| Library / Tipiṭaka / တိပိဋက • Tipiṭaka / မဇ္ဈိမနိကာယ (အဋ္ဌကထာ) • Majjhimanikāya (aṭṭhakathā) |
၇. ဂဏကမောဂ္ဂလ္လာနသုတ္တဝဏ္ဏနာ
7. Gaṇakamoggallānasuttavaṇṇanā
၇၄. ဧဝံ မေ သုတန္တိ ဂဏကမောဂ္ဂလ္လာနသုတ္တံ။ တတ္ထ ယာဝ ပစ္ဆိမသောပာနကဠေဝရာတိ ယာဝ ပဌမသောပာနဖလကာ ဧကဒိဝသေနေဝ သတ္တဘူမိကော ပာသာဒော န သက္ကာ ကာတုံ, ဝတ္ထုံ သောဓေတ္ဝာ ထမ္ဘုသ္သာပနတော ပဋ္ဌာယ ပန ယာဝ စိတ္တကမ္မကရဏာ အနုပုဗ္ဗကိရိယာ စေတ္ထ ပညာယတီတိ ဒသ္သေတိ။ ယဒိဒံ အဇ္ဈေနေတိ တယောပိ ဝေဒာ န သက္ကာ ဧကဒိဝသေနေဝ အဓီယိတုံ, ဧတေသံ အဇ္ဈေနေပိ ပန အနုပုဗ္ဗကိရိယာဝ ပညာယတီတိ ဒသ္သေတိ။ ဣသ္သတ္ထေတိ အာဝုဓဝိဇ္ဇာယပိ ဧကဒိဝသေနေဝ ဝာလဝေဓိ နာမ န သက္ကာ ကာတုံ, ဌာနသမ္ပာဒနမုဋ္ဌိကရဏာဒီဟိ ပန ဧတ္ထာပိ အနုပုဗ္ဗကိရိယာ ပညာယတီတိ ဒသ္သေတိ။ သင္ခာနေတိ ဂဏနာယ။ တတ္ထ အနုပုဗ္ဗကိရိယံ အတ္တနာဝ ဒသ္သေန္တော ဧဝံ ဂဏာပေမာတိအာဒိမာဟ။
74.Evaṃme sutanti gaṇakamoggallānasuttaṃ. Tattha yāva pacchimasopānakaḷevarāti yāva paṭhamasopānaphalakā ekadivaseneva sattabhūmiko pāsādo na sakkā kātuṃ, vatthuṃ sodhetvā thambhussāpanato paṭṭhāya pana yāva cittakammakaraṇā anupubbakiriyā cettha paññāyatīti dasseti. Yadidaṃ ajjheneti tayopi vedā na sakkā ekadivaseneva adhīyituṃ, etesaṃ ajjhenepi pana anupubbakiriyāva paññāyatīti dasseti. Issattheti āvudhavijjāyapi ekadivaseneva vālavedhi nāma na sakkā kātuṃ, ṭhānasampādanamuṭṭhikaraṇādīhi pana etthāpi anupubbakiriyā paññāyatīti dasseti. Saṅkhāneti gaṇanāya. Tattha anupubbakiriyaṃ attanāva dassento evaṃ gaṇāpemātiādimāha.
၇၅. သေယ္ယထာပိ ဗ္ရာဟ္မဏာတိ ဣဓ ဘဂဝာ ယသ္မာ ဗာဟိရသမယေ ယထာ ယထာ သိပ္ပံ ဥဂ္ဂဏ္ဟန္တိ, တထာ တထာ ကေရာဋိကာ ဟောန္တိ, တသ္မာ အတ္တနော သာသနံ ဗာဟိရသမယေန အနုပမေတ္ဝာ ဘဒ္ရအသ္သာဇာနီယေန ဥပမေန္တော သေယ္ယထာပီတိအာဒိမာဟ။ ဘဒ္ရော ဟိ အသ္သာဇာနီယော ယသ္မိံ ကာရဏေ ဒမိတော ဟောတိ, တံ ဇီဝိတဟေတုပိ နာတိက္ကမတိ။ ဧဝမေဝ သာသနေ သမ္မာပဋိပန္နော ကုလပုတ္တော သီလဝေလံ နာတိက္ကမတိ။ မုခာဓာနေတိ မုခဋ္ဌပနေ။
75.Seyyathāpi brāhmaṇāti idha bhagavā yasmā bāhirasamaye yathā yathā sippaṃ uggaṇhanti, tathā tathā kerāṭikā honti, tasmā attano sāsanaṃ bāhirasamayena anupametvā bhadraassājānīyena upamento seyyathāpītiādimāha. Bhadro hi assājānīyo yasmiṃ kāraṇe damito hoti, taṃ jīvitahetupi nātikkamati. Evameva sāsane sammāpaṭipanno kulaputto sīlavelaṃ nātikkamati. Mukhādhāneti mukhaṭṭhapane.
၇၆. သတိသမ္ပဇညာယ စာတိ သတိသမ္ပဇညာဟိ သမင္ဂိဘာဝတ္ထာယ ။ ဒ္ဝေ ဟိ ခီဏာသဝာ သတတဝိဟာရီ စ နောသတတဝိဟာရီ စ။ တတ္ထ သတတဝိဟာရီ ယံကိဉ္စိ ကမ္မံ ကတ္ဝာပိ ဖလသမာပတ္တိံ သမာပဇ္ဇိတုံ သက္ကောတိ, နော သတတဝိဟာရီ ပန အပ္ပမတ္တကေပိ ကိစ္စေ ကိစ္စပ္ပသုတော ဟုတ္ဝာ ဖလသမာပတ္တိံ အပ္ပေတုံ န သက္ကောတိ။
76.Satisampajaññāya cāti satisampajaññāhi samaṅgibhāvatthāya . Dve hi khīṇāsavā satatavihārī ca nosatatavihārī ca. Tattha satatavihārī yaṃkiñci kammaṃ katvāpi phalasamāpattiṃ samāpajjituṃ sakkoti, no satatavihārī pana appamattakepi kicce kiccappasuto hutvā phalasamāpattiṃ appetuṃ na sakkoti.
တတ္ရိဒံ ဝတ္ထု – ဧကော ကိရ ခီဏာသဝတ္ထေရော ခီဏာသဝသာမဏေရံ ဂဟေတ္ဝာ အရညဝာသံ ဂတော, တတ္ထ မဟာထေရသ္သ သေနာသနံ ပတ္တံ, သာမဏေရသ္သ န ပာပုဏာတိ, တံ ဝိတက္ကေန္တော ထေရော ဧကဒိဝသမ္ပိ ဖလသမာပတ္တိံ အပ္ပေတုံ နာသက္ခိ။ သာမဏေရော ပန တေမာသံ ဖလသမာပတ္တိရတိယာ ဝီတိနာမေတ္ဝာ ‘‘သပ္ပာယော , ဘန္တေ, အရညဝာသော ဇာတော’’တိ ထေရံ ပုစ္ဆိ။ ထေရော ‘‘န ဇာတော, အာဝုသော’’တိ အာဟ။ ဣတိ ယော ဧဝရူပော ခီဏာသဝော, သော ဣမေ ဓမ္မေ အာဒိတော ပဋ္ဌာယ အာဝဇ္ဇိတ္ဝာဝ သမာပဇ္ဇိတုံ သက္ခိသ္သတီတိ ဒသ္သေန္တော ‘‘သတိသမ္ပဇညာယ စာ’’တိ အာဟ။
Tatridaṃ vatthu – eko kira khīṇāsavatthero khīṇāsavasāmaṇeraṃ gahetvā araññavāsaṃ gato, tattha mahātherassa senāsanaṃ pattaṃ, sāmaṇerassa na pāpuṇāti, taṃ vitakkento thero ekadivasampi phalasamāpattiṃ appetuṃ nāsakkhi. Sāmaṇero pana temāsaṃ phalasamāpattiratiyā vītināmetvā ‘‘sappāyo , bhante, araññavāso jāto’’ti theraṃ pucchi. Thero ‘‘na jāto, āvuso’’ti āha. Iti yo evarūpo khīṇāsavo, so ime dhamme ādito paṭṭhāya āvajjitvāva samāpajjituṃ sakkhissatīti dassento ‘‘satisampajaññāya cā’’ti āha.
၇၈. ယေမေ, ဘော ဂောတမာတိ တထာဂတေ ကိရ ကထယန္တေဝ ဗ္ရာဟ္မဏသ္သ ‘‘ဣမေ ပုဂ္ဂလာ န အာရာဓေန္တိ, ဣမေ အာရာဓေန္တီ’’တိ နယော ဥဒပာဒိ, တံ ဒသ္သေန္တော ဧဝံ ဝတ္တုမာရဒ္ဓော။
78.Yeme, bho gotamāti tathāgate kira kathayanteva brāhmaṇassa ‘‘ime puggalā na ārādhenti, ime ārādhentī’’ti nayo udapādi, taṃ dassento evaṃ vattumāraddho.
ပရမဇ္ဇဓမ္မေသူတိ အဇ္ဇဓမ္မာ နာမ ဆသတ္ထာရဓမ္မာ, တေသု ဂောတမဝာဒောဝ, ပရမော ဥတ္တမောတိ အတ္ထော။ သေသံ သဗ္ဗတ္ထ ဥတ္တာနမေဝာတိ။
Paramajjadhammesūti ajjadhammā nāma chasatthāradhammā, tesu gotamavādova, paramo uttamoti attho. Sesaṃ sabbattha uttānamevāti.
ပပဉ္စသူဒနိယာ မဇ္ဈိမနိကာယဋ္ဌကထာယ
Papañcasūdaniyā majjhimanikāyaṭṭhakathāya
ဂဏကမောဂ္ဂလ္လာနသုတ္တဝဏ္ဏနာ နိဋ္ဌိတာ။
Gaṇakamoggallānasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / မဇ္ဈိမနိကာယ • Majjhimanikāya / ၇. ဂဏကမောဂ္ဂလ္လာနသုတ္တံ • 7. Gaṇakamoggallānasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / မဇ္ဈိမနိကာယ (ဋီကာ) • Majjhimanikāya (ṭīkā) / ၇. ဂဏကမောဂ္ဂလ္လာနသုတ္တဝဏ္ဏနာ • 7. Gaṇakamoggallānasuttavaṇṇanā
