| Library / Tipiṭaka / তিপিটক • Tipiṭaka / পেতৰত্থু-অট্ঠকথা • Petavatthu-aṭṭhakathā |
১০. গণপেতৰত্থুৰণ্ণনা
10. Gaṇapetavatthuvaṇṇanā
নগ্গা দুব্বণ্ণরূপাত্থাতি ইদং সত্থরি জেতৰনে ৰিহরন্তে সম্বহুলে পেতে আরব্ভ ৰুত্তং। সাৰত্থিযং কির সম্বহুলা মনুস্সা গণভূতা অস্সদ্ধা অপ্পসন্না মচ্ছেরমলপরিযুট্ঠিতচিত্তা দানাদিসুচরিতৰিমুখা হুত্ৰা চিরং জীৰিত্ৰা কাযস্স ভেদা নগরস্স সমীপে পেতযোনিযং নিব্বত্তিংসু । অথেকদিৰসং আযস্মা মহামোগ্গল্লানো সাৰত্থিযং পিণ্ডায গচ্ছন্তো অন্তরামগ্গে পেতে দিস্ৰা –
Naggā dubbaṇṇarūpātthāti idaṃ satthari jetavane viharante sambahule pete ārabbha vuttaṃ. Sāvatthiyaṃ kira sambahulā manussā gaṇabhūtā assaddhā appasannā maccheramalapariyuṭṭhitacittā dānādisucaritavimukhā hutvā ciraṃ jīvitvā kāyassa bhedā nagarassa samīpe petayoniyaṃ nibbattiṃsu . Athekadivasaṃ āyasmā mahāmoggallāno sāvatthiyaṃ piṇḍāya gacchanto antarāmagge pete disvā –
৭৮২.
782.
‘‘নগ্গা দুব্বণরূপাত্থ, কিসা ধমনিসন্থতা।
‘‘Naggā dubbaṇarūpāttha, kisā dhamanisanthatā;
উপ্ফাসুলিকা কিসিকা, কে নু তুম্হেত্থ মারিসা’’তি॥ –
Upphāsulikā kisikā, ke nu tumhettha mārisā’’ti. –
গাথায পুচ্ছি। তত্থ দুব্বণ্ণরূপাত্থাতি দুব্বণ্ণসরীরা হোথ। কে নু তুম্হেত্থাতি তুম্হে কে নু নাম ভৰথ। মারিসাতি তে অত্তনো সারুপ্পৰসেন আলপতি।
Gāthāya pucchi. Tattha dubbaṇṇarūpātthāti dubbaṇṇasarīrā hotha. Ke nu tumhetthāti tumhe ke nu nāma bhavatha. Mārisāti te attano sāruppavasena ālapati.
তং সুত্ৰা পেতা –
Taṃ sutvā petā –
৭৮৩.
783.
‘‘মযং ভদন্তে পেতম্হা, দুগ্গতা যমলোকিকা।
‘‘Mayaṃ bhadante petamhā, duggatā yamalokikā;
পাপকম্মং করিত্ৰান, পেতলোকং ইতো গতা’’তি॥ –
Pāpakammaṃ karitvāna, petalokaṃ ito gatā’’ti. –
গাথায অত্তনো পেতভাৰং পকাসেত্ৰা পুন থেরেন –
Gāthāya attano petabhāvaṃ pakāsetvā puna therena –
৭৮৪.
784.
‘‘কিং নু কাযেন ৰাচায, মনসা দুক্কটং কতং।
‘‘Kiṃ nu kāyena vācāya, manasā dukkaṭaṃ kataṃ;
কিস্সকম্মৰিপাকেন, পেতলোকং ইতো গতা’’তি॥ –
Kissakammavipākena, petalokaṃ ito gatā’’ti. –
গাথায কতকম্মং পুচ্ছিতা –
Gāthāya katakammaṃ pucchitā –
৭৮৫.
785.
‘‘অনাৰটেসু তিত্থেসু, ৰিচিনিম্হদ্ধমাসকং।
‘‘Anāvaṭesu titthesu, vicinimhaddhamāsakaṃ;
সন্তেসু দেয্যধম্মেসু, দীপং নাকম্হ অত্তনো॥
Santesu deyyadhammesu, dīpaṃ nākamha attano.
৭৮৬.
786.
‘‘নদিং উপেম তসিতা, রিত্তকা পরিৰত্ততি।
‘‘Nadiṃ upema tasitā, rittakā parivattati;
ছাযং উপেম উণ্হেসু, আতপো পরিৰত্ততি॥
Chāyaṃ upema uṇhesu, ātapo parivattati.
৭৮৭.
787.
‘‘অগ্গিৰণ্ণো চ নো ৰাতো, ডহন্তো উপৰাযতি।
‘‘Aggivaṇṇo ca no vāto, ḍahanto upavāyati;
এতঞ্চ ভন্তে অরহাম, অঞ্ঞঞ্চ পাপকং ততো॥
Etañca bhante arahāma, aññañca pāpakaṃ tato.
৭৮৮.
788.
‘‘অপি যোজনানি গচ্ছাম, ছাতা আহারগেধিনো।
‘‘Api yojanāni gacchāma, chātā āhāragedhino;
অলদ্ধাৰ নিৰত্তাম, অহো নো অপ্পপুঞ্ঞতা॥
Aladdhāva nivattāma, aho no appapuññatā.
৭৮৯.
789.
‘‘ছাতা পমুচ্ছিতা ভন্তা, ভূমিযং পটিসুম্ভিতা।
‘‘Chātā pamucchitā bhantā, bhūmiyaṃ paṭisumbhitā;
উত্তানা পটিকিরাম, অৰকুজ্জা পতামসে॥
Uttānā paṭikirāma, avakujjā patāmase.
৭৯০.
790.
‘‘তে চ তত্থেৰ পতিতা, ভূমিযং পটিসুম্ভিতা।
‘‘Te ca tattheva patitā, bhūmiyaṃ paṭisumbhitā;
উরং সীসঞ্চ ঘট্টেম, অহো নো অপ্পপুঞ্ঞতা॥
Uraṃ sīsañca ghaṭṭema, aho no appapuññatā.
৭৯১.
791.
‘‘এতঞ্চ ভন্তে অরহাম, অঞ্ঞঞ্চ পাপকং ততো।
‘‘Etañca bhante arahāma, aññañca pāpakaṃ tato;
সন্তেসু দেয্যধম্মেসু, দীপং নাকম্হ অত্তনো॥
Santesu deyyadhammesu, dīpaṃ nākamha attano.
৭৯২.
792.
‘‘তে হি নূন ইতো গন্ত্ৰা, যোনিং লদ্ধান মানুসিং।
‘‘Te hi nūna ito gantvā, yoniṃ laddhāna mānusiṃ;
ৰদঞ্ঞূ সীলসম্পন্না, কাহাম কুসলং বহু’’ন্তি॥ –
Vadaññū sīlasampannā, kāhāma kusalaṃ bahu’’nti. –
অত্তনা কতকম্মং কথেসুং।
Attanā katakammaṃ kathesuṃ.
৭৮৮. তত্থ অপি যোজনানি গচ্ছামাতি অনেকানিপি যোজনানি গচ্ছাম। কথং? ছাতা আহারগেধিনোতি , চিরকালং জিঘচ্ছায জিঘচ্ছিতা আহারে গিদ্ধা অভিগিজ্ঝন্তা হুত্ৰা, এৰং গন্ত্ৰাপি কিঞ্চি আহারং অলদ্ধাযেৰ নিৰত্তাম। অপ্পপুঞ্ঞতাতি অপুঞ্ঞতা অকতকল্যাণতা।
788. Tattha api yojanāni gacchāmāti anekānipi yojanāni gacchāma. Kathaṃ? Chātā āhāragedhinoti , cirakālaṃ jighacchāya jighacchitā āhāre giddhā abhigijjhantā hutvā, evaṃ gantvāpi kiñci āhāraṃ aladdhāyeva nivattāma. Appapuññatāti apuññatā akatakalyāṇatā.
৭৮৯. উত্তানা পটিকিরামাতি কদাচি উত্তানা হুত্ৰা ৰিকিরিযমানঙ্গপচ্চঙ্গা ৰিয ৰত্তাম। অৰকুজ্জা পতামসেতি কদাচি অৰকুজ্জা হুত্ৰা পতাম।
789.Uttānāpaṭikirāmāti kadāci uttānā hutvā vikiriyamānaṅgapaccaṅgā viya vattāma. Avakujjā patāmaseti kadāci avakujjā hutvā patāma.
৭৯০. তে চাতি তে মযং। উরং সীসঞ্চ ঘট্টেমাতি অৰকুজ্জা হুত্ৰা পতিতা উট্ঠাতুং অসক্কোন্তা ৰেধন্তা ৰেদনাপ্পত্তা অত্তনো অত্তনো উরং সীসঞ্চ পটিঘংসাম। সেসং হেট্ঠা ৰুত্তনযমেৰ।
790.Te cāti te mayaṃ. Uraṃ sīsañca ghaṭṭemāti avakujjā hutvā patitā uṭṭhātuṃ asakkontā vedhantā vedanāppattā attano attano uraṃ sīsañca paṭighaṃsāma. Sesaṃ heṭṭhā vuttanayameva.
থেরো তং পৰত্তিং ভগৰতো আরোচেসি। ভগৰা তমত্থং অট্ঠুপ্পত্তিং কত্ৰা সম্পত্তপরিসায ধম্মং দেসেসি। তং সুত্ৰা মহাজনো মচ্ছেরমলং পহায দানাদিসুচরিতনিরতো অহোসীতি।
Thero taṃ pavattiṃ bhagavato ārocesi. Bhagavā tamatthaṃ aṭṭhuppattiṃ katvā sampattaparisāya dhammaṃ desesi. Taṃ sutvā mahājano maccheramalaṃ pahāya dānādisucaritanirato ahosīti.
গণপেতৰত্থুৰণ্ণনা নিট্ঠিতা।
Gaṇapetavatthuvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পেতৰত্থুপাল়ি • Petavatthupāḷi / ১০. গণপেতৰত্থু • 10. Gaṇapetavatthu
