| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၁. ဂဂ္ဂရာသုတ္တံ
11. Gaggarāsuttaṃ
၂၁၉. ဧကံ သမယံ ဘဂဝာ စမ္ပာယံ ဝိဟရတိ ဂဂ္ဂရာယ ပောက္ခရဏိယာ တီရေ မဟတာ ဘိက္ခုသင္ဃေန သဒ္ဓိံ ပဉ္စမတ္တေဟိ ဘိက္ခုသတေဟိ သတ္တဟိ စ ဥပာသကသတေဟိ သတ္တဟိ စ ဥပာသိကာသတေဟိ အနေကေဟိ စ ဒေဝတာသဟသ္သေဟိ။ တ္ယာသ္သုဒံ ဘဂဝာ အတိရောစတိ 1 ဝဏ္ဏေန စေဝ ယသသာ စ။ အထ ခော အာယသ္မတော ဝင္ဂီသသ္သ ဧတဒဟောသိ – ‘‘အယံ ခော ဘဂဝာ စမ္ပာယံ ဝိဟရတိ ဂဂ္ဂရာယ ပောက္ခရဏိယာ တီရေ မဟတာ ဘိက္ခုသင္ဃေန သဒ္ဓိံ ပဉ္စမတ္တေဟိ ဘိက္ခုသတေဟိ သတ္တဟိ စ ဥပာသကသတေဟိ သတ္တဟိ စ ဥပာသိကာသတေဟိ အနေကေဟိ စ ဒေဝတာသဟသ္သေဟိ။ တ္ယာသ္သုဒံ ဘဂဝာ အတိရောစတိ ဝဏ္ဏေန စေဝ ယသသာ စ။ ယံနူနာဟံ ဘဂဝန္တံ သမ္မုခာ သာရုပ္ပာယ ဂာထာယ အဘိတ္ထဝေယ္ယ’’န္တိ။
219. Ekaṃ samayaṃ bhagavā campāyaṃ viharati gaggarāya pokkharaṇiyā tīre mahatā bhikkhusaṅghena saddhiṃ pañcamattehi bhikkhusatehi sattahi ca upāsakasatehi sattahi ca upāsikāsatehi anekehi ca devatāsahassehi. Tyāssudaṃ bhagavā atirocati 2 vaṇṇena ceva yasasā ca. Atha kho āyasmato vaṅgīsassa etadahosi – ‘‘ayaṃ kho bhagavā campāyaṃ viharati gaggarāya pokkharaṇiyā tīre mahatā bhikkhusaṅghena saddhiṃ pañcamattehi bhikkhusatehi sattahi ca upāsakasatehi sattahi ca upāsikāsatehi anekehi ca devatāsahassehi. Tyāssudaṃ bhagavā atirocati vaṇṇena ceva yasasā ca. Yaṃnūnāhaṃ bhagavantaṃ sammukhā sāruppāya gāthāya abhitthaveyya’’nti.
အထ ခော အာယသ္မာ ဝင္ဂီသော ဥဋ္ဌာယာသနာ ဧကံသံ ဥတ္တရာသင္ဂံ ကရိတ္ဝာ ယေန ဘဂဝာ တေနဉ္ဇလိံ ပဏာမေတ္ဝာ ဘဂဝန္တံ ဧတဒဝောစ – ‘‘ပဋိဘာတိ မံ, ဘဂဝာ, ပဋိဘာတိ မံ, သုဂတာ’’တိ။ ‘‘ပဋိဘာတု တံ, ဝင္ဂီသာ’’တိ ဘဂဝာ အဝောစ။ အထ ခော အာယသ္မာ ဝင္ဂီသော ဘဂဝန္တံ သမ္မုခာ သာရုပ္ပာယ ဂာထာယ အဘိတ္ထဝိ –
Atha kho āyasmā vaṅgīso uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘paṭibhāti maṃ, bhagavā, paṭibhāti maṃ, sugatā’’ti. ‘‘Paṭibhātu taṃ, vaṅgīsā’’ti bhagavā avoca. Atha kho āyasmā vaṅgīso bhagavantaṃ sammukhā sāruppāya gāthāya abhitthavi –
‘‘စန္ဒော ယထာ ဝိဂတဝလာဟကေ နဘေ၊
‘‘Cando yathā vigatavalāhake nabhe,
ဝိရောစတိ ဝိဂတမလောဝ ဘာဏုမာ။
Virocati vigatamalova bhāṇumā;
ဧဝမ္ပိ အင္ဂီရသ တ္ဝံ မဟာမုနိ၊
Evampi aṅgīrasa tvaṃ mahāmuni,
အတိရောစသိ ယသသာ သဗ္ဗလောက’’န္တိ။
Atirocasi yasasā sabbaloka’’nti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၁. ဂဂ္ဂရာသုတ္တဝဏ္ဏနာ • 11. Gaggarāsuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၁. ဂဂ္ဂရာသုတ္တဝဏ္ဏနာ • 11. Gaggarāsuttavaṇṇanā
