Library / Tipiṭaka / តិបិដក • Tipiṭaka / ជាតកបាឡិ • Jātakapāḷi

    ៥២០. គន្ធតិន្ទុកជាតកំ (១០)

    520. Gandhatindukajātakaṃ (10)

    ៣៣២.

    332.

    អប្បមាទោ អមតំ បទំ 1, បមាទោ មច្ចុនោ បទំ;

    Appamādo amataṃ padaṃ 2, pamādo maccuno padaṃ;

    អប្បមត្តា ន មីយន្តិ, យេ បមត្តា យថា មតា។

    Appamattā na mīyanti, ye pamattā yathā matā.

    ៣៣៣.

    333.

    មទា បមាទោ ជាយេថ, បមាទា ជាយតេ ខយោ;

    Madā pamādo jāyetha, pamādā jāyate khayo;

    ខយា បទោសា 3 ជាយន្តិ, មា បមាទោ 4 ភរតូសភ 5។

    Khayā padosā 6 jāyanti, mā pamādo 7 bharatūsabha 8.

    ៣៣៤.

    334.

    ពហូ ហិ ខត្តិយា ជីនា, អត្ថំ រដ្ឋំ បមាទិនោ;

    Bahū hi khattiyā jīnā, atthaṃ raṭṭhaṃ pamādino;

    អថោបិ គាមិនោ គាមា, អនគារា អគារិនោ។

    Athopi gāmino gāmā, anagārā agārino.

    ៣៣៥.

    335.

    ខត្តិយស្ស បមត្តស្ស, រដ្ឋស្មិំ រដ្ឋវឌ្ឍន;

    Khattiyassa pamattassa, raṭṭhasmiṃ raṭṭhavaḍḍhana;

    សព្ពេ ភោគា វិនស្សន្តិ, រញ្ញោ តំ វុច្ចតេ អឃំ។

    Sabbe bhogā vinassanti, rañño taṃ vuccate aghaṃ.

    ៣៣៦.

    336.

    នេស ធម្មោ មហារាជ, អតិវេលំ បមជ្ជសិ;

    Nesa dhammo mahārāja, ativelaṃ pamajjasi;

    ឥទ្ធំ ផីតំ ជនបទំ, ចោរា វិទ្ធំសយន្តិ នំ។

    Iddhaṃ phītaṃ janapadaṃ, corā viddhaṃsayanti naṃ.

    ៣៣៧.

    337.

    ន តេ បុត្តា ភវិស្សន្តិ, ន ហិរញ្ញំ ន ធានិយំ 9;

    Na te puttā bhavissanti, na hiraññaṃ na dhāniyaṃ 10;

    រដ្ឋេ វិលុប្បមានម្ហិ, សព្ពភោគេហិ ជិយ្យសិ។

    Raṭṭhe viluppamānamhi, sabbabhogehi jiyyasi.

    ៣៣៨.

    338.

    សព្ពភោគា បរិជិណ្ណំ, រាជានំ វាបិ ខត្តិយំ 11;

    Sabbabhogā parijiṇṇaṃ, rājānaṃ vāpi khattiyaṃ 12;

    ញាតិមិត្តា សុហជ្ជា ច, ន តំ មញ្ញន្តិ មានិយំ 13។

    Ñātimittā suhajjā ca, na taṃ maññanti māniyaṃ 14.

    ៣៣៩.

    339.

    ហត្ថារោហា អនីកដ្ឋា, រថិកា បត្តិការកា;

    Hatthārohā anīkaṭṭhā, rathikā pattikārakā;

    តមេវមុបជីវន្តា, ន តំ មញ្ញន្តិ មានិយំ។

    Tamevamupajīvantā, na taṃ maññanti māniyaṃ.

    ៣៤០.

    340.

    អសំវិហិតកម្មន្តំ, ពាលំ ទុម្មន្តិមន្តិនំ;

    Asaṃvihitakammantaṃ, bālaṃ dummantimantinaṃ;

    សិរី ជហតិ ទុម្មេធំ, ជិណ្ណំវ ឧរគោ តចំ។

    Sirī jahati dummedhaṃ, jiṇṇaṃva urago tacaṃ.

    ៣៤១.

    341.

    សុសំវិហិតកម្មន្តំ , កាលុដ្ឋាយិំ អតន្ទិតំ;

    Susaṃvihitakammantaṃ , kāluṭṭhāyiṃ atanditaṃ;

    សព្ពេ ភោគាភិវឌ្ឍន្តិ, គាវោ សឧសភាមិវ។

    Sabbe bhogābhivaḍḍhanti, gāvo sausabhāmiva.

    ៣៤២.

    342.

    ឧបស្សុតិំ មហារាជ, រដ្ឋេ ជនបទេ ចរ;

    Upassutiṃ mahārāja, raṭṭhe janapade cara;

    តត្ថ ទិស្វា ច សុត្វា ច, តតោ តំ 15 បដិបជ្ជសិ។

    Tattha disvā ca sutvā ca, tato taṃ 16 paṭipajjasi.

    ៣៤៣.

    343.

    ឯវំ វេទេតុ បញ្ចាលោ, សង្គាមេ សរមប្បិតោ 17;

    Evaṃ vedetu pañcālo, saṅgāme saramappito 18;

    យថាហមជ្ជ វេទេមិ, កណ្ដកេន សមប្បិតោ។

    Yathāhamajja vedemi, kaṇṭakena samappito.

    ៣៤៤.

    344.

    ជិណ្ណោ ទុព្ពលចក្ខូសិ, ន រូបំ សាធុ បស្សសិ;

    Jiṇṇo dubbalacakkhūsi, na rūpaṃ sādhu passasi;

    កិំ តត្ថ ព្រហ្មទត្តស្ស, យំ តំ មគ្គេយ្យ 19 កណ្ដកោ 20។

    Kiṃ tattha brahmadattassa, yaṃ taṃ maggeyya 21 kaṇṭako 22.

    ៣៤៥.

    345.

    ពហ្វេត្ថ ព្រហ្មទត្តស្ស, សោហំ 23 មគ្គស្មិ 24 ព្រាហ្មណ;

    Bahvettha brahmadattassa, sohaṃ 25 maggasmi 26 brāhmaṇa;

    អរក្ខិតា ជានបទា, អធម្មពលិនា ហតា។

    Arakkhitā jānapadā, adhammabalinā hatā.

    ៣៤៦.

    346.

    រត្តិញ្ហិ 27 ចោរា ខាទន្តិ, ទិវា ខាទន្តិ តុណ្ឌិយា;

    Rattiñhi 28 corā khādanti, divā khādanti tuṇḍiyā;

    រដ្ឋស្មិំ កូដរាជស្ស, ពហុ អធម្មិកោ ជនោ។

    Raṭṭhasmiṃ kūṭarājassa, bahu adhammiko jano.

    ៣៤៧.

    347.

    ឯតាទិសេ ភយេ ជាតេ 29, ភយដ្ដា តាត 30 មាណវា;

    Etādise bhaye jāte 31, bhayaṭṭā tāta 32 māṇavā;

    និល្លេនកានិ កុព្ពន្តិ, វនេ អាហត្វ កណ្ដកំ។

    Nillenakāni kubbanti, vane āhatva kaṇṭakaṃ.

    ៣៤៨.

    348.

    កទាស្សុ នាមយំ រាជា, ព្រហ្មទត្តោ មរិស្សតិ;

    Kadāssu nāmayaṃ rājā, brahmadatto marissati;

    យស្ស រដ្ឋម្ហិ ជិយ្យន្តិ, អប្បតិកា កុមារិកា។

    Yassa raṭṭhamhi jiyyanti, appatikā kumārikā.

    ៣៤៩.

    349.

    ទុព្ភាសិតញ្ហិ តេ ជម្មិ, អនត្ថបទកោវិទេ;

    Dubbhāsitañhi te jammi, anatthapadakovide;

    កុហិំ រាជា កុមារីនំ, ភត្តារំ បរិយេសតិ។

    Kuhiṃ rājā kumārīnaṃ, bhattāraṃ pariyesati.

    ៣៥០.

    350.

    ន មេ ទុព្ភាសិតំ ព្រហ្មេ, កោវិទត្ថបទា អហំ;

    Na me dubbhāsitaṃ brahme, kovidatthapadā ahaṃ;

    អរក្ខិតា ជានបទា, អធម្មពលិនា ហតា។

    Arakkhitā jānapadā, adhammabalinā hatā.

    ៣៥១.

    351.

    រត្តិញ្ហិ ចោរា ខាទន្តិ, ទិវា ខាទន្តិ តុណ្ឌិយា;

    Rattiñhi corā khādanti, divā khādanti tuṇḍiyā;

    រដ្ឋស្មិំ កូដរាជស្ស, ពហុ អធម្មិកោ ជនោ;

    Raṭṭhasmiṃ kūṭarājassa, bahu adhammiko jano;

    ទុជ្ជីវេ ទុព្ភរេ ទារេ, កុតោ ភត្តា កុមារិយោ។

    Dujjīve dubbhare dāre, kuto bhattā kumāriyo.

    ៣៥២.

    352.

    ឯវំ សយតុ បញ្ចាលោ, សង្គាមេ សត្តិយា ហតោ;

    Evaṃ sayatu pañcālo, saṅgāme sattiyā hato;

    យថាយំ កបណោ សេតិ, ហតោ ផាលេន សាលិយោ។

    Yathāyaṃ kapaṇo seti, hato phālena sāliyo.

    ៣៥៣.

    353.

    អធម្មេន តុវំ ជម្ម, ព្រហ្មទត្តស្ស កុជ្ឈសិ;

    Adhammena tuvaṃ jamma, brahmadattassa kujjhasi;

    យោ ត្វំ សបសិ រាជានំ, អបរជ្ឈិត្វាន អត្តនោ 33។

    Yo tvaṃ sapasi rājānaṃ, aparajjhitvāna attano 34.

    ៣៥៤.

    354.

    ធម្មេន ព្រហ្មទត្តស្ស, អហំ កុជ្ឈាមិ ព្រាហ្មណ;

    Dhammena brahmadattassa, ahaṃ kujjhāmi brāhmaṇa;

    អរក្ខិតា ជានបទា, អធម្មពលិនា ហតា។

    Arakkhitā jānapadā, adhammabalinā hatā.

    ៣៥៥.

    355.

    រត្តិញ្ហិ ចោរា ខាទន្តិ, ទិវា ខាទន្តិ តុណ្ឌិយា;

    Rattiñhi corā khādanti, divā khādanti tuṇḍiyā;

    រដ្ឋស្មិំ កូដរាជស្ស, ពហុ អធម្មិកោ ជនោ។

    Raṭṭhasmiṃ kūṭarājassa, bahu adhammiko jano.

    ៣៥៦.

    356.

    សា នូន បុន រេ បក្កា, វិកាលេ ភត្តមាហរិ;

    Sā nūna puna re pakkā, vikāle bhattamāhari;

    ភត្តហារិំ អបេក្ខន្តោ, ហតោ ផាលេន សាលិយោ។

    Bhattahāriṃ apekkhanto, hato phālena sāliyo.

    ៣៥៧.

    357.

    ឯវំ ហញ្ញតុ បញ្ចាលោ, សង្គាមេ អសិនា ហតោ 35;

    Evaṃ haññatu pañcālo, saṅgāme asinā hato 36;

    យថាហមជ្ជ បហតោ, ខីរញ្ច មេ បវដ្ដិតំ។

    Yathāhamajja pahato, khīrañca me pavaṭṭitaṃ.

    ៣៥៨.

    358.

    យំ បសុ ខីរំ ឆឌ្ឌេតិ, បសុបាលំ វិហិំសតិ 37;

    Yaṃ pasu khīraṃ chaḍḍeti, pasupālaṃ vihiṃsati 38;

    កិំ តត្ថ ព្រហ្មទត្តស្ស, យំ នោ គរហតេ 39 ភវំ។

    Kiṃ tattha brahmadattassa, yaṃ no garahate 40 bhavaṃ.

    ៣៥៩.

    359.

    គារយ្ហោ ព្រហ្មេ បញ្ចាលោ, ព្រហ្មទត្តស្ស រាជិនោ;

    Gārayho brahme pañcālo, brahmadattassa rājino;

    អរក្ខិតា ជានបទា, អធម្មពលិនា ហតា។

    Arakkhitā jānapadā, adhammabalinā hatā.

    ៣៦០.

    360.

    រត្តិញ្ហិ ចោរា ខាទន្តិ, ទិវា ខាទន្តិ តុណ្ឌិយា;

    Rattiñhi corā khādanti, divā khādanti tuṇḍiyā;

    រដ្ឋស្មិំ កូដរាជស្ស, ពហុ អធម្មិកោ ជនោ។

    Raṭṭhasmiṃ kūṭarājassa, bahu adhammiko jano.

    ៣៦១.

    361.

    ចណ្ឌា អដនកា 41 គាវី, យំ បុរេ ន ទុហាមសេ;

    Caṇḍā aṭanakā 42 gāvī, yaṃ pure na duhāmase;

    តំ ទានិ អជ្ជ ទោហាម, ខីរកាមេហុបទ្ទុតា។

    Taṃ dāni ajja dohāma, khīrakāmehupaddutā.

    ៣៦២.

    362.

    ឯវំ កន្ទតុ បញ្ចាលោ, វិបុត្តោ វិប្បសុក្ខតុ;

    Evaṃ kandatu pañcālo, viputto vippasukkhatu;

    យថាយំ កបណា គាវី, វិបុត្តា បរិធាវតិ។

    Yathāyaṃ kapaṇā gāvī, viputtā paridhāvati.

    ៣៦៣.

    363.

    យំ បសុ បសុបាលស្ស, សម្ភមេយ្យ 43 រវេយ្យ វា;

    Yaṃ pasu pasupālassa, sambhameyya 44 raveyya vā;

    កោ នីធ អបរាធត្ថិ, ព្រហ្មទត្តស្ស រាជិនោ។

    Ko nīdha aparādhatthi, brahmadattassa rājino.

    ៣៦៤.

    364.

    អបរាធោ មហាព្រហ្មេ, ព្រហ្មទត្តស្ស រាជិនោ;

    Aparādho mahābrahme, brahmadattassa rājino;

    អរក្ខិតា ជានបទា, អធម្មពលិនា ហតា។

    Arakkhitā jānapadā, adhammabalinā hatā.

    ៣៦៥.

    365.

    រត្តិញ្ហិ ចោរា ខាទន្តិ, ទិវា ខាទន្តិ តុណ្ឌិយា;

    Rattiñhi corā khādanti, divā khādanti tuṇḍiyā;

    រដ្ឋស្មិំ កូដរាជស្ស, ពហុ អធម្មិកោ ជនោ;

    Raṭṭhasmiṃ kūṭarājassa, bahu adhammiko jano;

    កថំ នោ អសិកោសត្ថា, ខីរបា ហញ្ញតេ បជា។

    Kathaṃ no asikosatthā, khīrapā haññate pajā.

    ៣៦៦.

    366.

    ឯវំ ខជ្ជតុ បញ្ចាលោ, ហតោ យុទ្ធេ សបុត្តកោ;

    Evaṃ khajjatu pañcālo, hato yuddhe saputtako;

    យថាហមជ្ជ ខជ្ជាមិ, គាមិកេហិ 45 អរញ្ញជោ។

    Yathāhamajja khajjāmi, gāmikehi 46 araññajo.

    ៣៦៧.

    367.

    ន សព្ពភូតេសុ វិធេន្តិ 47 រក្ខំ, រាជានោ មណ្ឌូក មនុស្សលោកេ;

    Na sabbabhūtesu vidhenti 48 rakkhaṃ, rājāno maṇḍūka manussaloke;

    នេត្តាវតា រាជា អធម្មចារី, យំ តាទិសំ ជីវមទេយ្យុ ធង្កា។

    Nettāvatā rājā adhammacārī, yaṃ tādisaṃ jīvamadeyyu dhaṅkā.

    ៣៦៨.

    368.

    អធម្មរូបោ វត ព្រហ្មចារី, អនុប្បិយំ ភាសសិ ខត្តិយស្ស;

    Adhammarūpo vata brahmacārī, anuppiyaṃ bhāsasi khattiyassa;

    វិលុប្បមានាយ បុថុប្បជាយ, បូជេសិ រាជំ បរមប្បមាទំ 49។

    Viluppamānāya puthuppajāya, pūjesi rājaṃ paramappamādaṃ 50.

    ៣៦៩.

    369.

    សចេ ឥមំ ព្រហ្មេ សុរជ្ជកំ សិយា, ផីតំ រដ្ឋំ មុទិតំ 51 វិប្បសន្នំ;

    Sace imaṃ brahme surajjakaṃ siyā, phītaṃ raṭṭhaṃ muditaṃ 52 vippasannaṃ;

    ភុត្វា ពលិំ អគ្គបិណ្ឌញ្ច កាកា, ន មាទិសំ ជីវមទេយ្យុ ធង្កាតិ។

    Bhutvā baliṃ aggapiṇḍañca kākā, na mādisaṃ jīvamadeyyu dhaṅkāti.

    គន្ធតិន្ទុកជាតកំ ទសមំ។

    Gandhatindukajātakaṃ dasamaṃ.

    តស្សុទ្ទានំ –

    Tassuddānaṃ –

    កិំឆន្ទ កុម្ភ ជយទ្ទិស ឆទ្ទន្ត, អថ បណ្ឌិតសម្ភវ សិរកបិ;

    Kiṃchanda kumbha jayaddisa chaddanta, atha paṇḍitasambhava sirakapi;

    ទករក្ខស បណ្ឌរនាគវរោ, អថ សម្ពុល តិន្ទុកទេវសុតោតិ។

    Dakarakkhasa paṇḍaranāgavaro, atha sambula tindukadevasutoti.

    តិំសនិបាតំ និដ្ឋិតំ។

    Tiṃsanipātaṃ niṭṭhitaṃ.

    ជាតកបាឡិយា បឋមោ ភាគោ និដ្ឋិតោ។

    Jātakapāḷiyā paṭhamo bhāgo niṭṭhito.




    Next: ៥២១. តេសកុណជាតកំ • 521. Tesakuṇajātakaṃ




    Footnotes:
    1. អមតបទំ (សី. បី.)
    2. amatapadaṃ (sī. pī.)
    3. ខយា ច ទោសា (សី.)
    4. មា មទោ (សី. ស្យា. បី.)
    5. ភារធូសភ (ក.)
    6. khayā ca dosā (sī.)
    7. mā mado (sī. syā. pī.)
    8. bhāradhūsabha (ka.)
    9. ន ហិរញ្ញនិធានិយា (ក.)
    10. na hiraññanidhāniyā (ka.)
    11. ខត្តិយ (ក.)
    12. khattiya (ka.)
    13. មន្តិយំ (ស្យា.)
    14. mantiyaṃ (syā.)
    15. ត្វំ (ក.)
    16. tvaṃ (ka.)
    17. សមប្បិតោ (សី. បី.)
    18. samappito (sī. pī.)
    19. មគ្ឃេយ្យ (បី.)
    20. កណ្ឌកោ (សី. ស្យា. បី.)
    21. maggheyya (pī.)
    22. kaṇḍako (sī. syā. pī.)
    23. យោហំ (សី. ស្យា. បី.)
    24. មគ្គោស្មិ (បី.)
    25. yohaṃ (sī. syā. pī.)
    26. maggosmi (pī.)
    27. រត្តិញ្ច (សី.)
    28. rattiñca (sī.)
    29. តាត (សី. បី.)
    30. តាវ (សី. បី.)
    31. tāta (sī. pī.)
    32. tāva (sī. pī.)
    33. អត្តនា (បី.)
    34. attanā (pī.)
    35. ទឡ្ហំ (បី.)
    36. daḷhaṃ (pī.)
    37. បសុបាលញ្ច ហិំសតិ (សី.), បសុ ផាលញ្ច ហិំសតិ (បី.)
    38. pasupālañca hiṃsati (sī.), pasu phālañca hiṃsati (pī.)
    39. គរហតោ (បី.)
    40. garahato (pī.)
    41. អដនក (បី.), អកដនា (ក.)
    42. aṭanaka (pī.), akaṭanā (ka.)
    43. បព្ភមេយ្យ (សី. បី.)
    44. pabbhameyya (sī. pī.)
    45. គាមកេហិ (សី. បី.)
    46. gāmakehi (sī. pī.)
    47. វិធន្តិ (ក.)
    48. vidhanti (ka.)
    49. រាជំ បរមប្បវាទំ (សី.), រាជា បរមប្បវាទិំ (ស្យា.)
    50. rājaṃ paramappavādaṃ (sī.), rājā paramappavādiṃ (syā.)
    51. បូរិតំ (ក.)
    52. pūritaṃ (ka.)



    Related texts:



    អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៥២០] ១០. គន្ធតិន្ទុកជាតកវណ្ណនា • [520] 10. Gandhatindukajātakavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact