| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
76. கா³மஸீமாதி³
76. Gāmasīmādi
147. அஸம்மதாய , பி⁴க்க²வே, ஸீமாய அட்ட²பிதாய, யங் கா³மங் வா நிக³மங் வா உபனிஸ்ஸாய விஹரதி, யா தஸ்ஸ வா கா³மஸ்ஸ கா³மஸீமா, நிக³மஸ்ஸ வா நிக³மஸீமா, அயங் தத்த² ஸமானஸங்வாஸா ஏகுபோஸதா². அகா³மகே சே, பி⁴க்க²வே, அரஞ்ஞே ஸமந்தா ஸத்தப்³ப⁴ந்தரா, அயங் தத்த² ஸமானஸங்வாஸா ஏகுபோஸதா². ஸப்³பா³, பி⁴க்க²வே, நதீ³ அஸீமா; ஸப்³போ³ ஸமுத்³தோ³ அஸீமோ; ஸப்³போ³ ஜாதஸ்ஸரோ அஸீமோ. நதி³யா வா, பி⁴க்க²வே, ஸமுத்³தே³ வா ஜாதஸ்ஸரே வா யங் மஜ்ஜி²மஸ்ஸ புரிஸஸ்ஸ ஸமந்தா உத³குக்கே²பா, அயங் தத்த² ஸமானஸங்வாஸா ஏகுபோஸதா²தி.
147. Asammatāya , bhikkhave, sīmāya aṭṭhapitāya, yaṃ gāmaṃ vā nigamaṃ vā upanissāya viharati, yā tassa vā gāmassa gāmasīmā, nigamassa vā nigamasīmā, ayaṃ tattha samānasaṃvāsā ekuposathā. Agāmake ce, bhikkhave, araññe samantā sattabbhantarā, ayaṃ tattha samānasaṃvāsā ekuposathā. Sabbā, bhikkhave, nadī asīmā; sabbo samuddo asīmo; sabbo jātassaro asīmo. Nadiyā vā, bhikkhave, samudde vā jātassare vā yaṃ majjhimassa purisassa samantā udakukkhepā, ayaṃ tattha samānasaṃvāsā ekuposathāti.
148. தேன கோ² பன ஸமயேன ச²ப்³ப³க்³கி³யா பி⁴க்கூ² ஸீமாய ஸீமங் ஸம்பி⁴ந்த³ந்தி. ப⁴க³வதோ ஏதமத்த²ங் ஆரோசேஸுங். யேஸங், பி⁴க்க²வே, ஸீமா பட²மங் ஸம்மதா தேஸங் தங் கம்மங் த⁴ம்மிகங் அகுப்பங் டா²னாரஹங். யேஸங், பி⁴க்க²வே, ஸீமா பச்சா² ஸம்மதா தேஸங் தங் கம்மங் அத⁴ம்மிகங் குப்பங் அட்டா²னாரஹங். ந, பி⁴க்க²வே, ஸீமாய ஸீமா ஸம்பி⁴ந்தி³தப்³பா³. யோ ஸம்பி⁴ந்தெ³ய்ய, ஆபத்தி து³க்கடஸ்ஸாதி.
148. Tena kho pana samayena chabbaggiyā bhikkhū sīmāya sīmaṃ sambhindanti. Bhagavato etamatthaṃ ārocesuṃ. Yesaṃ, bhikkhave, sīmā paṭhamaṃ sammatā tesaṃ taṃ kammaṃ dhammikaṃ akuppaṃ ṭhānārahaṃ. Yesaṃ, bhikkhave, sīmā pacchā sammatā tesaṃ taṃ kammaṃ adhammikaṃ kuppaṃ aṭṭhānārahaṃ. Na, bhikkhave, sīmāya sīmā sambhinditabbā. Yo sambhindeyya, āpatti dukkaṭassāti.
தேன கோ² பன ஸமயேன ச²ப்³ப³க்³கி³யா பி⁴க்கூ² ஸீமாய ஸீமங் அஜ்ஜொ²த்த²ரந்தி. ப⁴க³வதோ ஏதமத்த²ங் ஆரோசேஸுங். யேஸங், பி⁴க்க²வே, ஸீமா பட²மங் ஸம்மதா தேஸங் தங் கம்மங் த⁴ம்மிகங் அகுப்பங் டா²னாரஹங். யேஸங், பி⁴க்க²வே, ஸீமா பச்சா² ஸம்மதா தேஸங் தங் கம்மங் அத⁴ம்மிகங் குப்பங் அட்டா²னாரஹங். ந, பி⁴க்க²வே, ஸீமாய ஸீமா அஜ்ஜொ²த்த²ரிதப்³பா³. யோ அஜ்ஜொ²த்த²ரெய்ய, ஆபத்தி து³க்கடஸ்ஸாதி. அனுஜானாமி, பி⁴க்க²வே, ஸீமங் ஸம்மன்னந்தேன ஸீமந்தரிகங் ட²பெத்வா ஸீமங் ஸம்மன்னிதுந்தி.
Tena kho pana samayena chabbaggiyā bhikkhū sīmāya sīmaṃ ajjhottharanti. Bhagavato etamatthaṃ ārocesuṃ. Yesaṃ, bhikkhave, sīmā paṭhamaṃ sammatā tesaṃ taṃ kammaṃ dhammikaṃ akuppaṃ ṭhānārahaṃ. Yesaṃ, bhikkhave, sīmā pacchā sammatā tesaṃ taṃ kammaṃ adhammikaṃ kuppaṃ aṭṭhānārahaṃ. Na, bhikkhave, sīmāya sīmā ajjhottharitabbā. Yo ajjhotthareyya, āpatti dukkaṭassāti. Anujānāmi, bhikkhave, sīmaṃ sammannantena sīmantarikaṃ ṭhapetvā sīmaṃ sammannitunti.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கா³மஸீமாதி³கதா² • Gāmasīmādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கா³மஸீமாதி³கதா²வண்ணனா • Gāmasīmādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கா³மஸீமாதி³கதா²வண்ணனா • Gāmasīmādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கா³மஸீமாதி³கதா²வண்ணனா • Gāmasīmādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 76. கா³மஸீமாதி³கதா² • 76. Gāmasīmādikathā
