| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
2. க³ணபோ⁴ஜனஸிக்கா²பத³வண்ணனா
2. Gaṇabhojanasikkhāpadavaṇṇanā
க³ணபோ⁴ஜனேதி க³ணேன லத்³த⁴த்தா க³ணஸ்ஸ ஸந்தகே போ⁴ஜனே. தேனாஹ ‘‘க³ணஸ்ஸ போ⁴ஜனே’’தி. நனு செத்த² ‘‘க³ணஸ்ஸ போ⁴ஜனே’’தி வுச்சதி, ஸோ ச கோ² க³ணோ ‘‘கத்த²சி த்³வீஹி, கத்த²சி தீஹீ’’திஆதி³னா அனேகதா⁴ அதி⁴ப்பேதோ, இத⁴ கதிஹீதி ஆஹ ‘‘இத⁴ சா’’திஆதி³. தங் பனேதங் க³ணபோ⁴ஜனங் த்³வீஹி பகாரேஹி பஸவதி நிமந்தனதோ வா விஞ்ஞத்திதோ வாதி ஆஹ ‘‘தேஸங் நிமந்தனதோ வா’’திஆதி³. தத்த² நிமந்தனதோ வாதி அகப்பியனிமந்தனதோ வா. ஓத³னாதீ³னங் பஞ்சன்னந்தி ஓத³னஸத்துகும்மாஸமச்ச²மங்ஸானங் பஞ்சன்னங்.
Gaṇabhojaneti gaṇena laddhattā gaṇassa santake bhojane. Tenāha ‘‘gaṇassa bhojane’’ti. Nanu cettha ‘‘gaṇassa bhojane’’ti vuccati, so ca kho gaṇo ‘‘katthaci dvīhi, katthaci tīhī’’tiādinā anekadhā adhippeto, idha katihīti āha ‘‘idha cā’’tiādi. Taṃ panetaṃ gaṇabhojanaṃ dvīhi pakārehi pasavati nimantanato vā viññattito vāti āha ‘‘tesaṃ nimantanato vā’’tiādi. Tattha nimantanato vāti akappiyanimantanato vā. Odanādīnaṃ pañcannanti odanasattukummāsamacchamaṃsānaṃ pañcannaṃ.
‘‘ஓத³னேன நிமந்தேமி, ஓத³னங் மே க³ண்ஹதா²’’திஆதி³னா நயேன யேன கேனசி வேவசனேன வா பா⁴ஸந்தரேன வா பஞ்சன்னங் போ⁴ஜனானங் நாமங் க³ஹெத்வா நிமந்தேதீதி ஸம்ப³ந்தோ⁴. சத்தாரோதி ஏகட்டா²னே வா நானாட்டா²னேஸு வா டி²தே சத்தாரோ பி⁴க்கூ². லக்க²ணவசனஞ்சேதங், தஸ்மா சத்தாரோ வா ததோ வா அதி⁴கே பி⁴க்கூ²தி அத்தோ². வேவசனேன வாதி ப⁴த்தஅன்னாதி³பரியாயஸத்³தே³ன வா. பா⁴ஸந்தரேன வாதி அந்த⁴த³மிளாதி³பா⁴ஸந்தரேன வா. பஞ்சன்னங் போ⁴ஜனானங் நாமங் க³ஹெத்வாதி பஞ்சன்னங் போ⁴ஜனானங் அஞ்ஞதரஸ்ஸ நாமங் க³ஹெத்வா. ஓத³னேன நிமந்தேமீதி தும்ஹே ப⁴ந்தே ஓத³னேன நிமந்தேமி. ஆதி³ஸத்³தே³ன ‘‘ஆகங்க²த² ஓலோகேத² அதி⁴வாஸேத² படிமானேத², ஸத்துனா நிமந்தேமி, ஸத்துங் மே க³ண்ஹத² ஆகங்க²த² ஓலோகேத² அதி⁴வாஸேத² படிமானேதா²’’திஆதீ³னங் (பாசி॰ அட்ட²॰ 217-218) க³ஹணங். ஏகதோ வாதி ஏகத்த² டி²தே வா நிஸின்னே வா பி⁴க்கூ² தி³ஸ்வா ‘‘தும்ஹே, ப⁴ந்தே, ஓத³னேன நிமந்தேமீ’’திஆதி³னா ஏவங் ஏகதோ நிமந்திதா. நானாதோ வா நிமந்திதாதி சத்தாரி பரிவேணானி வா விஹாரே வா க³ந்த்வா நானாதோ வா நிமந்திதா. ஏகட்டா²னே டி²தேஸுயேவ வா ஏகோ புத்தேன, ஏகோ பிதராதி ஏவம்பி நிமந்திதா நானாதோயேவ நிமந்திதா நாம ஹொந்தி. ஏகதோ க³ண்ஹந்திதி அஞ்ஞமஞ்ஞஸ்ஸ த்³வாத³ஸஹத்தூ²பசாரே டி²தா க³ண்ஹந்தி.
‘‘Odanena nimantemi, odanaṃ me gaṇhathā’’tiādinā nayena yena kenaci vevacanena vā bhāsantarena vā pañcannaṃ bhojanānaṃ nāmaṃ gahetvā nimantetīti sambandho. Cattāroti ekaṭṭhāne vā nānāṭṭhānesu vā ṭhite cattāro bhikkhū. Lakkhaṇavacanañcetaṃ, tasmā cattāro vā tato vā adhike bhikkhūti attho. Vevacanena vāti bhattaannādipariyāyasaddena vā. Bhāsantarena vāti andhadamiḷādibhāsantarena vā. Pañcannaṃ bhojanānaṃ nāmaṃ gahetvāti pañcannaṃ bhojanānaṃ aññatarassa nāmaṃ gahetvā. Odanena nimantemīti tumhe bhante odanena nimantemi. Ādisaddena ‘‘ākaṅkhatha oloketha adhivāsetha paṭimānetha, sattunā nimantemi, sattuṃ me gaṇhatha ākaṅkhatha oloketha adhivāsetha paṭimānethā’’tiādīnaṃ (pāci. aṭṭha. 217-218) gahaṇaṃ. Ekato vāti ekattha ṭhite vā nisinne vā bhikkhū disvā ‘‘tumhe, bhante, odanena nimantemī’’tiādinā evaṃ ekato nimantitā. Nānāto vā nimantitāti cattāri pariveṇāni vā vihāre vā gantvā nānāto vā nimantitā. Ekaṭṭhāne ṭhitesuyeva vā eko puttena, eko pitarāti evampi nimantitā nānātoyeva nimantitā nāma honti. Ekato gaṇhantiti aññamaññassa dvādasahatthūpacāre ṭhitā gaṇhanti.
கஸ்மா பன நானாதோ பு⁴த்தேபி க³ணபோ⁴ஜனங் ஹோதீதி ஆஹ ‘‘படிக்³க³ஹணமேவ ஹெத்த² பமாண’’ந்தி. யதி³ ஏவங் அத² கஸ்மா பாளியங் ‘‘க³ணபோ⁴ஜனங் நாம யத்த² சத்தாரோ பி⁴க்கூ² பஞ்சன்னங் போ⁴ஜனானங் அஞ்ஞதரேன போ⁴ஜனேன நிமந்திதா பு⁴ஞ்ஜந்தி, ஏதங் க³ணபோ⁴ஜனங் நாமா’’தி (பாசி॰ 218) வுத்தங்? தங் படிக்³க³ஹணனியமனத்த²மேவ . ந ஹி அப்படிக்³க³ஹிதகங் பி⁴க்கூ² பு⁴ஞ்ஜந்தீதி ‘‘பு⁴ஞ்ஜந்தீ’’தி பத³ங் படிக்³க³ஹணனியமவசனங் ஹோதி. ஏகதோ வா நானாதோ வா விஞ்ஞாபெத்வாதி சத்தாரோ பி⁴க்கூ² ஏகதோ டி²தா வா நிஸின்னா வா உபாஸகங் தி³ஸ்வா ‘‘அம்ஹாகங் சதுன்னம்பி ப⁴த்தங் தே³ஹீ’’தி வா பாடேக்கங் பவிஸித்வா ‘‘மய்ஹங் ப⁴த்தங் தே³ஹி, மய்ஹங் ப⁴த்தங் தே³ஹீ’’தி வா ஏகதோ வா நானாதோ வா விஞ்ஞாபெத்வா. தஸ்ஸ து³வித⁴ஸ்ஸாபீதி யஞ்ச நிமந்தனதோ லத்³த⁴ங் க³ணபோ⁴ஜனங், யஞ்ச விஞ்ஞத்திதோ லத்³த⁴ங், தஸ்ஸ து³வித⁴ஸ்ஸாபி க³ணபோ⁴ஜனஸ்ஸ. ஏவங் படிக்³க³ஹணேதி ஏகதோ படிக்³க³ஹணே.
Kasmā pana nānāto bhuttepi gaṇabhojanaṃ hotīti āha ‘‘paṭiggahaṇameva hettha pamāṇa’’nti. Yadi evaṃ atha kasmā pāḷiyaṃ ‘‘gaṇabhojanaṃ nāma yattha cattāro bhikkhū pañcannaṃ bhojanānaṃ aññatarena bhojanena nimantitā bhuñjanti, etaṃ gaṇabhojanaṃ nāmā’’ti (pāci. 218) vuttaṃ? Taṃ paṭiggahaṇaniyamanatthameva . Na hi appaṭiggahitakaṃ bhikkhū bhuñjantīti ‘‘bhuñjantī’’ti padaṃ paṭiggahaṇaniyamavacanaṃ hoti. Ekato vā nānāto vā viññāpetvāti cattāro bhikkhū ekato ṭhitā vā nisinnā vā upāsakaṃ disvā ‘‘amhākaṃ catunnampi bhattaṃ dehī’’ti vā pāṭekkaṃ pavisitvā ‘‘mayhaṃ bhattaṃ dehi, mayhaṃ bhattaṃ dehī’’ti vā ekato vā nānāto vā viññāpetvā. Tassa duvidhassāpīti yañca nimantanato laddhaṃ gaṇabhojanaṃ, yañca viññattito laddhaṃ, tassa duvidhassāpi gaṇabhojanassa. Evaṃ paṭiggahaṇeti ekato paṭiggahaṇe.
பாதா³னம்பி ப²லிதத்தாதி (பாசி॰ அட்ட²॰ 217-218) அந்தமஸோ பாதா³னம்பி யதா² மஹாசம்மஸ்ஸ பரதோ மங்ஸங் தி³ஸ்ஸதி, ஏவங் ப²லிதத்தா. ந ஸக்கா பிண்டா³ய சரிதுந்தி வாலிகாய வா ஸக்க²ராய வா பு²ட்ட²மத்தே து³க்கு²ப்பத்திதோ அந்தோகா³மே பிண்டா³ய சரிதுங் ந ஸக்கோதி. சீவரே கரியமானேதி ஸாடகஞ்ச ஸுத்தஞ்ச லபி⁴த்வா சீவரே கரியமானே. யங் கிஞ்சி சீவரே கத்தப்³ப³கம்மந்தி சீவரவிசாரணசி²ந்த³னமோக⁴ஸுத்தாரோபனாதி³ யங் கிஞ்சி சீவரே கத்தப்³ப³ங் கம்மங், அந்தமஸோ ஸூசிவேத⁴னம்பீதி அதி⁴ப்பாயோ. ‘‘அத்³த⁴யோஜனம்பீ’’திஆதி³ அவகங்ஸதோ வுத்தங். யோ பன தூ³ரங் க³ந்துகாமோ, தத்த² வத்தப்³ப³மேவ நத்தி², க³ச்ச²ந்தோ அத்³த⁴யோஜனப்³ப⁴ந்தரே கா³வுதேபி பு⁴ஞ்ஜிதுங் லப⁴தி, க³தோ பன ஏகதி³வஸங். யதா³ நாவங் அபி⁴ருஹிதுகாமோ வா ஹோதி ஆருள்ஹோ வா ஓருள்ஹோ வா, அயங் நாவாபி⁴ருஹனஸமயோ நாமாதி ஆஹ ‘‘நாவாபி⁴ருஹனஸமயேபி ஏஸேவ நயோ’’தி. அயங் பன விஸேஸோ – அபி⁴ருள்ஹேன இச்சி²தட்டா²னங் க³ந்த்வாபி யாவ ந ஓரோஹதி, தாவ பு⁴ஞ்ஜிதப்³ப³ங். சத்தாரோ பி⁴க்கூ²தி அந்திமபரிச்சே²தோ³. யத்த² பன ஸதங் வா ஸஹஸ்ஸங் வா ஸன்னிபதிதங், தத்த² வத்தப்³ப³மேவ நத்தி². தஸ்மா தாதி³ஸே காலே ‘‘மஹாஸமயோ’’தி அதி⁴ட்ட²ஹித்வா பு⁴ஞ்ஜிதப்³ப³ங். யோ கோசி பப்³ப³ஜிதோதி ஸஹத⁴ம்மிகேஸு வா தித்தி²யேஸு வா அஞ்ஞதரோ.
Pādānampi phalitattāti (pāci. aṭṭha. 217-218) antamaso pādānampi yathā mahācammassa parato maṃsaṃ dissati, evaṃ phalitattā. Na sakkā piṇḍāya caritunti vālikāya vā sakkharāya vā phuṭṭhamatte dukkhuppattito antogāme piṇḍāya carituṃ na sakkoti. Cīvare kariyamāneti sāṭakañca suttañca labhitvā cīvare kariyamāne. Yaṃ kiñci cīvare kattabbakammanti cīvaravicāraṇachindanamoghasuttāropanādi yaṃ kiñci cīvare kattabbaṃ kammaṃ, antamaso sūcivedhanampīti adhippāyo. ‘‘Addhayojanampī’’tiādi avakaṃsato vuttaṃ. Yo pana dūraṃ gantukāmo, tattha vattabbameva natthi, gacchanto addhayojanabbhantare gāvutepi bhuñjituṃ labhati, gato pana ekadivasaṃ. Yadā nāvaṃ abhiruhitukāmo vā hoti āruḷho vā oruḷho vā, ayaṃ nāvābhiruhanasamayo nāmāti āha ‘‘nāvābhiruhanasamayepi eseva nayo’’ti. Ayaṃ pana viseso – abhiruḷhena icchitaṭṭhānaṃ gantvāpi yāva na orohati, tāva bhuñjitabbaṃ. Cattāro bhikkhūti antimaparicchedo. Yattha pana sataṃ vā sahassaṃ vā sannipatitaṃ, tattha vattabbameva natthi. Tasmā tādise kāle ‘‘mahāsamayo’’ti adhiṭṭhahitvā bhuñjitabbaṃ. Yo koci pabbajitoti sahadhammikesu vā titthiyesu vā aññataro.
யே ச த்³வே தயோ ஏகதோ க³ண்ஹந்தீதி யேபி அகப்பியனிமந்தனங் ஸாதி³யித்வா த்³வே வா தயோ வா ஏகதோ க³ண்ஹந்தி, தேஸம்பி அனாபத்தி. பணீதபோ⁴ஜனஸூபோத³னவிஞ்ஞத்தீஹி பன ஆபத்தியேவாதி வத³ந்தி, உபபரிக்கி²தப்³ப³ங். நிச்சப⁴த்தாதீ³ஸூதி நிச்சப⁴த்தே ஸலாகப⁴த்தே பக்கி²கே உபோஸதி²கே பாடிபதி³கே. தத்த² நிச்சப⁴த்தந்தி து⁴வப⁴த்தங் வுச்சதி. ‘‘நிச்சப⁴த்தங் க³ண்ஹதா²’’தி வத³ந்தி , ப³ஹூனம்பி ஏகதோ க³ண்ஹிதுங் வட்டதி. ஸலாகப⁴த்தாதீ³ஸுபி ஏஸேவ நயோ.
Ye ca dve tayo ekato gaṇhantīti yepi akappiyanimantanaṃ sādiyitvā dve vā tayo vā ekato gaṇhanti, tesampi anāpatti. Paṇītabhojanasūpodanaviññattīhi pana āpattiyevāti vadanti, upaparikkhitabbaṃ. Niccabhattādīsūti niccabhatte salākabhatte pakkhike uposathike pāṭipadike. Tattha niccabhattanti dhuvabhattaṃ vuccati. ‘‘Niccabhattaṃ gaṇhathā’’ti vadanti , bahūnampi ekato gaṇhituṃ vaṭṭati. Salākabhattādīsupi eseva nayo.
க³ணபோ⁴ஜனஸிக்கா²பத³வண்ணனா நிட்டி²தா.
Gaṇabhojanasikkhāpadavaṇṇanā niṭṭhitā.
