| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๘. คหฎฺฐวนฺทนาสุตฺตวณฺณนา
8. Gahaṭṭhavandanāsuttavaṇṇanā
๒๖๔. ปุถุทฺทิสาติ พหุทิสาฯ กา ปน ตาติ อาห ‘‘จตโสฺส ทิสา จตโสฺส อนุทิสา จา’’ติฯ อนุทิสาคหเณน เจตฺถ อุทฺธํ อโธปิ คยฺหตีติ จ ทเสฺสติฯ ภูมิวาสิโนติ ภูมิปฎิพทฺธวุตฺติโนฯ เอเตน รุกฺขปพฺพตนิวาสิโนปิ คหิตา โหนฺติฯ จิรรตฺตสมาหิตจิเตฺตติ อุปจารปฺปนาฌานานิ อุปฺปาเทตฺวา อปริหีนชฺฌานตาย จิรกาลํ สมาหิตจิเตฺตฯ อาปาณโกฎิกนฺติ ชีวิตปริยนฺตํ ยาวชีวํฯ เอวมาทีติ อาทิ-สเทฺทน อวเสสปุญฺญกิริยวตฺถูนิ สงฺคณฺหาติฯ นิจฺจสีลวเสน ปญฺจหิ, นิยมสีลวเสน ทสหิฯ ปิ-สเทฺทน ตโต กติปเยหิ อุโปสถสีลวเสน อฎฺฐหิปีติ ทเสฺสติฯ ธมฺมิเกหีติ ธมฺมโต อนเปเตหิฯ ปมุโขติ ปโมโกฺขฯ
264.Puthuddisāti bahudisā. Kā pana tāti āha ‘‘catasso disā catasso anudisā cā’’ti. Anudisāgahaṇena cettha uddhaṃ adhopi gayhatīti ca dasseti. Bhūmivāsinoti bhūmipaṭibaddhavuttino. Etena rukkhapabbatanivāsinopi gahitā honti. Cirarattasamāhitacitteti upacārappanājhānāni uppādetvā aparihīnajjhānatāya cirakālaṃ samāhitacitte. Āpāṇakoṭikanti jīvitapariyantaṃ yāvajīvaṃ. Evamādīti ādi-saddena avasesapuññakiriyavatthūni saṅgaṇhāti. Niccasīlavasena pañcahi, niyamasīlavasena dasahi. Pi-saddena tato katipayehi uposathasīlavasena aṭṭhahipīti dasseti. Dhammikehīti dhammato anapetehi. Pamukhoti pamokkho.
คหฎฺฐวนฺทนาสุตฺตวณฺณนา นิฎฺฐิตาฯ
Gahaṭṭhavandanāsuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๘. คหฎฺฐวนฺทนาสุตฺตํ • 8. Gahaṭṭhavandanāsuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๘. คหฎฺฐวนฺทนาสุตฺตวณฺณนา • 8. Gahaṭṭhavandanāsuttavaṇṇanā
