| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
2. г̇ан̣абхож̇анасигкаабад̣̇аван̣н̣анаа
2. Gaṇabhojanasikkhāpadavaṇṇanā
209. д̣̇уд̇ияз абхимаарзд̇и абхибхавид̇ваа бхаг̇аванд̇ам̣ мааран̣ад̇т̇ааяа баяож̇ид̇з д̇хануд̇харз. нану ‘‘рааж̇аанамби маараабзсий’’д̇и важанад̇о ид̣̇ам̣ сигкаабад̣̇ам̣ аж̇аад̇асад̇д̇уно гаалз бан̃н̃ад̇д̇анд̇и сид̣̇д̇хам̣, зван̃жа сад̇и баал̣ияам̣ ‘‘д̇зна ко бана самаязна ран̃н̃о мааг̇ад̇хасса…бз… н̃аад̇исаалохид̇о ааж̇ийвагзсу баб̣б̣аж̇ид̇о ход̇и…бз… б̣имб̣исаарам̣ зд̇ад̣̇авожаа’’д̇иаад̣̇и вируж̇жхад̇ийд̇и? на вируж̇жхад̇и. со гира ааж̇ийваго б̣имб̣исаарагаалад̇о бабхуд̇и анд̇аранд̇араа бхигкуу ниманд̇зд̇ваа д̣̇аанам̣ д̣̇знд̇о аж̇аад̇асад̇д̇угаалзби сигкаабад̣̇з бан̃н̃ад̇д̇зби бхигкуунам̣ санд̇игз д̣̇ууд̇ам̣ баахзси, бхигкуу жа гуггужжааяанд̇аа ниваарзсум̣. д̇асмаа аад̣̇ид̇о бадтааяа д̇ам̣ вад̇т̇у д̣̇ассид̇анд̇и взд̣̇ид̇аб̣б̣ам̣.
209. Dutiye abhimāreti abhibhavitvā bhagavantaṃ māraṇatthāya payojite dhanudhare. Nanu ‘‘rājānampi mārāpesī’’ti vacanato idaṃ sikkhāpadaṃ ajātasattuno kāle paññattanti siddhaṃ, evañca sati pāḷiyaṃ ‘‘tena kho pana samayena rañño māgadhassa…pe… ñātisālohito ājīvakesu pabbajito hoti…pe… bimbisāraṃ etadavocā’’tiādi virujjhatīti? Na virujjhati. So kira ājīvako bimbisārakālato pabhuti antarantarā bhikkhū nimantetvā dānaṃ dento ajātasattukālepi sikkhāpade paññattepi bhikkhūnaṃ santike dūtaṃ pāhesi, bhikkhū ca kukkuccāyantā nivāresuṃ. Tasmā ādito paṭṭhāya taṃ vatthu dassitanti veditabbaṃ.
215. ан̃н̃аман̃н̃ам̣ висад̣̇исам̣ раж̇ж̇ам̣ вираж̇ж̇ам̣, вираж̇ж̇ад̇о ааг̇ад̇аа взраж̇ж̇агаа. д̇з жа яасмаа ж̇аад̇иг̇од̇д̇аад̣̇ид̇о наанаавид̇хаа, д̇асмаа наанаавзраж̇ж̇агзд̇иби ад̇т̇о.
215. Aññamaññaṃ visadisaṃ rajjaṃ virajjaṃ, virajjato āgatā verajjakā. Te ca yasmā jātigottādito nānāvidhā, tasmā nānāverajjaketipi attho.
217-8. имасса сигкаабад̣̇асса вад̇т̇увасзнзва вин̃н̃ад̇д̇ид̇о г̇ан̣абхож̇анад̇т̇ад̇аа сид̣̇д̇хаад̇и д̇ам̣ авад̇ваа бад̣̇абхааж̇анз асид̣̇д̇хамзва ниманд̇анад̇о г̇ан̣абхож̇анам̣ д̣̇ассид̇анд̇и взд̣̇ид̇аб̣б̣ам̣. д̇знааха ‘‘д̣̇вийхаагаарзхий’’д̇иаад̣̇и. ‘‘язна гзнажи взважанзнаа’’д̇и вуд̇д̇ад̇д̇аа ‘‘бхож̇анам̣ г̇ан̣хат̇аа’’д̇иаад̣̇исааман̃н̃анаамзнааби г̇ан̣абхож̇анам̣ ход̇и. яам̣ бана баал̣ияам̣ ад̣̇д̇хаанаг̇аманаад̣̇ивад̇т̇уусу ‘‘ид̇хзва бхун̃ж̇ат̇аа’’д̇и вуд̇д̇аважанасса гуггужжааяанам̣, д̇амби од̣̇анаад̣̇инаамам̣ г̇ахзд̇ваа вуд̇д̇ад̇д̇аа зва гад̇анд̇и взд̣̇ид̇аб̣б̣ам̣. згад̇о г̇ан̣ханд̇ийд̇и ан̃н̃аман̃н̃асса д̣̇ваад̣̇асахад̇т̇ам̣ амун̃жид̇ваа згад̇о тад̇ваа г̇ан̣ханд̇и.
217-8. Imassa sikkhāpadassa vatthuvaseneva viññattito gaṇabhojanatthatā siddhāti taṃ avatvā padabhājane asiddhameva nimantanato gaṇabhojanaṃ dassitanti veditabbaṃ. Tenāha ‘‘dvīhākārehī’’tiādi. ‘‘Yena kenaci vevacanenā’’ti vuttattā ‘‘bhojanaṃ gaṇhathā’’tiādisāmaññanāmenāpi gaṇabhojanaṃ hoti. Yaṃ pana pāḷiyaṃ addhānagamanādivatthūsu ‘‘idheva bhuñjathā’’ti vuttavacanassa kukkuccāyanaṃ, tampi odanādināmaṃ gahetvā vuttattā eva katanti veditabbaṃ. Ekato gaṇhantīti aññamaññassa dvādasahatthaṃ amuñcitvā ekato ṭhatvā gaṇhanti.
‘‘амхаагам̣ жад̇уннамби бхад̇д̇ам̣ д̣̇зхий’’д̇и вуд̇д̇ад̇д̇аа баал̣и (ван̣н̣анаа) яам̣ ‘‘д̇вам̣ згасса бхигкуно бхад̇д̇ам̣ д̣̇зхий’’д̇иаад̣̇ино вуд̇д̇ад̇д̇аа жа бхож̇ананаамзна вин̃н̃ад̇д̇амзва г̇ан̣абхож̇анам̣ ход̇и, д̇ан̃жа ан̃н̃зна вин̃н̃ад̇д̇амби згад̇о г̇ан̣ханд̇аанам̣ саб̣б̣зсамби ход̇ийд̇и д̣̇адтаб̣б̣ам̣. висум̣ г̇ахид̇ам̣ бана вин̃н̃ад̇д̇ам̣ бхун̃ж̇ад̇о бан̣ийд̇абхож̇анаад̣̇исигкаабад̣̇зхи аабад̇д̇и зва.
‘‘Amhākaṃ catunnampi bhattaṃ dehī’’ti vuttattā pāḷi (vaṇṇanā) yaṃ ‘‘tvaṃ ekassa bhikkhuno bhattaṃ dehī’’tiādino vuttattā ca bhojananāmena viññattameva gaṇabhojanaṃ hoti, tañca aññena viññattampi ekato gaṇhantānaṃ sabbesampi hotīti daṭṭhabbaṃ. Visuṃ gahitaṃ pana viññattaṃ bhuñjato paṇītabhojanādisikkhāpadehi āpatti eva.
ааг̇анд̇угабадданд̇и ажчинд̣̇ид̇ваа анваад̇хим̣ ааробзд̇ваа гаран̣ажийварам̣ санд̇хааяа вуд̇д̇ам̣. табзд̇ийд̇и згам̣ анд̇ам̣ жийварз б̣анд̇ханавасзна табзд̇и. бажжааг̇ад̇ам̣ сиб̣б̣ад̇ийд̇и д̇ассзва д̣̇уд̇ияаанд̇ам̣ баривад̇д̇ид̇ваа аахад̇ам̣ сиб̣б̣ад̇и. ааг̇анд̇угабаддам̣ б̣анд̇хад̇ийд̇и жийварзна лаг̇г̇ам̣ гаронд̇о бунаббунам̣ д̇ад̇т̇а д̇ад̇т̇а суд̇д̇зна б̣анд̇хад̇и. гхаддзд̇ийд̇и бамаан̣зна г̇ахзд̇ваа д̣̇ан̣д̣аад̣̇ийхи гхаддзд̇и. суд̇д̇ам̣ гарод̇ийд̇и г̇ун̣аад̣̇ибхаавзна ваддзд̇и. валзд̇ийд̇и анзгаг̇ун̣асуд̇д̇ам̣ хад̇т̇зна ваа жаггад̣̇ан̣д̣зна ваа ваддзд̇и згад̇д̇ам̣ гарод̇и. баривад̇д̇анам̣ гарод̇ийд̇и баривад̇д̇анад̣̇ан̣д̣аяанд̇агам̣ гарод̇и, яасмим̣ суд̇д̇аг̇ул̣ам̣ бавзсзд̇ваа взл̣унаал̣игаад̣̇ийсу табзд̇ваа бариб̣бхамаабзд̇ваа суд̇д̇агодид̇о бадтааяа аагад̣дханд̇и.
Āgantukapaṭṭanti acchinditvā anvādhiṃ āropetvā karaṇacīvaraṃ sandhāya vuttaṃ. Ṭhapetīti ekaṃ antaṃ cīvare bandhanavasena ṭhapeti. Paccāgataṃ sibbatīti tasseva dutiyaantaṃ parivattitvā āhataṃ sibbati. Āgantukapaṭṭaṃ bandhatīti cīvarena laggaṃ karonto punappunaṃ tattha tattha suttena bandhati. Ghaṭṭetīti pamāṇena gahetvā daṇḍādīhi ghaṭṭeti. Suttaṃ karotīti guṇādibhāvena vaṭṭeti. Valetīti anekaguṇasuttaṃ hatthena vā cakkadaṇḍena vā vaṭṭeti ekattaṃ karoti. Parivattanaṃ karotīti parivattanadaṇḍayantakaṃ karoti, yasmiṃ suttaguḷaṃ pavesetvā veḷunāḷikādīsu ṭhapetvā paribbhamāpetvā suttakoṭito paṭṭhāya ākaḍḍhanti.
220. аниманд̇ид̇ажад̇уд̇т̇анд̇и аниманд̇ид̇о жад̇уд̇т̇о яасса бхигкужад̇уггасса, д̇ам̣ аниманд̇ид̇ажад̇уд̇т̇ам̣. звам̣ сзсзсуби. д̇знааха ‘‘бан̃жаннам̣ жад̇уггаана’’нд̇и. самбавзсзд̇ваад̇и д̇зхи яож̇зд̇ваа. г̇ан̣о бхиж̇ж̇ад̇ийд̇и ниманд̇ид̇асан̇гхо на ход̇ийд̇и ад̇т̇о.
220.Animantitacatutthanti animantito catuttho yassa bhikkhucatukkassa, taṃ animantitacatutthaṃ. Evaṃ sesesupi. Tenāha ‘‘pañcannaṃ catukkāna’’nti. Sampavesetvāti tehi yojetvā. Gaṇo bhijjatīti nimantitasaṅgho na hotīti attho.
ад̇хиваасзд̇ваа г̇ад̇зсууд̇и зд̇т̇а агаббияаниманд̇анаад̇хиваасанагкан̣з буб̣б̣абаяог̇з д̣̇уггадамби над̇т̇и, вин̃н̃ад̇д̇ид̇о басаванз бана вин̃н̃ад̇д̇игкан̣з ид̇арасигкаабад̣̇зхи д̣̇уггадам̣ ход̇ийд̇и г̇ахзд̇аб̣б̣ам̣. ниманд̇анам̣ саад̣̇ияат̇аад̇и ниманд̇анабхад̇д̇ам̣ бадиг̇г̇ан̣хат̇а. д̇аани жаад̇и гуммаасаад̣̇ийни жа д̇зхи бхигкуухи згзна бажчаа г̇ахид̇ад̇д̇аа згад̇о на г̇ахид̇аани.
Adhivāsetvāgatesūti ettha akappiyanimantanādhivāsanakkhaṇe pubbapayoge dukkaṭampi natthi, viññattito pasavane pana viññattikkhaṇe itarasikkhāpadehi dukkaṭaṃ hotīti gahetabbaṃ. Nimantanaṃ sādiyathāti nimantanabhattaṃ paṭiggaṇhatha. Tāni cāti kummāsādīni ca tehi bhikkhūhi ekena pacchā gahitattā ekato na gahitāni.
‘‘бхад̇д̇уд̣̇д̣̇зсагзна бан̣д̣ид̇зна бхавид̇аб̣б̣ам̣…бз… можзд̇аб̣б̣аа’’д̇и зд̇зна бхад̇д̇уд̣̇д̣̇зсагзна агаббияаниманд̇анз саад̣̇ид̇з саб̣б̣зсамби саад̣̇ид̇ам̣ ход̇и. згад̇о г̇ан̣ханд̇аанам̣ г̇ан̣абхож̇анаабад̇д̇и жа ход̇ийд̇и д̣̇ассзд̇и. д̣̇ууд̇асса д̣̇ваарз ааг̇анд̇ваа буна ‘‘бхад̇д̇ам̣ г̇ан̣хат̇аа’’д̇и важанабхаязна ‘‘г̇аамад̣̇ваарз адтад̇ваа’’д̇и вуд̇д̇ам̣. г̇ан̣абхож̇анад̇аа, самаяаабхааво, аж̇жхохаран̣анд̇и имаанзд̇т̇а д̇ийн̣и ан̇г̇аани.
‘‘Bhattuddesakena paṇḍitena bhavitabbaṃ…pe… mocetabbā’’ti etena bhattuddesakena akappiyanimantane sādite sabbesampi sāditaṃ hoti. Ekato gaṇhantānaṃ gaṇabhojanāpatti ca hotīti dasseti. Dūtassa dvāre āgantvā puna ‘‘bhattaṃ gaṇhathā’’ti vacanabhayena ‘‘gāmadvāre aṭṭhatvā’’ti vuttaṃ. Gaṇabhojanatā, samayābhāvo, ajjhoharaṇanti imānettha tīṇi aṅgāni.
г̇ан̣абхож̇анасигкаабад̣̇аван̣н̣анаа нидтид̇аа.
Gaṇabhojanasikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 4. бхож̇анаваг̇г̇о • 4. Bhojanavaggo
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 2. г̇ан̣абхож̇анасигкаабад̣̇аван̣н̣анаа • 2. Gaṇabhojanasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 2. г̇ан̣абхож̇анасигкаабад̣̇аван̣н̣анаа • 2. Gaṇabhojanasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 2. г̇ан̣абхож̇анасигкаабад̣̇аван̣н̣анаа • 2. Gaṇabhojanasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 2. г̇ан̣абхож̇анасигкаабад̣̇ам̣ • 2. Gaṇabhojanasikkhāpadaṃ
