| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
76. கா³மஸீமாதி³கதா²
76. Gāmasīmādikathā
147. உபோஸத²கம்மஸ்ஸ விஸுங் க³ஹிதத்தா ஸேஸகம்மவஸேன ஸமானஸங்வாஸகதா க³ஹேதப்³பா³ கோ³ப³லிப³த்³த³னயேன வா பாரிஸேஸனயேன வா. தந்தி ஸமானஸங்வாஸஏகூபோஸத²பா⁴வங். ‘‘அபரிச்சி²ன்னாயா’’தி இமினா அட்ட²பிதாயாதி எத்த² ட²பதா⁴துயா அதி⁴ப்பாயத்த²ங் த³ஸ்ஸேதி. கா³மங் வா நிக³மங் வாதி எத்த² நக³ரங் கேன ஸங்க³ஹிதந்தி ஆஹ ‘‘கா³மக்³க³ஹணேன செத்தா²’’திஆதி³. தத்த² எத்தா²தி ‘‘கா³மங் வா நிக³மங் வா’’தி பாடே², கா³மக்³க³ஹணேனாதி ஸம்ப³ந்தோ⁴. அத² வா எத்தா²தி கா³மனிக³மனக³ரேஸு, நக³ரம்பீதி ஸம்ப³ந்தோ⁴. கா³மாதீ³னங் பரிச்சே²த³ங் வித்தா²ரேன த³ஸ்ஸெந்தோ ஆஹ ‘‘தத்தா²’’திஆதி³. தத்த² தத்தா²தி கா³மனிக³மனக³ரேஸு. கா³மபோ⁴ஜகாதி கா³மங் பு⁴ஞ்ஜந்தீதி கா³மபோ⁴ஜகா. ப³லிந்தி கரங். ஸோ ஹி தங் நிஸ்ஸாய கா³மபோ⁴ஜகா ப³லந்தி ஜீவந்தி அனேனாதி ப³லீதி வுச்சதி. யம்பி ஏகங் பதே³ஸங் பரிச்சி²ந்தி³த்வா தே³தீதி யோஜனா. கா³மகெ²த்தேதி ரஞ்ஞோ ஆணா கி²பியதி எத்தா²தி கெ²த்தங், கா³மோயேவ கெ²த்தங் கா³மகெ²த்தங், தஸ்மிங். அயம்பீதி அயங் பதே³ஸோபி. ஸோபீதி பதே³ஸோபி. விஸுங்கா³மோ நாமாதி யோஜனா. ஸோபி விஸுங்கா³மோ கா³மஸீமா ஹோதியேவாதி யோஜனா. விஸுங் பரிச்சி²ந்தி³த்வா தி³ன்னோ கா³மோ விஸுங்கா³மோ. தஸ்மாதி யஸ்மா விஸுங் கா³மோ ஹோதி, தஸ்மா. ஸா சாதி விஸுங்கா³மஸீமா ச. இதராதி விஸுங்கா³மஸீமதோ அஞ்ஞா பகதிகா³மனக³ரனிக³மஸீமா சாதி யோஜனா.
147. Uposathakammassa visuṃ gahitattā sesakammavasena samānasaṃvāsakatā gahetabbā gobalibaddanayena vā pārisesanayena vā. Tanti samānasaṃvāsaekūposathabhāvaṃ. ‘‘Aparicchinnāyā’’ti iminā aṭṭhapitāyāti ettha ṭhapadhātuyā adhippāyatthaṃ dasseti. Gāmaṃ vā nigamaṃ vāti ettha nagaraṃ kena saṅgahitanti āha ‘‘gāmaggahaṇena cetthā’’tiādi. Tattha etthāti ‘‘gāmaṃ vā nigamaṃ vā’’ti pāṭhe, gāmaggahaṇenāti sambandho. Atha vā etthāti gāmanigamanagaresu, nagarampīti sambandho. Gāmādīnaṃ paricchedaṃ vitthārena dassento āha ‘‘tatthā’’tiādi. Tattha tatthāti gāmanigamanagaresu. Gāmabhojakāti gāmaṃ bhuñjantīti gāmabhojakā. Balinti karaṃ. So hi taṃ nissāya gāmabhojakā balanti jīvanti anenāti balīti vuccati. Yampi ekaṃ padesaṃ paricchinditvā detīti yojanā. Gāmakhetteti rañño āṇā khipiyati etthāti khettaṃ, gāmoyeva khettaṃ gāmakhettaṃ, tasmiṃ. Ayampīti ayaṃ padesopi. Sopīti padesopi. Visuṃgāmo nāmāti yojanā. Sopi visuṃgāmo gāmasīmā hotiyevāti yojanā. Visuṃ paricchinditvā dinno gāmo visuṃgāmo. Tasmāti yasmā visuṃ gāmo hoti, tasmā. Sā cāti visuṃgāmasīmā ca. Itarāti visuṃgāmasīmato aññā pakatigāmanagaranigamasīmā cāti yojanā.
ஏவந்தி ‘‘அஸம்மதாய பி⁴க்க²வே’’திஆதி³னா பாடே²ன. தந்தி ஸீமபரிச்சே²த³ங். அபரிச்சி²ன்னேதி ராஜூஹி அபரிச்சி²ன்னே. ‘‘அடவிபதே³ஸே’’தி இமினா நத்தி² கா³மோ எத்தா²தி அகா³மகோதி வசனத்த²ஸ்ஸ ஸரூபங் த³ஸ்ஸேதி. விஜ்ஜா²டவிஸதி³ஸேதி விக³தங் அக்³கி³னோ ஜா²யனமெத்தா²தி விஜ்ஜா², சோராத³யோ மனுஸ்ஸே ஆபு⁴ஸோ டவந்தி பீளயந்தி எத்தா²தி ஆடவி. விஜ்ஜா² ச ஸா ஆடவி சேதி விஜ்ஜா²டவி, தாய ஸதி³ஸே விஜ்ஜா²டவிஸதி³ஸே. எத்த² புரிமனயே கா³மாதீ³ஹி ஆஸன்னோ வா ஹோது, அனாஸன்னோ வா தேஹி அபரிச்சி²ன்னோ அடவிபதே³ஸோ க³ஹேதப்³போ³. பச்சி²மனயே தூ³ரோ மனுஸ்ஸானங் அனாக³மனபதோ² ஆடவிபதே³ஸோ க³ஹேதப்³போ³தி அயமேதேஸங் விஸேஸோ. அஸ்ஸாதி பி⁴க்கு²னோ. ஸமந்தாதி ஸமந்ததோ. அயங் ஸீமாதி அயங் ஸத்தப்³ப⁴ந்தரஸீமா. தத்தா²தி ஸத்தஸு அப்³ப⁴ந்தரேஸு. ஸமந்தா டி²தஸ்ஸ வா நிஸின்னஸ்ஸ வா அப்³ப⁴ந்தரே அந்தோகொட்டா²ஸே ஜாதங் அப்³ப⁴ந்தரங் அட்ட²வீஸஹத்த²பமாணங்.
Evanti ‘‘asammatāya bhikkhave’’tiādinā pāṭhena. Tanti sīmaparicchedaṃ. Aparicchinneti rājūhi aparicchinne. ‘‘Aṭavipadese’’ti iminā natthi gāmo etthāti agāmakoti vacanatthassa sarūpaṃ dasseti. Vijjhāṭavisadiseti vigataṃ aggino jhāyanametthāti vijjhā, corādayo manusse ābhuso ṭavanti pīḷayanti etthāti āṭavi. Vijjhā ca sā āṭavi ceti vijjhāṭavi, tāya sadise vijjhāṭavisadise. Ettha purimanaye gāmādīhi āsanno vā hotu, anāsanno vā tehi aparicchinno aṭavipadeso gahetabbo. Pacchimanaye dūro manussānaṃ anāgamanapatho āṭavipadeso gahetabboti ayametesaṃ viseso. Assāti bhikkhuno. Samantāti samantato. Ayaṃ sīmāti ayaṃ sattabbhantarasīmā. Tatthāti sattasu abbhantaresu. Samantā ṭhitassa vā nisinnassa vā abbhantare antokoṭṭhāse jātaṃ abbhantaraṃ aṭṭhavīsahatthapamāṇaṃ.
யா காசி நதீ³ அஸீமாவ ஹோதீதி ஸம்ப³ந்தோ⁴. நதீ³ஸீமலக்க²ணபத்தாதி நதீ³ஸீமலக்க²ணங் பத்தா. இமினா ஸீமலக்க²ணங் அபத்தா நதீ³ ப³ந்தி⁴யமானா ஸீமாவ ஹோதீதி த³ஸ்ஸேதி. ஸாவதா⁴ரணேன ‘‘அத்தனோ ஸபா⁴வேனேவா’’தி இமினா பி⁴க்கூ²னங் ப³ந்த⁴னபா⁴வேனாதி அத்த²ங் நிவத்தேதி. எத்தா²தி நதி³யங். எத்தா²தி ஜாதஸ்ஸரஸமுத்³தே³ஸு. யேன கேனசீதி அந்தமஸோ திரச்சா²னக³தேனபி யேன கேனசி. க²ணித்வா அகதோ ஸயங்ஜாதோதி ஸம்ப³ந்தோ⁴. இத³ங் ஹேதுஅந்தோக³த⁴விஸேஸனங். க²ணித்வா அகதத்தாதி ஹி அத்தோ². ஸயங்ஜாதோதி ஸயமேவ ஜாதோதி ஏவகாரோ யோஜேதப்³போ³. தேன வுத்தங் ‘‘யேன கேனசி க²ணித்வா அகதோ’’தி. ஸொப்³போ⁴தி ஸங் உபோ⁴தி பத³விபா⁴கோ³ காதப்³போ³. தத்த² ஸங்ஸத்³தோ³ ஸமந்தத்த²வாசகோ, உப⁴ஸத்³தோ³ பூரணத்த²வாசகோ. தஸ்மா ஸமந்ததோ ஆக³தேன உத³கேன உப⁴தி பூரதி எத்தா²தி ஸொப்³போ⁴தி வசனத்தோ² காதப்³போ³. தேன வுத்தங் ‘‘ஸமந்ததோ ஆக³தேன உத³கேன பூரிதோ திட்ட²தீ’’தி.
Yā kāci nadī asīmāva hotīti sambandho. Nadīsīmalakkhaṇapattāti nadīsīmalakkhaṇaṃ pattā. Iminā sīmalakkhaṇaṃ apattā nadī bandhiyamānā sīmāva hotīti dasseti. Sāvadhāraṇena ‘‘attano sabhāvenevā’’ti iminā bhikkhūnaṃ bandhanabhāvenāti atthaṃ nivatteti. Etthāti nadiyaṃ. Etthāti jātassarasamuddesu. Yena kenacīti antamaso tiracchānagatenapi yena kenaci. Khaṇitvā akato sayaṃjātoti sambandho. Idaṃ hetuantogadhavisesanaṃ. Khaṇitvā akatattāti hi attho. Sayaṃjātoti sayameva jātoti evakāro yojetabbo. Tena vuttaṃ ‘‘yena kenaci khaṇitvā akato’’ti. Sobbhoti saṃ ubhoti padavibhāgo kātabbo. Tattha saṃsaddo samantatthavācako, ubhasaddo pūraṇatthavācako. Tasmā samantato āgatena udakena ubhati pūrati etthāti sobbhoti vacanattho kātabbo. Tena vuttaṃ ‘‘samantato āgatena udakena pūrito tiṭṭhatī’’ti.
தத்தா²தி நதீ³ஸமுத்³த³ஜாதஸ்ஸரேஸு, ஆதா⁴ரே பு⁴ம்மங். யங்ஸத்³தோ³ டா²னவிஸயோதி ஆஹ ‘‘யங் டா²ன’’ந்தி. மஜ்ஜி²மஸ்ஸாதி தா²மமஜ்ஜி²மஸ்ஸ. வக்க²தி ஹி ‘‘தா²மமஜ்ஜி²மேனா’’தி. ‘‘ஸமந்ததோ’’தி இமினா ஸமந்தாதி எத்த² நிஸ்ஸக்கத்தே² நிஸ்ஸக்கவசனந்தி த³ஸ்ஸேதி. ‘‘உத³குக்கே²பேனா’’தி இமினா உத³குக்கே²பாதி எத்த² கரணத்தே² நிஸ்ஸக்கவசனந்தி த³ஸ்ஸேதி. உத³கங் உக்கி²பித்வா கி²பியதி எத்தா²தி உத³குக்கே²போ. ‘‘பரிச்சி²ன்ன’’ந்தி இமினா பாட²ஸேஸங் த³ஸ்ஸேதி. அக்க²து⁴த்தாதி எத்த² அக்கோ²தி பாஸகோ. ஸோ ஹி அகதி குடிலங் க³ச்ச²தி அனேனாதி அக்கோ²தி வுச்சதி, த⁴வந்தி மரியாத³மதிக்கம்ம கீளாதி³பஸுதங் க³ச்ச²ந்தீதி து⁴த்தா, அக்கே²ஸு து⁴த்தா அக்க²து⁴த்தா . தா³ருகு³ளந்தி ஸாரதா³ருமயங் கு³ளங். ‘‘வாலுகங் வா’’தி இமினா ‘‘உத³குக்கே²பா’’தி எத்த² உபலக்க²ணங் த³ஸ்ஸேதி. யத்தா²தி யஸ்மிங் பதே³ஸே. அயந்தி பதே³ஸோ. தஸ்ஸாதி உத³குக்கே²பஸ்ஸ.
Tatthāti nadīsamuddajātassaresu, ādhāre bhummaṃ. Yaṃsaddo ṭhānavisayoti āha ‘‘yaṃ ṭhāna’’nti. Majjhimassāti thāmamajjhimassa. Vakkhati hi ‘‘thāmamajjhimenā’’ti. ‘‘Samantato’’ti iminā samantāti ettha nissakkatthe nissakkavacananti dasseti. ‘‘Udakukkhepenā’’ti iminā udakukkhepāti ettha karaṇatthe nissakkavacananti dasseti. Udakaṃ ukkhipitvā khipiyati etthāti udakukkhepo. ‘‘Paricchinna’’nti iminā pāṭhasesaṃ dasseti. Akkhadhuttāti ettha akkhoti pāsako. So hi akati kuṭilaṃ gacchati anenāti akkhoti vuccati, dhavanti mariyādamatikkamma kīḷādipasutaṃ gacchantīti dhuttā, akkhesu dhuttā akkhadhuttā . Dāruguḷanti sāradārumayaṃ guḷaṃ. ‘‘Vālukaṃ vā’’ti iminā ‘‘udakukkhepā’’ti ettha upalakkhaṇaṃ dasseti. Yatthāti yasmiṃ padese. Ayanti padeso. Tassāti udakukkhepassa.
எத்தா²தி நதீ³ஸமுத்³த³ஜாதஸ்ஸரேஸு. முக²த்³வாரந்தி ஸமுத்³தா³தீ³னங் முக²ஸங்கா²தங் த்³வாரங். ஸப்³ப³த்தா²தி ஸப்³பா³ய நதி³யங். தே²ரவாத³ங் த³ஸ்ஸெந்தோ ஆஹ ‘‘யங் பனா’’திஆதி³. ‘‘யோஜனங்…பே॰… வட்டதீ’’தி யங் பன வசனங் மஹாஸுமத்தே²ரேன வுத்தந்தி யோஜனா. தத்ராபீதி யோஜனநதி³யம்பி. படிக்கி²த்தாகாரங் வித்தா²ரெந்தோ ஆஹ ‘‘ப⁴க³வதா ஹீ’’திஆதி³. நதி³யா பமாணந்தி நதி³யா க³ம்பீ⁴ரபமாணமேவ, ந ஆயாமவித்தா²ரபமாணந்தி அத்தோ². ‘‘ந யோஜனங் வா அத்³த⁴யோஜனங் வா’’தி வசனம்பி இத³மேவ ஸந்தா⁴ய வுத்தந்தி த³ட்ட²ப்³ப³ங். கிஞ்சாபி ஆயாமவித்தா²ரபமாணங் ந வுத்தங், பப⁴வதோ பன யாவ முக²த்³வாரா ஆயாமவித்தா²ரவஸேன கம்மங் காதுங் பஹோனகனதீ³யேவ க³ஹேதப்³பா³தி த³ட்ட²ப்³பா³. யா நதீ³தி ஸம்ப³ந்தோ⁴. இமஸ்ஸ ஸுத்தஸ்ஸாதி ‘‘திமண்ட³ல’’ந்திஆதி³கஸ்ஸ இமஸ்ஸ ஸுத்தஸ்ஸ. பப⁴வதோதி ஸமுதா³க³மதோ. எத்தா²தி நதி³யங். ஸப்³பே³ஹி பி⁴க்கூ²ஹி ட²பேதப்³போ³தி ஸம்ப³ந்தோ⁴. ததோதி ஏகஉத³குக்கே²பதோ.
Etthāti nadīsamuddajātassaresu. Mukhadvāranti samuddādīnaṃ mukhasaṅkhātaṃ dvāraṃ. Sabbatthāti sabbāya nadiyaṃ. Theravādaṃ dassento āha ‘‘yaṃ panā’’tiādi. ‘‘Yojanaṃ…pe… vaṭṭatī’’ti yaṃ pana vacanaṃ mahāsumattherena vuttanti yojanā. Tatrāpīti yojananadiyampi. Paṭikkhittākāraṃ vitthārento āha ‘‘bhagavatā hī’’tiādi. Nadiyā pamāṇanti nadiyā gambhīrapamāṇameva, na āyāmavitthārapamāṇanti attho. ‘‘Na yojanaṃ vā addhayojanaṃ vā’’ti vacanampi idameva sandhāya vuttanti daṭṭhabbaṃ. Kiñcāpi āyāmavitthārapamāṇaṃ na vuttaṃ, pabhavato pana yāva mukhadvārā āyāmavitthāravasena kammaṃ kātuṃ pahonakanadīyeva gahetabbāti daṭṭhabbā. Yā nadīti sambandho. Imassa suttassāti ‘‘timaṇḍala’’ntiādikassa imassa suttassa. Pabhavatoti samudāgamato. Etthāti nadiyaṃ. Sabbehi bhikkhūhi ṭhapetabboti sambandho. Tatoti ekaudakukkhepato.
கித்தகா பரிபுண்ணா ஹோதீதி ஆஹ ‘‘ஸமதித்தி²கா’’தி. தித்தே²ன ஸமங் பரிபூரதீதி ஸமதித்தி²கா. உத³கஸாடிகங் நிவாஸெத்வாபீதி பிஸத்³தோ³ ‘‘அனிவாஸெத்வாபீ’’தி த³ஸ்ஸேதி. உத³கஸாடிகங் அனிவாஸெந்தோபி வத்தே²ன அவினாபா⁴வதோ அஞ்ஞங் நிவாஸெத்வாதி அத்தோ² க³ஹேதப்³போ³. நாவாய ட²த்வா கரியமானே கிங் க³ச்ச²ந்தியாபி நாவாய காதுங் வட்டதீதி ஆஹ ‘‘க³ச்ச²ந்தியா பனா’’திஆதி³. ‘‘கஸ்மா’’திஆதி³னா காரணங் த³ஸ்ஸேதி. ஹீதி யஸ்மா. தந்தி உத³குக்கே²பமத்தங். ஏவங் ஸதி…பே॰… அனுஸாவனா ஹோதி, தஸ்மா க³ச்ச²ந்தியா நாவாய காதுங் ந வட்டதீதி யோஜனா. ‘‘தஸ்மா’’திஆதி³னா லத்³த⁴கு³ணங் த³ஸ்ஸேதி. ந கேவலங் நாவாயமேவாதி த³ஸ்ஸெந்தோ ஆஹ ‘‘அந்தோனதி³ய’’ந்திஆதி³.
Kittakā paripuṇṇā hotīti āha ‘‘samatitthikā’’ti. Titthena samaṃ paripūratīti samatitthikā. Udakasāṭikaṃ nivāsetvāpīti pisaddo ‘‘anivāsetvāpī’’ti dasseti. Udakasāṭikaṃ anivāsentopi vatthena avinābhāvato aññaṃ nivāsetvāti attho gahetabbo. Nāvāya ṭhatvā kariyamāne kiṃ gacchantiyāpi nāvāya kātuṃ vaṭṭatīti āha ‘‘gacchantiyā panā’’tiādi. ‘‘Kasmā’’tiādinā kāraṇaṃ dasseti. Hīti yasmā. Tanti udakukkhepamattaṃ. Evaṃ sati…pe… anusāvanā hoti, tasmā gacchantiyā nāvāya kātuṃ na vaṭṭatīti yojanā. ‘‘Tasmā’’tiādinā laddhaguṇaṃ dasseti. Na kevalaṃ nāvāyamevāti dassento āha ‘‘antonadiya’’ntiādi.
ருக்க²ஸ்ஸாதி அந்தோனதி³யங் ஜாதஸ்ஸ ருக்க²ஸ்ஸ. ஸாகா² வா பதிட்டி²தாதி ஸம்ப³ந்தோ⁴. ஸீமங் வா ஸோதெ⁴த்வாதி விஹாரஸீமகா³மஸீமாஸு டி²தானங் ஹத்த²பாஸானயனப³ஹிகரணவஸேன ஸீமங் வா ஸோதெ⁴த்வா. ஜாதருக்க²ஸ்ஸ பவிட்ட²ஸாகா²ய வா பாரோஹே வாதி ஸம்ப³ந்தோ⁴. அஸ்ஸாதி ப³ஹினதி³தீரே ஜாதருக்க²ஸ்ஸ. தத்தா²தி கா²ணுகே.
Rukkhassāti antonadiyaṃ jātassa rukkhassa. Sākhā vā patiṭṭhitāti sambandho. Sīmaṃ vā sodhetvāti vihārasīmagāmasīmāsu ṭhitānaṃ hatthapāsānayanabahikaraṇavasena sīmaṃ vā sodhetvā. Jātarukkhassa paviṭṭhasākhāya vā pārohe vāti sambandho. Assāti bahinaditīre jātarukkhassa. Tatthāti khāṇuke.
தஸ்ஸாதி பாஸாணதீ³பகஸ்ஸ. புப்³பே³ வுத்தப்பகாரேதி புப்³பே³ நதீ³னிமித்தட்டா²னே ‘‘அன்வத்³த⁴மாஸ’’ந்திஆதி³னா (மஹாவ॰ அட்ட²॰ 138) வுத்தப்பகாரே. ஸோதி பாஸாணதீ³பகோ. புன ஸோதி பாஸாணதீ³பகோயேவ. ஹீதி ஸச்சங், யஸ்மா வா.
Tassāti pāsāṇadīpakassa. Pubbe vuttappakāreti pubbe nadīnimittaṭṭhāne ‘‘anvaddhamāsa’’ntiādinā (mahāva. aṭṭha. 138) vuttappakāre. Soti pāsāṇadīpako. Puna soti pāsāṇadīpakoyeva. Hīti saccaṃ, yasmā vā.
ஆவரணந்தி பாளிங். தந்தி ஆவரணங். ஆவரணேன வா கொட்ட²கப³ந்தே⁴ன வா ஹேதுபூ⁴தேன, பச்சி²ஜ்ஜதீதி ஸம்ப³ந்தோ⁴. கோசி ஆவரணப்பதே³ஸோ அஜ்ஜொ²த்த²ரியதீதி ஸம்ப³ந்தோ⁴. தத்தா²தி ஆவரணப்பதே³ஸே. ஹீதி ஸச்சங், யஸ்மா வா. ‘‘ஹெட்டா²பாளி ப³த்³தா⁴’’தி இத³ங் நதி³ங் வினாஸெத்வா தளாககரணாகாரத³ஸ்ஸனங். எத்தா²தி நதி³யங், தளாகே வா. ச²ட்³டி³தமோத³கந்தி தளாகரக்க²னத்த²ங் ஏகேன வாரிமக்³கே³ன ச²ட்³டி³தங் உத³கங். தே³வே அவஸ்ஸந்தேதி து³ப்³பு³ட்டி²காலத்தா வஸ்ஸந்தகாலேபி தே³வே அவஸ்ஸந்தே. ஸாதி நதி³தோ நீஹடமாதிகா. காலந்தரேனாதி அஞ்ஞேன காலேன. உப்பதித்வாதி கா³மனிக³மானங் உபரி பதித்வா. பவத்ததீதி புப்³பே³ வுத்தபகாரே வஸ்ஸகாலே சத்தாரோ மாஸே அப்³பொ⁴ச்சி²ன்னா ஸந்த³தி. விஹாரஸீமந்தி விஹாரஸம்ப³ந்த⁴ங் ப³த்³த⁴ஸீமங்.
Āvaraṇanti pāḷiṃ. Tanti āvaraṇaṃ. Āvaraṇena vā koṭṭhakabandhena vā hetubhūtena, pacchijjatīti sambandho. Koci āvaraṇappadeso ajjhotthariyatīti sambandho. Tatthāti āvaraṇappadese. Hīti saccaṃ, yasmā vā. ‘‘Heṭṭhāpāḷi baddhā’’ti idaṃ nadiṃ vināsetvā taḷākakaraṇākāradassanaṃ. Etthāti nadiyaṃ, taḷāke vā. Chaḍḍitamodakanti taḷākarakkhanatthaṃ ekena vārimaggena chaḍḍitaṃ udakaṃ. Deve avassanteti dubbuṭṭhikālattā vassantakālepi deve avassante. Sāti nadito nīhaṭamātikā. Kālantarenāti aññena kālena. Uppatitvāti gāmanigamānaṃ upari patitvā. Pavattatīti pubbe vuttapakāre vassakāle cattāro māse abbhocchinnā sandati. Vihārasīmanti vihārasambandhaṃ baddhasīmaṃ.
ஸமுத்³தே³பீதி பிஸத்³தோ³ நதி³மபெக்க²தி. தத்தா²தி பதே³ஸே. ஓதரித்வாதி ஹெட்டா² தரித்வா. ‘‘ஓஸரித்வா’’திபி பாடோ², அயமேவத்தோ². ஸண்ட²ஹந்தீதி உத³கேன ஸமங் திட்ட²ந்தி. ஸோதி பதே³ஸோ. உத³கந்ததோதி உத³ககோடிதோ. தத்தா²தி ஸமுத்³தே³. பா³த⁴தீதி பீளயதி. தேஸூதி நாவாஅட்டகேஸு. தந்தி பிட்டி²பாஸாணங். ஊமியோதி வீசியோ. தா ஹி பரங்பராவஸேன உக்³க³ந்த்வா ஸவிஞ்ஞாணகாவிஞ்ஞாணகே மியந்தி ஹிங்ஸந்தி, அந்தோ பக்கி²பந்தீதி வா ஊமியோதி வுச்சந்தி. தத்தா²தி பிட்டி²பாஸாணே. ஹீதி ஸச்சங், யஸ்மா வா. உத³கேனேவ பிட்டி²பாஸாணோ ஒத்த²ரீயதீதி யோஜனா. ஸோதி தீ³பகபப்³ப³தோ. ‘‘தூ³ரே’’தி வத்வா தஸ்ஸ பமாணங் த³ஸ்ஸெந்தோ ஆஹ ‘‘மச்ச²வதா⁴னங் அனாக³மனபதே²’’தி. மச்ச²வதா⁴னந்தி கேவட்டானங். தே ஹி யஸ்மா மச்சே² ஹனந்தி, தஸ்மா மச்ச²வதா⁴தி வுச்சந்தி. ‘‘மச்ச²ப³ந்தா⁴ன’’ந்திபி பாடோ². மச்சே² ப³ந்த⁴ந்தீதி மச்ச²ப³ந்தா⁴தி வசனத்தோ² காதப்³போ³. அனாக³மனபதே²தி யத்த² க³ந்த்வா தத³ஹேவ பச்சாக³ந்த்வா ந ஆக³மனபதி²கே தே³ஸே. நத்தி² ஆக³மனபதோ² எத்தா²தி அனாக³மனபதோ², தே³ஸோ. தஸ்மிங் ‘‘அக³மனபதே²’’திபி பாடோ², ஸோ அயுத்தோ. கஸ்மா? அக³மனபத²ஸ்ஸ நாதி⁴ப்பேதத்தா. க³ந்த்வா ஹி புன அனாக³மனபதோ²யேவாதி⁴ப்பேதோ. தேஸந்தி மச்ச²வதா⁴னங். க³மனபரியந்தஸ்ஸாதி க³மனகோடியா . ஓரதோதி ஓரபா⁴கே³ டி²தோ தீ³பகோ வா பப்³ப³தோ வாதி யோஜேதப்³போ³. தத்தா²தி ஓரபா⁴கே³ டி²தேஸு தீ³பகபப்³ப³தேஸு. ஒத்த²ரித்வாதி பகதிஉத³கேன ஒத்த²ரித்வா. தத்தா²தி ஒத்த²ரித்வா டி²தே ஸமுத்³தே³.
Samuddepīti pisaddo nadimapekkhati. Tatthāti padese. Otaritvāti heṭṭhā taritvā. ‘‘Osaritvā’’tipi pāṭho, ayamevattho. Saṇṭhahantīti udakena samaṃ tiṭṭhanti. Soti padeso. Udakantatoti udakakoṭito. Tatthāti samudde. Bādhatīti pīḷayati. Tesūti nāvāaṭṭakesu. Tanti piṭṭhipāsāṇaṃ. Ūmiyoti vīciyo. Tā hi paraṃparāvasena uggantvā saviññāṇakāviññāṇake miyanti hiṃsanti, anto pakkhipantīti vā ūmiyoti vuccanti. Tatthāti piṭṭhipāsāṇe. Hīti saccaṃ, yasmā vā. Udakeneva piṭṭhipāsāṇo ottharīyatīti yojanā. Soti dīpakapabbato. ‘‘Dūre’’ti vatvā tassa pamāṇaṃ dassento āha ‘‘macchavadhānaṃ anāgamanapathe’’ti. Macchavadhānanti kevaṭṭānaṃ. Te hi yasmā macche hananti, tasmā macchavadhāti vuccanti. ‘‘Macchabandhāna’’ntipi pāṭho. Macche bandhantīti macchabandhāti vacanattho kātabbo. Anāgamanapatheti yattha gantvā tadaheva paccāgantvā na āgamanapathike dese. Natthi āgamanapatho etthāti anāgamanapatho, deso. Tasmiṃ ‘‘agamanapathe’’tipi pāṭho, so ayutto. Kasmā? Agamanapathassa nādhippetattā. Gantvā hi puna anāgamanapathoyevādhippeto. Tesanti macchavadhānaṃ. Gamanapariyantassāti gamanakoṭiyā . Oratoti orabhāge ṭhito dīpako vā pabbato vāti yojetabbo. Tatthāti orabhāge ṭhitesu dīpakapabbatesu. Ottharitvāti pakatiudakena ottharitvā. Tatthāti ottharitvā ṭhite samudde.
கரொந்தேஹிபி காதப்³ப³ந்தி ஸம்ப³ந்தோ⁴. யத்தா²தி யஸ்மிங் ஸரே. அயந்தி அயங் ஸரோ, ந ஜாதஸ்ஸரோ ஹோதி. அயங் ஸரோ கா³மகெ²த்தஸங்க்²யமேவ க³ச்ச²தீதி யோஜனா. தத்தா²தி ஸரே. யத்த² பனாதி யஸ்மிங் ஸரே பன. தஸ்ஸாதி ஜாதஸ்ஸரஸ்ஸ. தத்தா²தி பதே³ஸே. ஸசே க³ம்பீ⁴ரங் உத³கங் ஹோதீதி யோஜனா. தத்தா²தி அட்டகே. எத்தா²தி ஜாதஸ்ஸரே, டி²தேஸு பிட்டி²பாஸாணதீ³பகேஸூதி யோஜனா. பஹோனகஜாதஸ்ஸரோதி ஸங்க⁴கம்மங் காதுங் பஹோனகோ ஜாதஸ்ஸரோ. ‘‘ஸுக்க²தீ’’தி வத்வா ததே³வ ஸமத்தே²துங் வுத்தங் ‘‘நிருத³கோ’’தி. தத்தா²தி ஜாதஸ்ஸரே. ஸசே நிருத³கமத்தேன கா³மகெ²த்தங் க³ச்ச²தி. கதா³ க³ச்ச²தீதி ஆஹ ‘‘ஸசே பனெத்தா²’’திஆதி³. தத்த² எத்தா²தி ஜாதஸ்ஸரே. பொக்க²ரணீஆதீ³னீதி எத்த² ஆதி³ஸத்³தே³ன உத³கமாதிகாத³யோ ஸங்க³ண்ஹாதி. யதா³ க²ணந்தி, ததா³தி பாட²ஸேஸோ யோஜேதப்³போ³. ‘‘தங் டா²ன’’ந்தி வுத்தேபி ந க²ணனட்டா²னமேவ க³ஹேதப்³ப³ங், ‘‘எத்தா²’’தி ஸாமஞ்ஞதோ வுத்தத்தா ஸப்³போ³யேவ ஜாதஸ்ஸரோ க³ஹேதப்³போ³. ந கேவலங் அஜாதஸ்ஸரமத்தங் ஹோதி, அத² கோ² கா³மகெ²த்தந்தி ஆஹ ‘‘கா³மஸீமாஸங்க்²யமேவ க³ச்ச²தீ’’தி.
Karontehipi kātabbanti sambandho. Yatthāti yasmiṃ sare. Ayanti ayaṃ saro, na jātassaro hoti. Ayaṃ saro gāmakhettasaṅkhyameva gacchatīti yojanā. Tatthāti sare. Yattha panāti yasmiṃ sare pana. Tassāti jātassarassa. Tatthāti padese. Sace gambhīraṃ udakaṃ hotīti yojanā. Tatthāti aṭṭake. Etthāti jātassare, ṭhitesu piṭṭhipāsāṇadīpakesūti yojanā. Pahonakajātassaroti saṅghakammaṃ kātuṃ pahonako jātassaro. ‘‘Sukkhatī’’ti vatvā tadeva samatthetuṃ vuttaṃ ‘‘nirudako’’ti. Tatthāti jātassare. Sace nirudakamattena gāmakhettaṃ gacchati. Kadā gacchatīti āha ‘‘sace panetthā’’tiādi. Tattha etthāti jātassare. Pokkharaṇīādīnīti ettha ādisaddena udakamātikādayo saṅgaṇhāti. Yadā khaṇanti, tadāti pāṭhaseso yojetabbo. ‘‘Taṃ ṭhāna’’nti vuttepi na khaṇanaṭṭhānameva gahetabbaṃ, ‘‘etthā’’ti sāmaññato vuttattā sabboyeva jātassaro gahetabbo. Na kevalaṃ ajātassaramattaṃ hoti, atha kho gāmakhettanti āha ‘‘gāmasīmāsaṅkhyameva gacchatī’’ti.
நந்தி ஜாதஸ்ஸரங். பூரெத்வாதி மத்திகாதீ³ஹி பூரெத்வா. பாளிந்தி ஆவரணங். ஸப்³ப³மேவ நந்தி ஸகலமேவ தங் ஜாதஸ்ஸரங். லோணீபீதி பிஸத்³தே³ன ந கேவலங் ஸொப்³போ⁴யேவ ஜாதஸ்ஸரஸங்க்²யங் க³ச்ச²தி, அத² கோ² லோணீபீதி த³ஸ்ஸேதி. உத³கட்டா²னோகாஸேதி உத³கஸ்ஸ டா²னே ஓகாஸே.
Nanti jātassaraṃ. Pūretvāti mattikādīhi pūretvā. Pāḷinti āvaraṇaṃ. Sabbameva nanti sakalameva taṃ jātassaraṃ. Loṇīpīti pisaddena na kevalaṃ sobbhoyeva jātassarasaṅkhyaṃ gacchati, atha kho loṇīpīti dasseti. Udakaṭṭhānokāseti udakassa ṭhāne okāse.
148. ஸீமாய ஸீமங் ஸம்பி⁴ந்த³ந்தீதி எத்த² ‘‘ஸீமாய ஸீம’’ந்தி பதா³னங் ஸம்ப³ந்தா⁴பெக்க²த்தா தேஸங் ஸம்ப³ந்த⁴ங் த³ஸ்ஸேதுங் வுத்தங் ‘‘அத்தனோ பரேஸ’’ந்தி. ‘‘ப³த்³த⁴ஸீம’’ந்தி இமினா ‘‘ஸீம’’ந்தி ஸாமஞ்ஞதோ வுத்தேபி விஸேஸதோ ப³த்³த⁴ஸீமாயேவ க³ஹேதப்³பா³தி த³ஸ்ஸேதி. தமேவத்த²ங் வித்தா²ரெந்தோ ஆஹ ‘‘ஸசே ஹீ’’திஆதி³. ஸங்ஸட்ட²விடபாதி அஞ்ஞமஞ்ஞங் ஆஸன்னத்தா ஸங்ஸட்டோ² விடபோ ஏதேஸந்தி ஸங்ஸட்ட²விடபா. ‘‘ஸங்ஸட்ட²விடபா’’தி இத³ங் உபலக்க²ணமத்தங், மூலானிபி ஸங்ஸட்டா²னியேவாதி த³ட்ட²ப்³ப³ங். தேஸூதி த்³வீஸு ருக்கே²ஸு. விஹாரஸீமா சாதி போராணகவிஹாரஸீமா ச. அந்தோ கத்வாதி ஸீமாய அந்தோ கத்வா. அத² பச்சா²தி எத்த² ‘‘பச்சா²’’தி இமினா அத²ஸத்³த³ஸ்ஸத்த²ங் த³ஸ்ஸேதி. ஏவங் கே அகங்ஸூதி ஆஹ ‘‘ஏவங் ச²ப்³ப³க்³கி³யா அகங்ஸூ’’தி. தேனாதி கரணேன.
148.Sīmāya sīmaṃ sambhindantīti ettha ‘‘sīmāya sīma’’nti padānaṃ sambandhāpekkhattā tesaṃ sambandhaṃ dassetuṃ vuttaṃ ‘‘attano paresa’’nti. ‘‘Baddhasīma’’nti iminā ‘‘sīma’’nti sāmaññato vuttepi visesato baddhasīmāyeva gahetabbāti dasseti. Tamevatthaṃ vitthārento āha ‘‘sace hī’’tiādi. Saṃsaṭṭhaviṭapāti aññamaññaṃ āsannattā saṃsaṭṭho viṭapo etesanti saṃsaṭṭhaviṭapā. ‘‘Saṃsaṭṭhaviṭapā’’ti idaṃ upalakkhaṇamattaṃ, mūlānipi saṃsaṭṭhāniyevāti daṭṭhabbaṃ. Tesūti dvīsu rukkhesu. Vihārasīmā cāti porāṇakavihārasīmā ca. Anto katvāti sīmāya anto katvā. Atha pacchāti ettha ‘‘pacchā’’ti iminā athasaddassatthaṃ dasseti. Evaṃ ke akaṃsūti āha ‘‘evaṃ chabbaggiyā akaṃsū’’ti. Tenāti karaṇena.
அஜ்ஜொ²த்த²ரணாகாரங் த³ஸ்ஸெந்தோ ஆஹ ‘‘பரேஸ’’ந்திஆதி³. தஸ்ஸாதி ப³த்³த⁴ஸீமாய. பதே³ஸந்தி பி⁴க்கூ²ஹி கம்மங் காதுங் பஹோனகங் ஏகதே³ஸங். அந்தமஸோ ஏகஸ்ஸபி பி⁴க்கு²னோ ட²த்வா அதி⁴ட்டா²னுபோஸத²ங் காதுங் பஹோனகங் பதே³ஸங். கம்மங் காதுங் அப்பஹோனகபதே³ஸங் அந்தோ கரித்வா ப³ந்த⁴ந்தா ஸீமாய ஸீமங் ஸம்பி⁴ந்த³ந்தி நாம. ஸீமாய உபசாரோதி பச்சா² ப³ந்தி⁴தப்³பா³ய ஸீமாய உபசாரோ. ‘‘வட்³ட⁴ந்தோ ஸீமாஸங்கரங் கரோதீ’’தி இமினா ஸசே அவட்³ட⁴னகோ பாஸாணோ ஹோதி, த்³வின்னம்பி ஸீமானங் நிமித்தங் காதுங் வட்டதீதி த³ஸ்ஸேதி.
Ajjhottharaṇākāraṃ dassento āha ‘‘paresa’’ntiādi. Tassāti baddhasīmāya. Padesanti bhikkhūhi kammaṃ kātuṃ pahonakaṃ ekadesaṃ. Antamaso ekassapi bhikkhuno ṭhatvā adhiṭṭhānuposathaṃ kātuṃ pahonakaṃ padesaṃ. Kammaṃ kātuṃ appahonakapadesaṃ anto karitvā bandhantā sīmāya sīmaṃ sambhindanti nāma. Sīmāya upacāroti pacchā bandhitabbāya sīmāya upacāro. ‘‘Vaḍḍhanto sīmāsaṅkaraṃ karotī’’ti iminā sace avaḍḍhanako pāsāṇo hoti, dvinnampi sīmānaṃ nimittaṃ kātuṃ vaṭṭatīti dasseti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 76. கா³மஸீமாதி³ • 76. Gāmasīmādi
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கா³மஸீமாதி³கதா² • Gāmasīmādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கா³மஸீமாதி³கதா²வண்ணனா • Gāmasīmādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கா³மஸீமாதி³கதா²வண்ணனா • Gāmasīmādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கா³மஸீமாதி³கதா²வண்ணனா • Gāmasīmādikathāvaṇṇanā
