| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
গমিকাদিনিস্সযৰত্থুকথাৰণ্ণনা
Gamikādinissayavatthukathāvaṇṇanā
১২১. ‘‘অদ্ধানমগ্গপ্পটিপন্নেন ভিক্খুনা নিস্সযং অলভমানেন অনিস্সিতেন ৰত্থুন্তি অৰস্সকালেযেৰ ৰস্সকালে অদ্ধানগমনস্স পাল়িযংযেৰ পটিক্খিত্তত্তা’’তি ৰুত্তং, তং অপ্পমাণং সত্তাহং ৰস্সচ্ছেদাদিৰসেন অদ্ধানগমনসম্ভৰতো, গচ্ছন্তস্সেৰ ৰস্সকালগমনসম্ভৰতো চ। অন্তরামগ্গে…পে॰… অনাপত্তীতি নিস্সযদাযকাভাৰেযেৰ। ‘‘তস্স নিস্সাযা’’তি পাঠানুরূপং ৰুত্তং, তং নিস্সাযাতি অত্থো। ‘‘যদা পতিরূপো নিস্সযদাযকো আগচ্ছিস্সতী’’তি ৰচনেন অযং ৰিধি অৰস্সকালে এৰাতি সিদ্ধং। ‘‘অন্তোৰস্সে পন কস্সচি আগমনাভাৰা’’তি ৰুত্তং। সচে সো জলপট্টনে ৰা থলপট্টনে ৰা ৰসন্তো ৰস্সূপনাযিকায আসন্নায গন্তুকামো সুণাতি ‘‘অসুকো মহাথেরো আগমিস্সতী’’তি, তং চে আগমেতি, ৰট্টতি। আগমেন্তস্সেৰ চে ৰস্সূপনাযিকদিৰসো হোতি, হোতু, গন্তব্বং তত্থ, যত্থ নিস্সযদাযকং লভতীতি। পাতিমোক্খুদ্দেসকাভাৰেন চে গন্তুং ৰট্টতি, পগেৰ নিস্সযদাযকাভাৰেন। সচে সো গচ্ছন্তো জীৰিতন্তরাযং, ব্রহ্মচরিযন্তরাযং ৰা পস্সতি, তত্থেৰ ৰসিতব্বন্তি একে।
121.‘‘Addhānamaggappaṭipannena bhikkhunā nissayaṃ alabhamānena anissitena vatthunti avassakāleyeva vassakāle addhānagamanassa pāḷiyaṃyeva paṭikkhittattā’’ti vuttaṃ, taṃ appamāṇaṃ sattāhaṃ vassacchedādivasena addhānagamanasambhavato, gacchantasseva vassakālagamanasambhavato ca. Antarāmagge…pe… anāpattīti nissayadāyakābhāveyeva. ‘‘Tassa nissāyā’’ti pāṭhānurūpaṃ vuttaṃ, taṃ nissāyāti attho. ‘‘Yadā patirūpo nissayadāyako āgacchissatī’’ti vacanena ayaṃ vidhi avassakāle evāti siddhaṃ. ‘‘Antovasse pana kassaci āgamanābhāvā’’ti vuttaṃ. Sace so jalapaṭṭane vā thalapaṭṭane vā vasanto vassūpanāyikāya āsannāya gantukāmo suṇāti ‘‘asuko mahāthero āgamissatī’’ti, taṃ ce āgameti, vaṭṭati. Āgamentasseva ce vassūpanāyikadivaso hoti, hotu, gantabbaṃ tattha, yattha nissayadāyakaṃ labhatīti. Pātimokkhuddesakābhāvena ce gantuṃ vaṭṭati, pageva nissayadāyakābhāvena. Sace so gacchanto jīvitantarāyaṃ, brahmacariyantarāyaṃ vā passati, tattheva vasitabbanti eke.
১২২. ‘‘নাহং উস্সহামি থেরস্স নামং গহেতু’’ন্তি ইত্থন্নামো ইত্থন্নামস্স আযস্মতোতি লক্খণতো আহ। ‘‘গোত্তেনাপী’তি ৰচনতো যেন ৰোহারেন ৰোহরিযন্তি, তেন ৰট্টতীতি সিদ্ধং, তস্মা ‘কো নামো তে উপজ্ঝাযো’তি পুট্ঠেনাপি গোত্তমেৰ নামং কত্ৰা ৰত্তব্বন্তি সিদ্ধং হোতি, তস্মা চতুব্বিধেসু নামেসু যেন কেনচি নামেন অনুস্সাৰনা কাতব্বা’’তি ৰদন্তি। একস্স বহূনি নামানি হোন্তি, তত্থ একং নামং ঞত্তিযা, একং অনুস্সাৰনায কাতুং ন ৰট্টতি, অত্থতো, ব্যঞ্জনতো চ অভিন্নাহি অনুস্সাৰনাহি ভৰিতব্বন্তি। কত্থচি ‘‘আযস্মতো বুদ্ধরক্খিতত্থেরস্সা’’তি ৰত্ৰা কত্থচি কেৰলং ‘‘বুদ্ধরক্খিতস্সা’’তি সাৰেতি, ‘‘সাৰনং হাপেতী’’তি ন ৰুচ্চতি নামস্স অহাপিতত্তাতি একে। সচে কত্থচি ‘‘আযস্মতো বুদ্ধরক্খিতস্সা’’তি ৰত্ৰা কত্থচি ‘‘বুদ্ধরক্খিতস্সাযস্মতো’’তি সাৰেতি, পাঠানুরূপত্তা খেত্তমেৰ ওতিণ্ণন্তিপি একে। ব্যঞ্জনভেদপ্পসঙ্গতো অনুস্সাৰনে তং ন ৰট্টতীতি একে। সচে পন সব্বট্ঠানেপি তথেৰ ৰদতি, ৰট্টতি ভগৰতা দিন্নলক্খণানুরূপত্তা। লক্খণৰিরোধতো অঞ্ঞথা ন ৰট্টতীতি চে? ন, পযোগানুরূপত্তা। তত্থ তথা, ইধ অঞ্ঞথা পযোগোতি চে? ন, ৰিপত্তিলক্খণানং ৰিরোধতো। ন সব্বেন সব্বং, সাৰনাহাপনা এৰ হি পাল়িযং তদত্থৰিভাৰনে আগতাতি অঞ্ঞপদেসু সাৰনেসু পরিহারো ন সম্ভৰতি আচিণ্ণকপ্পৰিরোধতো। সোপি কিংপমাণন্তি চে? পমাণং আচরিযুগ্গহস্স পমাণত্তা।
122. ‘‘Nāhaṃ ussahāmi therassa nāmaṃ gahetu’’nti itthannāmo itthannāmassa āyasmatoti lakkhaṇato āha. ‘‘Gottenāpī’ti vacanato yena vohārena vohariyanti, tena vaṭṭatīti siddhaṃ, tasmā ‘ko nāmo te upajjhāyo’ti puṭṭhenāpi gottameva nāmaṃ katvā vattabbanti siddhaṃ hoti, tasmā catubbidhesu nāmesu yena kenaci nāmena anussāvanā kātabbā’’ti vadanti. Ekassa bahūni nāmāni honti, tattha ekaṃ nāmaṃ ñattiyā, ekaṃ anussāvanāya kātuṃ na vaṭṭati, atthato, byañjanato ca abhinnāhi anussāvanāhi bhavitabbanti. Katthaci ‘‘āyasmato buddharakkhitattherassā’’ti vatvā katthaci kevalaṃ ‘‘buddharakkhitassā’’ti sāveti, ‘‘sāvanaṃ hāpetī’’ti na vuccati nāmassa ahāpitattāti eke. Sace katthaci ‘‘āyasmato buddharakkhitassā’’ti vatvā katthaci ‘‘buddharakkhitassāyasmato’’ti sāveti, pāṭhānurūpattā khettameva otiṇṇantipi eke. Byañjanabhedappasaṅgato anussāvane taṃ na vaṭṭatīti eke. Sace pana sabbaṭṭhānepi tatheva vadati, vaṭṭati bhagavatā dinnalakkhaṇānurūpattā. Lakkhaṇavirodhato aññathā na vaṭṭatīti ce? Na, payogānurūpattā. Tattha tathā, idha aññathā payogoti ce? Na, vipattilakkhaṇānaṃ virodhato. Na sabbena sabbaṃ, sāvanāhāpanā eva hi pāḷiyaṃ tadatthavibhāvane āgatāti aññapadesu sāvanesu parihāro na sambhavati āciṇṇakappavirodhato. Sopi kiṃpamāṇanti ce? Pamāṇaṃ ācariyuggahassa pamāṇattā.
১২৩. দ্ৰে একানুস্সাৰনেতি এত্থ গণ্ঠিপদে তাৰ এৰং লিখিতং ‘‘একতো পৰত্তঅনুস্সাৰনে’’। ইদং সন্ধাযাতি নানুপজ্ঝাযং একাচরিযং অনুস্সাৰনকিরিযং সন্ধায, তঞ্চ অনুস্সাৰনকিরিযং একেনুপজ্ঝাযেন নানাচরিযেহি অনুজানামীতি অত্থো। নানুপজ্ঝাযেহি একেনাচরিযেন ন ত্ৰেৰ অনুজানামীতি অত্থোতি। পোরাণগণ্ঠিপদেপি তথেৰ ৰত্ৰা ‘‘তিণ্ণং উদ্ধং ন কেনচি আকারেন একতো ৰট্টতী’’তি ৰুত্তং, তং যুত্তং, ন হি সঙ্ঘো সঙ্ঘস্স কম্মং করোতীতি আচরিযো। ইদং পনেত্থ চিন্তেতব্বং। কথং? চত্তারো ৰা অতিরেকা ৰা উপসম্পদাপেক্খা সঙ্ঘৰোহারং ন লভন্তি ভিক্খুভাৰং অপ্পত্তত্তা। কেৰলং ভগৰতা পরিচ্ছিন্দিত্ৰা ‘‘তযো’’তি ৰুত্তত্তা ততো উদ্ধং ন ৰট্টতীতি নো তক্কোতি আচরিযো। অনুগণ্ঠিপদেপি অযমেৰত্থো বহুধা ৰিচারেত্ৰা ৰুত্তো। তথা অন্ধকট্ঠকথাযম্পি। ন সব্বত্থ ইমস্মিং অত্থৰিকপ্পে মতিভেদো অত্থি। যা পনেসা উভো পরিপুণ্ণৰীসতিৰস্সা, উভিন্নমেকুপজ্ঝাযো, একাচরিযো, একা কম্মৰাচা, একো উপসম্পন্নো, একো অনুপসম্পন্নোতি পরিৰারকথা, তং দস্সেত্ৰা একো চে আচরিযো দ্ৰিন্নং, তিণ্ণং ৰা উপসম্পদাপেক্খানং একং কম্মৰাচং একেনুপজ্ঝাযেন সাৰেতি, ৰট্টতীতি একে। তং অযুত্তং, ন হি সক্কা সিথিলধনিতাদিব্যঞ্জনলক্খণসম্পন্নং তস্মিং খণে কম্মৰাচং দস্সেতুং ৰিমুত্তদোসাদীসু পতনতো । ৰিসুং ৰিসুং করণং সন্ধায ইদং ৰুত্তন্তি দীপনত্থং ‘‘তযো পরিপুণ্ণৰীসতিৰস্সা , তিণ্ণমেকুপজ্ঝাযো, একাচরিযো, একা কম্মৰাচা, দ্ৰে উপসম্পন্না, একো অনুপসম্পন্নো’’তি ন ৰুত্তো। এৰঞ্হি ৰুত্তে সক্কা তীসু আকাসট্ঠমপনেত্ৰা সীমট্ঠানং দ্ৰিন্নমনুরূপং কম্মৰাচং দস্সেতুং, তমনিট্ঠপ্পসঙ্গং নিৰারেতুং ‘‘উভো’’তি ৰুত্তং। ‘‘তত্থ পরিপুণ্ণৰীসতিৰস্সৰচনেন ৰত্থুসম্পত্তি, পরিসায পধানত্তা, আচরিযুপজ্ঝাযৰচনেন পরিসসম্পত্তি, কম্মৰাচায অনুস্সাৰনসম্পত্তি দস্সিতা, সীমসম্পত্তি এৰেকা ন দস্সিতা। ততো ৰিপত্তি জাতা কম্মৰাচানং নানাক্খণিকত্তা। একক্খণভাৰে সতি উভিন্নং সম্পত্তি ৰা সিযা ৰিপত্তি ৰা, ন একস্সেৰ সম্পত্তি একস্স ৰিপত্তীতি সম্ভৰতি ৰিমুত্তাদিব্যঞ্জনদোসপ্পসঙ্গতো’’তি ৰুত্তং, তং ৰচনং উভোপি চেতে সীমগতাৰ হোন্তি, উভিন্নং একতো কম্মসম্পত্তিদীপনতো দ্ৰিন্নং একতো অনুস্সাৰনং একেন উপজ্ঝাযেন একেনাচরিযেন ৰট্টতীতি সাধেতি। দ্ৰিন্নং, তিণ্ণঞ্চ একতো সসমনুভাসনা চ পাল়িযংযেৰ দস্সিতা, তঞ্চ অনুলোমেতি। অট্ঠকথাচরিযেহি নানুঞ্ঞাতং, ন পটিক্খিত্তং, ৰিচারেত্ৰা গহেতব্বন্তি আচরিযো, তং ধম্মতায ৰিরুজ্ঝতি।
123.Dve ekānussāvaneti ettha gaṇṭhipade tāva evaṃ likhitaṃ ‘‘ekato pavattaanussāvane’’. Idaṃ sandhāyāti nānupajjhāyaṃ ekācariyaṃ anussāvanakiriyaṃ sandhāya, tañca anussāvanakiriyaṃ ekenupajjhāyena nānācariyehi anujānāmīti attho. Nānupajjhāyehi ekenācariyena na tveva anujānāmīti atthoti. Porāṇagaṇṭhipadepi tatheva vatvā ‘‘tiṇṇaṃ uddhaṃ na kenaci ākārena ekato vaṭṭatī’’ti vuttaṃ, taṃ yuttaṃ, na hi saṅgho saṅghassa kammaṃ karotīti ācariyo. Idaṃ panettha cintetabbaṃ. Kathaṃ? Cattāro vā atirekā vā upasampadāpekkhā saṅghavohāraṃ na labhanti bhikkhubhāvaṃ appattattā. Kevalaṃ bhagavatā paricchinditvā ‘‘tayo’’ti vuttattā tato uddhaṃ na vaṭṭatīti no takkoti ācariyo. Anugaṇṭhipadepi ayamevattho bahudhā vicāretvā vutto. Tathā andhakaṭṭhakathāyampi. Na sabbattha imasmiṃ atthavikappe matibhedo atthi. Yā panesā ubho paripuṇṇavīsativassā, ubhinnamekupajjhāyo, ekācariyo, ekā kammavācā, eko upasampanno, eko anupasampannoti parivārakathā, taṃ dassetvā eko ce ācariyo dvinnaṃ, tiṇṇaṃ vā upasampadāpekkhānaṃ ekaṃ kammavācaṃ ekenupajjhāyena sāveti, vaṭṭatīti eke. Taṃ ayuttaṃ, na hi sakkā sithiladhanitādibyañjanalakkhaṇasampannaṃ tasmiṃ khaṇe kammavācaṃ dassetuṃ vimuttadosādīsu patanato . Visuṃ visuṃ karaṇaṃ sandhāya idaṃ vuttanti dīpanatthaṃ ‘‘tayo paripuṇṇavīsativassā , tiṇṇamekupajjhāyo, ekācariyo, ekā kammavācā, dve upasampannā, eko anupasampanno’’ti na vutto. Evañhi vutte sakkā tīsu ākāsaṭṭhamapanetvā sīmaṭṭhānaṃ dvinnamanurūpaṃ kammavācaṃ dassetuṃ, tamaniṭṭhappasaṅgaṃ nivāretuṃ ‘‘ubho’’ti vuttaṃ. ‘‘Tattha paripuṇṇavīsativassavacanena vatthusampatti, parisāya padhānattā, ācariyupajjhāyavacanena parisasampatti, kammavācāya anussāvanasampatti dassitā, sīmasampatti evekā na dassitā. Tato vipatti jātā kammavācānaṃ nānākkhaṇikattā. Ekakkhaṇabhāve sati ubhinnaṃ sampatti vā siyā vipatti vā, na ekasseva sampatti ekassa vipattīti sambhavati vimuttādibyañjanadosappasaṅgato’’ti vuttaṃ, taṃ vacanaṃ ubhopi cete sīmagatāva honti, ubhinnaṃ ekato kammasampattidīpanato dvinnaṃ ekato anussāvanaṃ ekena upajjhāyena ekenācariyena vaṭṭatīti sādheti. Dvinnaṃ, tiṇṇañca ekato sasamanubhāsanā ca pāḷiyaṃyeva dassitā, tañca anulometi. Aṭṭhakathācariyehi nānuññātaṃ, na paṭikkhittaṃ, vicāretvā gahetabbanti ācariyo, taṃ dhammatāya virujjhati.
অযঞ্হি বুদ্ধানং ধম্মতা – যদিদং যত্থ যত্থ ৰচননানত্তমত্থি, তত্থ তত্থ গরুকেসু ঠানেসু ৰত্তব্বযুত্তং ৰদন্তি। দূতেন উপসম্পদাদযো চেত্থ নিদস্সনং। যস্মা চেত্থ পুব্বে অনুঞ্ঞাতকম্মৰাচায নানত্তং নত্থি, তস্মা ‘‘অনুজানামি, ভিক্খৰে, দ্ৰে তযো একানুস্সাৰনে কাতু’’ন্তি ৰত্ৰা ‘‘এৰঞ্চ পন, ভিক্খৰে, কাতব্বো’’তি ন ৰুত্তং। নানত্তে সতিপি তত্থ তত্থ দ্ৰিন্নং, বহূনং ৰা ৰসেন ৰুত্তকম্মৰাচানুসারেন গহেতব্বতো অৰুত্তন্তি চে? ন হি লহুকেসু ঠানেসু ৰত্ৰা গরুকেসু অৰচনং ধম্মতাতি আচরিযো। অঞ্ঞতরস্মিং পন গণ্ঠিপদে এৰং পপঞ্চিতং দ্ৰে একানুস্সাৰনেতি দ্ৰে একতো অনুস্সাৰনে। ‘‘একেন’’ ইতি পাঠো, একেন আচরিযেনাতি অত্থো। পুরিমনযেনেৰাতি ‘‘একেন ৰা দ্ৰীহি ৰা আচরিযেহী’’তি ৰুত্তনযেন এৰ, তস্মা একেনাচরিযেন দ্ৰে ৰা তযো ৰা অনুস্সাৰেতব্বা। ‘‘দ্ৰীহি ৰা তীহি ৰা’’তি পাঠো। নানাচরিযা নানুপজ্ঝাযাতি এত্থ ‘‘তঞ্চ খো একেন উপজ্ঝাযেন, ন ত্ৰেৰ নানুপজ্ঝাযেনা’’তি ৰুত্তত্তা ন ৰট্টতীতি চে? ৰট্টতি। কথং? একেন অনুস্সাৰনে একানুস্সাৰনেতি ৰিগ্গহস্স পাকটত্তা লীনমেৰ দস্সেতুং ‘‘একতো অনুস্সাৰনে’’তি ৰিগ্গহোৰ ৰুত্তো, তস্মা উজুকত্তমেৰ সন্ধায তঞ্চ খো একেন অনুস্সাৰনং একানুস্সাৰনং, একেন উপজ্ঝাযেন অনুজানামি, ন ত্ৰেৰ নানুপজ্ঝাযেনাতি অত্থো। ইদং সন্ধায হি দ্ৰিধা ৰিগ্গহো, তস্মা ‘‘নানাচরিযেহি নানুপজ্ঝাযা ন ৰট্টন্তীতি সিদ্ধমেৰা’’তি অঞ্ঞথাপি ৰদন্তি। তঞ্চ খো একেন উপজ্ঝাযেন একস্স উপজ্ঝাযস্স ৰা ৰত্তব্বং অনুস্সাৰনং, ন ত্ৰেৰ নানুপজ্ঝাযেন অনুজানামীতি অত্থো। কিং ৰুত্তং হোতি? ‘‘একো আচরিযো, দ্ৰে ৰা তযো ৰা উপসম্পদাপেক্খা দ্ৰিন্নং তিণ্ণং ৰা উপজ্ঝাযানং ন ত্ৰেৰ অনুজানামী’’তি কির ৰুত্তন্তি। অপরস্মিং পন গণ্ঠিপদে ‘‘একেন অনুস্সাৰনেতি ৰিগ্গহস্স পাকটত্তা তং পকাসেতুং ‘একেনা’তি ৰুত্তং। এৰং ৰুত্তে অৰস্সং পণ্ডিতা জানন্তি। তংপাকটত্তা চে জানন্তি, একেনাতি ইমিনা কিন্তি চে? কিঞ্চাপি জানন্তি, ৰিৰাদো পন হোতি অলদ্ধলেসত্তা, জানিতুঞ্চ ন সক্কা, ‘একেনা’তি ৰুত্তে পন তং সব্বং ন হোতীতি ৰুত্ত’’ন্তি লিখিতং। এৰং এত্থ অনেকে আচরিযা চ তক্কিকা চ অনেকধা পপঞ্চেন্তি, তং সব্বং সুট্ঠু উপপরিক্খিত্ৰা গরুকুলং পযিরুপাসিত্ৰা ৰংসানুগতোৰ অত্থো গহেতব্বো। ‘‘ন সব্বত্থ ইমস্মিং অত্থৰিকপ্পে মতিভেদো অত্থী’’তি ৰুত্তমেৰ।
Ayañhi buddhānaṃ dhammatā – yadidaṃ yattha yattha vacananānattamatthi, tattha tattha garukesu ṭhānesu vattabbayuttaṃ vadanti. Dūtena upasampadādayo cettha nidassanaṃ. Yasmā cettha pubbe anuññātakammavācāya nānattaṃ natthi, tasmā ‘‘anujānāmi, bhikkhave, dve tayo ekānussāvane kātu’’nti vatvā ‘‘evañca pana, bhikkhave, kātabbo’’ti na vuttaṃ. Nānatte satipi tattha tattha dvinnaṃ, bahūnaṃ vā vasena vuttakammavācānusārena gahetabbato avuttanti ce? Na hi lahukesu ṭhānesu vatvā garukesu avacanaṃ dhammatāti ācariyo. Aññatarasmiṃ pana gaṇṭhipade evaṃ papañcitaṃ dve ekānussāvaneti dve ekato anussāvane. ‘‘Ekena’’ iti pāṭho, ekena ācariyenāti attho. Purimanayenevāti ‘‘ekena vā dvīhi vā ācariyehī’’ti vuttanayena eva, tasmā ekenācariyena dve vā tayo vā anussāvetabbā. ‘‘Dvīhi vā tīhi vā’’ti pāṭho. Nānācariyā nānupajjhāyāti ettha ‘‘tañca kho ekena upajjhāyena, na tveva nānupajjhāyenā’’ti vuttattā na vaṭṭatīti ce? Vaṭṭati. Kathaṃ? Ekena anussāvane ekānussāvaneti viggahassa pākaṭattā līnameva dassetuṃ ‘‘ekato anussāvane’’ti viggahova vutto, tasmā ujukattameva sandhāya tañca kho ekena anussāvanaṃ ekānussāvanaṃ, ekena upajjhāyena anujānāmi, na tveva nānupajjhāyenāti attho. Idaṃ sandhāya hi dvidhā viggaho, tasmā ‘‘nānācariyehi nānupajjhāyā na vaṭṭantīti siddhamevā’’ti aññathāpi vadanti. Tañca kho ekena upajjhāyena ekassa upajjhāyassa vā vattabbaṃ anussāvanaṃ, na tveva nānupajjhāyena anujānāmīti attho. Kiṃ vuttaṃ hoti? ‘‘Eko ācariyo, dve vā tayo vā upasampadāpekkhā dvinnaṃ tiṇṇaṃ vā upajjhāyānaṃ na tveva anujānāmī’’ti kira vuttanti. Aparasmiṃ pana gaṇṭhipade ‘‘ekena anussāvaneti viggahassa pākaṭattā taṃ pakāsetuṃ ‘ekenā’ti vuttaṃ. Evaṃ vutte avassaṃ paṇḍitā jānanti. Taṃpākaṭattā ce jānanti, ekenāti iminā kinti ce? Kiñcāpi jānanti, vivādo pana hoti aladdhalesattā, jānituñca na sakkā, ‘ekenā’ti vutte pana taṃ sabbaṃ na hotīti vutta’’nti likhitaṃ. Evaṃ ettha aneke ācariyā ca takkikā ca anekadhā papañcenti, taṃ sabbaṃ suṭṭhu upaparikkhitvā garukulaṃ payirupāsitvā vaṃsānugatova attho gahetabbo. ‘‘Na sabbattha imasmiṃ atthavikappe matibhedo atthī’’ti vuttameva.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
৫৯. গমিকাদিনিস্সযৰত্থূনি • 59. Gamikādinissayavatthūni
৬০. গোত্তেন অনুস্সাৰনানুজাননা • 60. Gottena anussāvanānujānanā
৬১. দ্ৰেউপসম্পদাপেক্খাদিৰত্থু • 61. Dveupasampadāpekkhādivatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / গমিকাদিনিস্সযৰত্থুকথা • Gamikādinissayavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
গমিকাদিনিস্সযৰত্থুকথাৰণ্ণনা • Gamikādinissayavatthukathāvaṇṇanā
গোত্তেন অনুস্সাৰনানুজাননকথাৰণ্ণনা • Gottena anussāvanānujānanakathāvaṇṇanā
দ্ৰেউপসম্পদাপেক্খাদিৰত্থুকথাৰণ্ণনা • Dveupasampadāpekkhādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā
গমিকাদিনিস্সযৰত্থুকথাৰণ্ণনা • Gamikādinissayavatthukathāvaṇṇanā
দ্ৰেউপসম্পদাপেক্খাদিৰত্থুকথাৰণ্ণনা • Dveupasampadāpekkhādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৫৯. গমিকাদিনিস্সযৰত্থুকথা • 59. Gamikādinissayavatthukathā
