| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၃. အာနာပာနသ္သတိကထာ
3. Ānāpānassatikathā
၁. ဂဏနဝာရ
1. Gaṇanavāra
၁၅၂. သောဠသဝတ္ထုကံ အာနာပာနသ္သတိသမာဓိံ 1 ဘာဝယတော သမာဓိကာနိ ဒ္ဝေ ဉာဏသတာနိ ဥပ္ပဇ္ဇန္တိ – အဋ္ဌ ပရိပန္ထေ 2 ဉာဏာနိ, အဋ္ဌ စ ဥပကာရေ ဉာဏာနိ, အဋ္ဌာရသ ဥပက္ကိလေသေ ဉာဏာနိ, တေရသ ဝောဒာနေ ဉာဏာနိ, ဗာတ္တိံသ သတောကာရိသ္သ 3 ဉာဏာနိ, စတုဝီသတိ သမာဓိဝသေန ဉာဏာနိ, ဒ္ဝေသတ္တတိ ဝိပသ္သနာဝသေန ဉာဏာနိ, အဋ္ဌ နိဗ္ဗိဒာဉာဏာနိ, အဋ္ဌ နိဗ္ဗိဒာနုလောမဉာဏာနိ, အဋ္ဌ နိဗ္ဗိဒာပဋိပ္ပသ္သဒ္ဓိဉာဏာနိ, ဧကဝီသတိ ဝိမုတ္တိသုခေ ဉာဏာနိ။
152. Soḷasavatthukaṃ ānāpānassatisamādhiṃ 4 bhāvayato samādhikāni dve ñāṇasatāni uppajjanti – aṭṭha paripanthe 5 ñāṇāni, aṭṭha ca upakāre ñāṇāni, aṭṭhārasa upakkilese ñāṇāni, terasa vodāne ñāṇāni, bāttiṃsa satokārissa 6 ñāṇāni, catuvīsati samādhivasena ñāṇāni, dvesattati vipassanāvasena ñāṇāni, aṭṭha nibbidāñāṇāni, aṭṭha nibbidānulomañāṇāni, aṭṭha nibbidāpaṭippassaddhiñāṇāni, ekavīsati vimuttisukhe ñāṇāni.
ကတမာနိ အဋ္ဌ ပရိပန္ထေ ဉာဏာနိ, အဋ္ဌ စ ဥပကာရေ ဉာဏာနိ? ကာမစ္ဆန္ဒော သမာဓိသ္သ ပရိပန္ထော, နေက္ခမ္မံ သမာဓိသ္သ ဥပကာရံ။ ဗ္ယာပာဒော သမာဓိသ္သ ပရိပန္ထော, အဗ္ယာပာဒော သမာဓိသ္သ ဥပကာရံ။ ထိနမိဒ္ဓံ သမာဓိသ္သ ပရိပန္ထော, အာလောကသညာ သမာဓိသ္သ ဥပကာရံ။ ဥဒ္ဓစ္စံ သမာဓိသ္သ ပရိပန္ထော, အဝိက္ခေပော သမာဓိသ္သ ဥပကာရံ။ ဝိစိကိစ္ဆာ သမာဓိသ္သ ပရိပန္ထော, ဓမ္မဝဝတ္ထာနံ သမာဓိသ္သ ဥပကာရံ။ အဝိဇ္ဇာ သမာဓိသ္သ ပရိပန္ထော, ဉာဏံ သမာဓိသ္သ ဥပကာရံ။ အရတိ သမာဓိသ္သ ပရိပန္ထော, ပာမောဇ္ဇံ သမာဓိသ္သ ဥပကာရံ။ သဗ္ဗေပိ အကုသလာ ဓမ္မာ သမာဓိသ္သ ပရိပန္ထာ, သဗ္ဗေပိ ကုသလာ ဓမ္မာ သမာဓိသ္သ ဥပကာရာ။ ဣမာနိ အဋ္ဌ ပရိပန္ထေ ဉာဏာနိ, အဋ္ဌ စ ဥပကာရေ ဉာဏာနိ။
Katamāni aṭṭha paripanthe ñāṇāni, aṭṭha ca upakāre ñāṇāni? Kāmacchando samādhissa paripantho, nekkhammaṃ samādhissa upakāraṃ. Byāpādo samādhissa paripantho, abyāpādo samādhissa upakāraṃ. Thinamiddhaṃ samādhissa paripantho, ālokasaññā samādhissa upakāraṃ. Uddhaccaṃ samādhissa paripantho, avikkhepo samādhissa upakāraṃ. Vicikicchā samādhissa paripantho, dhammavavatthānaṃ samādhissa upakāraṃ. Avijjā samādhissa paripantho, ñāṇaṃ samādhissa upakāraṃ. Arati samādhissa paripantho, pāmojjaṃ samādhissa upakāraṃ. Sabbepi akusalā dhammā samādhissa paripanthā, sabbepi kusalā dhammā samādhissa upakārā. Imāni aṭṭha paripanthe ñāṇāni, aṭṭha ca upakāre ñāṇāni.
ဂဏနဝာရော ပဌမော။
Gaṇanavāro paṭhamo.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၁. ဂဏနဝာရဝဏ္ဏနာ • 1. Gaṇanavāravaṇṇanā
