব্ভিনিং ৰুট্ঠাপনৰত্থুস্মিং পঞ্ঞত্তং, গব্ভিনিযা ৰেমতিকায অগব্ভিনিযা গব্ভিনিসঞ্ঞায চেৰ ৰেমতিকায চ দুক্কটং। উভোসু অগব্ভিনিসঞ্ঞায, উম্মত্তিকাদীনঞ্চ অনাপত্তি। গব্ভিনিতা, ‘গব্ভিনী’তি জাননং, ৰুট্ঠাপনন্তি ইমানেত্থ তীণি অঙ্গানি। সমুট্ঠানাদীনি অদিন্নাদানসদিসানি, ইদং পন পণ্ণত্তিৰজ্জং, তিচিত্তং, তিৰেদনন্তি।
Sāvatthiyaṃ sambahulā bhikkhuniyo ārabbha gabbhiniṃ vuṭṭhāpanavatthusmiṃ paññattaṃ, gabbhiniyā vematikāya agabbhiniyā gabbhinisaññāya ceva vematikāya ca dukkaṭaṃ. Ubhosu agabbhinisaññāya, ummattikādīnañca anāpatti. Gabbhinitā, ‘gabbhinī’ti jānanaṃ, vuṭṭhāpananti imānettha tīṇi aṅgāni. Samuṭṭhānādīni adinnādānasadisāni, idaṃ pana paṇṇattivajjaṃ, ticittaṃ, tivedananti.
গব্ভিনীসিক্খাপদৰণ্ণনা নিট্ঠিতা।
Gabbhinīsikkhāpadavaṇṇanā niṭṭhitā.
২. পাযন্তীসিক্খাপদৰণ্ণনা
2. Pāyantīsikkhāpadavaṇṇanā
দুতিযে পাযন্তিন্তি থঞ্ঞং পাযমানং, যং পাযেতি, তস্স মাতা ৰা, ধাতি ৰা। ইদং ৰত্থুমত্তমেৰেত্থ ৰিসেসো, সেসং পঠমসিক্খাপদসদিসমেৰাতি।
Dutiye pāyantinti thaññaṃ pāyamānaṃ, yaṃ pāyeti, tassa mātā vā, dhāti vā. Idaṃ vatthumattamevettha viseso, sesaṃ paṭhamasikkhāpadasadisamevāti.
পাযন্তীসিক্খাপদৰণ্ণনা নিট্ঠিতা।
Pāyantīsikkhāpadavaṇṇanā niṭṭhitā.
৩. পঠমসিক্খমানসিক্খাপদৰণ্ণনা
3. Paṭhamasikkhamānasikkhāpadavaṇṇanā
ততিযে দ্ৰে ৰস্সানীতি পৰারণাৰসেন দ্ৰে সংৰচ্ছরানি। ছসু ধম্মেসূতি পাণাতিপাতাৰেরমণিআদীসু ৰিকালভোজনাৰেরমণিপরিযোসানেসু ছসু সিক্খাপদেসু। অসিক্খিতসিক্খন্তি পদভাজনে (পাচি॰ ১০৭৭) ৰুত্তনযেনেৰ অদিন্নসিক্খং ৰা কুপিতসিক্খং ৰা। সিক্খমানং ৰুট্ঠাপেয্যাতি তেসু ছসু ধম্মেসু সিক্খনতো, তে ৰা সিক্খাসঙ্খাতে ধম্মে মাননতো এৰংলদ্ধনামং অনুপসম্পন্নং উপসম্পাদেয্য। পাচিত্তিযন্তি পঠমসিক্খাপদে ৰুত্তনযেনেৰ কম্মৰাচাপরিযোসানে পাচিত্তিযং।
Tatiye dve vassānīti pavāraṇāvasena dve saṃvaccharāni. Chasu dhammesūti pāṇātipātāveramaṇiādīsu vikālabhojanāveramaṇipariyosānesu chasu sikkhāpadesu. Asikkhitasikkhanti padabhājane (pāci. 1077) vuttanayeneva adinnasikkhaṃ vā kupitasikkhaṃ vā. Sikkhamānaṃ vuṭṭhāpeyyāti tesu chasu dhammesu sikkhanato, te vā sikkhāsaṅkhāte dhamme mānanato evaṃladdhanāmaṃ anupasampannaṃ upasampādeyya. Pācittiyanti paṭhamasikkhāpade vuttanayeneva kammavācāpariyosāne pācittiyaṃ.
সাৰত্থিযং সম্বহুলা ভিক্খুনিযো আরব্ভ এৰরূপং সিক্খমানং ৰুট্ঠাপনৰত্থুস্মিং পঞ্ঞত্তং, ধম্মকম্মে তিকপাচিত্তিযং, অধম্মকম্মে তিকদুক্কটং। দ্ৰে ৰস্সানি ছসু ধম্মেসু সিক্খিতসিক্খং সিক্খমানং ৰুট্ঠাপেন্তিযা, উম্মত্তিকাদীনঞ্চ অনাপত্তি। ৰুত্তনযেন অসিক্খিতসিক্খতা, ধম্মকম্মতা, কম্মৰাচাপরিযোসানন্তি ইমানেত্থ তীণি অঙ্গানি। সমুট্ঠানাদীনি পঠমে ৰুত্তনযানেৰাতি।
Sāvatthiyaṃ sambahulā bhikkhuniyo ārabbha evarūpaṃ sikkhamānaṃ vuṭṭhāpanavatthusmiṃ paññattaṃ, dhammakamme tikapācittiyaṃ, adhammakamme tikadukkaṭaṃ. Dve vassāni chasu dhammesu sikkhitasikkhaṃ sikkhamānaṃ vuṭṭhāpentiyā, ummattikādīnañca anāpatti. Vuttanayena asikkhitasikkhatā, dhammakammatā, kammavācāpariyosānanti imānettha tīṇi aṅgāni. Samuṭṭhānādīni paṭhame vuttanayānevāti.
পঠমসিক্খমানসিক্খাপদৰণ্ণনা নিট্ঠিতা।
Paṭhamasikkhamānasikkhāpadavaṇṇanā niṭṭhitā.
৪. দুতিযসিক্খমানসিক্খাপদৰণ্ণনা
4. Dutiyasikkhamānasikkhāpadavaṇṇanā
চতুত্থে সঙ্ঘেন অসম্মতন্তি যস্সা সঙ্ঘেন অন্তমসো উপসম্পদামাল়কেপি পদভাজনে (পাচি॰ ১০৮৬) ৰুত্তা উপসম্পদাসম্মুতি ন দিন্না হোতি, তং ইমা দ্ৰেপি মহাসিক্খমানা নাম। ইধ সঙ্ঘেন সম্মতং ৰুট্ঠাপেন্তিযা, উম্মত্তিকাদীনঞ্চ অনাপত্তি। সেসং ততিযে ৰুত্তসদিসমেৰ, ইদং পন কিরিযাকিরিযং হোতীতি।
Catutthe saṅghena asammatanti yassā saṅghena antamaso upasampadāmāḷakepi padabhājane (pāci. 1086) vuttā upasampadāsammuti na dinnā hoti, taṃ imā dvepi mahāsikkhamānā nāma. Idha saṅghena sammataṃ vuṭṭhāpentiyā, ummattikādīnañca anāpatti. Sesaṃ tatiye vuttasadisameva, idaṃ pana kiriyākiriyaṃ hotīti.
দুতিযসিক্খমানসিক্খাপদৰণ্ণনা নিট্ঠিতা।
Dutiyasikkhamānasikkhāpadavaṇṇanā niṭṭhitā.
৫. পঠমগিহিগতসিক্খাপদৰণ্ণনা
5. Paṭhamagihigatasikkhāpadavaṇṇanā
পঞ্চমে গিহিগতন্তি পুরিসন্তরগতং, ইধাপি ইদং ৰত্থুমত্তমেৰ ৰিসেসো। ঊনদ্ৰাদসৰস্সঞ্চ পরিপুণ্ণসঞ্ঞায ৰুট্ঠাপেন্তিযা কিঞ্চাপি অনাপত্তি, সা পন অনুপসম্পন্নাৰ হোতি। সেসং পঠমসিক্খাপদসদিসমেৰাতি।
Pañcame gihigatanti purisantaragataṃ, idhāpi idaṃ vatthumattameva viseso. Ūnadvādasavassañca paripuṇṇasaññāya vuṭṭhāpentiyā kiñcāpi anāpatti, sā pana anupasampannāva hoti. Sesaṃ paṭhamasikkhāpadasadisamevāti.
পঠমগিহিগতসিক্খাপদৰণ্ণনা নিট্ঠিতা।
Paṭhamagihigatasikkhāpadavaṇṇanā niṭṭhitā.
৬-৭. দুতিযততিযগিহিগতসিক্খাপদৰণ্ণনা
6-7. Dutiyatatiyagihigatasikkhāpadavaṇṇanā
ছট্ঠে সব্বং ততিযে ৰুত্তনযেন। সত্তমেপি সব্বং চতুত্থে ৰুত্তনযেনেৰ ৰেদিতব্বন্তি।
Chaṭṭhe sabbaṃ tatiye vuttanayena. Sattamepi sabbaṃ catutthe vuttanayeneva veditabbanti.
দুতিযততিযগিহিগতসিক্খাপদৰণ্ণনা নিট্ঠিতা।
Dutiyatatiyagihigatasikkhāpadavaṇṇanā niṭṭhitā.
৮. পঠমসহজীৰিনিসিক্খাপদৰণ্ণনা
8. Paṭhamasahajīvinisikkhāpadavaṇṇanā
অট্ঠমে সহজীৰিনিন্তি সদ্ধিৰিহারিনিং। নেৰ অনুগ্গণ্হেয্যাতি সযং উদ্দেসাদীহি নানুগ্গণ্হেয্য। ন অনুগ্গণ্হাপেয্যাতি ‘‘ইমিস্সা, অয্যে, উদ্দেসাদীনি দেহী’’তি এৰং ন অঞ্ঞায অনুগ্গণ্হাপেয্য। পাচিত্তিযন্তি ধুরে নিক্খিত্তমত্তে পাচিত্তিযং।
Aṭṭhame sahajīvininti saddhivihāriniṃ. Neva anuggaṇheyyāti sayaṃ uddesādīhi nānuggaṇheyya. Na anuggaṇhāpeyyāti ‘‘imissā, ayye, uddesādīni dehī’’ti evaṃ na aññāya anuggaṇhāpeyya. Pācittiyanti dhure nikkhittamatte pācittiyaṃ.
সাৰত্থিযং থুল্লনন্দং আরব্ভ এৰরূপে ৰত্থুস্মিং পঞ্ঞত্তং, সেসমেত্থ তুৰট্টৰগ্গে দুক্খিতসহজীৰিনিসিক্খাপদে ৰুত্তসদিসমেৰাতি।
Sāvatthiyaṃ thullanandaṃ ārabbha evarūpe vatthusmiṃ paññattaṃ, sesamettha tuvaṭṭavagge dukkhitasahajīvinisikkhāpade vuttasadisamevāti.
পঠমসহজীৰিনিসিক্খাপদৰণ্ণনা নিট্ঠিতা।
Paṭhamasahajīvinisikkhāpadavaṇṇanā niṭṭhitā.
৯. নানুবন্ধনসিক্খাপদৰণ্ণনা
9. Nānubandhanasikkhāpadavaṇṇanā
নৰমে ৰুট্ঠাপিতং পৰত্তিনিন্তি ৰুট্ঠাপিতং পৰত্তিনিং যায উপসম্পাদিতা, তং উপজ্ঝাযিনিন্তি অত্থো। নানুবন্ধেয্যাতি চুণ্ণেন মত্তিকায দন্তকট্ঠেন মুখোদকেনাতি এৰং তেন তেন করণীযেন ন উপট্ঠহেয্য। পাচিত্তিযন্তি নানুবন্ধিস্সন্তি ধুরে নিক্খিত্তমত্তে পাচিত্তিযং।
Navame vuṭṭhāpitaṃ pavattininti vuṭṭhāpitaṃ pavattiniṃ yāya upasampāditā, taṃ upajjhāyininti attho. Nānubandheyyāti cuṇṇena mattikāya dantakaṭṭhena mukhodakenāti evaṃ tena tena karaṇīyena na upaṭṭhaheyya. Pācittiyanti nānubandhissanti dhure nikkhittamatte pācittiyaṃ.
সাৰত্থিযং সম্বহুলা ভিক্খুনিযো আরব্ভ নানুবন্ধনৰত্থুস্মিং পঞ্ঞত্তং। বালং পন অলজ্জিনিং ৰা অননুবন্ধন্তিযা, গিলানায, আপদাসু, উম্মত্তিকাদীনঞ্চ অনাপত্তি। ৰুট্ঠাপিতপ্পৰত্তিনিতা, দ্ৰে ৰস্সানি অননুবন্ধনে ধুরনিক্খেপো, অনুঞ্ঞাতকারণাভাৰোতি ইমানেত্থ তীণি অঙ্গানি। সমুট্ঠানাদীনি পঠমপারাজিকসদিসানি, ইদং পন অকিরিযং, দুক্খৰেদনন্তি।
Sāvatthiyaṃ sambahulā bhikkhuniyo ārabbha nānubandhanavatthusmiṃ paññattaṃ. Bālaṃ pana alajjiniṃ vā ananubandhantiyā, gilānāya, āpadāsu, ummattikādīnañca anāpatti. Vuṭṭhāpitappavattinitā, dve vassāni ananubandhane dhuranikkhepo, anuññātakāraṇābhāvoti imānettha tīṇi aṅgāni. Samuṭṭhānādīni paṭhamapārājikasadisāni, idaṃ pana akiriyaṃ, dukkhavedananti.
নানুবন্ধনসিক্খাপদৰণ্ণনা নিট্ঠিতা।
Nānubandhanasikkhāpadavaṇṇanā niṭṭhitā.
১০. দুতিযসহজীৰিনিসিক্খাপদৰণ্ণনা
10. Dutiyasahajīvinisikkhāpadavaṇṇanā
দসমে নেৰ ৰূপকাসেয্যাতি ন গহেত্ৰা গচ্ছেয্য। ন ৰূপকাসাপেয্যাতি ‘‘ইমং, অয্যে, গহেত্ৰা গচ্ছাহী’’তি অঞ্ঞং ন আণাপেয্য। পাচিত্তিযন্তি ধুরে নিক্খিত্তমত্তে পাচিত্তিযং।
Dasame neva vūpakāseyyāti na gahetvā gaccheyya. Na vūpakāsāpeyyāti ‘‘imaṃ, ayye, gahetvā gacchāhī’’ti aññaṃ na āṇāpeyya. Pācittiyanti dhure nikkhittamatte pācittiyaṃ.
সাৰত্থিযং থুল্লনন্দং আরব্ভ সহজীৰিনিযা অৰূপকাসনৰত্থুস্মিং পঞ্ঞত্তং। সতি পন অন্তরাযে, পরিযেসিত্ৰা দুতিযিকং অলভন্তিযা, গিলানায , আপদাসু, উম্মত্তিকাদীনঞ্চ অনাপত্তি। সহজীৰিনিতা, ৰূপকাসৰূপকাসাপনে ধুরনিক্খেপো, অনুঞ্ঞাতকারণাভাৰোতি ইমানেত্থ তীণি অঙ্গানি। সমুট্ঠানাদীনি সমনুভাসনসদিসানীতি।
Sāvatthiyaṃ thullanandaṃ ārabbha sahajīviniyā avūpakāsanavatthusmiṃ paññattaṃ. Sati pana antarāye, pariyesitvā dutiyikaṃ alabhantiyā, gilānāya , āpadāsu, ummattikādīnañca anāpatti. Sahajīvinitā, vūpakāsavūpakāsāpane dhuranikkhepo, anuññātakāraṇābhāvoti imānettha tīṇi aṅgāni. Samuṭṭhānādīni samanubhāsanasadisānīti.
দুতিযসহজীৰিনিসিক্খাপদৰণ্ণনা নিট্ঠিতা।
Dutiyasahajīvinisikkhāpadavaṇṇanā niṭṭhitā.
গব্ভিনীৰগ্গো সত্তমো।
Gabbhinīvaggo sattamo.
