| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
பாசித்தியகண்ட³ங்
Pācittiyakaṇḍaṃ
4. போ⁴ஜனவக்³கோ³
4. Bhojanavaggo
2. க³ணபோ⁴ஜனஸிக்கா²பத³வண்ணனா
2. Gaṇabhojanasikkhāpadavaṇṇanā
தே³வத³த்தோ காலே விஞ்ஞாபெத்வா பு⁴ஞ்ஜதி, தப்பச்சயா ப⁴க³வதா ‘‘க³ணபோ⁴ஜனே பாசித்திய’’ந்தி (பாசி॰ 209) ஸிக்கா²பத³ங் பஞ்ஞத்தங். பத³பா⁴ஜனே பன ‘‘நிமந்திதா பு⁴ஞ்ஜந்தீ’’தி (பாசி॰ 218) நிமந்தனமேவ க³ஹெத்வா விப⁴த்தங். அந்த⁴கட்ட²கதா²யங் பன வத்து²வஸேன விஞ்ஞத்தியா யாசனம்பி வுத்தந்தி லிகி²தங். கஸ்மா? பரிவாரே ஏவ ‘‘க³ணபோ⁴ஜனங் த்³வீஹாகாரேஹி பஸவதி விஞ்ஞத்திதோ வா நிமந்தனதோ வா’’தி (பரி॰ 322) வுத்தத்தா. தஸ்மா அட்டு²ப்பத்தியங்யேவ பாகடத்தா பத³பா⁴ஜனே ந வுத்தந்தி வேதி³தப்³ப³ங். ‘‘‘ஏகதோ க³ண்ஹந்தீ’தி ச க³ஹிதப⁴த்தாபி அஞ்ஞே யாவ க³ண்ஹந்தி, தாவ சே திட்ட²ந்தி, ஏகதோ க³ண்ஹந்தி ஏவ நாமா’’தி ச, ‘‘யோ கோசி பப்³ப³ஜிதோதி ஸஹத⁴ம்மிகேஸு, தித்தி²யேஸு வாதி அத்தோ²’’தி ச, ‘‘ஸமயாபா⁴வோதி ஸத்தன்னங் அனாபத்திஸமயானங் அபா⁴வோ’’தி ச, ‘‘ஸமயலத்³த⁴கேன ஸஹ சத்தாரோ ஹொந்தீ’’தி ச, ‘‘ஸமயலத்³த⁴கோ ஸயமேவ முச்சதி, ஸேஸானங் க³ணபூரகத்தா ஆபத்திகரோ ஹோதீ’’தி ச லிகி²தங்.
Devadatto kāle viññāpetvā bhuñjati, tappaccayā bhagavatā ‘‘gaṇabhojane pācittiya’’nti (pāci. 209) sikkhāpadaṃ paññattaṃ. Padabhājane pana ‘‘nimantitā bhuñjantī’’ti (pāci. 218) nimantanameva gahetvā vibhattaṃ. Andhakaṭṭhakathāyaṃ pana vatthuvasena viññattiyā yācanampi vuttanti likhitaṃ. Kasmā? Parivāre eva ‘‘gaṇabhojanaṃ dvīhākārehi pasavati viññattito vā nimantanato vā’’ti (pari. 322) vuttattā. Tasmā aṭṭhuppattiyaṃyeva pākaṭattā padabhājane na vuttanti veditabbaṃ. ‘‘‘Ekato gaṇhantī’ti ca gahitabhattāpi aññe yāva gaṇhanti, tāva ce tiṭṭhanti, ekato gaṇhanti eva nāmā’’ti ca, ‘‘yo koci pabbajitoti sahadhammikesu, titthiyesu vāti attho’’ti ca, ‘‘samayābhāvoti sattannaṃ anāpattisamayānaṃ abhāvo’’ti ca, ‘‘samayaladdhakena saha cattāro hontī’’ti ca, ‘‘samayaladdhako sayameva muccati, sesānaṃ gaṇapūrakattā āpattikaro hotī’’ti ca likhitaṃ.
எத்தா²ஹ – ‘‘படிக்³க³ஹணமேவ ஹெத்த² பமாண’’ந்தி வுத்தங், அத² கஸ்மா பாளியங் ‘‘க³ணபோ⁴ஜனங் நாம யத்த² சத்தாரோ…பே॰… பு⁴ஞ்ஜந்தீ’’தி (பாசி॰ 218) வுத்தந்தி? வுச்சதே – தத்த² ‘‘பு⁴ஞ்ஜந்தீ’’தி படிக்³க³ஹணனியமவசனங். ந ஹி அப்படிக்³க³ஹிதகங் பி⁴க்கூ² பு⁴ஞ்ஜந்தீதி.
Etthāha – ‘‘paṭiggahaṇameva hettha pamāṇa’’nti vuttaṃ, atha kasmā pāḷiyaṃ ‘‘gaṇabhojanaṃ nāma yattha cattāro…pe… bhuñjantī’’ti (pāci. 218) vuttanti? Vuccate – tattha ‘‘bhuñjantī’’ti paṭiggahaṇaniyamavacanaṃ. Na hi appaṭiggahitakaṃ bhikkhū bhuñjantīti.
க³ணபோ⁴ஜனஸிக்கா²பத³வண்ணனா நிட்டி²தா.
Gaṇabhojanasikkhāpadavaṇṇanā niṭṭhitā.
