| Library / Tipiṭaka / তিপিটক • Tipiṭaka / কঙ্খাৰিতরণী-পুরাণ-টীকা • Kaṅkhāvitaraṇī-purāṇa-ṭīkā |
পাচিত্তিযকণ্ডং
Pācittiyakaṇḍaṃ
৪. ভোজনৰগ্গো
4. Bhojanavaggo
২. গণভোজনসিক্খাপদৰণ্ণনা
2. Gaṇabhojanasikkhāpadavaṇṇanā
দেৰদত্তো কালে ৰিঞ্ঞাপেত্ৰা ভুঞ্জতি, তপ্পচ্চযা ভগৰতা ‘‘গণভোজনে পাচিত্তিয’’ন্তি (পাচি॰ ২০৯) সিক্খাপদং পঞ্ঞত্তং। পদভাজনে পন ‘‘নিমন্তিতা ভুঞ্জন্তী’’তি (পাচি॰ ২১৮) নিমন্তনমেৰ গহেত্ৰা ৰিভত্তং। অন্ধকট্ঠকথাযং পন ৰত্থুৰসেন ৰিঞ্ঞত্তিযা যাচনম্পি ৰুত্তন্তি লিখিতং। কস্মা? পরিৰারে এৰ ‘‘গণভোজনং দ্ৰীহাকারেহি পসৰতি ৰিঞ্ঞত্তিতো ৰা নিমন্তনতো ৰা’’তি (পরি॰ ৩২২) ৰুত্তত্তা। তস্মা অট্ঠুপ্পত্তিযংযেৰ পাকটত্তা পদভাজনে ন ৰুত্তন্তি ৰেদিতব্বং। ‘‘‘একতো গণ্হন্তী’তি চ গহিতভত্তাপি অঞ্ঞে যাৰ গণ্হন্তি, তাৰ চে তিট্ঠন্তি, একতো গণ্হন্তি এৰ নামা’’তি চ, ‘‘যো কোচি পব্বজিতোতি সহধম্মিকেসু, তিত্থিযেসু ৰাতি অত্থো’’তি চ, ‘‘সমযাভাৰোতি সত্তন্নং অনাপত্তিসমযানং অভাৰো’’তি চ, ‘‘সমযলদ্ধকেন সহ চত্তারো হোন্তী’’তি চ, ‘‘সমযলদ্ধকো সযমেৰ মুচ্চতি, সেসানং গণপূরকত্তা আপত্তিকরো হোতী’’তি চ লিখিতং।
Devadatto kāle viññāpetvā bhuñjati, tappaccayā bhagavatā ‘‘gaṇabhojane pācittiya’’nti (pāci. 209) sikkhāpadaṃ paññattaṃ. Padabhājane pana ‘‘nimantitā bhuñjantī’’ti (pāci. 218) nimantanameva gahetvā vibhattaṃ. Andhakaṭṭhakathāyaṃ pana vatthuvasena viññattiyā yācanampi vuttanti likhitaṃ. Kasmā? Parivāre eva ‘‘gaṇabhojanaṃ dvīhākārehi pasavati viññattito vā nimantanato vā’’ti (pari. 322) vuttattā. Tasmā aṭṭhuppattiyaṃyeva pākaṭattā padabhājane na vuttanti veditabbaṃ. ‘‘‘Ekato gaṇhantī’ti ca gahitabhattāpi aññe yāva gaṇhanti, tāva ce tiṭṭhanti, ekato gaṇhanti eva nāmā’’ti ca, ‘‘yo koci pabbajitoti sahadhammikesu, titthiyesu vāti attho’’ti ca, ‘‘samayābhāvoti sattannaṃ anāpattisamayānaṃ abhāvo’’ti ca, ‘‘samayaladdhakena saha cattāro hontī’’ti ca, ‘‘samayaladdhako sayameva muccati, sesānaṃ gaṇapūrakattā āpattikaro hotī’’ti ca likhitaṃ.
এত্থাহ – ‘‘পটিগ্গহণমেৰ হেত্থ পমাণ’’ন্তি ৰুত্তং, অথ কস্মা পাল়িযং ‘‘গণভোজনং নাম যত্থ চত্তারো…পে॰… ভুঞ্জন্তী’’তি (পাচি॰ ২১৮) ৰুত্তন্তি? ৰুচ্চতে – তত্থ ‘‘ভুঞ্জন্তী’’তি পটিগ্গহণনিযমৰচনং। ন হি অপ্পটিগ্গহিতকং ভিক্খূ ভুঞ্জন্তীতি।
Etthāha – ‘‘paṭiggahaṇameva hettha pamāṇa’’nti vuttaṃ, atha kasmā pāḷiyaṃ ‘‘gaṇabhojanaṃ nāma yattha cattāro…pe… bhuñjantī’’ti (pāci. 218) vuttanti? Vuccate – tattha ‘‘bhuñjantī’’ti paṭiggahaṇaniyamavacanaṃ. Na hi appaṭiggahitakaṃ bhikkhū bhuñjantīti.
গণভোজনসিক্খাপদৰণ্ণনা নিট্ঠিতা।
Gaṇabhojanasikkhāpadavaṇṇanā niṭṭhitā.
