| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
7. க³ணகமொக்³க³ல்லானஸுத்தவண்ணனா
7. Gaṇakamoggallānasuttavaṇṇanā
74. யதா² ஹெட்டி²மஸோபானப²லகங் ஓரோஹந்தஸ்ஸ பச்சி²மங் நாம ஹோதி, ஏவங் ஆரோஹந்தஸ்ஸ பட²மங் நாம ஹோதீதி வுத்தங் – ‘‘யாவ பச்சி²மஸோபானகளேவராதி யாவ பட²மஸோபானப²லகா’’தி. வத்து²ங் ஸோதெ⁴த்வாதி வத்து²விஜ்ஜாசரியேன வுத்தவிதி⁴னா பாஸாத³வத்து²னோ ஸோத⁴னவிதி⁴ங் கத்வா. எத்தா²தி பாஸாத³கரணே. ஸத்ததா⁴ பி⁴ன்னஸ்ஸ வாலக்³க³ஸ்ஸ அங்ஸுகோடிவேத⁴கோ வாலவேதி⁴ நாம. டா²னஸம்பாத³னந்தி வேஸாக²மண்ட³லாதீ³னங் ஸம்பாத³னங். முட்டி²கரணாதீ³ஹீதி உஸுமுட்டி²கரணஜியாகா³ஹஜியாவிஜ்ஜா²தீ³ஹி. ஏவங் க³ணாபேமாதி ஏகங் நாம ஏகமேவ, த்³வே து³கா சத்தாரி, தீணி திகானி நவ, சத்தாரி சதுக்கானி ஸோளஸாதிஆதி³னா ஏவங் க³ணனங் ஸிக்கா²பேம.
74. Yathā heṭṭhimasopānaphalakaṃ orohantassa pacchimaṃ nāma hoti, evaṃ ārohantassa paṭhamaṃ nāma hotīti vuttaṃ – ‘‘yāva pacchimasopānakaḷevarāti yāva paṭhamasopānaphalakā’’ti. Vatthuṃ sodhetvāti vatthuvijjācariyena vuttavidhinā pāsādavatthuno sodhanavidhiṃ katvā. Etthāti pāsādakaraṇe. Sattadhā bhinnassa vālaggassa aṃsukoṭivedhako vālavedhi nāma. Ṭhānasampādananti vesākhamaṇḍalādīnaṃ sampādanaṃ. Muṭṭhikaraṇādīhīti usumuṭṭhikaraṇajiyāgāhajiyāvijjhādīhi. Evaṃ gaṇāpemāti ekaṃ nāma ekameva, dve dukā cattāri, tīṇi tikāni nava, cattāri catukkāni soḷasātiādinā evaṃ gaṇanaṃ sikkhāpema.
75. கேராடிகா ஹொந்தீதி ஸமயஸ்ஸ அனுபக்கிலிட்ட²கரணமாயாஸாடெ²ய்யேன ஸமன்னாக³தா ஹொந்தி. தங் த³மனங் ஜீவிதஹேதுபி நாதிக்கமதி, அயமஸ்ஸ ஜாதிதோ³ஸாபா⁴வோ.
75.Kerāṭikā hontīti samayassa anupakkiliṭṭhakaraṇamāyāsāṭheyyena samannāgatā honti. Taṃ damanaṃ jīvitahetupi nātikkamati, ayamassa jātidosābhāvo.
76. ஸதிஸம்பஜஞ்ஞாஹி ஸமங்கி³பா⁴வத்தா²யாதி ஸததவிஹாரிபா⁴வஸாத⁴னேஹி ஸதிஸம்பஜஞ்ஞேஹி ஸமன்னாக³மத்தா²ய. நனு ச கீ²ணாஸவா ஸதிவேபுல்லப்பத்தா பஞ்ஞாவேபுல்லப்பத்தா ச, கத²ங் தஸ்ஸ ஸதிஸம்பஜஞ்ஞங் பயோக³ஸாத⁴னீயங் பவத்தந்தி ஆஹ ‘‘த்³வே ஹீ’’திஆதி³. ஸததவிஹாரீதி ஸததங் ஸமாபத்திவிஹாரிப³ஹுலா, தஸ்மா தே இச்சி²திச்சி²தக்க²ணே ப²லஸமாபத்திங் ஸமாபஜ்ஜந்தி. வுத்தவிபரியாயேன நோஸததவிஹாரினோ த³ட்ட²ப்³பா³. தேனாஹ ‘‘தத்தா²’’திஆதி³. அப்பேதுங் ந ஸக்கோதி அனாசிண்ணபா⁴வதோ.
76.Satisampajaññāhi samaṅgibhāvatthāyāti satatavihāribhāvasādhanehi satisampajaññehi samannāgamatthāya. Nanu ca khīṇāsavā sativepullappattā paññāvepullappattā ca, kathaṃ tassa satisampajaññaṃ payogasādhanīyaṃ pavattanti āha ‘‘dve hī’’tiādi. Satatavihārīti satataṃ samāpattivihāribahulā, tasmā te icchiticchitakkhaṇe phalasamāpattiṃ samāpajjanti. Vuttavipariyāyena nosatatavihārino daṭṭhabbā. Tenāha ‘‘tatthā’’tiādi. Appetuṃ na sakkoti anāciṇṇabhāvato.
தங் விதக்கெந்தோதி ‘‘ஸாமணேரஸ்ஸ ஸேனாஸனங் நத்தி², அரஞ்ஞஞ்ச ஸீஹாதீ³ஹி ஸபரிஸ்ஸயங், கிங் நு கோ² தஸ்ஸ ப⁴விஸ்ஸதீ’’தி தங் விதக்கெந்தோ. ஏவரூபோதி ஏதி³ஸோ யதா²வுத்தஸாமணேரஸதி³ஸோ கீ²ணாஸவோ. இமே த⁴ம்மேதி இமஸ்மிங் ஸுத்தே ஆக³தே ஸீலாதி³த⁴ம்மே. ஆவஜ்ஜித்வாவாதி அத்தனோ பரிஸுத்³த⁴ஸீலதாதி³ஆவஜ்ஜனஹேது ஏவ ஸமாபஜ்ஜிதுங் ஸக்கி²ஸ்ஸதி.
Taṃ vitakkentoti ‘‘sāmaṇerassa senāsanaṃ natthi, araññañca sīhādīhi saparissayaṃ, kiṃ nu kho tassa bhavissatī’’ti taṃ vitakkento. Evarūpoti ediso yathāvuttasāmaṇerasadiso khīṇāsavo. Ime dhammeti imasmiṃ sutte āgate sīlādidhamme. Āvajjitvāvāti attano parisuddhasīlatādiāvajjanahetu eva samāpajjituṃ sakkhissati.
78. ‘‘யேமே, போ⁴ கோ³தமா’’தி வசனஸ்ஸ ஸம்ப³ந்த⁴ங் த³ஸ்ஸேதுங், ‘‘ததா²க³தே கிரா’’திஆதி³ வுத்தங். ஏவந்தி ‘‘யேமே, போ⁴ கோ³தமா’’திஆதி³ஆகாரேஹி வத்துமாரத்³தோ⁴.
78.‘‘Yeme, bho gotamā’’ti vacanassa sambandhaṃ dassetuṃ, ‘‘tathāgate kirā’’tiādi vuttaṃ. Evanti ‘‘yeme, bho gotamā’’tiādiākārehi vattumāraddho.
அஜ்ஜத⁴ம்மேஸூதி அபுராதனத⁴ம்மேஸு. தக்கனமத்தானி ஹி தேஹி கப்பெத்வா ஸயங்படிபா⁴னங் விரசிதானி. புராதனதாய பரிபுண்ணதாய ஏகந்தனிய்யானிகதாய ச பரமோ உத்தமோ. தேனாஹ – ‘‘தேஸு…பே॰… உத்தமோதி அத்தோ²’’தி. ஸேஸங் ஸுவிஞ்ஞெய்யமேவ.
Ajjadhammesūti apurātanadhammesu. Takkanamattāni hi tehi kappetvā sayaṃpaṭibhānaṃ viracitāni. Purātanatāya paripuṇṇatāya ekantaniyyānikatāya ca paramo uttamo. Tenāha – ‘‘tesu…pe… uttamoti attho’’ti. Sesaṃ suviññeyyameva.
க³ணகமொக்³க³ல்லானஸுத்தவண்ணனாய லீனத்த²ப்பகாஸனா ஸமத்தா.
Gaṇakamoggallānasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 7. க³ணகமொக்³க³ல்லானஸுத்தங் • 7. Gaṇakamoggallānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 7. க³ணகமொக்³க³ல்லானஸுத்தவண்ணனா • 7. Gaṇakamoggallānasuttavaṇṇanā
