| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
க³மிகாதி³னிஸ்ஸயவத்து²கதா²
Gamikādinissayavatthukathā
121. நிஸ்ஸயகரணீயோதி கரணீயனிஸ்ஸயோ, கரணீயோ மயா நிஸ்ஸயோ; க³ஹேதப்³போ³தி அத்தோ². நிஸ்ஸயங் அலப⁴மானேனாதி அத்தனா ஸத்³தி⁴ங் அத்³தா⁴னமக்³க³ப்படிபன்னேஸு நிஸ்ஸயதா³யகே அஸதி நிஸ்ஸயங் ந லப⁴தி நாம. ஏவங் அலப⁴ந்தேன அனிஸ்ஸிதேன ப³ஹூனிபி தி³வஸானி க³ந்தப்³ப³ங். ஸசே புப்³பே³பி நிஸ்ஸயங் க³ஹெத்வா வுத்த²புப்³ப³ங் கஞ்சி ஆவாஸங் பவிஸதி, ஏகரத்தங் வஸந்தேனாபி நிஸ்ஸயோ க³ஹேதப்³போ³. அந்தராமக்³கே³ விஸ்ஸமந்தோ வா ஸத்த²ங் பரியேஸந்தோ வா கதிபாஹங் வஸதி, அனாபத்தி. அந்தோவஸ்ஸே பன நிப³த்³த⁴வாஸங் வஸிதப்³ப³ங், நிஸ்ஸயோ ச க³ஹேதப்³போ³. நாவாய க³ச்ச²ந்தஸ்ஸ பன வஸ்ஸானே ஆக³தேபி நிஸ்ஸயங் அலப⁴ந்தஸ்ஸ அனாபத்தி.
121.Nissayakaraṇīyoti karaṇīyanissayo, karaṇīyo mayā nissayo; gahetabboti attho. Nissayaṃ alabhamānenāti attanā saddhiṃ addhānamaggappaṭipannesu nissayadāyake asati nissayaṃ na labhati nāma. Evaṃ alabhantena anissitena bahūnipi divasāni gantabbaṃ. Sace pubbepi nissayaṃ gahetvā vutthapubbaṃ kañci āvāsaṃ pavisati, ekarattaṃ vasantenāpi nissayo gahetabbo. Antarāmagge vissamanto vā satthaṃ pariyesanto vā katipāhaṃ vasati, anāpatti. Antovasse pana nibaddhavāsaṃ vasitabbaṃ, nissayo ca gahetabbo. Nāvāya gacchantassa pana vassāne āgatepi nissayaṃ alabhantassa anāpatti.
யாசியமானேனாதி தேன கி³லானேன யாசியமானேன அனிஸ்ஸிதேன வஸிதப்³ப³ங். ஸசே ‘‘யாசாஹி ம’’ந்தி வுச்சமானோபி கி³லானோ மானேன ந யாசதி, க³ந்தப்³ப³ங்.
Yāciyamānenāti tena gilānena yāciyamānena anissitena vasitabbaṃ. Sace ‘‘yācāhi ma’’nti vuccamānopi gilāno mānena na yācati, gantabbaṃ.
பா²ஸு ஹோதீதி ஸமத²விபஸ்ஸனானங் படிலாப⁴வஸேன பா²ஸு ஹோதி. இமஞ்ஹி பரிஹாரங் நேவ ஸோதாபன்னோ ந ஸகதா³கா³மீ அனாகா³மீ அரஹந்தோ லப⁴ந்தி; ந தா²மக³தஸ்ஸ ஸமாதி⁴னோ வா விபஸ்ஸனாய வா லாபீ⁴, விஸ்ஸட்ட²கம்மட்டா²னே பன பா³லபுது²ஜ்ஜனே கதா²வ நத்தி². யஸ்ஸ கோ² பன ஸமதோ² வா விபஸ்ஸனா வா தருணோ ஹோதி, அயங் இமங் பரிஹாரங் லப⁴தி, பவாரணஸங்க³ஹோபி ஏதஸ்ஸேவ அனுஞ்ஞாதோ. தஸ்மா இமினா புக்³க³லேன ஆசரியே பவாரெத்வா க³தேபி ‘‘யதா³ பதிரூபோ நிஸ்ஸயதா³யகோ ஆக³ச்சி²ஸ்ஸதி, தஸ்ஸ நிஸ்ஸாய வஸிஸ்ஸாமீ’’தி ஆபோ⁴க³ங் கத்வா புன யாவ ஆஸாள்ஹீபுண்ணமா, தாவ அனிஸ்ஸிதேன வத்து²ங் வட்டதி. ஸசே பன ஆஸாள்ஹீமாஸே ஆசரியோ நாக³ச்ச²தி, யத்த² நிஸ்ஸயோ லப்³ப⁴தி, தத்த² க³ந்தப்³ப³ங்.
Phāsuhotīti samathavipassanānaṃ paṭilābhavasena phāsu hoti. Imañhi parihāraṃ neva sotāpanno na sakadāgāmī anāgāmī arahanto labhanti; na thāmagatassa samādhino vā vipassanāya vā lābhī, vissaṭṭhakammaṭṭhāne pana bālaputhujjane kathāva natthi. Yassa kho pana samatho vā vipassanā vā taruṇo hoti, ayaṃ imaṃ parihāraṃ labhati, pavāraṇasaṅgahopi etasseva anuññāto. Tasmā iminā puggalena ācariye pavāretvā gatepi ‘‘yadā patirūpo nissayadāyako āgacchissati, tassa nissāya vasissāmī’’ti ābhogaṃ katvā puna yāva āsāḷhīpuṇṇamā, tāva anissitena vatthuṃ vaṭṭati. Sace pana āsāḷhīmāse ācariyo nāgacchati, yattha nissayo labbhati, tattha gantabbaṃ.
122. கொ³த்தேனபி அனுஸ்ஸாவேதுந்தி மஹாகஸ்ஸபஸ்ஸ உபஸம்பதா³பெக்கோ²தி ஏவங் கொ³த்தங் வத்வா அனுஸ்ஸாவேதுங் அனுஜானாமீதி அத்தோ².
122.Gottenapi anussāvetunti mahākassapassa upasampadāpekkhoti evaṃ gottaṃ vatvā anussāvetuṃ anujānāmīti attho.
123. த்³வே ஏகானுஸ்ஸாவனேதி த்³வே ஏகதோ அனுஸ்ஸாவனே; ஏகேன ஏகஸ்ஸ அஞ்ஞேன இதரஸ்ஸாதி ஏவங் த்³வீஹி வா ஆசரியேஹி ஏகேன வா ஏகக்க²ணே கம்மவாசங் அனுஸ்ஸாவெந்தேஹி உபஸம்பாதே³துங் அனுஜானாமீதி அத்தோ².
123.Dve ekānussāvaneti dve ekato anussāvane; ekena ekassa aññena itarassāti evaṃ dvīhi vā ācariyehi ekena vā ekakkhaṇe kammavācaṃ anussāventehi upasampādetuṃ anujānāmīti attho.
த்³வே தயோ ஏகானுஸ்ஸாவனே காதுங் தஞ்ச கோ² ஏகேன உபஜ்ஜா²யேனாதி த்³வே வா தயோ வா ஜனே புரிமனயேனேவ ஏகதோ அனுஸ்ஸாவனே காதுங் அனுஜானாமி; தஞ்ச கோ² அனுஸ்ஸாவனகிரியங் ஏகேன உபஜ்ஜா²யேன அனுஜானாமீதி அத்தோ². தஸ்மா ஏகேன ஆசரியேன த்³வே வா தயோ வா அனுஸ்ஸாவேதப்³பா³. த்³வீஹி வா தீஹி வா ஆசரியேஹி விஸுங் விஸுங் ஏகேன ஏகஸ்ஸாதி ஏவங் ஏகப்பஹாரேனேவ த்³வே திஸ்ஸோ வா கம்மவாசா காதப்³பா³. ஸசே பன நானாசரியா நானுபஜ்ஜா²யா ஹொந்தி, திஸ்ஸத்தே²ரோ ஸுமனத்தே²ரஸ்ஸ ஸத்³தி⁴விஹாரிகங், ஸுமனத்தே²ரோ திஸ்ஸத்தே²ரஸ்ஸ ஸத்³தி⁴விஹாரிகங் அனுஸ்ஸாவேதி, அஞ்ஞமஞ்ஞஞ்ச க³ணபூரகா ஹொந்தி, வட்டதி. ஸசே பன நானாஉபஜ்ஜா²யா ஹொந்தி, ஏகோ ஆசரியோ ஹோதி, ‘‘நத்வேவ நானுபஜ்ஜா²யேனா’’தி படிக்கி²த்தத்தா ந வட்டதி. இத³ங் ஸந்தா⁴ய ஹி ஏஸ படிக்கே²போ.
Dve tayo ekānussāvane kātuṃ tañca kho ekena upajjhāyenāti dve vā tayo vā jane purimanayeneva ekato anussāvane kātuṃ anujānāmi; tañca kho anussāvanakiriyaṃ ekena upajjhāyena anujānāmīti attho. Tasmā ekena ācariyena dve vā tayo vā anussāvetabbā. Dvīhi vā tīhi vā ācariyehi visuṃ visuṃ ekena ekassāti evaṃ ekappahāreneva dve tisso vā kammavācā kātabbā. Sace pana nānācariyā nānupajjhāyā honti, tissatthero sumanattherassa saddhivihārikaṃ, sumanatthero tissattherassa saddhivihārikaṃ anussāveti, aññamaññañca gaṇapūrakā honti, vaṭṭati. Sace pana nānāupajjhāyā honti, eko ācariyo hoti, ‘‘natveva nānupajjhāyenā’’ti paṭikkhittattā na vaṭṭati. Idaṃ sandhāya hi esa paṭikkhepo.
க³மிகாதி³னிஸ்ஸயவத்து²கதா² நிட்டி²தா.
Gamikādinissayavatthukathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
59. க³மிகாதி³னிஸ்ஸயவத்தூ²னி • 59. Gamikādinissayavatthūni
60. கொ³த்தேன அனுஸ்ஸாவனானுஜானநா • 60. Gottena anussāvanānujānanā
61. த்³வேஉபஸம்பதா³பெக்கா²தி³வத்து² • 61. Dveupasampadāpekkhādivatthu
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
க³மிகாதி³னிஸ்ஸயவத்து²கதா²வண்ணனா • Gamikādinissayavatthukathāvaṇṇanā
கொ³த்தேன அனுஸ்ஸாவனானுஜானநகதா²வண்ணனா • Gottena anussāvanānujānanakathāvaṇṇanā
த்³வேஉபஸம்பதா³பெக்கா²தி³வத்து²கதா²வண்ணனா • Dveupasampadāpekkhādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / க³மிகாதி³னிஸ்ஸயவத்து²கதா²வண்ணனா • Gamikādinissayavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā
க³மிகாதி³னிஸ்ஸயவத்து²கதா²வண்ணனா • Gamikādinissayavatthukathāvaṇṇanā
த்³வேஉபஸம்பதா³பெக்கா²தி³வத்து²கதா²வண்ணனா • Dveupasampadāpekkhādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 59. க³மிகாதி³னிஸ்ஸயவத்து²கதா² • 59. Gamikādinissayavatthukathā
