| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
14. க³ந்த⁴த்தே²னஸுத்தவண்ணனா
14. Gandhatthenasuttavaṇṇanā
234. சுத்³த³ஸமே அஜ்ஜ²பா⁴ஸீதி தங் பி⁴க்கு²ங் நாளே க³ஹெத்வா பது³மங் ஸிங்க⁴மானங் தி³ஸ்வாவ – ‘‘அயங் பி⁴க்கு² ஸத்து² ஸந்திகே கம்மட்டா²னங் க³ஹெத்வா ஸமணத⁴ம்மங் காதுங் அரஞ்ஞங் பவிட்டோ² க³ந்தா⁴ரம்மணங் உபனிஜ்ஜா²யதி, ஸ்வாயங் அஜ்ஜ உபஸிங்க⁴ங் ஸ்வேபி புனதி³வஸேபி உபஸிங்கி⁴ஸ்ஸதி, ஏவமஸ்ஸ ஸா க³ந்த⁴தண்ஹா வட்³டி⁴த்வா தி³ட்ட²த⁴ம்மிகஸம்பராயிகங் அத்த²ங் நாஸெஸ்ஸதி, மா மயி பஸ்ஸந்தியா நஸ்ஸது, சோதெ³ஸ்ஸாமி ந’’ந்தி உபஸங்கமித்வா அபா⁴ஸி.
234. Cuddasame ajjhabhāsīti taṃ bhikkhuṃ nāḷe gahetvā padumaṃ siṅghamānaṃ disvāva – ‘‘ayaṃ bhikkhu satthu santike kammaṭṭhānaṃ gahetvā samaṇadhammaṃ kātuṃ araññaṃ paviṭṭho gandhārammaṇaṃ upanijjhāyati, svāyaṃ ajja upasiṅghaṃ svepi punadivasepi upasiṅghissati, evamassa sā gandhataṇhā vaḍḍhitvā diṭṭhadhammikasamparāyikaṃ atthaṃ nāsessati, mā mayi passantiyā nassatu, codessāmi na’’nti upasaṅkamitvā abhāsi.
ஏகங்க³மேதங் தெ²ய்யானந்தி தே²னிதப்³பா³னங் ரூபாரம்மணாதீ³னங் பஞ்சகொட்டா²ஸானங் இத³ங் ஏகங்க³ங், ஏககொட்டா²ஸோதி அத்தோ². ந ஹராமீதி ந க³ஹெத்வா க³ச்சா²மி. ஆராதி தூ³ரே நாளே க³ஹெத்வா நாமெத்வா தூ³ரே டி²தோ உபஸிங்கா⁴மீதி வத³தி. வண்ணேனாதி காரணேன.
Ekaṅgametaṃtheyyānanti thenitabbānaṃ rūpārammaṇādīnaṃ pañcakoṭṭhāsānaṃ idaṃ ekaṅgaṃ, ekakoṭṭhāsoti attho. Na harāmīti na gahetvā gacchāmi. Ārāti dūre nāḷe gahetvā nāmetvā dūre ṭhito upasiṅghāmīti vadati. Vaṇṇenāti kāraṇena.
ய்வாயந்தி யோ அயங். தஸ்மிங் கிர தே³வதாய ஸத்³தி⁴ங் கதெ²ந்தேயேவ ஏகோ தாபஸோ ஓதரித்வா பி⁴ஸக²னநாதீ³னி காதுங் ஆரத்³தோ⁴, தங் ஸந்தா⁴யேவமாஹ. ஆகிண்ணகம்மந்தோதி ஏவங் அபரிஸுத்³த⁴கம்மந்தோ. அகீ²ணகம்மந்தோதிபி பாடோ², கக்க²ளகம்மந்தோதி அத்தோ². ந வுச்சதீதி க³ந்த⁴சோரோதி வா புப்ப²சோரோதி வா கஸ்மா ந வுச்சதி.
Yvāyanti yo ayaṃ. Tasmiṃ kira devatāya saddhiṃ kathenteyeva eko tāpaso otaritvā bhisakhananādīni kātuṃ āraddho, taṃ sandhāyevamāha. Ākiṇṇakammantoti evaṃ aparisuddhakammanto. Akhīṇakammantotipi pāṭho, kakkhaḷakammantoti attho. Na vuccatīti gandhacoroti vā pupphacoroti vā kasmā na vuccati.
ஆகிண்ணலுத்³தோ³தி ப³ஹுபாபோ கா³ள்ஹபாபோ வா, தஸ்மா ந வுச்சதி. தா⁴திசேலங்வ மக்கி²தோதி யதா² தா⁴தியா நிவத்த²கிலிட்ட²வத்த²ங் உச்சாரபஸ்ஸாவபங்ஸுமஸிகத்³த³மாதீ³ஹி மக்கி²தங், ஏவமேவங் ராக³தோ³ஸாதீ³ஹி மக்கி²தோ. அரஹாமி வத்தவேதி அரஹாமி வத்துங். தே³வதாய சோத³னா கிர ஸுக³தானுஸிட்டி²ஸதி³ஸா, ந தங் லாமகா ஹீனாதி⁴முத்திகா மிச்சா²படிபன்னகபுக்³க³லா லப⁴ந்தி. தஸ்மிங் பன அத்தபா⁴வே மக்³க³ப²லானங் ப⁴ப்³ப³ரூபா புக்³க³லா தங் லப⁴ந்தி, தஸ்மா ஏவமாஹ.
Ākiṇṇaluddoti bahupāpo gāḷhapāpo vā, tasmā na vuccati. Dhāticelaṃva makkhitoti yathā dhātiyā nivatthakiliṭṭhavatthaṃ uccārapassāvapaṃsumasikaddamādīhi makkhitaṃ, evamevaṃ rāgadosādīhi makkhito. Arahāmi vattaveti arahāmi vattuṃ. Devatāya codanā kira sugatānusiṭṭhisadisā, na taṃ lāmakā hīnādhimuttikā micchāpaṭipannakapuggalā labhanti. Tasmiṃ pana attabhāve maggaphalānaṃ bhabbarūpā puggalā taṃ labhanti, tasmā evamāha.
ஸுசிக³வேஸினோதி ஸுசீனி ஸீலஸமாதி⁴ஞாணானி க³வேஸந்தஸ்ஸ. அப்³பா⁴மத்தங் வாதி வலாஹககூடமத்தங் விய. ஜானாஸீதி ஸுத்³தோ⁴ அயந்தி ஜானாஸி. வஜ்ஜாஸீதி வதெ³ய்யாஸி. நேவ தங் உபஜீவாமாதி தே³வதா கிர சிந்தேஸி – ‘‘அயங் பி⁴க்கு² அத்தி² மே ஹிதகாமா தே³வதா, ஸா மங் சோதெ³ஸ்ஸதி ஸாரெஸ்ஸதீதி பமாத³ம்பி அனுயுஞ்ஜெய்ய, நாஸ்ஸ வசனங் ஸம்படிச்சி²ஸ்ஸாமீ’’தி. தஸ்மா ஏவமாஹ. த்வமேவாதி த்வங்யேவ. ஜானெய்யாதி ஜானெய்யாஸி. யேனாதி யேன கம்மேன ஸுக³திங் க³ச்செ²ய்யாஸி, தங் கம்மங் த்வங்யேவ ஜானெய்யாஸீதி. சுத்³த³ஸமங்.
Sucigavesinoti sucīni sīlasamādhiñāṇāni gavesantassa. Abbhāmattaṃ vāti valāhakakūṭamattaṃ viya. Jānāsīti suddho ayanti jānāsi. Vajjāsīti vadeyyāsi. Neva taṃ upajīvāmāti devatā kira cintesi – ‘‘ayaṃ bhikkhu atthi me hitakāmā devatā, sā maṃ codessati sāressatīti pamādampi anuyuñjeyya, nāssa vacanaṃ sampaṭicchissāmī’’ti. Tasmā evamāha. Tvamevāti tvaṃyeva. Jāneyyāti jāneyyāsi. Yenāti yena kammena sugatiṃ gaccheyyāsi, taṃ kammaṃ tvaṃyeva jāneyyāsīti. Cuddasamaṃ.
இதி ஸாரத்த²ப்பகாஸினியா
Iti sāratthappakāsiniyā
ஸங்யுத்தனிகாய-அட்ட²கதா²ய
Saṃyuttanikāya-aṭṭhakathāya
வனஸங்யுத்தவண்ணனா நிட்டி²தா.
Vanasaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 14. க³ந்த⁴த்தே²னஸுத்தங் • 14. Gandhatthenasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 14. க³ந்த⁴த்தே²னஸுத்தவண்ணனா • 14. Gandhatthenasuttavaṇṇanā
