| Library / Tipiṭaka / තිපිටක • Tipiṭaka / අපදානපාළි • Apadānapāḷi |
34. ගන්‌ධොදකවග්‌ගො
34. Gandhodakavaggo
1. ගන්‌ධධූපියත්‌ථෙරඅපදානං
1. Gandhadhūpiyattheraapadānaṃ
1.
1.
‘‘සිද්‌ධත්‌ථස්‌ස භගවතො, ගන්‌ධධූපං අදාසහං;
‘‘Siddhatthassa bhagavato, gandhadhūpaṃ adāsahaṃ;
සුමනෙහි පටිච්‌ඡන්‌නං, බුද්‌ධානුච්‌ඡවිකඤ්‌ච තං.
Sumanehi paṭicchannaṃ, buddhānucchavikañca taṃ.
2.
2.
‘‘කඤ්‌චනග්‌ඝියසඞ්‌කාසං, බුද්‌ධං ලොකග්‌ගනායකං;
‘‘Kañcanagghiyasaṅkāsaṃ, buddhaṃ lokagganāyakaṃ;
ඉන්‌දීවරංව ජලිතං, ආදිත්‌තංව හුතාසනං.
Indīvaraṃva jalitaṃ, ādittaṃva hutāsanaṃ.
3.
3.
‘‘බ්‍යග්‌ඝුසභංව පවරං, අභිජාතංව කෙසරිං;
‘‘Byagghusabhaṃva pavaraṃ, abhijātaṃva kesariṃ;
නිසින්‌නං සමණානග්‌ගං, භික්‌ඛුසඞ්‌ඝපුරක්‌ඛතං.
Nisinnaṃ samaṇānaggaṃ, bhikkhusaṅghapurakkhataṃ.
4.
4.
‘‘දිස්‌වා චිත්‌තං පසාදෙත්‌වා, පග්‌ගහෙත්‌වාන අඤ්‌ජලිං;
‘‘Disvā cittaṃ pasādetvā, paggahetvāna añjaliṃ;
වන්‌දිත්‌වා සත්‌ථුනො පාදෙ, පක්‌කාමිං උත්‌තරාමුඛො.
Vanditvā satthuno pāde, pakkāmiṃ uttarāmukho.
5.
5.
‘‘චතුන්‌නවුතිතො කප්‌පෙ, යං ගන්‌ධමදදිං තදා;
‘‘Catunnavutito kappe, yaṃ gandhamadadiṃ tadā;
දුග්‌ගතිං නාභිජානාමි, ගන්‌ධපූජායිදං ඵලං.
Duggatiṃ nābhijānāmi, gandhapūjāyidaṃ phalaṃ.
6.
6.
‘‘පටිසම්‌භිදා චතස්‌සො, විමොක්‌ඛාපි ච අට්‌ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්‌ඤා සච්‌ඡිකතා, කතං බුද්‌ධස්‌ස සාසනං’’.
Chaḷabhiññā sacchikatā, kataṃ buddhassa sāsanaṃ’’.
ඉත්‌ථං සුදං ආයස්‌මා ගන්‌ධධූපියො ථෙරො ඉමා ගාථායො අභාසිත්‌ථාති.
Itthaṃ sudaṃ āyasmā gandhadhūpiyo thero imā gāthāyo abhāsitthāti.
ගන්‌ධධූපියත්‌ථෙරස්‌සාපදානං පඨමං.
Gandhadhūpiyattherassāpadānaṃ paṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / අපදාන-අට්‌ඨකථා • Apadāna-aṭṭhakathā / 1-10. ථොමකත්‌ථෙරඅපදානාදිවණ්‌ණනා • 1-10. Thomakattheraapadānādivaṇṇanā
