| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৭. গণকমোগ্গল্লানসুত্তৰণ্ণনা
7. Gaṇakamoggallānasuttavaṇṇanā
৭৪. এৰং মে সুতন্তি গণকমোগ্গল্লানসুত্তং। তত্থ যাৰ পচ্ছিমসোপানকল়েৰরাতি যাৰ পঠমসোপানফলকা একদিৰসেনেৰ সত্তভূমিকো পাসাদো ন সক্কা কাতুং, ৰত্থুং সোধেত্ৰা থম্ভুস্সাপনতো পট্ঠায পন যাৰ চিত্তকম্মকরণা অনুপুব্বকিরিযা চেত্থ পঞ্ঞাযতীতি দস্সেতি। যদিদং অজ্ঝেনেতি তযোপি ৰেদা ন সক্কা একদিৰসেনেৰ অধীযিতুং, এতেসং অজ্ঝেনেপি পন অনুপুব্বকিরিযাৰ পঞ্ঞাযতীতি দস্সেতি। ইস্সত্থেতি আৰুধৰিজ্জাযপি একদিৰসেনেৰ ৰালৰেধি নাম ন সক্কা কাতুং, ঠানসম্পাদনমুট্ঠিকরণাদীহি পন এত্থাপি অনুপুব্বকিরিযা পঞ্ঞাযতীতি দস্সেতি। সঙ্খানেতি গণনায। তত্থ অনুপুব্বকিরিযং অত্তনাৰ দস্সেন্তো এৰং গণাপেমাতিআদিমাহ।
74.Evaṃme sutanti gaṇakamoggallānasuttaṃ. Tattha yāva pacchimasopānakaḷevarāti yāva paṭhamasopānaphalakā ekadivaseneva sattabhūmiko pāsādo na sakkā kātuṃ, vatthuṃ sodhetvā thambhussāpanato paṭṭhāya pana yāva cittakammakaraṇā anupubbakiriyā cettha paññāyatīti dasseti. Yadidaṃ ajjheneti tayopi vedā na sakkā ekadivaseneva adhīyituṃ, etesaṃ ajjhenepi pana anupubbakiriyāva paññāyatīti dasseti. Issattheti āvudhavijjāyapi ekadivaseneva vālavedhi nāma na sakkā kātuṃ, ṭhānasampādanamuṭṭhikaraṇādīhi pana etthāpi anupubbakiriyā paññāyatīti dasseti. Saṅkhāneti gaṇanāya. Tattha anupubbakiriyaṃ attanāva dassento evaṃ gaṇāpemātiādimāha.
৭৫. সেয্যথাপি ব্রাহ্মণাতি ইধ ভগৰা যস্মা বাহিরসমযে যথা যথা সিপ্পং উগ্গণ্হন্তি, তথা তথা কেরাটিকা হোন্তি, তস্মা অত্তনো সাসনং বাহিরসমযেন অনুপমেত্ৰা ভদ্রঅস্সাজানীযেন উপমেন্তো সেয্যথাপীতিআদিমাহ। ভদ্রো হি অস্সাজানীযো যস্মিং কারণে দমিতো হোতি, তং জীৰিতহেতুপি নাতিক্কমতি। এৰমেৰ সাসনে সম্মাপটিপন্নো কুলপুত্তো সীলৰেলং নাতিক্কমতি। মুখাধানেতি মুখট্ঠপনে।
75.Seyyathāpi brāhmaṇāti idha bhagavā yasmā bāhirasamaye yathā yathā sippaṃ uggaṇhanti, tathā tathā kerāṭikā honti, tasmā attano sāsanaṃ bāhirasamayena anupametvā bhadraassājānīyena upamento seyyathāpītiādimāha. Bhadro hi assājānīyo yasmiṃ kāraṇe damito hoti, taṃ jīvitahetupi nātikkamati. Evameva sāsane sammāpaṭipanno kulaputto sīlavelaṃ nātikkamati. Mukhādhāneti mukhaṭṭhapane.
৭৬. সতিসম্পজঞ্ঞায চাতি সতিসম্পজঞ্ঞাহি সমঙ্গিভাৰত্থায । দ্ৰে হি খীণাসৰা সততৰিহারী চ নোসততৰিহারী চ। তত্থ সততৰিহারী যংকিঞ্চি কম্মং কত্ৰাপি ফলসমাপত্তিং সমাপজ্জিতুং সক্কোতি, নো সততৰিহারী পন অপ্পমত্তকেপি কিচ্চে কিচ্চপ্পসুতো হুত্ৰা ফলসমাপত্তিং অপ্পেতুং ন সক্কোতি।
76.Satisampajaññāya cāti satisampajaññāhi samaṅgibhāvatthāya . Dve hi khīṇāsavā satatavihārī ca nosatatavihārī ca. Tattha satatavihārī yaṃkiñci kammaṃ katvāpi phalasamāpattiṃ samāpajjituṃ sakkoti, no satatavihārī pana appamattakepi kicce kiccappasuto hutvā phalasamāpattiṃ appetuṃ na sakkoti.
তত্রিদং ৰত্থু – একো কির খীণাসৰত্থেরো খীণাসৰসামণেরং গহেত্ৰা অরঞ্ঞৰাসং গতো, তত্থ মহাথেরস্স সেনাসনং পত্তং, সামণেরস্স ন পাপুণাতি, তং ৰিতক্কেন্তো থেরো একদিৰসম্পি ফলসমাপত্তিং অপ্পেতুং নাসক্খি। সামণেরো পন তেমাসং ফলসমাপত্তিরতিযা ৰীতিনামেত্ৰা ‘‘সপ্পাযো , ভন্তে, অরঞ্ঞৰাসো জাতো’’তি থেরং পুচ্ছি। থেরো ‘‘ন জাতো, আৰুসো’’তি আহ। ইতি যো এৰরূপো খীণাসৰো, সো ইমে ধম্মে আদিতো পট্ঠায আৰজ্জিত্ৰাৰ সমাপজ্জিতুং সক্খিস্সতীতি দস্সেন্তো ‘‘সতিসম্পজঞ্ঞায চা’’তি আহ।
Tatridaṃ vatthu – eko kira khīṇāsavatthero khīṇāsavasāmaṇeraṃ gahetvā araññavāsaṃ gato, tattha mahātherassa senāsanaṃ pattaṃ, sāmaṇerassa na pāpuṇāti, taṃ vitakkento thero ekadivasampi phalasamāpattiṃ appetuṃ nāsakkhi. Sāmaṇero pana temāsaṃ phalasamāpattiratiyā vītināmetvā ‘‘sappāyo , bhante, araññavāso jāto’’ti theraṃ pucchi. Thero ‘‘na jāto, āvuso’’ti āha. Iti yo evarūpo khīṇāsavo, so ime dhamme ādito paṭṭhāya āvajjitvāva samāpajjituṃ sakkhissatīti dassento ‘‘satisampajaññāya cā’’ti āha.
৭৮. যেমে, ভো গোতমাতি তথাগতে কির কথযন্তেৰ ব্রাহ্মণস্স ‘‘ইমে পুগ্গলা ন আরাধেন্তি, ইমে আরাধেন্তী’’তি নযো উদপাদি, তং দস্সেন্তো এৰং ৰত্তুমারদ্ধো।
78.Yeme, bho gotamāti tathāgate kira kathayanteva brāhmaṇassa ‘‘ime puggalā na ārādhenti, ime ārādhentī’’ti nayo udapādi, taṃ dassento evaṃ vattumāraddho.
পরমজ্জধম্মেসূতি অজ্জধম্মা নাম ছসত্থারধম্মা, তেসু গোতমৰাদোৰ, পরমো উত্তমোতি অত্থো। সেসং সব্বত্থ উত্তানমেৰাতি।
Paramajjadhammesūti ajjadhammā nāma chasatthāradhammā, tesu gotamavādova, paramo uttamoti attho. Sesaṃ sabbattha uttānamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
গণকমোগ্গল্লানসুত্তৰণ্ণনা নিট্ঠিতা।
Gaṇakamoggallānasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৭. গণকমোগ্গল্লানসুত্তং • 7. Gaṇakamoggallānasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৭. গণকমোগ্গল্লানসুত্তৰণ্ণনা • 7. Gaṇakamoggallānasuttavaṇṇanā
