| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༥༩. གམིཀཱདིནིསྶཡཝཏྠཱུནི
59. Gamikādinissayavatthūni
༡༢༡. ཏེན ཁོ པན སམཡེན ཨཉྙཏརོ བྷིཀྑུ ཀོསལེསུ ཛནཔདེ ཨདྡྷཱནམགྒཔྤཊིཔནྣོ ཧོཏི། ཨཐ ཁོ ཏསྶ བྷིཀྑུནོ ཨེཏདཧོསི – ‘‘བྷགཝཏཱ པཉྙཏྟཾ ‘ན ཨནིསྶིཏེན ཝཏྠབྦ’ནྟི། ཨཧཉྩམྷི ནིསྶཡཀརཎཱིཡོ ཨདྡྷཱནམགྒཔྤཊིཔནྣོ, ཀཐཾ ནུ ཁོ མཡཱ པཊིཔཛྫིཏབྦ’’ནྟི? བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨདྡྷཱནམགྒཔྤཊིཔནྣེན བྷིཀྑུནཱ ནིསྶཡཾ ཨལབྷམཱནེན ཨནིསྶིཏེན ཝཏྠུནྟི།
121. Tena kho pana samayena aññataro bhikkhu kosalesu janapade addhānamaggappaṭipanno hoti. Atha kho tassa bhikkhuno etadahosi – ‘‘bhagavatā paññattaṃ ‘na anissitena vatthabba’nti. Ahañcamhi nissayakaraṇīyo addhānamaggappaṭipanno, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, addhānamaggappaṭipannena bhikkhunā nissayaṃ alabhamānena anissitena vatthunti.
ཏེན ཁོ པན སམཡེན དྭེ བྷིཀྑཱུ ཀོསལེསུ ཛནཔདེ ཨདྡྷཱནམགྒཔྤཊིཔནྣཱ ཧོནྟི། ཏེ ཨཉྙཏརཾ ཨཱཝཱསཾ ཨུཔགཙྪིཾསུ། ཏཏྠ ཨེཀོ བྷིཀྑུ གིལཱནོ ཧོཏི། ཨཐ ཁོ ཏསྶ གིལཱནསྶ བྷིཀྑུནོ ཨེཏདཧོསི – ‘‘བྷགཝཏཱ པཉྙཏྟཾ ‘ན ཨནིསྶིཏེན ཝཏྠབྦ’ནྟི། ཨཧཉྩམྷི ནིསྶཡཀརཎཱིཡོ གིལཱནོ, ཀཐཾ ནུ ཁོ མཡཱ པཊིཔཛྫིཏབྦ’’ནྟི? བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, གིལཱནེན བྷིཀྑུནཱ ནིསྶཡཾ ཨལབྷམཱནེན ཨནིསྶིཏེན ཝཏྠུནྟི།
Tena kho pana samayena dve bhikkhū kosalesu janapade addhānamaggappaṭipannā honti. Te aññataraṃ āvāsaṃ upagacchiṃsu. Tattha eko bhikkhu gilāno hoti. Atha kho tassa gilānassa bhikkhuno etadahosi – ‘‘bhagavatā paññattaṃ ‘na anissitena vatthabba’nti. Ahañcamhi nissayakaraṇīyo gilāno, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, gilānena bhikkhunā nissayaṃ alabhamānena anissitena vatthunti.
ཨཐ ཁོ ཏསྶ གིལཱནུཔཊྛཱཀསྶ བྷིཀྑུནོ ཨེཏདཧོསི – ‘‘བྷགཝཏཱ པཉྙཏྟཾ ‘ན ཨནིསྶིཏེན ཝཏྠབྦ’ནྟི། ཨཧཉྩམྷི ནིསྶཡཀརཎཱིཡོ, ཨཡཉྩ བྷིཀྑུ གིལཱནོ, ཀཐཾ ནུ ཁོ མཡཱ པཊིཔཛྫིཏབྦ’’ནྟི? བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, གིལཱནུཔཊྛཱཀེན བྷིཀྑུནཱ ནིསྶཡཾ ཨལབྷམཱནེན ཡཱཙིཡམཱནེན ཨནིསྶིཏེན ཝཏྠུནྟི།
Atha kho tassa gilānupaṭṭhākassa bhikkhuno etadahosi – ‘‘bhagavatā paññattaṃ ‘na anissitena vatthabba’nti. Ahañcamhi nissayakaraṇīyo, ayañca bhikkhu gilāno, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, gilānupaṭṭhākena bhikkhunā nissayaṃ alabhamānena yāciyamānena anissitena vatthunti.
ཏེན ཁོ པན སམཡེན ཨཉྙཏརོ བྷིཀྑུ ཨརཉྙེ ཝིཧརཏི། ཏསྶ ཙ ཏསྨིཾ སེནཱསནེ ཕཱསུ ཧོཏི། ཨཐ ཁོ ཏསྶ བྷིཀྑུནོ ཨེཏདཧོསི – ‘‘བྷགཝཏཱ པཉྙཏྟཾ ‘ན ཨནིསྶིཏེན ཝཏྠབྦ’ནྟི། ཨཧཉྩམྷི ནིསྶཡཀརཎཱིཡོ ཨརཉྙེ ཝིཧརཱམི, མཡ྄ཧཉྩ ཨིམསྨིཾ སེནཱསནེ ཕཱསུ ཧོཏི, ཀཐཾ ནུ ཁོ མཡཱ པཊིཔཛྫིཏབྦ’’ནྟི? བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཨཱརཉྙིཀེན བྷིཀྑུནཱ ཕཱསུཝིཧཱརཾ སལླཀྑེནྟེན ནིསྶཡཾ ཨལབྷམཱནེན ཨནིསྶིཏེན ཝཏྠུཾ – ཡདཱ པཏིརཱུཔོ ནིསྶཡདཱཡཀོ ཨཱགཙྪིསྶཏི, ཏདཱ ཏསྶ ནིསྶཱཡ ཝསིསྶཱམཱིཏི།
Tena kho pana samayena aññataro bhikkhu araññe viharati. Tassa ca tasmiṃ senāsane phāsu hoti. Atha kho tassa bhikkhuno etadahosi – ‘‘bhagavatā paññattaṃ ‘na anissitena vatthabba’nti. Ahañcamhi nissayakaraṇīyo araññe viharāmi, mayhañca imasmiṃ senāsane phāsu hoti, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, āraññikena bhikkhunā phāsuvihāraṃ sallakkhentena nissayaṃ alabhamānena anissitena vatthuṃ – yadā patirūpo nissayadāyako āgacchissati, tadā tassa nissāya vasissāmīti.
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / གམིཀཱདིནིསྶཡཝཏྠུཀཐཱ • Gamikādinissayavatthukathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / གམིཀཱདིནིསྶཡཝཏྠུཀཐཱཝཎྞནཱ • Gamikādinissayavatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / གམིཀཱདིནིསྶཡཝཏྠུཀཐཱཝཎྞནཱ • Gamikādinissayavatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / གམིཀཱདིནིསྶཡཝཏྠུཀཐཱཝཎྞནཱ • Gamikādinissayavatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༥༩. གམིཀཱདིནིསྶཡཝཏྠུཀཐཱ • 59. Gamikādinissayavatthukathā
