| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
3. க³மிகவத்தகதா²
3. Gamikavattakathā
360. தேன கோ² பன ஸமயேன க³மிகா பி⁴க்கூ² தா³ருப⁴ண்ட³ங் மத்திகாப⁴ண்ட³ங் அப்படிஸாமெத்வா த்³வாரவாதபானங் விவரித்வா ஸேனாஸனங் அனாபுச்சா² பக்கமந்தி. தா³ருப⁴ண்ட³ங் மத்திகாப⁴ண்ட³ங் நஸ்ஸதி. ஸேனாஸனங் அகு³த்தங் ஹோதி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம க³மிகா பி⁴க்கூ² தா³ருப⁴ண்ட³ங் மத்திகாப⁴ண்ட³ங் அப்படிஸாமெத்வா த்³வாரவாதபானங் விவரித்வா ஸேனாஸனங் அனாபுச்சா² பக்கமிஸ்ஸந்தி! தா³ருப⁴ண்ட³ங் மத்திகாப⁴ண்ட³ங் நஸ்ஸதி. ஸேனாஸனங் அகு³த்தங் ஹோதீ’’தி. அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ஸச்சங் கிர, பி⁴க்க²வே…பே॰… ஸச்சங் ப⁴க³வாதி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி –
360. Tena kho pana samayena gamikā bhikkhū dārubhaṇḍaṃ mattikābhaṇḍaṃ appaṭisāmetvā dvāravātapānaṃ vivaritvā senāsanaṃ anāpucchā pakkamanti. Dārubhaṇḍaṃ mattikābhaṇḍaṃ nassati. Senāsanaṃ aguttaṃ hoti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma gamikā bhikkhū dārubhaṇḍaṃ mattikābhaṇḍaṃ appaṭisāmetvā dvāravātapānaṃ vivaritvā senāsanaṃ anāpucchā pakkamissanti! Dārubhaṇḍaṃ mattikābhaṇḍaṃ nassati. Senāsanaṃ aguttaṃ hotī’’ti. Atha kho te bhikkhū bhagavato etamatthaṃ ārocesuṃ…pe… saccaṃ kira, bhikkhave…pe… saccaṃ bhagavāti…pe… vigarahitvā…pe… dhammiṃ kathaṃ katvā bhikkhū āmantesi –
361. ‘‘தேன ஹி, பி⁴க்க²வே, க³மிகானங் பி⁴க்கூ²னங் வத்தங் பஞ்ஞபெஸ்ஸாமி யதா² க³மிகேஹி பி⁴க்கூ²ஹி ஸம்மா வத்திதப்³ப³ங். க³மிகேன, பி⁴க்க²வே, பி⁴க்கு²னா தா³ருப⁴ண்ட³ங் மத்திகாப⁴ண்ட³ங் படிஸாமெத்வா த்³வாரவாதபானங் த²கெத்வா ஸேனாஸனங் ஆபுச்சா² பக்கமிதப்³ப³ங் 1. ஸசே பி⁴க்கு² ந ஹோதி, ஸாமணேரோ ஆபுச்சி²தப்³போ³. ஸசே ஸாமணேரோ ந ஹோதி, ஆராமிகோ ஆபுச்சி²தப்³போ³. ஸசே ஆராமிகோ ந ஹோதி, உபாஸகோ ஆபுச்சி²தப்³போ³. ஸசே ந ஹோதி பி⁴க்கு² வா ஸாமணேரோ வா ஆராமிகோ வா உபாஸகோ வா, சதூஸு பாஸாணேஸு மஞ்சங் பஞ்ஞபெத்வா மஞ்சே மஞ்சங் ஆரோபெத்வா பீடே² பீட²ங் ஆரோபெத்வா ஸேனாஸனங் உபரி புஞ்ஜங் கரித்வா தா³ருப⁴ண்ட³ங் மத்திகாப⁴ண்ட³ங் படிஸாமெத்வா த்³வாரவாதபானங் த²கெத்வா பக்கமிதப்³ப³ங். ஸசே விஹாரோ ஓவஸ்ஸதி, ஸசே உஸ்ஸஹதி, சா²தே³தப்³போ³, உஸ்ஸுகங் வா காதப்³ப³ங் – ‘கிந்தி நு கோ² விஹாரோ சா²தி³யேதா²’தி. ஏவஞ்சேதங் லபே⁴த², இச்சேதங் குஸலங். நோ சே லபே⁴த², யோ தே³ஸோ அனோவஸ்ஸகோ ஹோதி, தத்த² சதூஸு பாஸாணேஸு மஞ்சங் பஞ்ஞபெத்வா மஞ்சே மஞ்சங் ஆரோபெத்வா பீடே² பீட²ங் ஆரோபெத்வா ஸேனாஸனங் உபரி புஞ்ஜங் கரித்வா தா³ருப⁴ண்ட³ங் மத்திகாப⁴ண்ட³ங் படிஸாமெத்வா த்³வாரவாதபானங் த²கெத்வா பக்கமிதப்³ப³ங். ஸசே ஸப்³போ³ விஹாரோ ஓவஸ்ஸதி, ஸசே உஸ்ஸஹதி, ஸேனாஸனங் கா³மங் அதிஹரிதப்³ப³ங், உஸ்ஸுகங் வா காதப்³ப³ங் – ‘கிந்தி நு கோ² ஸேனாஸனங் கா³மங் அதிஹரியேதா²’தி. ஏவஞ்சேதங் லபே⁴த², இச்சேதங் குஸலங். நோ சே லபே⁴த², அஜ்ஜோ²காஸே சதூஸு பாஸாணேஸு மஞ்சங் பஞ்ஞபெத்வா மஞ்சே மஞ்சங் ஆரோபெத்வா பீடே² பீட²ங் ஆரோபெத்வா ஸேனாஸனங் உபரி புஞ்ஜங் கரித்வா தா³ருப⁴ண்ட³ங் மத்திகாப⁴ண்ட³ங் படிஸாமெத்வா திணேன வா பண்ணேன வா படிச்சா²தெ³த்வா பக்கமிதப்³ப³ங் – அப்பேவ நாம அங்கா³னிபி ஸேஸெய்யுந்தி. இத³ங் கோ², பி⁴க்க²வே, க³மிகானங் பி⁴க்கூ²னங் வத்தங் யதா² க³மிகேஹி பி⁴க்கூ²ஹி ஸம்மா வத்திதப்³ப³’’ந்தி.
361. ‘‘Tena hi, bhikkhave, gamikānaṃ bhikkhūnaṃ vattaṃ paññapessāmi yathā gamikehi bhikkhūhi sammā vattitabbaṃ. Gamikena, bhikkhave, bhikkhunā dārubhaṇḍaṃ mattikābhaṇḍaṃ paṭisāmetvā dvāravātapānaṃ thaketvā senāsanaṃ āpucchā pakkamitabbaṃ 2. Sace bhikkhu na hoti, sāmaṇero āpucchitabbo. Sace sāmaṇero na hoti, ārāmiko āpucchitabbo. Sace ārāmiko na hoti, upāsako āpucchitabbo. Sace na hoti bhikkhu vā sāmaṇero vā ārāmiko vā upāsako vā, catūsu pāsāṇesu mañcaṃ paññapetvā mañce mañcaṃ āropetvā pīṭhe pīṭhaṃ āropetvā senāsanaṃ upari puñjaṃ karitvā dārubhaṇḍaṃ mattikābhaṇḍaṃ paṭisāmetvā dvāravātapānaṃ thaketvā pakkamitabbaṃ. Sace vihāro ovassati, sace ussahati, chādetabbo, ussukaṃ vā kātabbaṃ – ‘kinti nu kho vihāro chādiyethā’ti. Evañcetaṃ labhetha, iccetaṃ kusalaṃ. No ce labhetha, yo deso anovassako hoti, tattha catūsu pāsāṇesu mañcaṃ paññapetvā mañce mañcaṃ āropetvā pīṭhe pīṭhaṃ āropetvā senāsanaṃ upari puñjaṃ karitvā dārubhaṇḍaṃ mattikābhaṇḍaṃ paṭisāmetvā dvāravātapānaṃ thaketvā pakkamitabbaṃ. Sace sabbo vihāro ovassati, sace ussahati, senāsanaṃ gāmaṃ atiharitabbaṃ, ussukaṃ vā kātabbaṃ – ‘kinti nu kho senāsanaṃ gāmaṃ atihariyethā’ti. Evañcetaṃ labhetha, iccetaṃ kusalaṃ. No ce labhetha, ajjhokāse catūsu pāsāṇesu mañcaṃ paññapetvā mañce mañcaṃ āropetvā pīṭhe pīṭhaṃ āropetvā senāsanaṃ upari puñjaṃ karitvā dārubhaṇḍaṃ mattikābhaṇḍaṃ paṭisāmetvā tiṇena vā paṇṇena vā paṭicchādetvā pakkamitabbaṃ – appeva nāma aṅgānipi seseyyunti. Idaṃ kho, bhikkhave, gamikānaṃ bhikkhūnaṃ vattaṃ yathā gamikehi bhikkhūhi sammā vattitabba’’nti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / க³மிகவத்தகதா² • Gamikavattakathā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. க³மிகவத்தகதா² • 3. Gamikavattakathā
