| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৪. চতুত্থৰগ্গো
4. Catutthavaggo
১. গহ্ৰরতীরিযত্থেরগাথাৰণ্ণনা
1. Gahvaratīriyattheragāthāvaṇṇanā
ফুট্ঠো ডংসেহীতি আযস্মতো গহ্ৰরতীরিযত্থেরস্স গাথা। কা উপ্পত্তি? সো কির পুরিমবুদ্ধেসু কতাধিকারো ইতো একতিংসে কপ্পে সিখিস্স ভগৰতো কালে মিগলুদ্দো হুত্ৰা অরঞ্ঞে ৰিচরন্তো অদ্দস সিখিং ভগৰন্তং অঞ্ঞতরস্মিং রুক্খমূলে দেৰনাগযক্খানং ধম্মং দেসেন্তং, দিস্ৰা পন পসন্নমানসো ‘‘ধম্মো এস ৰুচ্চতী’’তি সরে নিমিত্তং অগ্গহেসি। সো তেন চিত্তপ্পসাদেন দেৰলোকে উপ্পন্নো পুন অপরাপরং সুগতীসুযেৰ সংসরন্তো ইমস্মিং বুদ্ধুপ্পাদে সাৰত্থিযং ব্রাহ্মণকুলে নিব্বত্তিত্ৰা ‘‘অগ্গিদত্তো’’তি লদ্ধনামো ৰযপ্পত্তো ভগৰতো যমকপাটিহারিযং দিস্ৰা সঞ্জাতপ্পসাদো সাসনে পব্বজিত্ৰা কম্মট্ঠানং গহেত্ৰা গহ্ৰরতীরে নাম অরঞ্ঞট্ঠানে ৰসতি। তেনস্স গহ্ৰরতীরযোতি সমঞ্ঞা অহোসি। সো ৰিপস্সনং ৰড্ঢেত্ৰা নচিরস্সেৰ অরহত্তং পাপুণি। তেন ৰুত্তং অপদানে (অপ॰ থের ২.৫২.৪৪-৫০) –
Phuṭṭhoḍaṃsehīti āyasmato gahvaratīriyattherassa gāthā. Kā uppatti? So kira purimabuddhesu katādhikāro ito ekatiṃse kappe sikhissa bhagavato kāle migaluddo hutvā araññe vicaranto addasa sikhiṃ bhagavantaṃ aññatarasmiṃ rukkhamūle devanāgayakkhānaṃ dhammaṃ desentaṃ, disvā pana pasannamānaso ‘‘dhammo esa vuccatī’’ti sare nimittaṃ aggahesi. So tena cittappasādena devaloke uppanno puna aparāparaṃ sugatīsuyeva saṃsaranto imasmiṃ buddhuppāde sāvatthiyaṃ brāhmaṇakule nibbattitvā ‘‘aggidatto’’ti laddhanāmo vayappatto bhagavato yamakapāṭihāriyaṃ disvā sañjātappasādo sāsane pabbajitvā kammaṭṭhānaṃ gahetvā gahvaratīre nāma araññaṭṭhāne vasati. Tenassa gahvaratīrayoti samaññā ahosi. So vipassanaṃ vaḍḍhetvā nacirasseva arahattaṃ pāpuṇi. Tena vuttaṃ apadāne (apa. thera 2.52.44-50) –
‘‘মিগলুদ্দো পুরে আসি, অরঞ্ঞে ৰিপিনে অহং।
‘‘Migaluddo pure āsi, araññe vipine ahaṃ;
অদ্দসং ৰিরজং বুদ্ধং, দেৰসঙ্ঘপুরক্খতং॥
Addasaṃ virajaṃ buddhaṃ, devasaṅghapurakkhataṃ.
‘‘চতুসচ্চং পকাসেন্তং, দেসেন্তং, অমতং পদং।
‘‘Catusaccaṃ pakāsentaṃ, desentaṃ, amataṃ padaṃ;
অস্সোসিং মধুরং ধম্মং, সিখিনো লোকবন্ধুনো॥
Assosiṃ madhuraṃ dhammaṃ, sikhino lokabandhuno.
‘‘ঘোসে চিত্তং পসাদেসিং, অসমপ্পটিপুগ্গলে।
‘‘Ghose cittaṃ pasādesiṃ, asamappaṭipuggale;
তত্থ চিত্তং পসাদেত্ৰা, উত্তরিং দুত্তরং ভৰং॥
Tattha cittaṃ pasādetvā, uttariṃ duttaraṃ bhavaṃ.
‘‘একতিংসে ইতো কপ্পে, যং সঞ্ঞমলভিং তদা।
‘‘Ekatiṃse ito kappe, yaṃ saññamalabhiṃ tadā;
দুগ্গতিং নাভিজানামি, ঘোসসঞ্ঞাযিদং ফলং॥
Duggatiṃ nābhijānāmi, ghosasaññāyidaṃ phalaṃ.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহত্তং পন পত্ৰা ভগৰন্তং ৰন্দিত্ৰা সাৰত্থিযং অগমাসি। তস্স আগতভাৰং সুত্ৰা ঞাতকা উপগন্ত্ৰা মহাদানং পৰত্তেসুং। সো কতিপযদিৰসে ৰসিত্ৰা অরঞ্ঞমেৰ গন্তুকামো অহোসি। তং ঞাতকা, ‘‘ভন্তে, অরঞ্ঞং নাম ডংসমকসাদিৰসেন বহুপরিস্সযং, ইধেৰ ৰসথা’’তি আহংসু। তং সুত্ৰা থেরো ‘‘অরঞ্ঞৰাসোযেৰ ময্হং রুচ্চতী’’তি ৰিৰেকাভিরতিকিত্তনমুখেন অঞ্ঞং ব্যাকরোন্তো ‘‘ফুট্ঠো ডংসেহী’’তি গাথং অভাসি।
Arahattaṃ pana patvā bhagavantaṃ vanditvā sāvatthiyaṃ agamāsi. Tassa āgatabhāvaṃ sutvā ñātakā upagantvā mahādānaṃ pavattesuṃ. So katipayadivase vasitvā araññameva gantukāmo ahosi. Taṃ ñātakā, ‘‘bhante, araññaṃ nāma ḍaṃsamakasādivasena bahuparissayaṃ, idheva vasathā’’ti āhaṃsu. Taṃ sutvā thero ‘‘araññavāsoyeva mayhaṃ ruccatī’’ti vivekābhiratikittanamukhena aññaṃ byākaronto ‘‘phuṭṭho ḍaṃsehī’’ti gāthaṃ abhāsi.
৩১. তত্থ ফুট্ঠো ডংসেহি মকসেহীতি ডংসনসীলতায ‘‘ডংসা’’তি লদ্ধনামাহি অন্ধকমক্খিকাহি, মকসনঞ্ঞিতেহি চ সূচিমুখপাণেহি ফুস্সিতো দট্ঠোতি অত্থো। অরঞ্ঞস্মিন্তি ‘‘পঞ্চধনুসতিকং পচ্ছিম’’ন্তি (পারা॰ ৬৫৪) ৰুত্তঅরঞ্ঞলক্খণযোগতো অরঞ্ঞে। ব্রহাৰনেতি মহারুক্খগচ্ছগহনতায মহাৰনে অরঞ্ঞানিযং। নাগো সঙ্গামসীসেৰাতি সঙ্গামাৰচরো হত্থিনাগো ৰিয সঙ্গামমুদ্ধনি পরসেনাসম্পহারং। ‘‘অরঞ্ঞৰাসো নাম বুদ্ধাদীহি ৰণ্ণিতো থোমিতো’’তি উস্সাহজাতো সতো সতিমা হুত্ৰা তত্র তস্মিং অরঞ্ঞে, তস্মিং ৰা ডংসাদিসম্ফস্সে উপট্ঠিতে অধিৰাসযে অধিৰাসেয্য সহেয্য, ‘‘ডংসাদযো মং আবাধেন্তী’’তি অরঞ্ঞৰাসং ন জহেয্যাতি অত্থো।
31. Tattha phuṭṭho ḍaṃsehi makasehīti ḍaṃsanasīlatāya ‘‘ḍaṃsā’’ti laddhanāmāhi andhakamakkhikāhi, makasanaññitehi ca sūcimukhapāṇehi phussito daṭṭhoti attho. Araññasminti ‘‘pañcadhanusatikaṃ pacchima’’nti (pārā. 654) vuttaaraññalakkhaṇayogato araññe. Brahāvaneti mahārukkhagacchagahanatāya mahāvane araññāniyaṃ. Nāgo saṅgāmasīsevāti saṅgāmāvacaro hatthināgo viya saṅgāmamuddhani parasenāsampahāraṃ. ‘‘Araññavāso nāma buddhādīhi vaṇṇito thomito’’ti ussāhajāto sato satimā hutvā tatra tasmiṃ araññe, tasmiṃ vā ḍaṃsādisamphasse upaṭṭhite adhivāsaye adhivāseyya saheyya, ‘‘ḍaṃsādayo maṃ ābādhentī’’ti araññavāsaṃ na jaheyyāti attho.
গহ্ৰরতীরিযত্থেরগাথাৰণ্ণনা নিট্ঠিতা।
Gahvaratīriyattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ১. গহ্ৰরতীরিযত্থেরগাথা • 1. Gahvaratīriyattheragāthā
