| Library / Tipiṭaka / ತಿಪಿಟಕ • Tipiṭaka / ದ್ವೇಮಾತಿಕಾಪಾಳಿ • Dvemātikāpāḷi |
೭. ಗಬ್ಭಿನೀವಗ್ಗೋ
7. Gabbhinīvaggo
೧. ಗಬ್ಭಿನೀಸಿಕ್ಖಾಪದವಣ್ಣನಾ
1. Gabbhinīsikkhāpadavaṇṇanā
ಗಬ್ಭಿನಿವಗ್ಗಸ್ಸ ಪಠಮೇ ‘‘ಗಬ್ಭಿನೀ’’ತಿ ಜಾನಿತ್ವಾ ಉಪಜ್ಝಾಯಾಯ ವುಟ್ಠಾಪೇನ್ತಿಯಾ ಗಣಪರಿಯೇಸನಾದೀಸು ಚ ಞತ್ತಿಕಮ್ಮವಾಚಾದ್ವಯೇ ಚ ದುಕ್ಕಟಂ, ಕಮ್ಮವಾಚಾಪರಿಯೋಸಾನೇ ಪಾಚಿತ್ತಿಯಂ।
Gabbhinivaggassa paṭhame ‘‘gabbhinī’’ti jānitvā upajjhāyāya vuṭṭhāpentiyā gaṇapariyesanādīsu ca ñattikammavācādvaye ca dukkaṭaṃ, kammavācāpariyosāne pācittiyaṃ.
ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಗಬ್ಭಿನಿಂ ವುಟ್ಠಾಪನವತ್ಥುಸ್ಮಿಂ ಪಞ್ಞತ್ತಂ, ಗಬ್ಭಿನಿಯಾ ವೇಮತಿಕಾಯ ಅಗಬ್ಭಿನಿಯಾ ಗಬ್ಭಿನಿಸಞ್ಞಾಯ ಚೇವ ವೇಮತಿಕಾಯ ಚ ದುಕ್ಕಟಂ। ಉಭೋಸು ಅಗಬ್ಭಿನಿಸಞ್ಞಾಯ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಗಬ್ಭಿನಿತಾ, ‘ಗಬ್ಭಿನೀ’ತಿ ಜಾನನಂ, ವುಟ್ಠಾಪನನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಅದಿನ್ನಾದಾನಸದಿಸಾನಿ, ಇದಂ ಪನ ಪಣ್ಣತ್ತಿವಜ್ಜಂ, ತಿಚಿತ್ತಂ, ತಿವೇದನನ್ತಿ।
Sāvatthiyaṃ sambahulā bhikkhuniyo ārabbha gabbhiniṃ vuṭṭhāpanavatthusmiṃ paññattaṃ, gabbhiniyā vematikāya agabbhiniyā gabbhinisaññāya ceva vematikāya ca dukkaṭaṃ. Ubhosu agabbhinisaññāya, ummattikādīnañca anāpatti. Gabbhinitā, ‘gabbhinī’ti jānanaṃ, vuṭṭhāpananti imānettha tīṇi aṅgāni. Samuṭṭhānādīni adinnādānasadisāni, idaṃ pana paṇṇattivajjaṃ, ticittaṃ, tivedananti.
ಗಬ್ಭಿನೀಸಿಕ್ಖಾಪದವಣ್ಣನಾ ನಿಟ್ಠಿತಾ।
Gabbhinīsikkhāpadavaṇṇanā niṭṭhitā.
೨. ಪಾಯನ್ತೀಸಿಕ್ಖಾಪದವಣ್ಣನಾ
2. Pāyantīsikkhāpadavaṇṇanā
ದುತಿಯೇ ಪಾಯನ್ತಿನ್ತಿ ಥಞ್ಞಂ ಪಾಯಮಾನಂ, ಯಂ ಪಾಯೇತಿ, ತಸ್ಸ ಮಾತಾ ವಾ, ಧಾತಿ ವಾ। ಇದಂ ವತ್ಥುಮತ್ತಮೇವೇತ್ಥ ವಿಸೇಸೋ, ಸೇಸಂ ಪಠಮಸಿಕ್ಖಾಪದಸದಿಸಮೇವಾತಿ।
Dutiye pāyantinti thaññaṃ pāyamānaṃ, yaṃ pāyeti, tassa mātā vā, dhāti vā. Idaṃ vatthumattamevettha viseso, sesaṃ paṭhamasikkhāpadasadisamevāti.
ಪಾಯನ್ತೀಸಿಕ್ಖಾಪದವಣ್ಣನಾ ನಿಟ್ಠಿತಾ।
Pāyantīsikkhāpadavaṇṇanā niṭṭhitā.
೩. ಪಠಮಸಿಕ್ಖಮಾನಸಿಕ್ಖಾಪದವಣ್ಣನಾ
3. Paṭhamasikkhamānasikkhāpadavaṇṇanā
ತತಿಯೇ ದ್ವೇ ವಸ್ಸಾನೀತಿ ಪವಾರಣಾವಸೇನ ದ್ವೇ ಸಂವಚ್ಛರಾನಿ। ಛಸು ಧಮ್ಮೇಸೂತಿ ಪಾಣಾತಿಪಾತಾವೇರಮಣಿಆದೀಸು ವಿಕಾಲಭೋಜನಾವೇರಮಣಿಪರಿಯೋಸಾನೇಸು ಛಸು ಸಿಕ್ಖಾಪದೇಸು। ಅಸಿಕ್ಖಿತಸಿಕ್ಖನ್ತಿ ಪದಭಾಜನೇ (ಪಾಚಿ॰ ೧೦೭೭) ವುತ್ತನಯೇನೇವ ಅದಿನ್ನಸಿಕ್ಖಂ ವಾ ಕುಪಿತಸಿಕ್ಖಂ ವಾ। ಸಿಕ್ಖಮಾನಂ ವುಟ್ಠಾಪೇಯ್ಯಾತಿ ತೇಸು ಛಸು ಧಮ್ಮೇಸು ಸಿಕ್ಖನತೋ, ತೇ ವಾ ಸಿಕ್ಖಾಸಙ್ಖಾತೇ ಧಮ್ಮೇ ಮಾನನತೋ ಏವಂಲದ್ಧನಾಮಂ ಅನುಪಸಮ್ಪನ್ನಂ ಉಪಸಮ್ಪಾದೇಯ್ಯ। ಪಾಚಿತ್ತಿಯನ್ತಿ ಪಠಮಸಿಕ್ಖಾಪದೇ ವುತ್ತನಯೇನೇವ ಕಮ್ಮವಾಚಾಪರಿಯೋಸಾನೇ ಪಾಚಿತ್ತಿಯಂ।
Tatiye dve vassānīti pavāraṇāvasena dve saṃvaccharāni. Chasu dhammesūti pāṇātipātāveramaṇiādīsu vikālabhojanāveramaṇipariyosānesu chasu sikkhāpadesu. Asikkhitasikkhanti padabhājane (pāci. 1077) vuttanayeneva adinnasikkhaṃ vā kupitasikkhaṃ vā. Sikkhamānaṃ vuṭṭhāpeyyāti tesu chasu dhammesu sikkhanato, te vā sikkhāsaṅkhāte dhamme mānanato evaṃladdhanāmaṃ anupasampannaṃ upasampādeyya. Pācittiyanti paṭhamasikkhāpade vuttanayeneva kammavācāpariyosāne pācittiyaṃ.
ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಏವರೂಪಂ ಸಿಕ್ಖಮಾನಂ ವುಟ್ಠಾಪನವತ್ಥುಸ್ಮಿಂ ಪಞ್ಞತ್ತಂ, ಧಮ್ಮಕಮ್ಮೇ ತಿಕಪಾಚಿತ್ತಿಯಂ, ಅಧಮ್ಮಕಮ್ಮೇ ತಿಕದುಕ್ಕಟಂ। ದ್ವೇ ವಸ್ಸಾನಿ ಛಸು ಧಮ್ಮೇಸು ಸಿಕ್ಖಿತಸಿಕ್ಖಂ ಸಿಕ್ಖಮಾನಂ ವುಟ್ಠಾಪೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ವುತ್ತನಯೇನ ಅಸಿಕ್ಖಿತಸಿಕ್ಖತಾ, ಧಮ್ಮಕಮ್ಮತಾ, ಕಮ್ಮವಾಚಾಪರಿಯೋಸಾನನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಪಠಮೇ ವುತ್ತನಯಾನೇವಾತಿ।
Sāvatthiyaṃ sambahulā bhikkhuniyo ārabbha evarūpaṃ sikkhamānaṃ vuṭṭhāpanavatthusmiṃ paññattaṃ, dhammakamme tikapācittiyaṃ, adhammakamme tikadukkaṭaṃ. Dve vassāni chasu dhammesu sikkhitasikkhaṃ sikkhamānaṃ vuṭṭhāpentiyā, ummattikādīnañca anāpatti. Vuttanayena asikkhitasikkhatā, dhammakammatā, kammavācāpariyosānanti imānettha tīṇi aṅgāni. Samuṭṭhānādīni paṭhame vuttanayānevāti.
ಪಠಮಸಿಕ್ಖಮಾನಸಿಕ್ಖಾಪದವಣ್ಣನಾ ನಿಟ್ಠಿತಾ।
Paṭhamasikkhamānasikkhāpadavaṇṇanā niṭṭhitā.
೪. ದುತಿಯಸಿಕ್ಖಮಾನಸಿಕ್ಖಾಪದವಣ್ಣನಾ
4. Dutiyasikkhamānasikkhāpadavaṇṇanā
ಚತುತ್ಥೇ ಸಙ್ಘೇನ ಅಸಮ್ಮತನ್ತಿ ಯಸ್ಸಾ ಸಙ್ಘೇನ ಅನ್ತಮಸೋ ಉಪಸಮ್ಪದಾಮಾಳಕೇಪಿ ಪದಭಾಜನೇ (ಪಾಚಿ॰ ೧೦೮೬) ವುತ್ತಾ ಉಪಸಮ್ಪದಾಸಮ್ಮುತಿ ನ ದಿನ್ನಾ ಹೋತಿ, ತಂ ಇಮಾ ದ್ವೇಪಿ ಮಹಾಸಿಕ್ಖಮಾನಾ ನಾಮ। ಇಧ ಸಙ್ಘೇನ ಸಮ್ಮತಂ ವುಟ್ಠಾಪೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಸೇಸಂ ತತಿಯೇ ವುತ್ತಸದಿಸಮೇವ, ಇದಂ ಪನ ಕಿರಿಯಾಕಿರಿಯಂ ಹೋತೀತಿ।
Catutthe saṅghena asammatanti yassā saṅghena antamaso upasampadāmāḷakepi padabhājane (pāci. 1086) vuttā upasampadāsammuti na dinnā hoti, taṃ imā dvepi mahāsikkhamānā nāma. Idha saṅghena sammataṃ vuṭṭhāpentiyā, ummattikādīnañca anāpatti. Sesaṃ tatiye vuttasadisameva, idaṃ pana kiriyākiriyaṃ hotīti.
ದುತಿಯಸಿಕ್ಖಮಾನಸಿಕ್ಖಾಪದವಣ್ಣನಾ ನಿಟ್ಠಿತಾ।
Dutiyasikkhamānasikkhāpadavaṇṇanā niṭṭhitā.
೫. ಪಠಮಗಿಹಿಗತಸಿಕ್ಖಾಪದವಣ್ಣನಾ
5. Paṭhamagihigatasikkhāpadavaṇṇanā
ಪಞ್ಚಮೇ ಗಿಹಿಗತನ್ತಿ ಪುರಿಸನ್ತರಗತಂ, ಇಧಾಪಿ ಇದಂ ವತ್ಥುಮತ್ತಮೇವ ವಿಸೇಸೋ। ಊನದ್ವಾದಸವಸ್ಸಞ್ಚ ಪರಿಪುಣ್ಣಸಞ್ಞಾಯ ವುಟ್ಠಾಪೇನ್ತಿಯಾ ಕಿಞ್ಚಾಪಿ ಅನಾಪತ್ತಿ, ಸಾ ಪನ ಅನುಪಸಮ್ಪನ್ನಾವ ಹೋತಿ। ಸೇಸಂ ಪಠಮಸಿಕ್ಖಾಪದಸದಿಸಮೇವಾತಿ।
Pañcame gihigatanti purisantaragataṃ, idhāpi idaṃ vatthumattameva viseso. Ūnadvādasavassañca paripuṇṇasaññāya vuṭṭhāpentiyā kiñcāpi anāpatti, sā pana anupasampannāva hoti. Sesaṃ paṭhamasikkhāpadasadisamevāti.
ಪಠಮಗಿಹಿಗತಸಿಕ್ಖಾಪದವಣ್ಣನಾ ನಿಟ್ಠಿತಾ।
Paṭhamagihigatasikkhāpadavaṇṇanā niṭṭhitā.
೬-೭. ದುತಿಯತತಿಯಗಿಹಿಗತಸಿಕ್ಖಾಪದವಣ್ಣನಾ
6-7. Dutiyatatiyagihigatasikkhāpadavaṇṇanā
ಛಟ್ಠೇ ಸಬ್ಬಂ ತತಿಯೇ ವುತ್ತನಯೇನ। ಸತ್ತಮೇಪಿ ಸಬ್ಬಂ ಚತುತ್ಥೇ ವುತ್ತನಯೇನೇವ ವೇದಿತಬ್ಬನ್ತಿ।
Chaṭṭhe sabbaṃ tatiye vuttanayena. Sattamepi sabbaṃ catutthe vuttanayeneva veditabbanti.
ದುತಿಯತತಿಯಗಿಹಿಗತಸಿಕ್ಖಾಪದವಣ್ಣನಾ ನಿಟ್ಠಿತಾ।
Dutiyatatiyagihigatasikkhāpadavaṇṇanā niṭṭhitā.
೮. ಪಠಮಸಹಜೀವಿನಿಸಿಕ್ಖಾಪದವಣ್ಣನಾ
8. Paṭhamasahajīvinisikkhāpadavaṇṇanā
ಅಟ್ಠಮೇ ಸಹಜೀವಿನಿನ್ತಿ ಸದ್ಧಿವಿಹಾರಿನಿಂ। ನೇವ ಅನುಗ್ಗಣ್ಹೇಯ್ಯಾತಿ ಸಯಂ ಉದ್ದೇಸಾದೀಹಿ ನಾನುಗ್ಗಣ್ಹೇಯ್ಯ। ನ ಅನುಗ್ಗಣ್ಹಾಪೇಯ್ಯಾತಿ ‘‘ಇಮಿಸ್ಸಾ, ಅಯ್ಯೇ, ಉದ್ದೇಸಾದೀನಿ ದೇಹೀ’’ತಿ ಏವಂ ನ ಅಞ್ಞಾಯ ಅನುಗ್ಗಣ್ಹಾಪೇಯ್ಯ। ಪಾಚಿತ್ತಿಯನ್ತಿ ಧುರೇ ನಿಕ್ಖಿತ್ತಮತ್ತೇ ಪಾಚಿತ್ತಿಯಂ।
Aṭṭhame sahajīvininti saddhivihāriniṃ. Neva anuggaṇheyyāti sayaṃ uddesādīhi nānuggaṇheyya. Na anuggaṇhāpeyyāti ‘‘imissā, ayye, uddesādīni dehī’’ti evaṃ na aññāya anuggaṇhāpeyya. Pācittiyanti dhure nikkhittamatte pācittiyaṃ.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಏವರೂಪೇ ವತ್ಥುಸ್ಮಿಂ ಪಞ್ಞತ್ತಂ, ಸೇಸಮೇತ್ಥ ತುವಟ್ಟವಗ್ಗೇ ದುಕ್ಖಿತಸಹಜೀವಿನಿಸಿಕ್ಖಾಪದೇ ವುತ್ತಸದಿಸಮೇವಾತಿ।
Sāvatthiyaṃ thullanandaṃ ārabbha evarūpe vatthusmiṃ paññattaṃ, sesamettha tuvaṭṭavagge dukkhitasahajīvinisikkhāpade vuttasadisamevāti.
ಪಠಮಸಹಜೀವಿನಿಸಿಕ್ಖಾಪದವಣ್ಣನಾ ನಿಟ್ಠಿತಾ।
Paṭhamasahajīvinisikkhāpadavaṇṇanā niṭṭhitā.
೯. ನಾನುಬನ್ಧನಸಿಕ್ಖಾಪದವಣ್ಣನಾ
9. Nānubandhanasikkhāpadavaṇṇanā
ನವಮೇ ವುಟ್ಠಾಪಿತಂ ಪವತ್ತಿನಿನ್ತಿ ವುಟ್ಠಾಪಿತಂ ಪವತ್ತಿನಿಂ ಯಾಯ ಉಪಸಮ್ಪಾದಿತಾ, ತಂ ಉಪಜ್ಝಾಯಿನಿನ್ತಿ ಅತ್ಥೋ। ನಾನುಬನ್ಧೇಯ್ಯಾತಿ ಚುಣ್ಣೇನ ಮತ್ತಿಕಾಯ ದನ್ತಕಟ್ಠೇನ ಮುಖೋದಕೇನಾತಿ ಏವಂ ತೇನ ತೇನ ಕರಣೀಯೇನ ನ ಉಪಟ್ಠಹೇಯ್ಯ। ಪಾಚಿತ್ತಿಯನ್ತಿ ನಾನುಬನ್ಧಿಸ್ಸನ್ತಿ ಧುರೇ ನಿಕ್ಖಿತ್ತಮತ್ತೇ ಪಾಚಿತ್ತಿಯಂ।
Navame vuṭṭhāpitaṃ pavattininti vuṭṭhāpitaṃ pavattiniṃ yāya upasampāditā, taṃ upajjhāyininti attho. Nānubandheyyāti cuṇṇena mattikāya dantakaṭṭhena mukhodakenāti evaṃ tena tena karaṇīyena na upaṭṭhaheyya. Pācittiyanti nānubandhissanti dhure nikkhittamatte pācittiyaṃ.
ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ನಾನುಬನ್ಧನವತ್ಥುಸ್ಮಿಂ ಪಞ್ಞತ್ತಂ। ಬಾಲಂ ಪನ ಅಲಜ್ಜಿನಿಂ ವಾ ಅನನುಬನ್ಧನ್ತಿಯಾ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ವುಟ್ಠಾಪಿತಪ್ಪವತ್ತಿನಿತಾ, ದ್ವೇ ವಸ್ಸಾನಿ ಅನನುಬನ್ಧನೇ ಧುರನಿಕ್ಖೇಪೋ, ಅನುಞ್ಞಾತಕಾರಣಾಭಾವೋತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಪಠಮಪಾರಾಜಿಕಸದಿಸಾನಿ, ಇದಂ ಪನ ಅಕಿರಿಯಂ, ದುಕ್ಖವೇದನನ್ತಿ।
Sāvatthiyaṃ sambahulā bhikkhuniyo ārabbha nānubandhanavatthusmiṃ paññattaṃ. Bālaṃ pana alajjiniṃ vā ananubandhantiyā, gilānāya, āpadāsu, ummattikādīnañca anāpatti. Vuṭṭhāpitappavattinitā, dve vassāni ananubandhane dhuranikkhepo, anuññātakāraṇābhāvoti imānettha tīṇi aṅgāni. Samuṭṭhānādīni paṭhamapārājikasadisāni, idaṃ pana akiriyaṃ, dukkhavedananti.
ನಾನುಬನ್ಧನಸಿಕ್ಖಾಪದವಣ್ಣನಾ ನಿಟ್ಠಿತಾ।
Nānubandhanasikkhāpadavaṇṇanā niṭṭhitā.
೧೦. ದುತಿಯಸಹಜೀವಿನಿಸಿಕ್ಖಾಪದವಣ್ಣನಾ
10. Dutiyasahajīvinisikkhāpadavaṇṇanā
ದಸಮೇ ನೇವ ವೂಪಕಾಸೇಯ್ಯಾತಿ ನ ಗಹೇತ್ವಾ ಗಚ್ಛೇಯ್ಯ। ನ ವೂಪಕಾಸಾಪೇಯ್ಯಾತಿ ‘‘ಇಮಂ, ಅಯ್ಯೇ, ಗಹೇತ್ವಾ ಗಚ್ಛಾಹೀ’’ತಿ ಅಞ್ಞಂ ನ ಆಣಾಪೇಯ್ಯ। ಪಾಚಿತ್ತಿಯನ್ತಿ ಧುರೇ ನಿಕ್ಖಿತ್ತಮತ್ತೇ ಪಾಚಿತ್ತಿಯಂ।
Dasame neva vūpakāseyyāti na gahetvā gaccheyya. Na vūpakāsāpeyyāti ‘‘imaṃ, ayye, gahetvā gacchāhī’’ti aññaṃ na āṇāpeyya. Pācittiyanti dhure nikkhittamatte pācittiyaṃ.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಸಹಜೀವಿನಿಯಾ ಅವೂಪಕಾಸನವತ್ಥುಸ್ಮಿಂ ಪಞ್ಞತ್ತಂ। ಸತಿ ಪನ ಅನ್ತರಾಯೇ, ಪರಿಯೇಸಿತ್ವಾ ದುತಿಯಿಕಂ ಅಲಭನ್ತಿಯಾ, ಗಿಲಾನಾಯ , ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಸಹಜೀವಿನಿತಾ, ವೂಪಕಾಸವೂಪಕಾಸಾಪನೇ ಧುರನಿಕ್ಖೇಪೋ, ಅನುಞ್ಞಾತಕಾರಣಾಭಾವೋತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಸಮನುಭಾಸನಸದಿಸಾನೀತಿ।
Sāvatthiyaṃ thullanandaṃ ārabbha sahajīviniyā avūpakāsanavatthusmiṃ paññattaṃ. Sati pana antarāye, pariyesitvā dutiyikaṃ alabhantiyā, gilānāya , āpadāsu, ummattikādīnañca anāpatti. Sahajīvinitā, vūpakāsavūpakāsāpane dhuranikkhepo, anuññātakāraṇābhāvoti imānettha tīṇi aṅgāni. Samuṭṭhānādīni samanubhāsanasadisānīti.
ದುತಿಯಸಹಜೀವಿನಿಸಿಕ್ಖಾಪದವಣ್ಣನಾ ನಿಟ್ಠಿತಾ।
Dutiyasahajīvinisikkhāpadavaṇṇanā niṭṭhitā.
ಗಬ್ಭಿನೀವಗ್ಗೋ ಸತ್ತಮೋ।
Gabbhinīvaggo sattamo.
