| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) |
༧. གཎཀམོགྒལླཱནསུཏྟཝཎྞནཱ
7. Gaṇakamoggallānasuttavaṇṇanā
༧༤. ཨེཝཾ མེ སུཏནྟི གཎཀམོགྒལླཱནསུཏྟཾ། ཏཏྠ ཡཱཝ པཙྪིམསོཔཱནཀལེ༹ཝརཱཏི ཡཱཝ པཋམསོཔཱནཕལཀཱ ཨེཀདིཝསེནེཝ སཏྟབྷཱུམིཀོ པཱསཱདོ ན སཀྐཱ ཀཱཏུཾ, ཝཏྠུཾ སོདྷེཏྭཱ ཐམྦྷུསྶཱཔནཏོ པཊྛཱཡ པན ཡཱཝ ཙིཏྟཀམྨཀརཎཱ ཨནུཔུབྦཀིརིཡཱ ཙེཏྠ པཉྙཱཡཏཱིཏི དསྶེཏི། ཡདིདཾ ཨཛ྄ཛྷེནེཏི ཏཡོཔི ཝེདཱ ན སཀྐཱ ཨེཀདིཝསེནེཝ ཨདྷཱིཡིཏུཾ, ཨེཏེསཾ ཨཛ྄ཛྷེནེཔི པན ཨནུཔུབྦཀིརིཡཱཝ པཉྙཱཡཏཱིཏི དསྶེཏི། ཨིསྶཏྠེཏི ཨཱཝུདྷཝིཛྫཱཡཔི ཨེཀདིཝསེནེཝ ཝཱལཝེདྷི ནཱམ ན སཀྐཱ ཀཱཏུཾ, ཋཱནསམྤཱདནམུཊྛིཀརཎཱདཱིཧི པན ཨེཏྠཱཔི ཨནུཔུབྦཀིརིཡཱ པཉྙཱཡཏཱིཏི དསྶེཏི། སངྑཱནེཏི གཎནཱཡ། ཏཏྠ ཨནུཔུབྦཀིརིཡཾ ཨཏྟནཱཝ དསྶེནྟོ ཨེཝཾ གཎཱཔེམཱཏིཨཱདིམཱཧ།
74.Evaṃme sutanti gaṇakamoggallānasuttaṃ. Tattha yāva pacchimasopānakaḷevarāti yāva paṭhamasopānaphalakā ekadivaseneva sattabhūmiko pāsādo na sakkā kātuṃ, vatthuṃ sodhetvā thambhussāpanato paṭṭhāya pana yāva cittakammakaraṇā anupubbakiriyā cettha paññāyatīti dasseti. Yadidaṃ ajjheneti tayopi vedā na sakkā ekadivaseneva adhīyituṃ, etesaṃ ajjhenepi pana anupubbakiriyāva paññāyatīti dasseti. Issattheti āvudhavijjāyapi ekadivaseneva vālavedhi nāma na sakkā kātuṃ, ṭhānasampādanamuṭṭhikaraṇādīhi pana etthāpi anupubbakiriyā paññāyatīti dasseti. Saṅkhāneti gaṇanāya. Tattha anupubbakiriyaṃ attanāva dassento evaṃ gaṇāpemātiādimāha.
༧༥. སེཡྻཐཱཔི བྲཱཧྨཎཱཏི ཨིདྷ བྷགཝཱ ཡསྨཱ བཱཧིརསམཡེ ཡཐཱ ཡཐཱ སིཔྤཾ ཨུགྒཎྷནྟི, ཏཐཱ ཏཐཱ ཀེརཱཊིཀཱ ཧོནྟི, ཏསྨཱ ཨཏྟནོ སཱསནཾ བཱཧིརསམཡེན ཨནུཔམེཏྭཱ བྷདྲཨསྶཱཛཱནཱིཡེན ཨུཔམེནྟོ སེཡྻཐཱཔཱིཏིཨཱདིམཱཧ། བྷདྲོ ཧི ཨསྶཱཛཱནཱིཡོ ཡསྨིཾ ཀཱརཎེ དམིཏོ ཧོཏི, ཏཾ ཛཱིཝིཏཧེཏུཔི ནཱཏིཀྐམཏི། ཨེཝམེཝ སཱསནེ སམྨཱཔཊིཔནྣོ ཀུལཔུཏྟོ སཱིལཝེལཾ ནཱཏིཀྐམཏི། མུཁཱདྷཱནེཏི མུཁཊྛཔནེ།
75.Seyyathāpi brāhmaṇāti idha bhagavā yasmā bāhirasamaye yathā yathā sippaṃ uggaṇhanti, tathā tathā kerāṭikā honti, tasmā attano sāsanaṃ bāhirasamayena anupametvā bhadraassājānīyena upamento seyyathāpītiādimāha. Bhadro hi assājānīyo yasmiṃ kāraṇe damito hoti, taṃ jīvitahetupi nātikkamati. Evameva sāsane sammāpaṭipanno kulaputto sīlavelaṃ nātikkamati. Mukhādhāneti mukhaṭṭhapane.
༧༦. སཏིསམྤཛཉྙཱཡ ཙཱཏི སཏིསམྤཛཉྙཱཧི སམངྒིབྷཱཝཏྠཱཡ ། དྭེ ཧི ཁཱིཎཱསཝཱ སཏཏཝིཧཱརཱི ཙ ནོསཏཏཝིཧཱརཱི ཙ། ཏཏྠ སཏཏཝིཧཱརཱི ཡཾཀིཉྩི ཀམྨཾ ཀཏྭཱཔི ཕལསམཱཔཏྟིཾ སམཱཔཛྫིཏུཾ སཀྐོཏི, ནོ སཏཏཝིཧཱརཱི པན ཨཔྤམཏྟཀེཔི ཀིཙྩེ ཀིཙྩཔྤསུཏོ ཧུཏྭཱ ཕལསམཱཔཏྟིཾ ཨཔྤེཏུཾ ན སཀྐོཏི།
76.Satisampajaññāya cāti satisampajaññāhi samaṅgibhāvatthāya . Dve hi khīṇāsavā satatavihārī ca nosatatavihārī ca. Tattha satatavihārī yaṃkiñci kammaṃ katvāpi phalasamāpattiṃ samāpajjituṃ sakkoti, no satatavihārī pana appamattakepi kicce kiccappasuto hutvā phalasamāpattiṃ appetuṃ na sakkoti.
ཏཏྲིདཾ ཝཏྠུ – ཨེཀོ ཀིར ཁཱིཎཱསཝཏྠེརོ ཁཱིཎཱསཝསཱམཎེརཾ གཧེཏྭཱ ཨརཉྙཝཱསཾ གཏོ, ཏཏྠ མཧཱཐེརསྶ སེནཱསནཾ པཏྟཾ, སཱམཎེརསྶ ན པཱཔུཎཱཏི, ཏཾ ཝིཏཀྐེནྟོ ཐེརོ ཨེཀདིཝསམྤི ཕལསམཱཔཏྟིཾ ཨཔྤེཏུཾ ནཱསཀྑི། སཱམཎེརོ པན ཏེམཱསཾ ཕལསམཱཔཏྟིརཏིཡཱ ཝཱིཏིནཱམེཏྭཱ ‘‘སཔྤཱཡོ , བྷནྟེ, ཨརཉྙཝཱསོ ཛཱཏོ’’ཏི ཐེརཾ པུཙྪི། ཐེརོ ‘‘ན ཛཱཏོ, ཨཱཝུསོ’’ཏི ཨཱཧ། ཨིཏི ཡོ ཨེཝརཱུཔོ ཁཱིཎཱསཝོ, སོ ཨིམེ དྷམྨེ ཨཱདིཏོ པཊྛཱཡ ཨཱཝཛྫིཏྭཱཝ སམཱཔཛྫིཏུཾ སཀྑིསྶཏཱིཏི དསྶེནྟོ ‘‘སཏིསམྤཛཉྙཱཡ ཙཱ’’ཏི ཨཱཧ།
Tatridaṃ vatthu – eko kira khīṇāsavatthero khīṇāsavasāmaṇeraṃ gahetvā araññavāsaṃ gato, tattha mahātherassa senāsanaṃ pattaṃ, sāmaṇerassa na pāpuṇāti, taṃ vitakkento thero ekadivasampi phalasamāpattiṃ appetuṃ nāsakkhi. Sāmaṇero pana temāsaṃ phalasamāpattiratiyā vītināmetvā ‘‘sappāyo , bhante, araññavāso jāto’’ti theraṃ pucchi. Thero ‘‘na jāto, āvuso’’ti āha. Iti yo evarūpo khīṇāsavo, so ime dhamme ādito paṭṭhāya āvajjitvāva samāpajjituṃ sakkhissatīti dassento ‘‘satisampajaññāya cā’’ti āha.
༧༨. ཡེམེ, བྷོ གོཏམཱཏི ཏཐཱགཏེ ཀིར ཀཐཡནྟེཝ བྲཱཧྨཎསྶ ‘‘ཨིམེ པུགྒལཱ ན ཨཱརཱདྷེནྟི, ཨིམེ ཨཱརཱདྷེནྟཱི’’ཏི ནཡོ ཨུདཔཱདི, ཏཾ དསྶེནྟོ ཨེཝཾ ཝཏྟུམཱརདྡྷོ།
78.Yeme, bho gotamāti tathāgate kira kathayanteva brāhmaṇassa ‘‘ime puggalā na ārādhenti, ime ārādhentī’’ti nayo udapādi, taṃ dassento evaṃ vattumāraddho.
པརམཛྫདྷམྨེསཱུཏི ཨཛྫདྷམྨཱ ནཱམ ཚསཏྠཱརདྷམྨཱ, ཏེསུ གོཏམཝཱདོཝ, པརམོ ཨུཏྟམོཏི ཨཏྠོ། སེསཾ སབྦཏྠ ཨུཏྟཱནམེཝཱཏི།
Paramajjadhammesūti ajjadhammā nāma chasatthāradhammā, tesu gotamavādova, paramo uttamoti attho. Sesaṃ sabbattha uttānamevāti.
པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ
Papañcasūdaniyā majjhimanikāyaṭṭhakathāya
གཎཀམོགྒལླཱནསུཏྟཝཎྞནཱ ནིཊྛིཏཱ།
Gaṇakamoggallānasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༧. གཎཀམོགྒལླཱནསུཏྟཾ • 7. Gaṇakamoggallānasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༧. གཎཀམོགྒལླཱནསུཏྟཝཎྞནཱ • 7. Gaṇakamoggallānasuttavaṇṇanā
