| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
11. ගග්‌ගරාසුත්‌තං
11. Gaggarāsuttaṃ
219. එකං සමයං භගවා චම්‌පායං විහරති ගග්‌ගරාය පොක්‌ඛරණියා තීරෙ මහතා භික්‌ඛුසඞ්‌ඝෙන සද්‌ධිං පඤ්‌චමත්‌තෙහි භික්‌ඛුසතෙහි සත්‌තහි ච උපාසකසතෙහි සත්‌තහි ච උපාසිකාසතෙහි අනෙකෙහි ච දෙවතාසහස්‌සෙහි. ත්‍යාස්‌සුදං භගවා අතිරොචති 1 වණ්‌ණෙන චෙව යසසා ච. අථ ඛො ආයස්‌මතො වඞ්‌ගීසස්‌ස එතදහොසි – ‘‘අයං ඛො භගවා චම්‌පායං විහරති ගග්‌ගරාය පොක්‌ඛරණියා තීරෙ මහතා භික්‌ඛුසඞ්‌ඝෙන සද්‌ධිං පඤ්‌චමත්‌තෙහි භික්‌ඛුසතෙහි සත්‌තහි ච උපාසකසතෙහි සත්‌තහි ච උපාසිකාසතෙහි අනෙකෙහි ච දෙවතාසහස්‌සෙහි. ත්‍යාස්‌සුදං භගවා අතිරොචති වණ්‌ණෙන චෙව යසසා ච. යංනූනාහං භගවන්‌තං සම්‌මුඛා සාරුප්‌පාය ගාථාය අභිත්‌ථවෙය්‍ය’’න්‌ති.
219. Ekaṃ samayaṃ bhagavā campāyaṃ viharati gaggarāya pokkharaṇiyā tīre mahatā bhikkhusaṅghena saddhiṃ pañcamattehi bhikkhusatehi sattahi ca upāsakasatehi sattahi ca upāsikāsatehi anekehi ca devatāsahassehi. Tyāssudaṃ bhagavā atirocati 2 vaṇṇena ceva yasasā ca. Atha kho āyasmato vaṅgīsassa etadahosi – ‘‘ayaṃ kho bhagavā campāyaṃ viharati gaggarāya pokkharaṇiyā tīre mahatā bhikkhusaṅghena saddhiṃ pañcamattehi bhikkhusatehi sattahi ca upāsakasatehi sattahi ca upāsikāsatehi anekehi ca devatāsahassehi. Tyāssudaṃ bhagavā atirocati vaṇṇena ceva yasasā ca. Yaṃnūnāhaṃ bhagavantaṃ sammukhā sāruppāya gāthāya abhitthaveyya’’nti.
අථ ඛො ආයස්‌මා වඞ්‌ගීසො උට්‌ඨායාසනා එකංසං උත්‌තරාසඞ්‌ගං කරිත්‌වා යෙන භගවා තෙනඤ්‌ජලිං පණාමෙත්‌වා භගවන්‌තං එතදවොච – ‘‘පටිභාති මං, භගවා, පටිභාති මං, සුගතා’’ති. ‘‘පටිභාතු තං, වඞ්‌ගීසා’’ති භගවා අවොච. අථ ඛො ආයස්‌මා වඞ්‌ගීසො භගවන්‌තං සම්‌මුඛා සාරුප්‌පාය ගාථාය අභිත්‌ථවි –
Atha kho āyasmā vaṅgīso uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘paṭibhāti maṃ, bhagavā, paṭibhāti maṃ, sugatā’’ti. ‘‘Paṭibhātu taṃ, vaṅgīsā’’ti bhagavā avoca. Atha kho āyasmā vaṅgīso bhagavantaṃ sammukhā sāruppāya gāthāya abhitthavi –
‘‘චන්‌දො යථා විගතවලාහකෙ නභෙ,
‘‘Cando yathā vigatavalāhake nabhe,
විරොචති විගතමලොව භාණුමා;
Virocati vigatamalova bhāṇumā;
එවම්‌පි අඞ්‌ගීරස ත්‌වං මහාමුනි,
Evampi aṅgīrasa tvaṃ mahāmuni,
අතිරොචසි යසසා සබ්‌බලොක’’න්‌ති.
Atirocasi yasasā sabbaloka’’nti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 11. ගග්‌ගරාසුත්‌තවණ්‌ණනා • 11. Gaggarāsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 11. ගග්‌ගරාසුත්‌තවණ්‌ණනා • 11. Gaggarāsuttavaṇṇanā
