| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-པུརཱཎ-ཊཱིཀཱ • Kaṅkhāvitaraṇī-purāṇa-ṭīkā |
པཱཙིཏྟིཡཀཎྜཾ
Pācittiyakaṇḍaṃ
༤. བྷོཛནཝགྒོ
4. Bhojanavaggo
༢. གཎབྷོཛནསིཀྑཱཔདཝཎྞནཱ
2. Gaṇabhojanasikkhāpadavaṇṇanā
དེཝདཏྟོ ཀཱལེ ཝིཉྙཱཔེཏྭཱ བྷུཉྫཏི, ཏཔྤཙྩཡཱ བྷགཝཏཱ ‘‘གཎབྷོཛནེ པཱཙིཏྟིཡ’’ནྟི (པཱཙི॰ ༢༠༩) སིཀྑཱཔདཾ པཉྙཏྟཾ། པདབྷཱཛནེ པན ‘‘ནིམནྟིཏཱ བྷུཉྫནྟཱི’’ཏི (པཱཙི॰ ༢༡༨) ནིམནྟནམེཝ གཧེཏྭཱ ཝིབྷཏྟཾ། ཨནྡྷཀཊྛཀཐཱཡཾ པན ཝཏྠུཝསེན ཝིཉྙཏྟིཡཱ ཡཱཙནམྤི ཝུཏྟནྟི ལིཁིཏཾ། ཀསྨཱ? པརིཝཱརེ ཨེཝ ‘‘གཎབྷོཛནཾ དྭཱིཧཱཀཱརེཧི པསཝཏི ཝིཉྙཏྟིཏོ ཝཱ ནིམནྟནཏོ ཝཱ’’ཏི (པརི॰ ༣༢༢) ཝུཏྟཏྟཱ། ཏསྨཱ ཨཊྛུཔྤཏྟིཡཾཡེཝ པཱཀཊཏྟཱ པདབྷཱཛནེ ན ཝུཏྟནྟི ཝེདིཏབྦཾ། ‘‘‘ཨེཀཏོ གཎྷནྟཱི’ཏི ཙ གཧིཏབྷཏྟཱཔི ཨཉྙེ ཡཱཝ གཎྷནྟི, ཏཱཝ ཙེ ཏིཊྛནྟི, ཨེཀཏོ གཎྷནྟི ཨེཝ ནཱམཱ’’ཏི ཙ, ‘‘ཡོ ཀོཙི པབྦཛིཏོཏི སཧདྷམྨིཀེསུ, ཏིཏྠིཡེསུ ཝཱཏི ཨཏྠོ’’ཏི ཙ, ‘‘སམཡཱབྷཱཝོཏི སཏྟནྣཾ ཨནཱཔཏྟིསམཡཱནཾ ཨབྷཱཝོ’’ཏི ཙ, ‘‘སམཡལདྡྷཀེན སཧ ཙཏྟཱརོ ཧོནྟཱི’’ཏི ཙ, ‘‘སམཡལདྡྷཀོ སཡམེཝ མུཙྩཏི, སེསཱནཾ གཎཔཱུརཀཏྟཱ ཨཱཔཏྟིཀརོ ཧོཏཱི’’ཏི ཙ ལིཁིཏཾ།
Devadatto kāle viññāpetvā bhuñjati, tappaccayā bhagavatā ‘‘gaṇabhojane pācittiya’’nti (pāci. 209) sikkhāpadaṃ paññattaṃ. Padabhājane pana ‘‘nimantitā bhuñjantī’’ti (pāci. 218) nimantanameva gahetvā vibhattaṃ. Andhakaṭṭhakathāyaṃ pana vatthuvasena viññattiyā yācanampi vuttanti likhitaṃ. Kasmā? Parivāre eva ‘‘gaṇabhojanaṃ dvīhākārehi pasavati viññattito vā nimantanato vā’’ti (pari. 322) vuttattā. Tasmā aṭṭhuppattiyaṃyeva pākaṭattā padabhājane na vuttanti veditabbaṃ. ‘‘‘Ekato gaṇhantī’ti ca gahitabhattāpi aññe yāva gaṇhanti, tāva ce tiṭṭhanti, ekato gaṇhanti eva nāmā’’ti ca, ‘‘yo koci pabbajitoti sahadhammikesu, titthiyesu vāti attho’’ti ca, ‘‘samayābhāvoti sattannaṃ anāpattisamayānaṃ abhāvo’’ti ca, ‘‘samayaladdhakena saha cattāro hontī’’ti ca, ‘‘samayaladdhako sayameva muccati, sesānaṃ gaṇapūrakattā āpattikaro hotī’’ti ca likhitaṃ.
ཨེཏྠཱཧ – ‘‘པཊིགྒཧཎམེཝ ཧེཏྠ པམཱཎ’’ནྟི ཝུཏྟཾ, ཨཐ ཀསྨཱ པཱལི༹ཡཾ ‘‘གཎབྷོཛནཾ ནཱམ ཡཏྠ ཙཏྟཱརོ…པེ॰… བྷུཉྫནྟཱི’’ཏི (པཱཙི॰ ༢༡༨) ཝུཏྟནྟི? ཝུཙྩཏེ – ཏཏྠ ‘‘བྷུཉྫནྟཱི’’ཏི པཊིགྒཧཎནིཡམཝཙནཾ། ན ཧི ཨཔྤཊིགྒཧིཏཀཾ བྷིཀྑཱུ བྷུཉྫནྟཱིཏི།
Etthāha – ‘‘paṭiggahaṇameva hettha pamāṇa’’nti vuttaṃ, atha kasmā pāḷiyaṃ ‘‘gaṇabhojanaṃ nāma yattha cattāro…pe… bhuñjantī’’ti (pāci. 218) vuttanti? Vuccate – tattha ‘‘bhuñjantī’’ti paṭiggahaṇaniyamavacanaṃ. Na hi appaṭiggahitakaṃ bhikkhū bhuñjantīti.
གཎབྷོཛནསིཀྑཱཔདཝཎྞནཱ ནིཊྛིཏཱ།
Gaṇabhojanasikkhāpadavaṇṇanā niṭṭhitā.
