| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
2. க³ணபோ⁴ஜனஸிக்கா²பத³வண்ணனா
2. Gaṇabhojanasikkhāpadavaṇṇanā
209. து³தியே அபி⁴மாரேதி அபி⁴ப⁴வித்வா ப⁴க³வந்தங் மாரணத்தா²ய பயோஜிதே த⁴னுத⁴ரே. நனு ‘‘ராஜானம்பி மாராபேஸீ’’தி வசனதோ இத³ங் ஸிக்கா²பத³ங் அஜாதஸத்துனோ காலே பஞ்ஞத்தந்தி ஸித்³த⁴ங், ஏவஞ்ச ஸதி பாளியங் ‘‘தேன கோ² பன ஸமயேன ரஞ்ஞோ மாக³த⁴ஸ்ஸ…பே॰… ஞாதிஸாலோஹிதோ ஆஜீவகேஸு பப்³ப³ஜிதோ ஹோதி…பே॰… பி³ம்பி³ஸாரங் ஏதத³வோசா’’திஆதி³ விருஜ்ஜ²தீதி? ந விருஜ்ஜ²தி. ஸோ கிர ஆஜீவகோ பி³ம்பி³ஸாரகாலதோ பபு⁴தி அந்தரந்தரா பி⁴க்கூ² நிமந்தெத்வா தா³னங் தெ³ந்தோ அஜாதஸத்துகாலேபி ஸிக்கா²பதே³ பஞ்ஞத்தேபி பி⁴க்கூ²னங் ஸந்திகே தூ³தங் பாஹேஸி, பி⁴க்கூ² ச குக்குச்சாயந்தா நிவாரேஸுங். தஸ்மா ஆதி³தோ பட்டா²ய தங் வத்து² த³ஸ்ஸிதந்தி வேதி³தப்³ப³ங்.
209. Dutiye abhimāreti abhibhavitvā bhagavantaṃ māraṇatthāya payojite dhanudhare. Nanu ‘‘rājānampi mārāpesī’’ti vacanato idaṃ sikkhāpadaṃ ajātasattuno kāle paññattanti siddhaṃ, evañca sati pāḷiyaṃ ‘‘tena kho pana samayena rañño māgadhassa…pe… ñātisālohito ājīvakesu pabbajito hoti…pe… bimbisāraṃ etadavocā’’tiādi virujjhatīti? Na virujjhati. So kira ājīvako bimbisārakālato pabhuti antarantarā bhikkhū nimantetvā dānaṃ dento ajātasattukālepi sikkhāpade paññattepi bhikkhūnaṃ santike dūtaṃ pāhesi, bhikkhū ca kukkuccāyantā nivāresuṃ. Tasmā ādito paṭṭhāya taṃ vatthu dassitanti veditabbaṃ.
215. அஞ்ஞமஞ்ஞங் விஸதி³ஸங் ரஜ்ஜங் விரஜ்ஜங், விரஜ்ஜதோ ஆக³தா வேரஜ்ஜகா. தே ச யஸ்மா ஜாதிகொ³த்தாதி³தோ நானாவிதா⁴, தஸ்மா நானாவேரஜ்ஜகேதிபி அத்தோ².
215. Aññamaññaṃ visadisaṃ rajjaṃ virajjaṃ, virajjato āgatā verajjakā. Te ca yasmā jātigottādito nānāvidhā, tasmā nānāverajjaketipi attho.
217-8. இமஸ்ஸ ஸிக்கா²பத³ஸ்ஸ வத்து²வஸேனேவ விஞ்ஞத்திதோ க³ணபோ⁴ஜனத்த²தா ஸித்³தா⁴தி தங் அவத்வா பத³பா⁴ஜனே அஸித்³த⁴மேவ நிமந்தனதோ க³ணபோ⁴ஜனங் த³ஸ்ஸிதந்தி வேதி³தப்³ப³ங். தேனாஹ ‘‘த்³வீஹாகாரேஹீ’’திஆதி³. ‘‘யேன கேனசி வேவசனேனா’’தி வுத்தத்தா ‘‘போ⁴ஜனங் க³ண்ஹதா²’’திஆதி³ஸாமஞ்ஞனாமேனாபி க³ணபோ⁴ஜனங் ஹோதி. யங் பன பாளியங் அத்³தா⁴னக³மனாதி³வத்தூ²ஸு ‘‘இதே⁴வ பு⁴ஞ்ஜதா²’’தி வுத்தவசனஸ்ஸ குக்குச்சாயனங், தம்பி ஓத³னாதி³னாமங் க³ஹெத்வா வுத்தத்தா ஏவ கதந்தி வேதி³தப்³ப³ங். ஏகதோ க³ண்ஹந்தீதி அஞ்ஞமஞ்ஞஸ்ஸ த்³வாத³ஸஹத்த²ங் அமுஞ்சித்வா ஏகதோ ட²த்வா க³ண்ஹந்தி.
217-8. Imassa sikkhāpadassa vatthuvaseneva viññattito gaṇabhojanatthatā siddhāti taṃ avatvā padabhājane asiddhameva nimantanato gaṇabhojanaṃ dassitanti veditabbaṃ. Tenāha ‘‘dvīhākārehī’’tiādi. ‘‘Yena kenaci vevacanenā’’ti vuttattā ‘‘bhojanaṃ gaṇhathā’’tiādisāmaññanāmenāpi gaṇabhojanaṃ hoti. Yaṃ pana pāḷiyaṃ addhānagamanādivatthūsu ‘‘idheva bhuñjathā’’ti vuttavacanassa kukkuccāyanaṃ, tampi odanādināmaṃ gahetvā vuttattā eva katanti veditabbaṃ. Ekato gaṇhantīti aññamaññassa dvādasahatthaṃ amuñcitvā ekato ṭhatvā gaṇhanti.
‘‘அம்ஹாகங் சதுன்னம்பி ப⁴த்தங் தே³ஹீ’’தி வுத்தத்தா பாளி (வண்ணனா) யங் ‘‘த்வங் ஏகஸ்ஸ பி⁴க்கு²னோ ப⁴த்தங் தே³ஹீ’’திஆதி³னோ வுத்தத்தா ச போ⁴ஜனநாமேன விஞ்ஞத்தமேவ க³ணபோ⁴ஜனங் ஹோதி, தஞ்ச அஞ்ஞேன விஞ்ஞத்தம்பி ஏகதோ க³ண்ஹந்தானங் ஸப்³பே³ஸம்பி ஹோதீதி த³ட்ட²ப்³ப³ங். விஸுங் க³ஹிதங் பன விஞ்ஞத்தங் பு⁴ஞ்ஜதோ பணீதபோ⁴ஜனாதி³ஸிக்கா²பதே³ஹி ஆபத்தி ஏவ.
‘‘Amhākaṃ catunnampi bhattaṃ dehī’’ti vuttattā pāḷi (vaṇṇanā) yaṃ ‘‘tvaṃ ekassa bhikkhuno bhattaṃ dehī’’tiādino vuttattā ca bhojananāmena viññattameva gaṇabhojanaṃ hoti, tañca aññena viññattampi ekato gaṇhantānaṃ sabbesampi hotīti daṭṭhabbaṃ. Visuṃ gahitaṃ pana viññattaṃ bhuñjato paṇītabhojanādisikkhāpadehi āpatti eva.
ஆக³ந்துகபட்டந்தி அச்சி²ந்தி³த்வா அன்வாதி⁴ங் ஆரோபெத்வா கரணசீவரங் ஸந்தா⁴ய வுத்தங். ட²பேதீதி ஏகங் அந்தங் சீவரே ப³ந்த⁴னவஸேன ட²பேதி. பச்சாக³தங் ஸிப்³ப³தீதி தஸ்ஸேவ து³தியஅந்தங் பரிவத்தித்வா ஆஹதங் ஸிப்³ப³தி. ஆக³ந்துகபட்டங் ப³ந்த⁴தீதி சீவரேன லக்³க³ங் கரொந்தோ புனப்புனங் தத்த² தத்த² ஸுத்தேன ப³ந்த⁴தி. க⁴ட்டேதீதி பமாணேன க³ஹெத்வா த³ண்டா³தீ³ஹி க⁴ட்டேதி. ஸுத்தங் கரோதீதி கு³ணாதி³பா⁴வேன வட்டேதி. வலேதீதி அனேககு³ணஸுத்தங் ஹத்தே²ன வா சக்கத³ண்டே³ன வா வட்டேதி ஏகத்தங் கரோதி. பரிவத்தனங் கரோதீதி பரிவத்தனத³ண்ட³யந்தகங் கரோதி, யஸ்மிங் ஸுத்தகு³ளங் பவேஸெத்வா வேளுனாளிகாதீ³ஸு ட²பெத்வா பரிப்³ப⁴மாபெத்வா ஸுத்தகோடிதோ பட்டா²ய ஆகட்³ட⁴ந்தி.
Āgantukapaṭṭanti acchinditvā anvādhiṃ āropetvā karaṇacīvaraṃ sandhāya vuttaṃ. Ṭhapetīti ekaṃ antaṃ cīvare bandhanavasena ṭhapeti. Paccāgataṃ sibbatīti tasseva dutiyaantaṃ parivattitvā āhataṃ sibbati. Āgantukapaṭṭaṃ bandhatīti cīvarena laggaṃ karonto punappunaṃ tattha tattha suttena bandhati. Ghaṭṭetīti pamāṇena gahetvā daṇḍādīhi ghaṭṭeti. Suttaṃ karotīti guṇādibhāvena vaṭṭeti. Valetīti anekaguṇasuttaṃ hatthena vā cakkadaṇḍena vā vaṭṭeti ekattaṃ karoti. Parivattanaṃ karotīti parivattanadaṇḍayantakaṃ karoti, yasmiṃ suttaguḷaṃ pavesetvā veḷunāḷikādīsu ṭhapetvā paribbhamāpetvā suttakoṭito paṭṭhāya ākaḍḍhanti.
220. அனிமந்திதசதுத்த²ந்தி அனிமந்திதோ சதுத்தோ² யஸ்ஸ பி⁴க்கு²சதுக்கஸ்ஸ, தங் அனிமந்திதசதுத்த²ங். ஏவங் ஸேஸேஸுபி. தேனாஹ ‘‘பஞ்சன்னங் சதுக்கான’’ந்தி. ஸம்பவேஸெத்வாதி தேஹி யோஜெத்வா. க³ணோ பி⁴ஜ்ஜதீதி நிமந்திதஸங்கோ⁴ ந ஹோதீதி அத்தோ².
220.Animantitacatutthanti animantito catuttho yassa bhikkhucatukkassa, taṃ animantitacatutthaṃ. Evaṃ sesesupi. Tenāha ‘‘pañcannaṃ catukkāna’’nti. Sampavesetvāti tehi yojetvā. Gaṇo bhijjatīti nimantitasaṅgho na hotīti attho.
அதி⁴வாஸெத்வா க³தேஸூதி எத்த² அகப்பியனிமந்தனாதி⁴வாஸனக்க²ணே புப்³ப³பயோகே³ து³க்கடம்பி நத்தி², விஞ்ஞத்திதோ பஸவனே பன விஞ்ஞத்திக்க²ணே இதரஸிக்கா²பதே³ஹி து³க்கடங் ஹோதீதி க³ஹேதப்³ப³ங். நிமந்தனங் ஸாதி³யதா²தி நிமந்தனப⁴த்தங் படிக்³க³ண்ஹத². தானி சாதி கும்மாஸாதீ³னி ச தேஹி பி⁴க்கூ²ஹி ஏகேன பச்சா² க³ஹிதத்தா ஏகதோ ந க³ஹிதானி.
Adhivāsetvāgatesūti ettha akappiyanimantanādhivāsanakkhaṇe pubbapayoge dukkaṭampi natthi, viññattito pasavane pana viññattikkhaṇe itarasikkhāpadehi dukkaṭaṃ hotīti gahetabbaṃ. Nimantanaṃ sādiyathāti nimantanabhattaṃ paṭiggaṇhatha. Tāni cāti kummāsādīni ca tehi bhikkhūhi ekena pacchā gahitattā ekato na gahitāni.
‘‘ப⁴த்துத்³தே³ஸகேன பண்டி³தேன ப⁴விதப்³ப³ங்…பே॰… மோசேதப்³பா³’’தி ஏதேன ப⁴த்துத்³தே³ஸகேன அகப்பியனிமந்தனே ஸாதி³தே ஸப்³பே³ஸம்பி ஸாதி³தங் ஹோதி. ஏகதோ க³ண்ஹந்தானங் க³ணபோ⁴ஜனாபத்தி ச ஹோதீதி த³ஸ்ஸேதி. தூ³தஸ்ஸ த்³வாரே ஆக³ந்த்வா புன ‘‘ப⁴த்தங் க³ண்ஹதா²’’தி வசனப⁴யேன ‘‘கா³மத்³வாரே அட்ட²த்வா’’தி வுத்தங். க³ணபோ⁴ஜனதா, ஸமயாபா⁴வோ, அஜ்ஜோ²ஹரணந்தி இமானெத்த² தீணி அங்கா³னி.
‘‘Bhattuddesakena paṇḍitena bhavitabbaṃ…pe… mocetabbā’’ti etena bhattuddesakena akappiyanimantane sādite sabbesampi sāditaṃ hoti. Ekato gaṇhantānaṃ gaṇabhojanāpatti ca hotīti dasseti. Dūtassa dvāre āgantvā puna ‘‘bhattaṃ gaṇhathā’’ti vacanabhayena ‘‘gāmadvāre aṭṭhatvā’’ti vuttaṃ. Gaṇabhojanatā, samayābhāvo, ajjhoharaṇanti imānettha tīṇi aṅgāni.
க³ணபோ⁴ஜனஸிக்கா²பத³வண்ணனா நிட்டி²தா.
Gaṇabhojanasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. க³ணபோ⁴ஜனஸிக்கா²பத³வண்ணனா • 2. Gaṇabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. க³ணபோ⁴ஜனஸிக்கா²பத³வண்ணனா • 2. Gaṇabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. க³ணபோ⁴ஜனஸிக்கா²பத³வண்ணனா • 2. Gaṇabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. க³ணபோ⁴ஜனஸிக்கா²பத³ங் • 2. Gaṇabhojanasikkhāpadaṃ
