| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. গদ্রভসুত্তং
2. Gadrabhasuttaṃ
৮৩. ‘‘সেয্যথাপি, ভিক্খৰে, গদ্রভো গোগণং পিট্ঠিতো পিট্ঠিতো অনুবন্ধো হোতি – ‘অহম্পি দম্মো, অহম্পি দম্মো’তি 1। তস্স ন তাদিসো ৰণ্ণো হোতি সেয্যথাপি গুন্নং, ন তাদিসো সরো হোতি সেয্যথাপি গুন্নং, ন তাদিসং পদং হোতি সেয্যথাপি গুন্নং। সো গোগণংযেৰ পিট্ঠিতো পিট্ঠিতো অনুবন্ধো হোতি – ‘অহম্পি দম্মো, অহম্পি দম্মো’’’তি।
83. ‘‘Seyyathāpi, bhikkhave, gadrabho gogaṇaṃ piṭṭhito piṭṭhito anubandho hoti – ‘ahampi dammo, ahampi dammo’ti 2. Tassa na tādiso vaṇṇo hoti seyyathāpi gunnaṃ, na tādiso saro hoti seyyathāpi gunnaṃ, na tādisaṃ padaṃ hoti seyyathāpi gunnaṃ. So gogaṇaṃyeva piṭṭhito piṭṭhito anubandho hoti – ‘ahampi dammo, ahampi dammo’’’ti.
‘‘এৰমেৰং খো, ভিক্খৰে, ইধেকচ্চো ভিক্খু ভিক্খুসঙ্ঘং পিট্ঠিতো পিট্ঠিতো অনুবন্ধো হোতি – ‘অহম্পি ভিক্খু, অহম্পি ভিক্খূ’তি। তস্স ন তাদিসো ছন্দো হোতি অধিসীলসিক্খাসমাদানে সেয্যথাপি অঞ্ঞেসং ভিক্খূনং, ন তাদিসো ছন্দো হোতি অধিচিত্তসিক্খাসমাদানে সেয্যথাপি অঞ্ঞেসং ভিক্খূনং, ন তাদিসো ছন্দো হোতি অধিপঞ্ঞাসিক্খাসমাদানে সেয্যথাপি অঞ্ঞেসং ভিক্খূনং। সো ভিক্খুসঙ্ঘংযেৰ পিট্ঠিতো পিট্ঠিতো অনুবন্ধো হোতি – ‘অহম্পি ভিক্খু, অহম্পি ভিক্খূ’’’তি।
‘‘Evamevaṃ kho, bhikkhave, idhekacco bhikkhu bhikkhusaṅghaṃ piṭṭhito piṭṭhito anubandho hoti – ‘ahampi bhikkhu, ahampi bhikkhū’ti. Tassa na tādiso chando hoti adhisīlasikkhāsamādāne seyyathāpi aññesaṃ bhikkhūnaṃ, na tādiso chando hoti adhicittasikkhāsamādāne seyyathāpi aññesaṃ bhikkhūnaṃ, na tādiso chando hoti adhipaññāsikkhāsamādāne seyyathāpi aññesaṃ bhikkhūnaṃ. So bhikkhusaṅghaṃyeva piṭṭhito piṭṭhito anubandho hoti – ‘ahampi bhikkhu, ahampi bhikkhū’’’ti.
‘‘তস্মাতিহ , ভিক্খৰে, এৰং সিক্খিতব্বং – ‘তিব্বো নো ছন্দো ভৰিস্সতি অধিসীলসিক্খাসমাদানে, তিব্বো নো ছন্দো ভৰিস্সতি অধিচিত্তসিক্খাসমাদানে, তিব্বো নো ছন্দো ভৰিস্সতি অধিপঞ্ঞাসিক্খাসমাদানে’তি। এৰঞ্হি ৰো, ভিক্খৰে, সিক্খিতব্ব’’ন্তি। দুতিযং।
‘‘Tasmātiha , bhikkhave, evaṃ sikkhitabbaṃ – ‘tibbo no chando bhavissati adhisīlasikkhāsamādāne, tibbo no chando bhavissati adhicittasikkhāsamādāne, tibbo no chando bhavissati adhipaññāsikkhāsamādāne’ti. Evañhi vo, bhikkhave, sikkhitabba’’nti. Dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. গদ্রভসুত্তৰণ্ণনা • 2. Gadrabhasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৫. সমণসুত্তাদিৰণ্ণনা • 1-5. Samaṇasuttādivaṇṇanā
