| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5-6. க³ண்ட³ஸுத்தாதி³வண்ணனா
5-6. Gaṇḍasuttādivaṇṇanā
15-16. பஞ்சமே தீணி சத்தாரி வஸ்ஸானி வஸ்ஸக³ணா, அனேகே வஸ்ஸக³ணா உப்பன்னா அஸ்ஸாதி அனேகவஸ்ஸக³ணிகோ. தஸ்ஸஸ்ஸூதி தஸ்ஸ ப⁴வெய்யுங். அபே⁴த³னமுகா²னீதி ந கேனசி பி⁴ந்தி³த்வா கதானி, கேவலங் கம்மஸமுட்டி²தானேவ வணமுகா²னி. ஜேகு³ச்சி²யங்யேவாதி ஜிகு³ச்சி²தப்³ப³மேவ படிகூலமேவ. சாதுமஹாபூ⁴திகஸ்ஸாதி சதுமஹாபூ⁴தமயஸ்ஸ. ஓத³னகும்மாஸூபசயஸ்ஸாதி ஓத³னேன சேவ கும்மாஸேன ச உபசிதஸ்ஸ வட்³டி⁴தஸ்ஸ. அனிச்சுச்சா²த³னபரிமத்³த³னபே⁴த³னவித்³த⁴ங்ஸனத⁴ம்மஸ்ஸாதி ஹுத்வா அபா⁴வட்டே²ன அனிச்சத⁴ம்மஸ்ஸ, து³க்³க³ந்த⁴விகா⁴தத்தா²ய தனுவிலேபனேன உச்சா²த³னத⁴ம்மஸ்ஸ, அங்க³பச்சங்கா³பா³த⁴வினோத³னத்தா²ய கு²த்³த³கஸம்பா³ஹனேன பரிமத்³த³னத⁴ம்மஸ்ஸ, த³ஹரகாலே வா ஊரூஸு ஸயாபெத்வா க³ப்³ப⁴வாஸேன து³ஸ்ஸண்டி²தானங் தேஸங் தேஸங் அங்க³பச்சங்கா³னங் ஸண்டா²னஸம்பாத³னத்த²ங் அஞ்ச²னபீளனாதி³வஸேன பரிமத்³த³னத⁴ம்மஸ்ஸ, ஏவங் பரிஹரிதஸ்ஸாபி ச பே⁴த³னவித்³த⁴ங்ஸனத⁴ம்மஸ்ஸ, பி⁴ஜ்ஜனவிகிரணஸபா⁴வஸ்ஸேவாதி அத்தோ². எத்த² ச அனிச்சபதே³ன சேவ பே⁴த³னவித்³த⁴ங்ஸனபதே³ஹி சஸ்ஸ அத்த²ங்க³மோ கதி²தோ, ஸேஸேஹி ஸமுத³யோ. நிப்³பி³ந்த³தா²தி உக்கண்ட²த² பஜஹத² இமங் காயந்தி த³ஸ்ஸேதி. ஏவமிமஸ்மிங் ஸுத்தே ப³லவவிபஸ்ஸனா கதி²தா. ச²ட்ட²ங் வுத்தனயமேவ. ஸஞ்ஞாஸீஸேன பனெத்த² ஞாணமேவ கதி²தங்.
15-16. Pañcame tīṇi cattāri vassāni vassagaṇā, aneke vassagaṇā uppannā assāti anekavassagaṇiko. Tassassūti tassa bhaveyyuṃ. Abhedanamukhānīti na kenaci bhinditvā katāni, kevalaṃ kammasamuṭṭhitāneva vaṇamukhāni. Jegucchiyaṃyevāti jigucchitabbameva paṭikūlameva. Cātumahābhūtikassāti catumahābhūtamayassa. odanakummāsūpacayassāti odanena ceva kummāsena ca upacitassa vaḍḍhitassa. Aniccucchādanaparimaddanabhedanaviddhaṃsanadhammassāti hutvā abhāvaṭṭhena aniccadhammassa, duggandhavighātatthāya tanuvilepanena ucchādanadhammassa, aṅgapaccaṅgābādhavinodanatthāya khuddakasambāhanena parimaddanadhammassa, daharakāle vā ūrūsu sayāpetvā gabbhavāsena dussaṇṭhitānaṃ tesaṃ tesaṃ aṅgapaccaṅgānaṃ saṇṭhānasampādanatthaṃ añchanapīḷanādivasena parimaddanadhammassa, evaṃ pariharitassāpi ca bhedanaviddhaṃsanadhammassa, bhijjanavikiraṇasabhāvassevāti attho. Ettha ca aniccapadena ceva bhedanaviddhaṃsanapadehi cassa atthaṅgamo kathito, sesehi samudayo. Nibbindathāti ukkaṇṭhatha pajahatha imaṃ kāyanti dasseti. Evamimasmiṃ sutte balavavipassanā kathitā. Chaṭṭhaṃ vuttanayameva. Saññāsīsena panettha ñāṇameva kathitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
5. க³ண்ட³ஸுத்தங் • 5. Gaṇḍasuttaṃ
6. ஸஞ்ஞாஸுத்தங் • 6. Saññāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5-9. க³ண்ட³ஸுத்தாதி³வண்ணனா • 5-9. Gaṇḍasuttādivaṇṇanā
