| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
59. ගමිකාදිනිස්‌සයවත්‌ථූනි
59. Gamikādinissayavatthūni
121. තෙන ඛො පන සමයෙන අඤ්‌ඤතරො භික්‌ඛු කොසලෙසු ජනපදෙ අද්‌ධානමග්‌ගප්‌පටිපන්‌නො හොති. අථ ඛො තස්‌ස භික්‌ඛුනො එතදහොසි – ‘‘භගවතා පඤ්‌ඤත්‌තං ‘න අනිස්‌සිතෙන වත්‌ථබ්‌බ’න්‌ති. අහඤ්‌චම්‌හි නිස්‌සයකරණීයො අද්‌ධානමග්‌ගප්‌පටිපන්‌නො, කථං නු ඛො මයා පටිපජ්‌ජිතබ්‌බ’’න්‌ති? භගවතො එතමත්‌ථං ආරොචෙසුං. අනුජානාමි, භික්‌ඛවෙ, අද්‌ධානමග්‌ගප්‌පටිපන්‌නෙන භික්‌ඛුනා නිස්‌සයං අලභමානෙන අනිස්‌සිතෙන වත්‌ථුන්‌ති.
121. Tena kho pana samayena aññataro bhikkhu kosalesu janapade addhānamaggappaṭipanno hoti. Atha kho tassa bhikkhuno etadahosi – ‘‘bhagavatā paññattaṃ ‘na anissitena vatthabba’nti. Ahañcamhi nissayakaraṇīyo addhānamaggappaṭipanno, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, addhānamaggappaṭipannena bhikkhunā nissayaṃ alabhamānena anissitena vatthunti.
තෙන ඛො පන සමයෙන ද්‌වෙ භික්‌ඛූ කොසලෙසු ජනපදෙ අද්‌ධානමග්‌ගප්‌පටිපන්‌නා හොන්‌ති. තෙ අඤ්‌ඤතරං ආවාසං උපගච්‌ඡිංසු. තත්‌ථ එකො භික්‌ඛු ගිලානො හොති. අථ ඛො තස්‌ස ගිලානස්‌ස භික්‌ඛුනො එතදහොසි – ‘‘භගවතා පඤ්‌ඤත්‌තං ‘න අනිස්‌සිතෙන වත්‌ථබ්‌බ’න්‌ති. අහඤ්‌චම්‌හි නිස්‌සයකරණීයො ගිලානො, කථං නු ඛො මයා පටිපජ්‌ජිතබ්‌බ’’න්‌ති? භගවතො එතමත්‌ථං ආරොචෙසුං. අනුජානාමි, භික්‌ඛවෙ, ගිලානෙන භික්‌ඛුනා නිස්‌සයං අලභමානෙන අනිස්‌සිතෙන වත්‌ථුන්‌ති.
Tena kho pana samayena dve bhikkhū kosalesu janapade addhānamaggappaṭipannā honti. Te aññataraṃ āvāsaṃ upagacchiṃsu. Tattha eko bhikkhu gilāno hoti. Atha kho tassa gilānassa bhikkhuno etadahosi – ‘‘bhagavatā paññattaṃ ‘na anissitena vatthabba’nti. Ahañcamhi nissayakaraṇīyo gilāno, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, gilānena bhikkhunā nissayaṃ alabhamānena anissitena vatthunti.
අථ ඛො තස්‌ස ගිලානුපට්‌ඨාකස්‌ස භික්‌ඛුනො එතදහොසි – ‘‘භගවතා පඤ්‌ඤත්‌තං ‘න අනිස්‌සිතෙන වත්‌ථබ්‌බ’න්‌ති. අහඤ්‌චම්‌හි නිස්‌සයකරණීයො, අයඤ්‌ච භික්‌ඛු ගිලානො, කථං නු ඛො මයා පටිපජ්‌ජිතබ්‌බ’’න්‌ති? භගවතො එතමත්‌ථං ආරොචෙසුං. අනුජානාමි, භික්‌ඛවෙ, ගිලානුපට්‌ඨාකෙන භික්‌ඛුනා නිස්‌සයං අලභමානෙන යාචියමානෙන අනිස්‌සිතෙන වත්‌ථුන්‌ති.
Atha kho tassa gilānupaṭṭhākassa bhikkhuno etadahosi – ‘‘bhagavatā paññattaṃ ‘na anissitena vatthabba’nti. Ahañcamhi nissayakaraṇīyo, ayañca bhikkhu gilāno, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, gilānupaṭṭhākena bhikkhunā nissayaṃ alabhamānena yāciyamānena anissitena vatthunti.
තෙන ඛො පන සමයෙන අඤ්‌ඤතරො භික්‌ඛු අරඤ්‌ඤෙ විහරති. තස්‌ස ච තස්‌මිං සෙනාසනෙ ඵාසු හොති. අථ ඛො තස්‌ස භික්‌ඛුනො එතදහොසි – ‘‘භගවතා පඤ්‌ඤත්‌තං ‘න අනිස්‌සිතෙන වත්‌ථබ්‌බ’න්‌ති. අහඤ්‌චම්‌හි නිස්‌සයකරණීයො අරඤ්‌ඤෙ විහරාමි, මය්‌හඤ්‌ච ඉමස්‌මිං සෙනාසනෙ ඵාසු හොති, කථං නු ඛො මයා පටිපජ්‌ජිතබ්‌බ’’න්‌ති? භගවතො එතමත්‌ථං ආරොචෙසුං. අනුජානාමි, භික්‌ඛවෙ, ආරඤ්‌ඤිකෙන භික්‌ඛුනා ඵාසුවිහාරං සල්‌ලක්‌ඛෙන්‌තෙන නිස්‌සයං අලභමානෙන අනිස්‌සිතෙන වත්‌ථුං – යදා පතිරූපො නිස්‌සයදායකො ආගච්‌ඡිස්‌සති, තදා තස්‌ස නිස්‌සාය වසිස්‌සාමීති.
Tena kho pana samayena aññataro bhikkhu araññe viharati. Tassa ca tasmiṃ senāsane phāsu hoti. Atha kho tassa bhikkhuno etadahosi – ‘‘bhagavatā paññattaṃ ‘na anissitena vatthabba’nti. Ahañcamhi nissayakaraṇīyo araññe viharāmi, mayhañca imasmiṃ senāsane phāsu hoti, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, āraññikena bhikkhunā phāsuvihāraṃ sallakkhentena nissayaṃ alabhamānena anissitena vatthuṃ – yadā patirūpo nissayadāyako āgacchissati, tadā tassa nissāya vasissāmīti.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / ගමිකාදිනිස්‌සයවත්‌ථුකථා • Gamikādinissayavatthukathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / ගමිකාදිනිස්‌සයවත්‌ථුකථාවණ්‌ණනා • Gamikādinissayavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / ගමිකාදිනිස්‌සයවත්‌ථුකථාවණ්‌ණනා • Gamikādinissayavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ගමිකාදිනිස්‌සයවත්‌ථුකථාවණ්‌ණනා • Gamikādinissayavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 59. ගමිකාදිනිස්‌සයවත්‌ථුකථා • 59. Gamikādinissayavatthukathā
