| Library / Tipiṭaka / तिपिटक • Tipiṭaka / पटिसम्भिदामग्गपाळि • Paṭisambhidāmaggapāḷi |
३. आनापानस्सतिकथा
3. Ānāpānassatikathā
१. गणनवार
1. Gaṇanavāra
१५२. सोळसवत्थुकं आनापानस्सतिसमाधिं 1 भावयतो समाधिकानि द्वे ञाणसतानि उप्पज्जन्ति – अट्ठ परिपन्थे 2 ञाणानि, अट्ठ च उपकारे ञाणानि, अट्ठारस उपक्किलेसे ञाणानि, तेरस वोदाने ञाणानि, बात्तिंस सतोकारिस्स 3 ञाणानि, चतुवीसति समाधिवसेन ञाणानि, द्वेसत्तति विपस्सनावसेन ञाणानि, अट्ठ निब्बिदाञाणानि, अट्ठ निब्बिदानुलोमञाणानि, अट्ठ निब्बिदापटिप्पस्सद्धिञाणानि, एकवीसति विमुत्तिसुखे ञाणानि।
152. Soḷasavatthukaṃ ānāpānassatisamādhiṃ 4 bhāvayato samādhikāni dve ñāṇasatāni uppajjanti – aṭṭha paripanthe 5 ñāṇāni, aṭṭha ca upakāre ñāṇāni, aṭṭhārasa upakkilese ñāṇāni, terasa vodāne ñāṇāni, bāttiṃsa satokārissa 6 ñāṇāni, catuvīsati samādhivasena ñāṇāni, dvesattati vipassanāvasena ñāṇāni, aṭṭha nibbidāñāṇāni, aṭṭha nibbidānulomañāṇāni, aṭṭha nibbidāpaṭippassaddhiñāṇāni, ekavīsati vimuttisukhe ñāṇāni.
कतमानि अट्ठ परिपन्थे ञाणानि, अट्ठ च उपकारे ञाणानि? कामच्छन्दो समाधिस्स परिपन्थो, नेक्खम्मं समाधिस्स उपकारं। ब्यापादो समाधिस्स परिपन्थो, अब्यापादो समाधिस्स उपकारं। थिनमिद्धं समाधिस्स परिपन्थो, आलोकसञ्ञा समाधिस्स उपकारं। उद्धच्चं समाधिस्स परिपन्थो, अविक्खेपो समाधिस्स उपकारं। विचिकिच्छा समाधिस्स परिपन्थो, धम्मववत्थानं समाधिस्स उपकारं। अविज्जा समाधिस्स परिपन्थो, ञाणं समाधिस्स उपकारं। अरति समाधिस्स परिपन्थो, पामोज्जं समाधिस्स उपकारं। सब्बेपि अकुसला धम्मा समाधिस्स परिपन्था, सब्बेपि कुसला धम्मा समाधिस्स उपकारा। इमानि अट्ठ परिपन्थे ञाणानि, अट्ठ च उपकारे ञाणानि।
Katamāni aṭṭha paripanthe ñāṇāni, aṭṭha ca upakāre ñāṇāni? Kāmacchando samādhissa paripantho, nekkhammaṃ samādhissa upakāraṃ. Byāpādo samādhissa paripantho, abyāpādo samādhissa upakāraṃ. Thinamiddhaṃ samādhissa paripantho, ālokasaññā samādhissa upakāraṃ. Uddhaccaṃ samādhissa paripantho, avikkhepo samādhissa upakāraṃ. Vicikicchā samādhissa paripantho, dhammavavatthānaṃ samādhissa upakāraṃ. Avijjā samādhissa paripantho, ñāṇaṃ samādhissa upakāraṃ. Arati samādhissa paripantho, pāmojjaṃ samādhissa upakāraṃ. Sabbepi akusalā dhammā samādhissa paripanthā, sabbepi kusalā dhammā samādhissa upakārā. Imāni aṭṭha paripanthe ñāṇāni, aṭṭha ca upakāre ñāṇāni.
गणनवारो पठमो।
Gaṇanavāro paṭhamo.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / पटिसम्भिदामग्ग-अट्ठकथा • Paṭisambhidāmagga-aṭṭhakathā / १. गणनवारवण्णना • 1. Gaṇanavāravaṇṇanā
