| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
3. ஆனாபானஸ்ஸதிகதா²
3. Ānāpānassatikathā
1. க³ணனவாரவண்ணனா
1. Gaṇanavāravaṇṇanā
152. இதா³னி தி³ட்டி²கதா²னந்தரங் கதி²தாய ஆனாபானஸ்ஸதிகதா²ய அபுப்³ப³த்தா²னுவண்ணனா அனுப்பத்தா. அயஞ்ஹி ஆனாபானஸ்ஸதிகதா² தி³ட்டி²கதா²ய ஸுவிதி³ததி³ட்டா²தீ³னவஸ்ஸ மிச்சா²தி³ட்டி²மலவிஸோத⁴னேன ஸுவிஸுத்³த⁴சித்தஸ்ஸ யதா²பூ⁴தாவபோ³தா⁴ய ஸமாதி⁴பா⁴வனா ஸுகரா ஹோதி, ஸப்³ப³ஸமாதி⁴பா⁴வனாஸு ச ஸப்³ப³ஸப்³ப³ஞ்ஞுபோ³தி⁴ஸத்தானங் போ³தி⁴மூலே இமினாவ ஸமாதி⁴னா ஸமாஹிதசித்தானங் யதா²பூ⁴தாவபோ³த⁴தோ அயமேவ ஸமாதி⁴பா⁴வனா பதா⁴னாதி ச தி³ட்டி²கதா²னந்தரங் கதி²தா. தத்த² ஸோளஸவத்து²கங் ஆனாபானஸ்ஸதிஸமாதி⁴ங் பா⁴வயதோ ஸமதி⁴கானி த்³வே ஞாணஸதானி உப்பஜ்ஜந்தீதி ஞாணக³ணனுத்³தே³ஸோ, அட்ட² பரிபந்தே² ஞாணானீதிஆதி³ ஞாணக³ணனநித்³தே³ஸோ, கதமானி அட்ட² பரிபந்தே² ஞாணானீதிஆதி³. இமானி ஏகவீஸதி விமுத்திஸுகே² ஞாணானீதிபரியந்தங் ஸப்³ப³ஞாணானங் வித்தா²ரனித்³தே³ஸோ, அந்தே ஸோளஸவத்து²கங் ஆனாபானஸ்ஸதிஸமாதி⁴ங் பா⁴வயதோதிஆதி³ நிக³மனந்தி ஏவங் தாவ பாளிவவத்தா²னங் வேதி³தப்³ப³ங்.
152. Idāni diṭṭhikathānantaraṃ kathitāya ānāpānassatikathāya apubbatthānuvaṇṇanā anuppattā. Ayañhi ānāpānassatikathā diṭṭhikathāya suviditadiṭṭhādīnavassa micchādiṭṭhimalavisodhanena suvisuddhacittassa yathābhūtāvabodhāya samādhibhāvanā sukarā hoti, sabbasamādhibhāvanāsu ca sabbasabbaññubodhisattānaṃ bodhimūle imināva samādhinā samāhitacittānaṃ yathābhūtāvabodhato ayameva samādhibhāvanā padhānāti ca diṭṭhikathānantaraṃ kathitā. Tattha soḷasavatthukaṃ ānāpānassatisamādhiṃ bhāvayato samadhikāni dve ñāṇasatāni uppajjantīti ñāṇagaṇanuddeso, aṭṭha paripanthe ñāṇānītiādi ñāṇagaṇananiddeso, katamāni aṭṭha paripanthe ñāṇānītiādi. Imāni ekavīsati vimuttisukhe ñāṇānītipariyantaṃ sabbañāṇānaṃ vitthāraniddeso, ante soḷasavatthukaṃ ānāpānassatisamādhiṃ bhāvayatotiādi nigamananti evaṃ tāva pāḷivavatthānaṃ veditabbaṃ.
தத்த² க³ணனுத்³தே³ஸே க³ணனவாரே தாவ ஸோளஸவத்து²கந்தி தீ³க⁴ங் ரஸ்ஸங் ஸப்³ப³காயபடிஸங்வேதீ³ பஸ்ஸம்ப⁴யங் காயஸங்கா²ரந்தி காயானுபஸ்ஸனாசதுக்கங், பீதிபடிஸங்வேதீ³ ஸுக²படிஸங்வேதீ³ சித்தஸங்கா²ரபடிஸங்வேதீ³ பஸ்ஸம்ப⁴யங் சித்தஸங்கா²ரந்தி வேத³னானுபஸ்ஸனாசதுக்கங், சித்தபடிஸங்வேதீ³ அபி⁴ப்பமோத³யங் சித்தங் ஸமாத³ஹங் சித்தங் விமோசயங் சித்தந்தி சித்தானுபஸ்ஸனாசதுக்கங், அனிச்சானுபஸ்ஸீ விராகா³னுபஸ்ஸீ நிரோதா⁴னுபஸ்ஸீ படினிஸ்ஸக்³கா³னுபஸ்ஸீதி த⁴ம்மானுபஸ்ஸனாசதுக்கந்தி இமேஸங் சதுன்னங் சதுக்கானங் வஸேன ஸோளஸ வத்தூ²னி பதிட்டா² ஆரம்மணானி அஸ்ஸாதி ஸோளஸவத்து²கோ. தங் ஸோளஸவத்து²கங். ஸமாஸவஸேன பனெத்த² விப⁴த்திலோபோ கதோ. ஆனந்தி அப்³ப⁴ந்தரங் பவிஸனவாதோ. அபானந்தி ப³ஹினிக்க²மனவாதோ. கேசி பன விபரியாயேன வத³ந்தி. அபானஞ்ஹி அபேதங் ஆனதோதி அபானந்தி வுச்சதி, நித்³தே³ஸே (படி॰ ம॰ 1.160) பன நா-காரஸ்ஸ தீ³க⁴த்தமஜ்ஜு²பெக்கி²த்வா ஆபானந்தி. தஸ்மிங் ஆனாபானே ஸதி ஆனாபானஸ்ஸதி, அஸ்ஸாஸபஸ்ஸாஸபரிக்³கா³ஹிகாய ஸதியா ஏதங் அதி⁴வசனங். ஆனாபானஸ்ஸதியா யுத்தோ ஸமாதி⁴, ஆனாபானஸ்ஸதியங் வா ஸமாதி⁴ ஆனாபானஸ்ஸதிஸமாதி⁴. பா⁴வயதோதி நிப்³பே³த⁴பா⁴கி³யங் பா⁴வெந்தஸ்ஸ. ஸமதி⁴கானீதி ஸஹ அதி⁴கேன வத்தந்தீதி ஸமதி⁴கானி, ஸாதிரேகானீதி அத்தோ². ம-காரோ பனெத்த² பத³ஸந்தி⁴கரோ. கேசி பன ‘‘ஸங்அதி⁴கானீ’’தி வத³ந்தி. ஏவங் ஸதி த்³வே ஞாணஸதானியேவ அதி⁴கானீதி ஆபஜ்ஜதி, தங் ந யுஜ்ஜதி. இமானி ஹி வீஸதிஅதி⁴கானி த்³வே ஞாணஸதானி ஹொந்தீதி.
Tattha gaṇanuddese gaṇanavāre tāva soḷasavatthukanti dīghaṃ rassaṃ sabbakāyapaṭisaṃvedī passambhayaṃ kāyasaṅkhāranti kāyānupassanācatukkaṃ, pītipaṭisaṃvedī sukhapaṭisaṃvedī cittasaṅkhārapaṭisaṃvedī passambhayaṃ cittasaṅkhāranti vedanānupassanācatukkaṃ, cittapaṭisaṃvedī abhippamodayaṃ cittaṃ samādahaṃ cittaṃ vimocayaṃ cittanti cittānupassanācatukkaṃ, aniccānupassī virāgānupassī nirodhānupassī paṭinissaggānupassīti dhammānupassanācatukkanti imesaṃ catunnaṃ catukkānaṃ vasena soḷasa vatthūni patiṭṭhā ārammaṇāni assāti soḷasavatthuko. Taṃ soḷasavatthukaṃ. Samāsavasena panettha vibhattilopo kato. Ānanti abbhantaraṃ pavisanavāto. Apānanti bahinikkhamanavāto. Keci pana vipariyāyena vadanti. Apānañhi apetaṃ ānatoti apānanti vuccati, niddese (paṭi. ma. 1.160) pana nā-kārassa dīghattamajjhupekkhitvā āpānanti. Tasmiṃ ānāpāne sati ānāpānassati, assāsapassāsapariggāhikāya satiyā etaṃ adhivacanaṃ. Ānāpānassatiyā yutto samādhi, ānāpānassatiyaṃ vā samādhi ānāpānassatisamādhi. Bhāvayatoti nibbedhabhāgiyaṃ bhāventassa. Samadhikānīti saha adhikena vattantīti samadhikāni, sātirekānīti attho. Ma-kāro panettha padasandhikaro. Keci pana ‘‘saṃadhikānī’’ti vadanti. Evaṃ sati dve ñāṇasatāniyeva adhikānīti āpajjati, taṃ na yujjati. Imāni hi vīsatiadhikāni dve ñāṇasatāni hontīti.
பரிபந்தே² ஞாணானீதி பரிபந்த²ங் ஆரம்மணங் கத்வா பவத்தஞாணானி. ததா² உபகாரே உபக்கிலேஸே ஞாணானி. வோதா³னே ஞாணானீதி வோதா³யதி, தேன சித்தங் பரிஸுத்³த⁴ங் ஹோதீதி வோதா³னங். கிங் தங்? ஞாணங். ‘‘வோதா³னஞாணானீ’’தி வத்தப்³பே³ ‘‘ஸுதமயே ஞாண’’ந்திஆதீ³ஸு (படி॰ ம॰ மாதிகா 1.1; படி॰ ம॰ 1.1) விய ‘‘வோதா³னே ஞாணானீ’’தி வுத்தங். ஸதோ ஸம்பஜானோ ஹுத்வா கரோதீதி ஸதோகாரீ, தஸ்ஸ ஸதோகாரிஸ்ஸ ஞாணானி. நிப்³பி³தா³ஞாணானீதி நிப்³பி³தா³பூ⁴தானி ஞாணானி. நிப்³பி³தா³னுலோமஞாணானீதி நிப்³பி³தா³ய அனுகூலானி ஞாணானி. நிப்³பி³தா³னுலோமிஞாணானீதிபி பாடோ², நிப்³பி³தா³னுலோமோ ஏதேஸங் அத்தீ²தி நிப்³பி³தா³னுலோமீதி அத்தோ². நிப்³பி³தா³படிப்பஸ்ஸத்³தி⁴ஞாணானீதி நிப்³பி³தா³ய படிப்பஸ்ஸத்³தி⁴யங் ஞாணானி. விமுத்திஸுகே² ஞாணானீதி விமுத்திஸுகே²ன ஸம்பயுத்தானி ஞாணானி.
Paripanthe ñāṇānīti paripanthaṃ ārammaṇaṃ katvā pavattañāṇāni. Tathā upakāre upakkilese ñāṇāni. Vodāne ñāṇānīti vodāyati, tena cittaṃ parisuddhaṃ hotīti vodānaṃ. Kiṃ taṃ? Ñāṇaṃ. ‘‘Vodānañāṇānī’’ti vattabbe ‘‘sutamaye ñāṇa’’ntiādīsu (paṭi. ma. mātikā 1.1; paṭi. ma. 1.1) viya ‘‘vodāne ñāṇānī’’ti vuttaṃ. Sato sampajāno hutvā karotīti satokārī, tassa satokārissa ñāṇāni. Nibbidāñāṇānīti nibbidābhūtāni ñāṇāni. Nibbidānulomañāṇānīti nibbidāya anukūlāni ñāṇāni. Nibbidānulomiñāṇānītipi pāṭho, nibbidānulomo etesaṃ atthīti nibbidānulomīti attho. Nibbidāpaṭippassaddhiñāṇānīti nibbidāya paṭippassaddhiyaṃ ñāṇāni. Vimuttisukhe ñāṇānīti vimuttisukhena sampayuttāni ñāṇāni.
கதமானி அட்டா²திஆதீ³ஹி பரிபந்த²உபகாரானங் படிபக்க²விபக்க²யுக³லத்தா தேஸு ஞாணானி ஸஹேவ நித்³தி³ட்டா²னி. காமச்ச²ந்த³னெக்க²ம்மாதீ³னி ஹெட்டா² வுத்தத்தா²னி. உபகாரந்தி ச லிங்க³விபல்லாஸவஸேன நபுங்ஸகவசனங் கதங். ஸப்³பே³பி அகுஸலா த⁴ம்மாதி வுத்தாவஸேஸா யே கேசி அகுஸலா த⁴ம்மா. ததா² ஸப்³பே³பி நிப்³பே³த⁴பா⁴கி³யா குஸலா த⁴ம்மா. ‘‘பரிபந்தோ² உபகார’’ந்தி ச தங் ததே³வ அபெக்கி²த்வா ஏகவசனங் கதங். எத்த² ச பரிபந்தே² ஞாணானி ச உபகாரே ஞாணானி ச புச்சி²த்வா தேஸங் ஆரம்மணானேவ விஸ்ஸஜ்ஜித்வா தேஹேவ தானி விஸ்ஸஜ்ஜிதானி ஹொந்தீதி ததா³ரம்மணானி ஞாணானி நிக³மெத்வா த³ஸ்ஸேஸி. உபக்கிலேஸே ஞாணாதீ³ஸுபி ஏஸேவ நயோ.
Katamāni aṭṭhātiādīhi paripanthaupakārānaṃ paṭipakkhavipakkhayugalattā tesu ñāṇāni saheva niddiṭṭhāni. Kāmacchandanekkhammādīni heṭṭhā vuttatthāni. Upakāranti ca liṅgavipallāsavasena napuṃsakavacanaṃ kataṃ. Sabbepi akusalā dhammāti vuttāvasesā ye keci akusalā dhammā. Tathā sabbepi nibbedhabhāgiyā kusalā dhammā. ‘‘Paripantho upakāra’’nti ca taṃ tadeva apekkhitvā ekavacanaṃ kataṃ. Ettha ca paripanthe ñāṇāni ca upakāre ñāṇāni ca pucchitvā tesaṃ ārammaṇāneva vissajjitvā teheva tāni vissajjitāni hontīti tadārammaṇāni ñāṇāni nigametvā dassesi. Upakkilese ñāṇādīsupi eseva nayo.
க³ணனவாரவண்ணனா நிட்டி²தா.
Gaṇanavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 1. க³ணனவார • 1. Gaṇanavāra
