| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
4. சதுத்த²வக்³கோ³
4. Catutthavaggo
1. க³ஹ்வரதீரியத்தே²ரகா³தா²வண்ணனா
1. Gahvaratīriyattheragāthāvaṇṇanā
பு²ட்டோ² ட³ங்ஸேஹீதி ஆயஸ்மதோ க³ஹ்வரதீரியத்தே²ரஸ்ஸ கா³தா². கா உப்பத்தி? ஸோ கிர புரிமபு³த்³தே⁴ஸு கதாதி⁴காரோ இதோ ஏகதிங்ஸே கப்பே ஸிகி²ஸ்ஸ ப⁴க³வதோ காலே மிக³லுத்³தோ³ ஹுத்வா அரஞ்ஞே விசரந்தோ அத்³த³ஸ ஸிகி²ங் ப⁴க³வந்தங் அஞ்ஞதரஸ்மிங் ருக்க²மூலே தே³வனாக³யக்கா²னங் த⁴ம்மங் தே³ஸெந்தங், தி³ஸ்வா பன பஸன்னமானஸோ ‘‘த⁴ம்மோ ஏஸ வுச்சதீ’’தி ஸரே நிமித்தங் அக்³க³ஹேஸி. ஸோ தேன சித்தப்பஸாதே³ன தே³வலோகே உப்பன்னோ புன அபராபரங் ஸுக³தீஸுயேவ ஸங்ஸரந்தோ இமஸ்மிங் பு³த்³து⁴ப்பாதே³ ஸாவத்தி²யங் ப்³ராஹ்மணகுலே நிப்³ப³த்தித்வா ‘‘அக்³கி³த³த்தோ’’தி லத்³த⁴னாமோ வயப்பத்தோ ப⁴க³வதோ யமகபாடிஹாரியங் தி³ஸ்வா ஸஞ்ஜாதப்பஸாதோ³ ஸாஸனே பப்³ப³ஜித்வா கம்மட்டா²னங் க³ஹெத்வா க³ஹ்வரதீரே நாம அரஞ்ஞட்டா²னே வஸதி. தேனஸ்ஸ க³ஹ்வரதீரயோதி ஸமஞ்ஞா அஹோஸி. ஸோ விபஸ்ஸனங் வட்³டெ⁴த்வா நசிரஸ்ஸேவ அரஹத்தங் பாபுணி. தேன வுத்தங் அபதா³னே (அப॰ தே²ர 2.52.44-50) –
Phuṭṭhoḍaṃsehīti āyasmato gahvaratīriyattherassa gāthā. Kā uppatti? So kira purimabuddhesu katādhikāro ito ekatiṃse kappe sikhissa bhagavato kāle migaluddo hutvā araññe vicaranto addasa sikhiṃ bhagavantaṃ aññatarasmiṃ rukkhamūle devanāgayakkhānaṃ dhammaṃ desentaṃ, disvā pana pasannamānaso ‘‘dhammo esa vuccatī’’ti sare nimittaṃ aggahesi. So tena cittappasādena devaloke uppanno puna aparāparaṃ sugatīsuyeva saṃsaranto imasmiṃ buddhuppāde sāvatthiyaṃ brāhmaṇakule nibbattitvā ‘‘aggidatto’’ti laddhanāmo vayappatto bhagavato yamakapāṭihāriyaṃ disvā sañjātappasādo sāsane pabbajitvā kammaṭṭhānaṃ gahetvā gahvaratīre nāma araññaṭṭhāne vasati. Tenassa gahvaratīrayoti samaññā ahosi. So vipassanaṃ vaḍḍhetvā nacirasseva arahattaṃ pāpuṇi. Tena vuttaṃ apadāne (apa. thera 2.52.44-50) –
‘‘மிக³லுத்³தோ³ புரே ஆஸி, அரஞ்ஞே விபினே அஹங்;
‘‘Migaluddo pure āsi, araññe vipine ahaṃ;
அத்³த³ஸங் விரஜங் பு³த்³த⁴ங், தே³வஸங்க⁴புரக்க²தங்.
Addasaṃ virajaṃ buddhaṃ, devasaṅghapurakkhataṃ.
‘‘சதுஸச்சங் பகாஸெந்தங், தே³ஸெந்தங், அமதங் பத³ங்;
‘‘Catusaccaṃ pakāsentaṃ, desentaṃ, amataṃ padaṃ;
அஸ்ஸோஸிங் மது⁴ரங் த⁴ம்மங், ஸிகி²னோ லோகப³ந்து⁴னோ.
Assosiṃ madhuraṃ dhammaṃ, sikhino lokabandhuno.
‘‘கோ⁴ஸே சித்தங் பஸாதே³ஸிங், அஸமப்படிபுக்³க³லே;
‘‘Ghose cittaṃ pasādesiṃ, asamappaṭipuggale;
தத்த² சித்தங் பஸாதெ³த்வா, உத்தரிங் து³த்தரங் ப⁴வங்.
Tattha cittaṃ pasādetvā, uttariṃ duttaraṃ bhavaṃ.
‘‘ஏகதிங்ஸே இதோ கப்பே, யங் ஸஞ்ஞமலபி⁴ங் ததா³;
‘‘Ekatiṃse ito kappe, yaṃ saññamalabhiṃ tadā;
து³க்³க³திங் நாபி⁴ஜானாமி, கோ⁴ஸஸஞ்ஞாயித³ங் ப²லங்.
Duggatiṃ nābhijānāmi, ghosasaññāyidaṃ phalaṃ.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
அரஹத்தங் பன பத்வா ப⁴க³வந்தங் வந்தி³த்வா ஸாவத்தி²யங் அக³மாஸி. தஸ்ஸ ஆக³தபா⁴வங் ஸுத்வா ஞாதகா உபக³ந்த்வா மஹாதா³னங் பவத்தேஸுங். ஸோ கதிபயதி³வஸே வஸித்வா அரஞ்ஞமேவ க³ந்துகாமோ அஹோஸி. தங் ஞாதகா, ‘‘ப⁴ந்தே, அரஞ்ஞங் நாம ட³ங்ஸமகஸாதி³வஸேன ப³ஹுபரிஸ்ஸயங், இதே⁴வ வஸதா²’’தி ஆஹங்ஸு. தங் ஸுத்வா தே²ரோ ‘‘அரஞ்ஞவாஸோயேவ மய்ஹங் ருச்சதீ’’தி விவேகாபி⁴ரதிகித்தனமுகே²ன அஞ்ஞங் ப்³யாகரொந்தோ ‘‘பு²ட்டோ² ட³ங்ஸேஹீ’’தி கா³த²ங் அபா⁴ஸி.
Arahattaṃ pana patvā bhagavantaṃ vanditvā sāvatthiyaṃ agamāsi. Tassa āgatabhāvaṃ sutvā ñātakā upagantvā mahādānaṃ pavattesuṃ. So katipayadivase vasitvā araññameva gantukāmo ahosi. Taṃ ñātakā, ‘‘bhante, araññaṃ nāma ḍaṃsamakasādivasena bahuparissayaṃ, idheva vasathā’’ti āhaṃsu. Taṃ sutvā thero ‘‘araññavāsoyeva mayhaṃ ruccatī’’ti vivekābhiratikittanamukhena aññaṃ byākaronto ‘‘phuṭṭho ḍaṃsehī’’ti gāthaṃ abhāsi.
31. தத்த² பு²ட்டோ² ட³ங்ஸேஹி மகஸேஹீதி ட³ங்ஸனஸீலதாய ‘‘ட³ங்ஸா’’தி லத்³த⁴னாமாஹி அந்த⁴கமக்கி²காஹி, மகஸனஞ்ஞிதேஹி ச ஸூசிமுக²பாணேஹி பு²ஸ்ஸிதோ த³ட்டோ²தி அத்தோ². அரஞ்ஞஸ்மிந்தி ‘‘பஞ்சத⁴னுஸதிகங் பச்சி²ம’’ந்தி (பாரா॰ 654) வுத்தஅரஞ்ஞலக்க²ணயோக³தோ அரஞ்ஞே. ப்³ரஹாவனேதி மஹாருக்க²க³ச்ச²க³ஹனதாய மஹாவனே அரஞ்ஞானியங். நாகோ³ ஸங்கா³மஸீஸேவாதி ஸங்கா³மாவசரோ ஹத்தி²னாகோ³ விய ஸங்கா³மமுத்³த⁴னி பரஸேனாஸம்பஹாரங். ‘‘அரஞ்ஞவாஸோ நாம பு³த்³தா⁴தீ³ஹி வண்ணிதோ தோ²மிதோ’’தி உஸ்ஸாஹஜாதோ ஸதோ ஸதிமா ஹுத்வா தத்ர தஸ்மிங் அரஞ்ஞே, தஸ்மிங் வா ட³ங்ஸாதி³ஸம்ப²ஸ்ஸே உபட்டி²தே அதி⁴வாஸயே அதி⁴வாஸெய்ய ஸஹெய்ய, ‘‘ட³ங்ஸாத³யோ மங் ஆபா³தெ⁴ந்தீ’’தி அரஞ்ஞவாஸங் ந ஜஹெய்யாதி அத்தோ².
31. Tattha phuṭṭho ḍaṃsehi makasehīti ḍaṃsanasīlatāya ‘‘ḍaṃsā’’ti laddhanāmāhi andhakamakkhikāhi, makasanaññitehi ca sūcimukhapāṇehi phussito daṭṭhoti attho. Araññasminti ‘‘pañcadhanusatikaṃ pacchima’’nti (pārā. 654) vuttaaraññalakkhaṇayogato araññe. Brahāvaneti mahārukkhagacchagahanatāya mahāvane araññāniyaṃ. Nāgo saṅgāmasīsevāti saṅgāmāvacaro hatthināgo viya saṅgāmamuddhani parasenāsampahāraṃ. ‘‘Araññavāso nāma buddhādīhi vaṇṇito thomito’’ti ussāhajāto sato satimā hutvā tatra tasmiṃ araññe, tasmiṃ vā ḍaṃsādisamphasse upaṭṭhite adhivāsaye adhivāseyya saheyya, ‘‘ḍaṃsādayo maṃ ābādhentī’’ti araññavāsaṃ na jaheyyāti attho.
க³ஹ்வரதீரியத்தே²ரகா³தா²வண்ணனா நிட்டி²தா.
Gahvaratīriyattheragāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 1. க³ஹ்வரதீரியத்தே²ரகா³தா² • 1. Gahvaratīriyattheragāthā
