| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
7. க³த்³து³லப³த்³த⁴ஸுத்தங்
7. Gaddulabaddhasuttaṃ
99. ஸாவத்தி²னிதா³னங். ‘‘அனமதக்³கோ³யங், பி⁴க்க²வே, ஸங்ஸாரோ. புப்³பா³ கோடி ந பஞ்ஞாயதி அவிஜ்ஜானீவரணானங் ஸத்தானங் தண்ஹாஸங்யோஜனானங் ஸந்தா⁴வதங் ஸங்ஸரதங். ஹோதி ஸோ, பி⁴க்க²வே, ஸமயோ யங் மஹாஸமுத்³தோ³ உஸ்ஸுஸ்ஸதி விஸுஸ்ஸதி ந ப⁴வதி; ந த்வேவாஹங், பி⁴க்க²வே, அவிஜ்ஜானீவரணானங் ஸத்தானங் தண்ஹாஸங்யோஜனானங் ஸந்தா⁴வதங் ஸங்ஸரதங் து³க்க²ஸ்ஸ அந்தகிரியங் வதா³மி. ஹோதி ஸோ, பி⁴க்க²வே, ஸமயோ யங் ஸினேரு பப்³ப³தராஜா ட³ய்ஹதி வினஸ்ஸதி ந ப⁴வதி; ந த்வேவாஹங், பி⁴க்க²வே, அவிஜ்ஜானீவரணானங் ஸத்தானங் தண்ஹாஸங்யோஜனானங் ஸந்தா⁴வதங் ஸங்ஸரதங் து³க்க²ஸ்ஸ அந்தகிரியங் வதா³மி. ஹோதி ஸோ, பி⁴க்க²வே, ஸமயோ யங் மஹாபத²வீ ட³ய்ஹதி வினஸ்ஸதி ந ப⁴வதி; ந த்வேவாஹங், பி⁴க்க²வே, அவிஜ்ஜானீவரணானங் ஸத்தானங் தண்ஹாஸங்யோஜனானங் ஸந்தா⁴வதங் ஸங்ஸரதங் து³க்க²ஸ்ஸ அந்தகிரியங் வதா³மி’’.
99. Sāvatthinidānaṃ. ‘‘Anamataggoyaṃ, bhikkhave, saṃsāro. Pubbā koṭi na paññāyati avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ. Hoti so, bhikkhave, samayo yaṃ mahāsamuddo ussussati visussati na bhavati; na tvevāhaṃ, bhikkhave, avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ dukkhassa antakiriyaṃ vadāmi. Hoti so, bhikkhave, samayo yaṃ sineru pabbatarājā ḍayhati vinassati na bhavati; na tvevāhaṃ, bhikkhave, avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ dukkhassa antakiriyaṃ vadāmi. Hoti so, bhikkhave, samayo yaṃ mahāpathavī ḍayhati vinassati na bhavati; na tvevāhaṃ, bhikkhave, avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ dukkhassa antakiriyaṃ vadāmi’’.
‘‘ஸெய்யதா²பி, பி⁴க்க²வே, ஸா க³த்³து³லப³த்³தோ⁴ 1 த³ள்ஹே கீ²லே வா த²ம்பே⁴ வா உபனிப³த்³தோ⁴ தமேவ கீ²லங் வா த²ம்ப⁴ங் வா அனுபரிதா⁴வதி அனுபரிவத்ததி; ஏவமேவ கோ², பி⁴க்க²வே, அஸ்ஸுதவா புது²ஜ்ஜனோ அரியானங் அத³ஸ்ஸாவீ…பே॰… ஸப்புரிஸத⁴ம்மே அவினீதோ ரூபங் அத்ததோ ஸமனுபஸ்ஸதி…பே॰… வேத³னங் அத்ததோ ஸமனுபஸ்ஸதி… ஸஞ்ஞங் அத்ததோ ஸமனுபஸ்ஸதி… ஸங்கா²ரே அத்ததோ ஸமனுபஸ்ஸதி… விஞ்ஞாணங் அத்ததோ ஸமனுபஸ்ஸதி, விஞ்ஞாணவந்தங் வா அத்தானங்; அத்தனி வா விஞ்ஞாணங், விஞ்ஞாணஸ்மிங் வா அத்தானங். ஸோ ரூபஞ்ஞேவ அனுபரிதா⁴வதி அனுபரிவத்ததி, வேத³னஞ்ஞேவ…பே॰… ஸஞ்ஞஞ்ஞேவ… ஸங்கா²ரேயேவ… விஞ்ஞாணஞ்ஞேவ அனுபரிதா⁴வதி அனுபரிவத்ததி. ஸோ ரூபங் அனுபரிதா⁴வங் அனுபரிவத்தங், வேத³னங்…பே॰… ஸஞ்ஞங்… ஸங்கா²ரே… விஞ்ஞாணங் அனுபரிதா⁴வங் அனுபரிவத்தங், ந பரிமுச்சதி ரூபம்ஹா, ந பரிமுச்சதி வேத³னாய, ந பரிமுச்சதி ஸஞ்ஞாய, ந பரிமுச்சதி ஸங்கா²ரேஹி, ந பரிமுச்சதி விஞ்ஞாணம்ஹா, ந பரிமுச்சதி ஜாதியா ஜராமரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி. ‘ந பரிமுச்சதி து³க்க²ஸ்மா’தி வதா³மி’’.
‘‘Seyyathāpi, bhikkhave, sā gaddulabaddho 2 daḷhe khīle vā thambhe vā upanibaddho tameva khīlaṃ vā thambhaṃ vā anuparidhāvati anuparivattati; evameva kho, bhikkhave, assutavā puthujjano ariyānaṃ adassāvī…pe… sappurisadhamme avinīto rūpaṃ attato samanupassati…pe… vedanaṃ attato samanupassati… saññaṃ attato samanupassati… saṅkhāre attato samanupassati… viññāṇaṃ attato samanupassati, viññāṇavantaṃ vā attānaṃ; attani vā viññāṇaṃ, viññāṇasmiṃ vā attānaṃ. So rūpaññeva anuparidhāvati anuparivattati, vedanaññeva…pe… saññaññeva… saṅkhāreyeva… viññāṇaññeva anuparidhāvati anuparivattati. So rūpaṃ anuparidhāvaṃ anuparivattaṃ, vedanaṃ…pe… saññaṃ… saṅkhāre… viññāṇaṃ anuparidhāvaṃ anuparivattaṃ, na parimuccati rūpamhā, na parimuccati vedanāya, na parimuccati saññāya, na parimuccati saṅkhārehi, na parimuccati viññāṇamhā, na parimuccati jātiyā jarāmaraṇena sokehi paridevehi dukkhehi domanassehi upāyāsehi. ‘Na parimuccati dukkhasmā’ti vadāmi’’.
‘‘ஸுதவா ச கோ², பி⁴க்க²வே, அரியஸாவகோ அரியானங் த³ஸ்ஸாவீ…பே॰… ஸப்புரிஸத⁴ம்மே ஸுவினீதோ, ந ரூபங் அத்ததோ ஸமனுபஸ்ஸதி…பே॰… ந வேத³னங்… ந ஸஞ்ஞங்… ந ஸங்கா²ரே… ந விஞ்ஞாணங் அத்ததோ ஸமனுபஸ்ஸதி, ந விஞ்ஞாணவந்தங் வா அத்தானங்; ந அத்தனி வா விஞ்ஞாணங், ந விஞ்ஞாணஸ்மிங் வா அத்தானங். ஸோ ரூபங் நானுபரிதா⁴வதி நானுபரிவத்ததி, வேத³னங்… ஸஞ்ஞங்… ஸங்கா²ரே… விஞ்ஞாணங் நானுபரிதா⁴வதி நானுபரிவத்ததி. ஸோ ரூபங் அனநுபரிதா⁴வங் அனநுபரிவத்தங், வேத³னங்… ஸஞ்ஞங்… ஸங்கா²ரே… விஞ்ஞாணங் அனநுபரிதா⁴வங் அனநுபரிவத்தங்; பரிமுச்சதி ரூபம்ஹா, பரிமுச்சதி வேத³னாய, பரிமுச்சதி ஸஞ்ஞாய, பரிமுச்சதி ஸங்கா²ரேஹி, பரிமுச்சதி விஞ்ஞாணம்ஹா, பரிமுச்சதி ஜாதியா ஜராமரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி. ‘பரிமுச்சதி து³க்க²ஸ்மா’தி வதா³மீ’’தி. ஸத்தமங்.
‘‘Sutavā ca kho, bhikkhave, ariyasāvako ariyānaṃ dassāvī…pe… sappurisadhamme suvinīto, na rūpaṃ attato samanupassati…pe… na vedanaṃ… na saññaṃ… na saṅkhāre… na viññāṇaṃ attato samanupassati, na viññāṇavantaṃ vā attānaṃ; na attani vā viññāṇaṃ, na viññāṇasmiṃ vā attānaṃ. So rūpaṃ nānuparidhāvati nānuparivattati, vedanaṃ… saññaṃ… saṅkhāre… viññāṇaṃ nānuparidhāvati nānuparivattati. So rūpaṃ ananuparidhāvaṃ ananuparivattaṃ, vedanaṃ… saññaṃ… saṅkhāre… viññāṇaṃ ananuparidhāvaṃ ananuparivattaṃ; parimuccati rūpamhā, parimuccati vedanāya, parimuccati saññāya, parimuccati saṅkhārehi, parimuccati viññāṇamhā, parimuccati jātiyā jarāmaraṇena sokehi paridevehi dukkhehi domanassehi upāyāsehi. ‘Parimuccati dukkhasmā’ti vadāmī’’ti. Sattamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. க³த்³து³லப³த்³த⁴ஸுத்தவண்ணனா • 7. Gaddulabaddhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. க³த்³து³லப³த்³த⁴ஸுத்தவண்ணனா • 7. Gaddulabaddhasuttavaṇṇanā
