| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
2. க³ணபோ⁴ஜனஸிக்கா²பத³ங்
2. Gaṇabhojanasikkhāpadaṃ
209. து³தியே பஹீனலாப⁴ஸக்காரஸ்ஸ ஹேதுங் த³ஸ்ஸெந்தோ ஆஹ ‘‘ஸோ கிரா’’திஆதி³. ஸோதி தே³வத³த்தோ. ‘‘அஹோஸீ’’தி ச ‘‘பாகடோ ஜாதோ’’தி ச யோஜேதப்³போ³. அஜாதஸத்துனாதி அஜாதஸ்ஸேயேவ பிதுராஜஸ்ஸ ஸத்துபா⁴வதோ அஜாதஸத்துனா, ‘‘மாராபெத்வா’’திபதே³ காரிதகம்மங். ராஜானந்தி பி³ம்பி³ஸாரராஜங், ‘‘மாராபெத்வா’’திபதே³ தா⁴துகம்மங். அபி⁴மாரேதி அபி⁴னிலீயித்வா ப⁴க³வதோ மாரணத்தா²ய பேஸிதே த⁴னுத⁴ரே. கூ³ள்ஹபடிச்ச²ன்னோதி கு³ஹிதோ ஹுத்வா படிச்ச²ன்னோ. பரிகதா²யாதி பரிகு³ஹனாய கதா²ய. ‘‘ராஜானம்பீ’’திபத³ங் ‘‘மாராபேஸீ’’திபதே³ தா⁴துகம்மங். பவிஜ்ஜீ²தி பவட்டேஸி. ததோதி ததோ வுத்ததோ பரங் உட்ட²ஹிங்ஸூதி ஸம்ப³ந்தோ⁴. நக³ரே நிவஸந்தீதி நாக³ரா. ராஜாதி அஜாதஸத்துராஜா. ஸாஸனகண்டகந்திஸாஸனஸ்ஸ கண்டகஸதி³ஸத்தா ஸாஸனகண்டகங். ததோதி நீஹரதோ. உபட்டா²னம்பீதி உபட்டா²னம்பி, உபட்டா²னத்தா²யபி வா. அஞ்ஞேபீதி ராஜதோ அஞ்ஞேபி. அஸ்ஸாதி தே³வத³த்தஸ்ஸ. கிஞ்சி கா²த³னீயபோ⁴ஜனீயங் ‘‘தா³தப்³ப³’’ந்தி இமினா யோஜேதப்³ப³ங். கிஞ்சி வா அபி⁴வாத³னாதி³ ‘‘காதப்³ப³’’ந்தி இமினா ஸம்ப³ந்தோ⁴. குலேஸு விஞ்ஞாபெத்வா பு⁴ஞ்ஜனஸ்ஸ ஹேதுங் த³ஸ்ஸெந்தோ ஆஹ ‘‘மா மே’’திஆதி³. போஸெந்தோ ஹுத்வா பு⁴ஞ்ஜதீதி ஸம்ப³ந்தோ⁴.
209. Dutiye pahīnalābhasakkārassa hetuṃ dassento āha ‘‘so kirā’’tiādi. Soti devadatto. ‘‘Ahosī’’ti ca ‘‘pākaṭo jāto’’ti ca yojetabbo. Ajātasattunāti ajātasseyeva piturājassa sattubhāvato ajātasattunā, ‘‘mārāpetvā’’tipade kāritakammaṃ. Rājānanti bimbisārarājaṃ, ‘‘mārāpetvā’’tipade dhātukammaṃ. Abhimāreti abhinilīyitvā bhagavato māraṇatthāya pesite dhanudhare. Gūḷhapaṭicchannoti guhito hutvā paṭicchanno. Parikathāyāti pariguhanāya kathāya. ‘‘Rājānampī’’tipadaṃ ‘‘mārāpesī’’tipade dhātukammaṃ. Pavijjhīti pavaṭṭesi. Tatoti tato vuttato paraṃ uṭṭhahiṃsūti sambandho. Nagare nivasantīti nāgarā. Rājāti ajātasatturājā. Sāsanakaṇṭakantisāsanassa kaṇṭakasadisattā sāsanakaṇṭakaṃ. Tatoti nīharato. Upaṭṭhānampīti upaṭṭhānampi, upaṭṭhānatthāyapi vā. Aññepīti rājato aññepi. Assāti devadattassa. Kiñci khādanīyabhojanīyaṃ ‘‘dātabba’’nti iminā yojetabbaṃ. Kiñci vā abhivādanādi ‘‘kātabba’’nti iminā sambandho. Kulesu viññāpetvā bhuñjanassa hetuṃ dassento āha ‘‘mā me’’tiādi. Posento hutvā bhuñjatīti sambandho.
211. ப⁴த்தங் அனதி⁴வாஸெந்தானங் கஸ்மா சீவரங் பரித்தங் உப்பஜ்ஜதீதி ஆஹ ‘‘ப⁴த்தங் அக³ண்ஹந்தான’’ந்திஆதி³.
211. Bhattaṃ anadhivāsentānaṃ kasmā cīvaraṃ parittaṃ uppajjatīti āha ‘‘bhattaṃ agaṇhantāna’’ntiādi.
212. சீவரகாரகே பி⁴க்கூ² ப⁴த்தேன கஸ்மா நிமந்தெந்தீதி ஆஹ ‘‘கா³மே’’திஆதி³.
212. Cīvarakārake bhikkhū bhattena kasmā nimantentīti āha ‘‘gāme’’tiādi.
215. நானாவேரஜ்ஜகேதி எத்த² ரஞ்ஞோ இத³ங் ரஜ்ஜங், விஸதி³ஸங் ரஜ்ஜங் விரஜ்ஜங், நானப்பகாரங் விரஜ்ஜங் நானாவிரஜ்ஜங். நானாவிரஜ்ஜேஹி ஆக³தா நானாவேரஜ்ஜகா. மஜ்ஜே² வுத்³தி⁴ ஹோதீதி ஆஹ ‘‘நானாவிதே⁴ஹி அஞ்ஞரஜ்ஜேஹி ஆக³தே’’தி. அஞ்ஞரஜ்ஜேஹீதி ராஜக³ஹதோ அஞ்ஞேஹி ரஜ்ஜேஹி. ரஞ்ஜிதப்³ப³ந்தி ரஞ்ஜந்தி வுத்தே நிக்³க³ஹிதஸ்ஸ அனாஸனங் ஸந்தா⁴ய வுத்தங் ‘‘நானாவேரஞ்ஜகேஇதிபி பாடோ²’’தி.
215.Nānāverajjaketi ettha rañño idaṃ rajjaṃ, visadisaṃ rajjaṃ virajjaṃ, nānappakāraṃ virajjaṃ nānāvirajjaṃ. Nānāvirajjehi āgatā nānāverajjakā. Majjhe vuddhi hotīti āha ‘‘nānāvidhehi aññarajjehi āgate’’ti. Aññarajjehīti rājagahato aññehi rajjehi. Rañjitabbanti rañjanti vutte niggahitassa anāsanaṃ sandhāya vuttaṃ ‘‘nānāverañjakeitipi pāṭho’’ti.
218. க³ணபோ⁴ஜனேதி க³ணஸ்ஸ போ⁴ஜனங் க³ணபோ⁴ஜனங், க³ணபோ⁴ஜனஸ்ஸ போ⁴ஜனங் க³ணபோ⁴ஜனங், தஸ்மிங் க³ணபோ⁴ஜனே பாசித்தியந்தி அத்தோ². ‘‘ரத்தூபரதோ’’திஆதீ³ஸு (தீ³॰ நி॰ 1.10; ம॰ நி॰ 1.293) விய ஏகஸ்ஸ போ⁴ஜனஸத்³த³ஸ்ஸ லோபோ த³ட்ட²ப்³போ³. நனு உபோஸதே² விய த்³வே தயோ க³ணோ நாமாதி ஆஹ ‘‘இத⁴ க³ணோ நாம சத்தாரோ’’திஆதி³. தேன த்³வே தயோ க³ணோ நாம ந ஹொந்தி, சத்தாரோ பன ஆதி³ங் கத்வா தது³த்தரி க³ணோ நாமாதி த³ஸ்ஸேதி. தங் பனேதந்தி எத்த² ஏதஸத்³தோ³ வசனாலங்காரோ த்³வீஸு ஸப்³ப³னாமேஸு புப்³ப³ஸ்ஸேவ யேபு⁴ய்யேன பதா⁴னத்தா. பஸவதீதி வட்³ட⁴தி, ஜாயதீதி அத்தோ². வேவசனேன வாதி ‘‘ப⁴த்தேன நிமந்தேமி, போ⁴ஜனேன நிமந்தேமீ’’தி பரியாயேன வா. பா⁴ஸந்தரேன வாதி மூலபா⁴ஸாதோ அஞ்ஞாய பா⁴ஸாய வா. ஏகதோ நிமந்திதா பி⁴க்கூ²தி ஸம்ப³ந்தோ⁴. ஹீதி ஸச்சங், யஸ்மா வா. பமாணந்தி காரணங். ‘‘சத்தாரோ’’தி லிங்க³விபல்லாஸங் கத்வா ‘‘விஹாரே’’திபதே³ன யோஜேதப்³ப³ங். டி²தேஸுயேவாதி பத³ங் நித்³தா⁴ரணஸமுதா³யோ. ஏகோ நிமந்திதோதி ஸம்ப³ந்தோ⁴.
218.Gaṇabhojaneti gaṇassa bhojanaṃ gaṇabhojanaṃ, gaṇabhojanassa bhojanaṃ gaṇabhojanaṃ, tasmiṃ gaṇabhojane pācittiyanti attho. ‘‘Rattūparato’’tiādīsu (dī. ni. 1.10; ma. ni. 1.293) viya ekassa bhojanasaddassa lopo daṭṭhabbo. Nanu uposathe viya dve tayo gaṇo nāmāti āha ‘‘idha gaṇo nāma cattāro’’tiādi. Tena dve tayo gaṇo nāma na honti, cattāro pana ādiṃ katvā taduttari gaṇo nāmāti dasseti. Taṃ panetanti ettha etasaddo vacanālaṅkāro dvīsu sabbanāmesu pubbasseva yebhuyyena padhānattā. Pasavatīti vaḍḍhati, jāyatīti attho. Vevacanena vāti ‘‘bhattena nimantemi, bhojanena nimantemī’’ti pariyāyena vā. Bhāsantarena vāti mūlabhāsāto aññāya bhāsāya vā. Ekato nimantitā bhikkhūti sambandho. Hīti saccaṃ, yasmā vā. Pamāṇanti kāraṇaṃ. ‘‘Cattāro’’ti liṅgavipallāsaṃ katvā ‘‘vihāre’’tipadena yojetabbaṃ. Ṭhitesuyevāti padaṃ niddhāraṇasamudāyo. Eko nimantitoti sambandho.
சத்தாரோ பி⁴க்கூ² விஞ்ஞாபெய்யுந்தி ஸம்ப³ந்தோ⁴. பாடேக்கந்தி பதிஏகஸ்ஸ பா⁴வோ பாடேக்கங், விஸுந்தி அத்தோ². ஏகதோ வா நானாதோ வா விஞ்ஞாபெய்யுந்தி ஸம்ப³ந்தோ⁴.
Cattāro bhikkhū viññāpeyyunti sambandho. Pāṭekkanti patiekassa bhāvo pāṭekkaṃ, visunti attho. Ekato vā nānāto vā viññāpeyyunti sambandho.
ச²விஸங்கா²ததோ பா³ஹிரசம்மதோ அப்³ப⁴ந்தரசம்மஸ்ஸ தூ²லத்தா ‘‘மஹாசம்மஸ்ஸா’’தி வுத்தங். பா²லங் ஏதேஸங் பாதா³னங் ஸஞ்ஜாதந்தி பா²லிதா, உப்பாதெ³ந்தீதி ஸம்ப³ந்தோ⁴. பஹடமத்தே ஸதீதி யோஜனா. லேஸேன கப்பந்தி பவத்தங் சித்தங் லேஸகப்பியங்.
Chavisaṅkhātato bāhiracammato abbhantaracammassa thūlattā ‘‘mahācammassā’’ti vuttaṃ. Phālaṃ etesaṃ pādānaṃ sañjātanti phālitā, uppādentīti sambandho. Pahaṭamatte satīti yojanā. Lesena kappanti pavattaṃ cittaṃ lesakappiyaṃ.
ஸுத்தஞ்சாதி ஸூசிபாஸபவேஸனஸுத்தஞ்ச. நனு விஸுங் சீவரதா³னஸமயோ விய சீவரகாரஸமயோபி அத்தி², கஸ்மா ‘‘யதா³ ததா³’’தி வுத்தந்தி ஆஹ ‘‘விஸுங் ஹீ’’திஆதி³. ஹீதி ஸச்சங், யஸ்மா வா. விஸுங் சீவரதா³னஸமயோ விய சீவரகாரஸமயோ நாம யஸ்மா நத்தி², தஸ்மா ‘‘யதா³ ததா³’’தி மயா வுத்தந்தி அதி⁴ப்பாயோ. தஸ்மா யோ பி⁴க்கு² கரோதி, தேன பு⁴ஞ்ஜிதப்³ப³ந்தி யோஜனா. ஸூசிவேட²னகோதி ஸிப்³ப³னத்தா²ய த்³வே பிலோதிகக²ண்டே³ ஸம்ப³ந்தி⁴த்வா ஸூசியா விஜ்ஜ²னகோ. விசாரேதீதி பஞ்சக²ண்ட³ஸத்தக²ண்டா³தி³வஸேன ஸங்வித³ஹதி. சி²ந்த³தீதி ஸத்த²கேன வா ஹத்தே²ன வா சி²ந்த³தி. மோக⁴ஸுத்தந்தி முய்ஹனங் மோகோ⁴, அத்த²தோ க³ஹேதப்³ப³ச²ட்டேதப்³ப³ட்டா²னே முய்ஹனசித்தங், தஸ்ஸ சி²ந்த³னங் ஸுத்தந்தி மோக⁴ஸுத்தங். ஆக³ந்துகபட்டந்தி து³பட்டசீவரே மூலபட்டஸ்ஸ உபரி ட²பிதபட்டங். பச்சாக³தந்தி பட்டசீவராதீ³ஸு லப்³ப⁴தி. ப³ந்த⁴தீதி மூலபட்டேன ஆக³ந்துகபட்டங். ப³ந்த⁴தி. அனுவாதந்தி சீவரங் அனுபரியாயித்வா வீயதி ப³ந்தீ⁴யதீதி அனுவாதங், தங் சி²ந்த³தி. க⁴ட்டேதீதி த்³வே அனுவாதந்தே அஞ்ஞமஞ்ஞங் ஸம்ப³ஜ்ஜ²தி. ஆரோபேதீதி சீவரஸ்ஸ உபரி ஆரோபேதி. தத்தா²தி சீவரே. ஸுத்தங் கரோதீதி ஸூசிபாஸபவேஸனஸுத்தங் வட்டேதி. வலேதீதி வட்டித்வா ஸுத்தவேட²னத³ண்ட³கே ஆவட்டேதி. பிப்ப²லிகந்தி ஸத்த²கங். தஞ்ஹி பியம்பி பா²லேதீதி பிப்ப²லி, ஸாயேவ பிப்ப²லிகந்தி கத்வா பிப்ப²லிகந்தி வுச்சதி, தங் நிஸேதி நிஸானங் கரோதீதி அத்தோ². யோ பன கதே²தி, ஏதங் ட²பெத்வாதி யோஜனா.
Suttañcāti sūcipāsapavesanasuttañca. Nanu visuṃ cīvaradānasamayo viya cīvarakārasamayopi atthi, kasmā ‘‘yadā tadā’’ti vuttanti āha ‘‘visuṃ hī’’tiādi. Hīti saccaṃ, yasmā vā. Visuṃ cīvaradānasamayo viya cīvarakārasamayo nāma yasmā natthi, tasmā ‘‘yadā tadā’’ti mayā vuttanti adhippāyo. Tasmā yo bhikkhu karoti, tena bhuñjitabbanti yojanā. Sūciveṭhanakoti sibbanatthāya dve pilotikakhaṇḍe sambandhitvā sūciyā vijjhanako. Vicāretīti pañcakhaṇḍasattakhaṇḍādivasena saṃvidahati. Chindatīti satthakena vā hatthena vā chindati. Moghasuttanti muyhanaṃ mogho, atthato gahetabbachaṭṭetabbaṭṭhāne muyhanacittaṃ, tassa chindanaṃ suttanti moghasuttaṃ. Āgantukapaṭṭanti dupaṭṭacīvare mūlapaṭṭassa upari ṭhapitapaṭṭaṃ. Paccāgatanti paṭṭacīvarādīsu labbhati. Bandhatīti mūlapaṭṭena āgantukapaṭṭaṃ. Bandhati. Anuvātanti cīvaraṃ anupariyāyitvā vīyati bandhīyatīti anuvātaṃ, taṃ chindati. Ghaṭṭetīti dve anuvātante aññamaññaṃ sambajjhati. Āropetīti cīvarassa upari āropeti. Tatthāti cīvare. Suttaṃ karotīti sūcipāsapavesanasuttaṃ vaṭṭeti. Valetīti vaṭṭitvā suttaveṭhanadaṇḍake āvaṭṭeti. Pipphalikanti satthakaṃ. Tañhi piyampi phāletīti pipphali, sāyeva pipphalikanti katvā pipphalikanti vuccati, taṃ niseti nisānaṃ karotīti attho. Yo pana katheti, etaṃ ṭhapetvāti yojanā.
அத்³தா⁴னமக்³க³ஸ்ஸ த்³விகா³வுதத்தா ‘‘அத்³த⁴யோஜனப்³ப⁴ந்தரே கா³வுதே’’தி வுத்தங். அபி⁴ரூள்ஹேன பு⁴ஞ்ஜிதப்³ப³ந்தி ஸம்ப³ந்தோ⁴. யத்தா²தி யஸ்மிங் காலே. ‘‘ஸன்னிபதந்தீ’’தி ப³ஹுகத்துவஸேன வுத்தங். அகுஸலங் பரிவஜ்ஜேதீதி பரிப்³பா³ஜகோ , பப்³ப³ஜ்ஜவேஸங் வா பரிக்³க³ஹெத்வா வஜதி க³ச்ச²தி பவத்ததீதி பரிப்³பா³ஜகோ. வினா பா⁴வபச்சயேன பா⁴வத்த²ஸ்ஸ ஞாதப்³ப³தோ பரிப்³பா³ஜகபா⁴வோ பரிப்³பா³ஜகோ, தங் ஸமாபன்னோதி பரிப்³பா³ஜகஸமாபன்னோ. அத² வா பரிப்³பா³ஜகேஸு ஸமாபன்னோ பரியாபன்னோதி பரிப்³பா³ஜகஸமாபன்னோ. ‘‘ஏதேஸ’’ந்திபத³ங் ‘‘யேன கேனசீ’’திபதே³ நித்³தா⁴ரணஸமுதா³யோ.
Addhānamaggassa dvigāvutattā ‘‘addhayojanabbhantare gāvute’’ti vuttaṃ. Abhirūḷhena bhuñjitabbanti sambandho. Yatthāti yasmiṃ kāle. ‘‘Sannipatantī’’ti bahukattuvasena vuttaṃ. Akusalaṃ parivajjetīti paribbājako, pabbajjavesaṃ vā pariggahetvā vajati gacchati pavattatīti paribbājako. Vinā bhāvapaccayena bhāvatthassa ñātabbato paribbājakabhāvo paribbājako, taṃ samāpannoti paribbājakasamāpanno. Atha vā paribbājakesu samāpanno pariyāpannoti paribbājakasamāpanno. ‘‘Etesa’’ntipadaṃ ‘‘yena kenacī’’tipade niddhāraṇasamudāyo.
220. யேபி பி⁴க்கூ² பு⁴ஞ்ஜந்தீதி ஸம்ப³ந்தோ⁴. தத்தா²தி ‘‘த்³வே தயோ ஏகதோ’’திவசனே. அனிமந்திதோ சதுத்தோ² யஸ்ஸ சதுக்கஸ்ஸாதி அனிமந்திதசதுத்த²ங், அனிமந்திதேன வா சதுத்த²ங் அனிமந்திதசதுத்த²ங். ஏஸேவ நயோ அஞ்ஞேஸுபி சதுத்தே²ஸு. இதா⁴தி இமஸ்மிங் ஸாஸனே. நிமந்தேதீதி அகப்பியனிமந்தனேன நிமந்தேதி. தேஸூதி சதூஸு பி⁴க்கூ²ஸு. ஸோதி உபாஸகோ. அஞ்ஞந்தி நாக³தபி⁴க்கு²தோ அஞ்ஞங், நிமந்திதபி⁴க்கு²தோ வா. தங்க²ணப்பத்தந்தி தஸ்மிங் புச்ச²னகத²னக்க²ணே பத்தங். ஹீதி வித்தா²ரோ. தத்தா²தி தஸ்மிங் டா²னே, கே³ஹே வா. தேஹீதி கரணபூ⁴தேஹி பி⁴க்கூ²ஹி.
220. Yepi bhikkhū bhuñjantīti sambandho. Tatthāti ‘‘dve tayo ekato’’tivacane. Animantito catuttho yassa catukkassāti animantitacatutthaṃ, animantitena vā catutthaṃ animantitacatutthaṃ. Eseva nayo aññesupi catutthesu. Idhāti imasmiṃ sāsane. Nimantetīti akappiyanimantanena nimanteti. Tesūti catūsu bhikkhūsu. Soti upāsako. Aññanti nāgatabhikkhuto aññaṃ, nimantitabhikkhuto vā. Taṅkhaṇappattanti tasmiṃ pucchanakathanakkhaṇe pattaṃ. Hīti vitthāro. Tatthāti tasmiṃ ṭhāne, gehe vā. Tehīti karaṇabhūtehi bhikkhūhi.
ஸோதி பிண்ட³பாதிகோ. அனாக³ச்ச²ந்தம்பீதி ஸயங் ந ஆக³ச்ச²ந்தம்பி. லச்ச²தா²தி லபி⁴ஸ்ஸத².
Soti piṇḍapātiko. Anāgacchantampīti sayaṃ na āgacchantampi. Lacchathāti labhissatha.
ஸோபீதி ஸாமணேரோபி, ந பிண்ட³பாதிகோயேவாதி அத்தோ².
Sopīti sāmaṇeropi, na piṇḍapātikoyevāti attho.
தத்தா²தி கி³லானசதுத்தே², தேஸு சதூஸு வா. கி³லானோ இதரேஸங் பன க³ணபூரகோ ஹோதீதி யோஜனா.
Tatthāti gilānacatutthe, tesu catūsu vā. Gilāno itaresaṃ pana gaṇapūrako hotīti yojanā.
க³ணபூரகத்தாதி ஸமயலத்³த⁴ஸ்ஸ க³ணபூரகத்தா. சதுக்கானீதி சீவரதா³னசதுத்த²ங் சீவரகாரசதுத்த²ங் அத்³தா⁴னக³மனசதுத்த²ங் நாவாபி⁴ருஹனசதுத்த²ங் மஹாஸமயசதுத்த²ங், ஸமணப⁴த்தசதுத்த²ந்தி ச² சதுக்கானி. புரிமேஹி மிஸ்ஸெத்வா ஏகாத³ஸ சதுக்கானி வேதி³தப்³பா³னி. ஏகோ பண்டி³தோ பி⁴க்கு² நிஸின்னோ ஹோதீதி ஸம்ப³ந்தோ⁴. தேஸூதி தீஸு பி⁴க்கூ²ஸு, க³தேஸு க³ச்ச²தீதி யோஜனா. பு⁴த்வா ஆக³ந்த்வா டி²தேஸுபி அனாபத்தியேவ. கஸ்மா ஸப்³பே³ஸங் அனாபத்தி, நனு சத்தாரோ பி⁴க்கூ² ஏகதோ க³ண்ஹந்தீதி ஆஹ ‘‘பஞ்சன்னங் ஹீ’’திஆதி³. ஹீதி ஸச்சங், யஸ்மா வா. போ⁴ஜனானங்யேவாதி ந யாகு³க²ஜ்ஜகப²லாப²லாதீ³னங். தானி சாதி யேஹி போ⁴ஜனேஹி விஸங்கேதங் நத்தி², தானி ச போ⁴ஜனானி. தேஹீதி சதூஹி பி⁴க்கூ²ஹி . தானீதி யாகு³ஆதீ³னி. இதீதி தஸ்மா அனாபத்திந்தி யோஜனா.
Gaṇapūrakattāti samayaladdhassa gaṇapūrakattā. Catukkānīti cīvaradānacatutthaṃ cīvarakāracatutthaṃ addhānagamanacatutthaṃ nāvābhiruhanacatutthaṃ mahāsamayacatutthaṃ, samaṇabhattacatutthanti cha catukkāni. Purimehi missetvā ekādasa catukkāni veditabbāni. Eko paṇḍito bhikkhu nisinno hotīti sambandho. Tesūti tīsu bhikkhūsu, gatesu gacchatīti yojanā. Bhutvā āgantvā ṭhitesupi anāpattiyeva. Kasmā sabbesaṃ anāpatti, nanu cattāro bhikkhū ekato gaṇhantīti āha ‘‘pañcannaṃ hī’’tiādi. Hīti saccaṃ, yasmā vā. Bhojanānaṃyevāti na yāgukhajjakaphalāphalādīnaṃ. Tāni cāti yehi bhojanehi visaṅketaṃ natthi, tāni ca bhojanāni. Tehīti catūhi bhikkhūhi . Tānīti yāguādīni. Itīti tasmā anāpattinti yojanā.
கோசி பேஸிதோ அபண்டி³தமனுஸ்ஸோ வத³தீதி யோஜனா. கத்துகாமேன பேஸிதோதி ஸம்ப³ந்தோ⁴. ப⁴த்தங் க³ண்ஹதா²தி வாதி வாஸத்³தோ³ ‘‘ஓத³னங் க³ண்ஹத², போ⁴ஜனங் க³ண்ஹத², அன்னங் க³ண்ஹத², குரங் க³ண்ஹதா²’’தி வசனானிபி ஸங்க³ண்ஹாதி. நிமந்தனங் ஸாதி³யந்தீதி நேமந்தனிகா. பிண்ட³பாதே து⁴தங்கே³ நியுத்தாதி பிண்ட³பாதிகா. புனதி³வஸே ப⁴ந்தேதி வுத்தேதி யோஜனா. ஹரித்வாதி அபனெத்வா. ததோதி ததோ வத³னதோ பரந்தி ஸம்ப³ந்தோ⁴. விக்கே²பந்தி விவித⁴ங் கே²பங். தேதி அஸுகா ச அஸுகா ச கா³மிகா. ப⁴ந்தேதி வுத்தேதி யோஜனா. ஸோபீதி அபண்டி³தமனுஸ்ஸோபி, ந கா³மிகாயேவாதி அத்தோ². கஸ்மா ந லபா⁴மி ப⁴ந்தேதி வுத்தேதி யோஜனா. ஏவங் ‘‘கத²ங் நிமந்தேஸுங் ப⁴ந்தே’’தி எத்தா²பி. ததோதி தஸ்மா காரணா. ஏஸாதி ஏஸோ கா³மோ. தந்தி பூ⁴மத்தே² சேதங் உபயோக³வசனங், தஸ்மிங் கா³மே சரதா²தி ஹி அத்தோ². கிங் ஏதேனாதி ஏதேன புச்ச²னேன கிங் பயோஜனங். எத்தா²தி புச்ச²னே. மா பமஜ்ஜித்தா²தி வத³தீதி ஸம்ப³ந்தோ⁴. து³தியதி³வஸேதி நிமந்தனதி³வஸதோ து³தியதி³வஸே. து⁴ரகா³மேதி பதா⁴னகா³மே, அந்திககா³மே வா. பா⁴வோ நாம கிரியத்தா ஏகோயேவ ஹோதி, தஸ்மா கத்தாரங் வா கம்மங் வா ஸம்ப³ந்த⁴ங் வா அபெக்கி²த்வா ப³ஹுவசனேன ந ப⁴விதப்³ப³ங், தேன வுத்தங் ‘‘ந து³ப்³ப³சேஹி ப⁴விதப்³ப³’’ந்தி. தேஸூதி கா³மிகேஸு போ⁴ஜெந்தேஸூதி ஸம்ப³ந்தோ⁴. அஸனஸாலாயந்தி போ⁴ஜனஸாலாயங். ஸா ஹி அஸதி பு⁴ஞ்ஜதி எத்தா²தி அஸனா, ஸலந்தி பவிஸந்தி அஸ்ஸந்தி ஸாலா, அஸனா ச ஸா ஸாலாசேதி அஸனஸாலாதி அத்தே²ன ‘‘அஸனஸாலா’’தி வுச்சதி.
Koci pesito apaṇḍitamanusso vadatīti yojanā. Kattukāmena pesitoti sambandho. Bhattaṃ gaṇhathāti vāti vāsaddo ‘‘odanaṃ gaṇhatha, bhojanaṃ gaṇhatha, annaṃ gaṇhatha, kuraṃ gaṇhathā’’ti vacanānipi saṅgaṇhāti. Nimantanaṃ sādiyantīti nemantanikā. Piṇḍapāte dhutaṅge niyuttāti piṇḍapātikā. Punadivase bhanteti vutteti yojanā. Haritvāti apanetvā. Tatoti tato vadanato paranti sambandho. Vikkhepanti vividhaṃ khepaṃ. Teti asukā ca asukā ca gāmikā. Bhanteti vutteti yojanā. Sopīti apaṇḍitamanussopi, na gāmikāyevāti attho. Kasmā na labhāmi bhanteti vutteti yojanā. Evaṃ ‘‘kathaṃ nimantesuṃ bhante’’ti etthāpi. Tatoti tasmā kāraṇā. Esāti eso gāmo. Tanti bhūmatthe cetaṃ upayogavacanaṃ, tasmiṃ gāme carathāti hi attho. Kiṃ etenāti etena pucchanena kiṃ payojanaṃ. Etthāti pucchane. Mā pamajjitthāti vadatīti sambandho. Dutiyadivaseti nimantanadivasato dutiyadivase. Dhuragāmeti padhānagāme, antikagāme vā. Bhāvo nāma kiriyattā ekoyeva hoti, tasmā kattāraṃ vā kammaṃ vā sambandhaṃ vā apekkhitvā bahuvacanena na bhavitabbaṃ, tena vuttaṃ ‘‘na dubbacehi bhavitabba’’nti. Tesūti gāmikesu bhojentesūti sambandho. Asanasālāyanti bhojanasālāyaṃ. Sā hi asati bhuñjati etthāti asanā, salanti pavisanti assanti sālā, asanā ca sā sālāceti asanasālāti atthena ‘‘asanasālā’’ti vuccati.
அத² பனாதி ததோ அஞ்ஞதா² பன. அபாதா³னத்தோ² ஹி அத²ஸத்³தோ³. தத்த² தத்தா²தி தஸ்மிங் தஸ்மிங் டா²னே அந்தரவீதி²ஆதீ³ஸூதி அத்தோ². படிகச்சேவாதி பட²மங் கத்வா ஏவ. பி⁴க்கூ²ஸு கா³மதோ அனிக்க²ந்தேஸு பகே³வாதி வுத்தங் ஹோதி. ந வட்டதீதி ‘‘ப⁴த்தங் க³ண்ஹதா²’’தி பஹிணத்தா ந வட்டதி. யே பன மனுஸ்ஸா போ⁴ஜெந்தீதி ஸம்ப³ந்தோ⁴. நிவத்ததா²தி வுத்தபதே³தி ‘‘நிவத்ததா²’’தி வுத்தே கிரியாபதே³. யஸ்ஸ கஸ்ஸசி ஹோதீதி யஸ்ஸ கஸ்ஸசி அத்தா²ய ஹோதீதி யோஜனா. நிவத்திதுங் வட்டதீதி ‘‘ப⁴த்தங் க³ண்ஹதா²’’தி அவுத்தத்தா நிவத்திதுங் வட்டதி. ஸம்ப³ந்த⁴ங் கத்வாதி ‘‘நிவத்தத² ப⁴ந்தே’’தி ப⁴ந்தேஸத்³தே³ன அப்³யவஹிதங் கத்வா. நிஸீத³த² ப⁴ந்தே, ப⁴த்தங் க³ண்ஹதா²தி ப⁴ந்தேஸத்³தே³ன ப்³யவஹிதங் கத்வா வுத்தே ‘‘நிஸீத³தா²’’திபதே³ நிஸீதி³துங் வட்டதி. அத² ப⁴ந்தேஸத்³தே³ன ப்³யவஹிதங் அகத்வா ‘‘நிஸீத³த², ப⁴த்தங் க³ண்ஹதா²’’தி ஸம்ப³ந்த⁴ங் கத்வா வுத்தே நிஸீதி³துங் வட்டதி. இச்சேதங் நயங் அதிதி³ஸதி ‘‘ஏஸேவ நயோ’’திஇமினாதி. து³தியங்.
Atha panāti tato aññathā pana. Apādānattho hi athasaddo. Tattha tatthāti tasmiṃ tasmiṃ ṭhāne antaravīthiādīsūti attho. Paṭikaccevāti paṭhamaṃ katvā eva. Bhikkhūsu gāmato anikkhantesu pagevāti vuttaṃ hoti. Na vaṭṭatīti ‘‘bhattaṃ gaṇhathā’’ti pahiṇattā na vaṭṭati. Ye pana manussā bhojentīti sambandho. Nivattathāti vuttapadeti ‘‘nivattathā’’ti vutte kiriyāpade. Yassakassacihotīti yassa kassaci atthāya hotīti yojanā. Nivattituṃ vaṭṭatīti ‘‘bhattaṃ gaṇhathā’’ti avuttattā nivattituṃ vaṭṭati. Sambandhaṃ katvāti ‘‘nivattatha bhante’’ti bhantesaddena abyavahitaṃ katvā. Nisīdatha bhante, bhattaṃ gaṇhathāti bhantesaddena byavahitaṃ katvā vutte ‘‘nisīdathā’’tipade nisīdituṃ vaṭṭati. Atha bhantesaddena byavahitaṃ akatvā ‘‘nisīdatha, bhattaṃ gaṇhathā’’ti sambandhaṃ katvā vutte nisīdituṃ vaṭṭati. Iccetaṃ nayaṃ atidisati ‘‘eseva nayo’’tiimināti. Dutiyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. க³ணபோ⁴ஜனஸிக்கா²பத³வண்ணனா • 2. Gaṇabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. க³ணபோ⁴ஜனஸிக்கா²பத³வண்ணனா • 2. Gaṇabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. க³ணபோ⁴ஜனஸிக்கா²பத³வண்ணனா • 2. Gaṇabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. க³ணபோ⁴ஜனஸிக்கா²பத³வண்ணனா • 2. Gaṇabhojanasikkhāpadavaṇṇanā
