| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi |
೩. ಆನಾಪಾನಸ್ಸತಿಕಥಾ
3. Ānāpānassatikathā
೧. ಗಣನವಾರ
1. Gaṇanavāra
೧೫೨. ಸೋಳಸವತ್ಥುಕಂ ಆನಾಪಾನಸ್ಸತಿಸಮಾಧಿಂ 1 ಭಾವಯತೋ ಸಮಾಧಿಕಾನಿ ದ್ವೇ ಞಾಣಸತಾನಿ ಉಪ್ಪಜ್ಜನ್ತಿ – ಅಟ್ಠ ಪರಿಪನ್ಥೇ 2 ಞಾಣಾನಿ, ಅಟ್ಠ ಚ ಉಪಕಾರೇ ಞಾಣಾನಿ, ಅಟ್ಠಾರಸ ಉಪಕ್ಕಿಲೇಸೇ ಞಾಣಾನಿ, ತೇರಸ ವೋದಾನೇ ಞಾಣಾನಿ, ಬಾತ್ತಿಂಸ ಸತೋಕಾರಿಸ್ಸ 3 ಞಾಣಾನಿ, ಚತುವೀಸತಿ ಸಮಾಧಿವಸೇನ ಞಾಣಾನಿ, ದ್ವೇಸತ್ತತಿ ವಿಪಸ್ಸನಾವಸೇನ ಞಾಣಾನಿ, ಅಟ್ಠ ನಿಬ್ಬಿದಾಞಾಣಾನಿ, ಅಟ್ಠ ನಿಬ್ಬಿದಾನುಲೋಮಞಾಣಾನಿ, ಅಟ್ಠ ನಿಬ್ಬಿದಾಪಟಿಪ್ಪಸ್ಸದ್ಧಿಞಾಣಾನಿ, ಏಕವೀಸತಿ ವಿಮುತ್ತಿಸುಖೇ ಞಾಣಾನಿ।
152. Soḷasavatthukaṃ ānāpānassatisamādhiṃ 4 bhāvayato samādhikāni dve ñāṇasatāni uppajjanti – aṭṭha paripanthe 5 ñāṇāni, aṭṭha ca upakāre ñāṇāni, aṭṭhārasa upakkilese ñāṇāni, terasa vodāne ñāṇāni, bāttiṃsa satokārissa 6 ñāṇāni, catuvīsati samādhivasena ñāṇāni, dvesattati vipassanāvasena ñāṇāni, aṭṭha nibbidāñāṇāni, aṭṭha nibbidānulomañāṇāni, aṭṭha nibbidāpaṭippassaddhiñāṇāni, ekavīsati vimuttisukhe ñāṇāni.
ಕತಮಾನಿ ಅಟ್ಠ ಪರಿಪನ್ಥೇ ಞಾಣಾನಿ, ಅಟ್ಠ ಚ ಉಪಕಾರೇ ಞಾಣಾನಿ? ಕಾಮಚ್ಛನ್ದೋ ಸಮಾಧಿಸ್ಸ ಪರಿಪನ್ಥೋ, ನೇಕ್ಖಮ್ಮಂ ಸಮಾಧಿಸ್ಸ ಉಪಕಾರಂ। ಬ್ಯಾಪಾದೋ ಸಮಾಧಿಸ್ಸ ಪರಿಪನ್ಥೋ, ಅಬ್ಯಾಪಾದೋ ಸಮಾಧಿಸ್ಸ ಉಪಕಾರಂ। ಥಿನಮಿದ್ಧಂ ಸಮಾಧಿಸ್ಸ ಪರಿಪನ್ಥೋ, ಆಲೋಕಸಞ್ಞಾ ಸಮಾಧಿಸ್ಸ ಉಪಕಾರಂ। ಉದ್ಧಚ್ಚಂ ಸಮಾಧಿಸ್ಸ ಪರಿಪನ್ಥೋ, ಅವಿಕ್ಖೇಪೋ ಸಮಾಧಿಸ್ಸ ಉಪಕಾರಂ। ವಿಚಿಕಿಚ್ಛಾ ಸಮಾಧಿಸ್ಸ ಪರಿಪನ್ಥೋ, ಧಮ್ಮವವತ್ಥಾನಂ ಸಮಾಧಿಸ್ಸ ಉಪಕಾರಂ। ಅವಿಜ್ಜಾ ಸಮಾಧಿಸ್ಸ ಪರಿಪನ್ಥೋ, ಞಾಣಂ ಸಮಾಧಿಸ್ಸ ಉಪಕಾರಂ। ಅರತಿ ಸಮಾಧಿಸ್ಸ ಪರಿಪನ್ಥೋ, ಪಾಮೋಜ್ಜಂ ಸಮಾಧಿಸ್ಸ ಉಪಕಾರಂ। ಸಬ್ಬೇಪಿ ಅಕುಸಲಾ ಧಮ್ಮಾ ಸಮಾಧಿಸ್ಸ ಪರಿಪನ್ಥಾ, ಸಬ್ಬೇಪಿ ಕುಸಲಾ ಧಮ್ಮಾ ಸಮಾಧಿಸ್ಸ ಉಪಕಾರಾ। ಇಮಾನಿ ಅಟ್ಠ ಪರಿಪನ್ಥೇ ಞಾಣಾನಿ, ಅಟ್ಠ ಚ ಉಪಕಾರೇ ಞಾಣಾನಿ।
Katamāni aṭṭha paripanthe ñāṇāni, aṭṭha ca upakāre ñāṇāni? Kāmacchando samādhissa paripantho, nekkhammaṃ samādhissa upakāraṃ. Byāpādo samādhissa paripantho, abyāpādo samādhissa upakāraṃ. Thinamiddhaṃ samādhissa paripantho, ālokasaññā samādhissa upakāraṃ. Uddhaccaṃ samādhissa paripantho, avikkhepo samādhissa upakāraṃ. Vicikicchā samādhissa paripantho, dhammavavatthānaṃ samādhissa upakāraṃ. Avijjā samādhissa paripantho, ñāṇaṃ samādhissa upakāraṃ. Arati samādhissa paripantho, pāmojjaṃ samādhissa upakāraṃ. Sabbepi akusalā dhammā samādhissa paripanthā, sabbepi kusalā dhammā samādhissa upakārā. Imāni aṭṭha paripanthe ñāṇāni, aṭṭha ca upakāre ñāṇāni.
ಗಣನವಾರೋ ಪಠಮೋ।
Gaṇanavāro paṭhamo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā / ೧. ಗಣನವಾರವಣ್ಣನಾ • 1. Gaṇanavāravaṇṇanā
