| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
76. ගාමසීමාදි
76. Gāmasīmādi
147. අසම්‌මතාය , භික්‌ඛවෙ, සීමාය අට්‌ඨපිතාය, යං ගාමං වා නිගමං වා උපනිස්‌සාය විහරති, යා තස්‌ස වා ගාමස්‌ස ගාමසීමා, නිගමස්‌ස වා නිගමසීමා, අයං තත්‌ථ සමානසංවාසා එකුපොසථා. අගාමකෙ චෙ, භික්‌ඛවෙ, අරඤ්‌ඤෙ සමන්‌තා සත්‌තබ්‌භන්‌තරා, අයං තත්‌ථ සමානසංවාසා එකුපොසථා. සබ්‌බා, භික්‌ඛවෙ, නදී අසීමා; සබ්‌බො සමුද්‌දො අසීමො; සබ්‌බො ජාතස්‌සරො අසීමො. නදියා වා, භික්‌ඛවෙ, සමුද්‌දෙ වා ජාතස්‌සරෙ වා යං මජ්‌ඣිමස්‌ස පුරිසස්‌ස සමන්‌තා උදකුක්‌ඛෙපා, අයං තත්‌ථ සමානසංවාසා එකුපොසථාති.
147. Asammatāya , bhikkhave, sīmāya aṭṭhapitāya, yaṃ gāmaṃ vā nigamaṃ vā upanissāya viharati, yā tassa vā gāmassa gāmasīmā, nigamassa vā nigamasīmā, ayaṃ tattha samānasaṃvāsā ekuposathā. Agāmake ce, bhikkhave, araññe samantā sattabbhantarā, ayaṃ tattha samānasaṃvāsā ekuposathā. Sabbā, bhikkhave, nadī asīmā; sabbo samuddo asīmo; sabbo jātassaro asīmo. Nadiyā vā, bhikkhave, samudde vā jātassare vā yaṃ majjhimassa purisassa samantā udakukkhepā, ayaṃ tattha samānasaṃvāsā ekuposathāti.
148. තෙන ඛො පන සමයෙන ඡබ්‌බග්‌ගියා භික්‌ඛූ සීමාය සීමං සම්‌භින්‌දන්‌ති. භගවතො එතමත්‌ථං ආරොචෙසුං. යෙසං, භික්‌ඛවෙ, සීමා පඨමං සම්‌මතා තෙසං තං කම්‌මං ධම්‌මිකං අකුප්‌පං ඨානාරහං. යෙසං, භික්‌ඛවෙ, සීමා පච්‌ඡා සම්‌මතා තෙසං තං කම්‌මං අධම්‌මිකං කුප්‌පං අට්‌ඨානාරහං. න, භික්‌ඛවෙ, සීමාය සීමා සම්‌භින්‌දිතබ්‌බා. යො සම්‌භින්‌දෙය්‍ය, ආපත්‌ති දුක්‌කටස්‌සාති.
148. Tena kho pana samayena chabbaggiyā bhikkhū sīmāya sīmaṃ sambhindanti. Bhagavato etamatthaṃ ārocesuṃ. Yesaṃ, bhikkhave, sīmā paṭhamaṃ sammatā tesaṃ taṃ kammaṃ dhammikaṃ akuppaṃ ṭhānārahaṃ. Yesaṃ, bhikkhave, sīmā pacchā sammatā tesaṃ taṃ kammaṃ adhammikaṃ kuppaṃ aṭṭhānārahaṃ. Na, bhikkhave, sīmāya sīmā sambhinditabbā. Yo sambhindeyya, āpatti dukkaṭassāti.
තෙන ඛො පන සමයෙන ඡබ්‌බග්‌ගියා භික්‌ඛූ සීමාය සීමං අජ්‌ඣොත්‌ථරන්‌ති. භගවතො එතමත්‌ථං ආරොචෙසුං. යෙසං, භික්‌ඛවෙ, සීමා පඨමං සම්‌මතා තෙසං තං කම්‌මං ධම්‌මිකං අකුප්‌පං ඨානාරහං. යෙසං, භික්‌ඛවෙ, සීමා පච්‌ඡා සම්‌මතා තෙසං තං කම්‌මං අධම්‌මිකං කුප්‌පං අට්‌ඨානාරහං. න, භික්‌ඛවෙ, සීමාය සීමා අජ්‌ඣොත්‌ථරිතබ්‌බා. යො අජ්‌ඣොත්‌ථරෙය්‍ය, ආපත්‌ති දුක්‌කටස්‌සාති. අනුජානාමි, භික්‌ඛවෙ, සීමං සම්‌මන්‌නන්‌තෙන සීමන්‌තරිකං ඨපෙත්‌වා සීමං සම්‌මන්‌නිතුන්‌ති.
Tena kho pana samayena chabbaggiyā bhikkhū sīmāya sīmaṃ ajjhottharanti. Bhagavato etamatthaṃ ārocesuṃ. Yesaṃ, bhikkhave, sīmā paṭhamaṃ sammatā tesaṃ taṃ kammaṃ dhammikaṃ akuppaṃ ṭhānārahaṃ. Yesaṃ, bhikkhave, sīmā pacchā sammatā tesaṃ taṃ kammaṃ adhammikaṃ kuppaṃ aṭṭhānārahaṃ. Na, bhikkhave, sīmāya sīmā ajjhottharitabbā. Yo ajjhotthareyya, āpatti dukkaṭassāti. Anujānāmi, bhikkhave, sīmaṃ sammannantena sīmantarikaṃ ṭhapetvā sīmaṃ sammannitunti.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / ගාමසීමාදිකථා • Gāmasīmādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / ගාමසීමාදිකථාවණ්‌ණනා • Gāmasīmādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / ගාමසීමාදිකථාවණ්‌ණනා • Gāmasīmādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ගාමසීමාදිකථාවණ්‌ණනා • Gāmasīmādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 76. ගාමසීමාදිකථා • 76. Gāmasīmādikathā
