| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৭. গণকমোগ্গল্লানসুত্তৰণ্ণনা
7. Gaṇakamoggallānasuttavaṇṇanā
৭৪. যথা হেট্ঠিমসোপানফলকং ওরোহন্তস্স পচ্ছিমং নাম হোতি, এৰং আরোহন্তস্স পঠমং নাম হোতীতি ৰুত্তং – ‘‘যাৰ পচ্ছিমসোপানকল়েৰরাতি যাৰ পঠমসোপানফলকা’’তি। ৰত্থুং সোধেত্ৰাতি ৰত্থুৰিজ্জাচরিযেন ৰুত্তৰিধিনা পাসাদৰত্থুনো সোধনৰিধিং কত্ৰা। এত্থাতি পাসাদকরণে। সত্তধা ভিন্নস্স ৰালগ্গস্স অংসুকোটিৰেধকো ৰালৰেধি নাম। ঠানসম্পাদনন্তি ৰেসাখমণ্ডলাদীনং সম্পাদনং। মুট্ঠিকরণাদীহীতি উসুমুট্ঠিকরণজিযাগাহজিযাৰিজ্ঝাদীহি। এৰং গণাপেমাতি একং নাম একমেৰ, দ্ৰে দুকা চত্তারি, তীণি তিকানি নৰ, চত্তারি চতুক্কানি সোল়সাতিআদিনা এৰং গণনং সিক্খাপেম।
74. Yathā heṭṭhimasopānaphalakaṃ orohantassa pacchimaṃ nāma hoti, evaṃ ārohantassa paṭhamaṃ nāma hotīti vuttaṃ – ‘‘yāva pacchimasopānakaḷevarāti yāva paṭhamasopānaphalakā’’ti. Vatthuṃ sodhetvāti vatthuvijjācariyena vuttavidhinā pāsādavatthuno sodhanavidhiṃ katvā. Etthāti pāsādakaraṇe. Sattadhā bhinnassa vālaggassa aṃsukoṭivedhako vālavedhi nāma. Ṭhānasampādananti vesākhamaṇḍalādīnaṃ sampādanaṃ. Muṭṭhikaraṇādīhīti usumuṭṭhikaraṇajiyāgāhajiyāvijjhādīhi. Evaṃ gaṇāpemāti ekaṃ nāma ekameva, dve dukā cattāri, tīṇi tikāni nava, cattāri catukkāni soḷasātiādinā evaṃ gaṇanaṃ sikkhāpema.
৭৫. কেরাটিকা হোন্তীতি সমযস্স অনুপক্কিলিট্ঠকরণমাযাসাঠেয্যেন সমন্নাগতা হোন্তি। তং দমনং জীৰিতহেতুপি নাতিক্কমতি, অযমস্স জাতিদোসাভাৰো।
75.Kerāṭikā hontīti samayassa anupakkiliṭṭhakaraṇamāyāsāṭheyyena samannāgatā honti. Taṃ damanaṃ jīvitahetupi nātikkamati, ayamassa jātidosābhāvo.
৭৬. সতিসম্পজঞ্ঞাহি সমঙ্গিভাৰত্থাযাতি সততৰিহারিভাৰসাধনেহি সতিসম্পজঞ্ঞেহি সমন্নাগমত্থায। ননু চ খীণাসৰা সতিৰেপুল্লপ্পত্তা পঞ্ঞাৰেপুল্লপ্পত্তা চ, কথং তস্স সতিসম্পজঞ্ঞং পযোগসাধনীযং পৰত্তন্তি আহ ‘‘দ্ৰে হী’’তিআদি। সততৰিহারীতি সততং সমাপত্তিৰিহারিবহুলা, তস্মা তে ইচ্ছিতিচ্ছিতক্খণে ফলসমাপত্তিং সমাপজ্জন্তি। ৰুত্তৰিপরিযাযেন নোসততৰিহারিনো দট্ঠব্বা। তেনাহ ‘‘তত্থা’’তিআদি। অপ্পেতুং ন সক্কোতি অনাচিণ্ণভাৰতো।
76.Satisampajaññāhi samaṅgibhāvatthāyāti satatavihāribhāvasādhanehi satisampajaññehi samannāgamatthāya. Nanu ca khīṇāsavā sativepullappattā paññāvepullappattā ca, kathaṃ tassa satisampajaññaṃ payogasādhanīyaṃ pavattanti āha ‘‘dve hī’’tiādi. Satatavihārīti satataṃ samāpattivihāribahulā, tasmā te icchiticchitakkhaṇe phalasamāpattiṃ samāpajjanti. Vuttavipariyāyena nosatatavihārino daṭṭhabbā. Tenāha ‘‘tatthā’’tiādi. Appetuṃ na sakkoti anāciṇṇabhāvato.
তং ৰিতক্কেন্তোতি ‘‘সামণেরস্স সেনাসনং নত্থি, অরঞ্ঞঞ্চ সীহাদীহি সপরিস্সযং, কিং নু খো তস্স ভৰিস্সতী’’তি তং ৰিতক্কেন্তো। এৰরূপোতি এদিসো যথাৰুত্তসামণেরসদিসো খীণাসৰো। ইমে ধম্মেতি ইমস্মিং সুত্তে আগতে সীলাদিধম্মে। আৰজ্জিত্ৰাৰাতি অত্তনো পরিসুদ্ধসীলতাদিআৰজ্জনহেতু এৰ সমাপজ্জিতুং সক্খিস্সতি।
Taṃ vitakkentoti ‘‘sāmaṇerassa senāsanaṃ natthi, araññañca sīhādīhi saparissayaṃ, kiṃ nu kho tassa bhavissatī’’ti taṃ vitakkento. Evarūpoti ediso yathāvuttasāmaṇerasadiso khīṇāsavo. Ime dhammeti imasmiṃ sutte āgate sīlādidhamme. Āvajjitvāvāti attano parisuddhasīlatādiāvajjanahetu eva samāpajjituṃ sakkhissati.
৭৮. ‘‘যেমে, ভো গোতমা’’তি ৰচনস্স সম্বন্ধং দস্সেতুং, ‘‘তথাগতে কিরা’’তিআদি ৰুত্তং। এৰন্তি ‘‘যেমে, ভো গোতমা’’তিআদিআকারেহি ৰত্তুমারদ্ধো।
78.‘‘Yeme, bho gotamā’’ti vacanassa sambandhaṃ dassetuṃ, ‘‘tathāgate kirā’’tiādi vuttaṃ. Evanti ‘‘yeme, bho gotamā’’tiādiākārehi vattumāraddho.
অজ্জধম্মেসূতি অপুরাতনধম্মেসু। তক্কনমত্তানি হি তেহি কপ্পেত্ৰা সযংপটিভানং ৰিরচিতানি। পুরাতনতায পরিপুণ্ণতায একন্তনিয্যানিকতায চ পরমো উত্তমো। তেনাহ – ‘‘তেসু…পে॰… উত্তমোতি অত্থো’’তি। সেসং সুৰিঞ্ঞেয্যমেৰ।
Ajjadhammesūti apurātanadhammesu. Takkanamattāni hi tehi kappetvā sayaṃpaṭibhānaṃ viracitāni. Purātanatāya paripuṇṇatāya ekantaniyyānikatāya ca paramo uttamo. Tenāha – ‘‘tesu…pe… uttamoti attho’’ti. Sesaṃ suviññeyyameva.
গণকমোগ্গল্লানসুত্তৰণ্ণনায লীনত্থপ্পকাসনা সমত্তা।
Gaṇakamoggallānasuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৭. গণকমোগ্গল্লানসুত্তং • 7. Gaṇakamoggallānasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৭. গণকমোগ্গল্লানসুত্তৰণ্ণনা • 7. Gaṇakamoggallānasuttavaṇṇanā
