| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. க³ந்த⁴ஜாதஸுத்தவண்ணனா
9. Gandhajātasuttavaṇṇanā
80. நவமே ஏதத³வோசாதி பச்சா²ப⁴த்தங் பிண்ட³பாதபடிக்கந்தோ த³ஸப³லஸ்ஸ வத்தங் த³ஸ்ஸெத்வா அத்தனோ தி³வாவிஹாரட்டா²னங் க³ந்த்வா ‘‘இமஸ்மிங் லோகே மூலக³ந்தோ⁴ நாம அத்தி², ஸாரக³ந்தோ⁴ நாம அத்தி², புப்ப²க³ந்தோ⁴ நாம அத்தி². இமே பன தயோபி க³ந்தா⁴ அனுவாதங்யேவ க³ச்ச²ந்தி, ந படிவாதங். அத்தி² நு கோ² கிஞ்சி, யஸ்ஸ படிவாதம்பி க³ந்தோ⁴ க³ச்ச²தீ’’தி சிந்தெத்வா அட்ட²ன்னங் வரானங் க³ஹணகாலேயேவ கங்கு²ப்பத்திஸமயே உபஸங்கமனவரஸ்ஸ க³ஹிதத்தா தக்க²ணங்யேவ தி³வாட்டா²னதோ வுட்டா²ய ஸத்து² ஸந்திகங் க³ந்த்வா வந்தி³த்வா ஏகமந்தங் நிஸின்னோ உப்பன்னாய கங்கா²ய வினோத³னத்த²ங் ஏதங் ‘‘தீணிமானி, ப⁴ந்தே’’திஆதி³வசனங் அவோச. தத்த² க³ந்த⁴ஜாதானீதி க³ந்த⁴ஜாதியோ. மூலக³ந்தோ⁴தி மூலவத்து²கோ க³ந்தோ⁴, க³ந்த⁴ஸம்பன்னங் வா மூலமேவ மூலக³ந்தோ⁴. தஸ்ஸ ஹி க³ந்தோ⁴ அனுவாதங் க³ச்ச²தி. க³ந்த⁴ஸ்ஸ பன க³ந்தோ⁴ நாம நத்தி². ஸாரக³ந்த⁴புப்ப²க³ந்தே⁴ஸுபி ஏஸேவ நயோ. அத்தா²னந்த³, கிஞ்சி க³ந்த⁴ஜாதந்தி எத்த² ஸரணக³மனாத³யோ கு³ணவண்ணபா⁴ஸனவஸேன தி³ஸாகா³மிதாய க³ந்த⁴ஸதி³ஸத்தா க³ந்தா⁴, தேஸங் வத்து²பூ⁴தோ புக்³க³லோ க³ந்த⁴ஜாதங் நாம. க³ந்தோ⁴ க³ச்ச²தீதி வண்ணபா⁴ஸனவஸேன க³ச்ச²தி. ஸீலவாதி பஞ்சஸீலேன வா த³ஸஸீலேன வா ஸீலவா. கல்யாணத⁴ம்மோதி தேனேவ ஸீலத⁴ம்மேன கல்யாணத⁴ம்மோ ஸுந்த³ரத⁴ம்மோ. விக³தமலமச்சே²ரேனாதிஆதீ³னங் அத்தோ² விஸுத்³தி⁴மக்³கே³ (விஸுத்³தி⁴॰ 1.160) வித்தா²ரிதோவ. தி³ஸாஸூதி சதூஸு தி³ஸாஸு சதூஸு அனுதி³ஸாஸு . ஸமணப்³ராஹ்மணாதி ஸமிதபாபபா³ஹிதபாபா ஸமணப்³ராஹ்மணா.
80. Navame etadavocāti pacchābhattaṃ piṇḍapātapaṭikkanto dasabalassa vattaṃ dassetvā attano divāvihāraṭṭhānaṃ gantvā ‘‘imasmiṃ loke mūlagandho nāma atthi, sāragandho nāma atthi, pupphagandho nāma atthi. Ime pana tayopi gandhā anuvātaṃyeva gacchanti, na paṭivātaṃ. Atthi nu kho kiñci, yassa paṭivātampi gandho gacchatī’’ti cintetvā aṭṭhannaṃ varānaṃ gahaṇakāleyeva kaṅkhuppattisamaye upasaṅkamanavarassa gahitattā takkhaṇaṃyeva divāṭṭhānato vuṭṭhāya satthu santikaṃ gantvā vanditvā ekamantaṃ nisinno uppannāya kaṅkhāya vinodanatthaṃ etaṃ ‘‘tīṇimāni, bhante’’tiādivacanaṃ avoca. Tattha gandhajātānīti gandhajātiyo. Mūlagandhoti mūlavatthuko gandho, gandhasampannaṃ vā mūlameva mūlagandho. Tassa hi gandho anuvātaṃ gacchati. Gandhassa pana gandho nāma natthi. Sāragandhapupphagandhesupi eseva nayo. Atthānanda, kiñci gandhajātanti ettha saraṇagamanādayo guṇavaṇṇabhāsanavasena disāgāmitāya gandhasadisattā gandhā, tesaṃ vatthubhūto puggalo gandhajātaṃ nāma. Gandho gacchatīti vaṇṇabhāsanavasena gacchati. Sīlavāti pañcasīlena vā dasasīlena vā sīlavā. Kalyāṇadhammoti teneva sīladhammena kalyāṇadhammo sundaradhammo. Vigatamalamaccherenātiādīnaṃ attho visuddhimagge (visuddhi. 1.160) vitthāritova. Disāsūti catūsu disāsu catūsu anudisāsu . Samaṇabrāhmaṇāti samitapāpabāhitapāpā samaṇabrāhmaṇā.
ந புப்ப²க³ந்தோ⁴ படிவாதமேதீதி வஸ்ஸிகபுப்பா²தீ³னங் க³ந்தோ⁴ படிவாதங் ந க³ச்ச²தி. ந சந்த³னங் தக³ரமல்லிகா வாதி சந்த³னதக³ரமல்லிகானம்பி க³ந்தோ⁴ படிவாதங் ந க³ச்ச²தீதி அத்தோ². தே³வலோகேபி பு²டஸுமனா நாம ஹோதி, தஸ்ஸா புப்பி²ததி³வஸே க³ந்தோ⁴ யோஜனஸதங் அஜ்ஜொ²த்த²ரதி. ஸோபி படிவாதங் வித³த்தி²மத்தம்பி ரதனமத்தம்பி க³ந்துங் ந ஸக்கோதீதி வத³ந்தி. ஸதஞ்ச க³ந்தோ⁴ படிவாதமேதீதி ஸதஞ்ச பண்டி³தானங் பு³த்³த⁴பச்சேகபு³த்³த⁴பு³த்³த⁴புத்தானங் ஸீலாதி³கு³ணக³ந்தோ⁴ படிவாதங் க³ச்ச²தி. ஸப்³பா³ தி³ஸா ஸப்புரிஸோ பவாயதீதி ஸப்புரிஸோ பண்டி³தோ ஸீலாதி³கு³ணக³ந்தே⁴ன ஸப்³பா³ தி³ஸா பவாயதி, ஸப்³பா³ தி³ஸா க³ந்தே⁴ன அவத்த²ரதீதி அத்தோ².
Na pupphagandho paṭivātametīti vassikapupphādīnaṃ gandho paṭivātaṃ na gacchati. Na candanaṃ tagaramallikā vāti candanatagaramallikānampi gandho paṭivātaṃ na gacchatīti attho. Devalokepi phuṭasumanā nāma hoti, tassā pupphitadivase gandho yojanasataṃ ajjhottharati. Sopi paṭivātaṃ vidatthimattampi ratanamattampi gantuṃ na sakkotīti vadanti. Satañca gandho paṭivātametīti satañca paṇḍitānaṃ buddhapaccekabuddhabuddhaputtānaṃ sīlādiguṇagandho paṭivātaṃ gacchati. Sabbā disā sappuriso pavāyatīti sappuriso paṇḍito sīlādiguṇagandhena sabbā disā pavāyati, sabbā disā gandhena avattharatīti attho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. க³ந்த⁴ஜாதஸுத்தங் • 9. Gandhajātasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. க³ந்த⁴ஜாதஸுத்தவண்ணனா • 9. Gandhajātasuttavaṇṇanā
